|
|
 Re: الىمهدىالامين..مصطفى سيد احمد التشكيلى..ثلاث لوحات رسمها بريشته وتاج محل علىجدارمدرسة ودسلف (Re: sheba)
|
استفاد مصطفى من كونه رساما ومصمما للاقمشة وتشكيلى فى اختيار نصوصه الغنائية بدقة كبيرة ونجد ان معظمها يحتوى على صور جمالية وتعابير استمدها مصطفى من خبرته بالرسم والتشكيل وانتقاها هو بعناية فائقة ونترككم مع هذه القصاصات من عدد من الاغانى تبرز عدد من الصور والتعابير الجمالية فى اغنيات الراحل مصطفى سيد احمد
نتلاقى نهرين من تسامى وإشتهاء
***
لاقينى فى كل المرافى زفاف ربيع .. وفرح قوافى
وإنشرى فى حزن السنابل غيمة يا كل المشاعر
وأمشى قبّال الصباح ..وزعى الطل للأزهار
***
والمطرة زى شفع العيد تدخل غرف كل البيوت
حكمة الجوع الشرح للأرضة كيف تقرأ المرق.. قبال يقع فوقـك سقف
***
أمرق على مهلك .. مروق الحنة من ضفر العروس
واصعد على مهلك ..صعود البذرة والروح والشموس
****
النخل إتلاقى .. غنى وردد النيل الأغانى
النجوم لامع بريقة الورود النايمة .. فاقت
عطرت كل الجزاير بى رحيقة
****
النخل زايد فى عرضو .. وفى علاهو..
البيوت غرقت وراهو وبرضو زايد فى علاهو
يحكى للدنيا الجميلة سر ثباتو .. وسر بهاهو
***
والحزن من نور عيونك يلبس الفرحة الجديدة
***
ما الدنيا كلها إنتظار ..والإرتحال قدر الفصول
الموجة تحلم بالضفاف.. والغيمة تحلم بالهطول
***
شفتى كيف لما الشمس..مدت نوافير الشعاع
والضفاف بعدت كتير..والريح ملت جوف الشراع
كيف هناك بدت الضفاف..تتلاشى فى زمن الضياع
***
طفلة حلوة وشايلة لونة ....ترسم الوطن الشباب
كل خط فى اللوحة باين ...من دموع الطفلة يحكى
النفوس تبقى السحاب..القلوب تبقى الأراضى ..
نزرع الوطن اليباب…راسمة فى اللوحة القمارى ..
فيها وش النيل حزين..الضفاف كان لونا أحمر .
الشجر كان لونو أخضر..الجباه عرقة بيضارى ..حمرة النيل واصفرارو
**********
راسمة جوه اللوحة طفلة ..الفرح فى رموشة صفق
ادت الامواج بسيمة ..غير النيل إنحدارو
لابسة من السعدة قرقاب ...شايلة فى الأيد الطوارى..مارقة قمحة من اليباب
****
ما بان عليك سفر العمر..لسة الربيع يا دابو زار
لسة الضفاف المترعة...بتفيض ندى وتطرح ثمار
***
يازهرة طالت بالفرح..بتراقص أنوار المساء
ما بان عليك أثر القطاف..ولا جاتك أيام القسا
**
الحزن لا يتخير الدمع ثيابا..كى يسمى بالقواميس بكاء
هو شىء يتعرى من فتات الروح..يعبر من نوافير الدم الكبرى
ويخرج من حدود المادة السوداء...شىء’’ ليس يفنى فى محيط اللون
أو يبدو هلاماً فى مساحات العدم
الحُزن فينا كائن..يمشى على ساقين
دائرة’’ تطّوف فى فراغ الكون..تمحو من شعاع الصمت
ذاكرة السكون المطمئنه
كيف ترفضُّ الجدائل..فضة فى الضوء
ترفضُّ الفقاقيع..ما بين إمرأة الرزاز
إشارة للريح فى المطرالصبى
إضاءة فى الماء..خيطاً من حبيبات الندى
سحراً..صلاةً..هيكلاً..قوسَ قزح
***
وأشد ساعد على المجداف..تلوّح لى .. مدن عينيك
وترفع لى منارة بسمتك .. سارية
****
كل ما الريح .. تطارد الموج..أزيد إصرار وأحلف بيك
أغير سكة التيار..وأقول يا إنتى .. يا أغرق
الوح لى مدن عينيك تلوح لى..أخاف الضفة ترجع
بيك قبل اتلحق
أخاف غيم المنىالشايل..تسوقو الريح .. ويتفرق
****
مطر الحزن عاود هطل..جدد عذاب الأرصفـة
ضى المصابيح البعيد..أتعب عيونك .. وإنطفا
****
زى ما بموت وهج الشعاع..تمتد سحابات الغروب
**
ولا النيل القديم ياهو ... ولا يانا.. نعاين فى الجروف تِنهد .. ولا يانا
رُقاب تمر الجدود تِنقَص .. ولا يانا
**
تتِشْ عين الضلام بى الضو..تفرهِد شتلة لا هدّام
ولا فيضاً يفوت الحَد..عُقُب يا نيل تكون ياكا
***
يا المراكبيى البتجبِد ....من فك الموج الغريق
**
لمن يجى الزمن الفلانى..سمانا بتقطر مطر درى..وتمازج برتقانى
***
شهرت على الجفاف وعدك..بطاقاتنا الخريفية
رجع فاضي الكلام مليان..معاك أتبرجت غيمة
وشهق جوايـا..صوت جدول
مرقت على المطر حفيان..لقيتك والرزاز مدخل
**
إفترضتك لون أساسى..يمنح اللوحة إزدواجية القراية
ويفتح الضو..بين خطوط الريشة ..
والخط الإضافى .. الجايى..من شبكية الزول البشاهد
وإكتشفنا الرسمك وأنا
**
قال الجدول :..طلوع النخلة .. مرور
الريح .. واحد..لكن الريح بعانق حقل
ونحن بنطلع نخلة .. وننزل..ونكتب فى ذاكرة الصفق الأخضر
سجنا الريح فى الورق الأبيض
****
يا بت يا نيل..لو نامت قمحة على
الأبيض وإتشرت زيو..وزاد الأبيض فى غيو..ومدد رجلو اليسرى
***
قال الأبيض لى الأزرق:..يبقى ضد الإنتباه
وضد تواريخ التمازج بينى بينك..ما البشوفك فى مراهقة الخرائط
وفينا من وجع المسافرين واطه .. ما لاقت هوية
رد الأزرق:..مطر الحبش لو كان نبش
جواك سقف..و هد حيلك فى الدواخل
وشدّ عصبك فى المداخل..صوت مراكبى..
**
يا أعشاب النيل الأبيض..ما تتضارى ورا الدعوات
ما تتلبسى فرح الفات..أقرا تاريخك .. وأخاف
أسأل جبين الفجر .. ألقى..الفجر مطعون فى القفا
هل سافرت فى دمك المحقون..رجا حبة غضب
ما شلنا جمرك .. وإنطفا..جوانا نارك .. والمطر
***
مين اللى قال..إنو المسافة البينا بين الشمس طاقة
أو مياه النيل..بتدخل فى عروق السنبلة..المسقية بى عرق الجعانين ..
***
كانوا بتمنوكى لو ....ترتاحى لحظة على الدرب
حبوكى حب..قدر الحروف ....الحايمة فى بطن الكتب
قدر الخيال ....ما مدّ إيدو على السحب
**
والنيل فاض وإنحنى...نيلين وحلمك أنا..فرعين شايلين جنا
**
سمحة وسمرية ..محبوبتى ولفتاتة غزالة..
خضرة ومسقية..وجنب النيل مشتولة النالة
**
يا مشرع الحلم الفسيح..أنا بينى مابينك جزر تترامى .. والموج اللّديح
**
يا رغبة الرعد البيسكن ..بين غناوينا وحروفنا
ضوِّى الدساكر والضفاف..عبِّى الحناجر بالهتاف
سدِّد مسامات الرِّعاف..نوِّر مغاراتنا وكهوفنا
****
يا مشرع الحلم الفسيح..أنا وإنت .. والمطر الفصيح
حنطوِّع الزمن القبيح..ناخد بعض .. شكل السما
حدِّثنى دايماً .. كلما..تنشف على البر الضفادع
يهجر الضو المواضع..وتسقط من الكف .. الأصابع
حدثنى دايماً كلما...تحرد مراسيك السفن
تسكن مرافيك الزعامات .. الدُمى
****
عباد الشمس شافك ..مشاك ساقِك جبيرة وجد...تيار الظلام غطاك
***
تذوب يوم الشموس ضوّت..عباد الشمس يوم جاك ..سألنا الغيم عِنادِك ردْ ....
أسف بُعدِك حروف جفّت.. جِدار الماضى .. دمعة خد
***
الصباح الـباهـى لونـك..وضاحة يـا فجر المشارق ....غـابـة الأبنوس عـيونك
**
جلـبت ليك الغـيم رحـط..طرّزت لـيك النيل زفـاف
***
وفى بيوضة مافى سراب..جبال كجبى وفيافى الكاب
تميد بى الخضرة ...منقسمى..
فيافى الصّى وبيوضة ....البراسيم فيها مفروضة...خدارا يرارى شوف عينى..
على الأبواب طواريها وحواريها ,وقماريها بقت روضة..
.بقت تشرب من الحامداب ...
.تشوفى رهاب ... بُعُد نجمى..بشوفو قريب قُرُب نضمى
***
حاتجى البت .. الحديقة..فاردة أنسام فى طريقة..وشايلا ألوان ..
***
حاتجى البحدث بريقة..ضجـّة الضو فى المكان ..حاتجى المن بدرى جات..من ظلامات السكات ..
شايلة قمرين فى عيونة..وفاتحة ليلين بى جنونة....وضاوية ساحات إنتمت..لى فجر .. فات
**
سحابات الهموم .. ياليل..بكن بين السكات والقول
وباقات النجوم الجن..يعزن فى المطر..فاتن عزاك .. رجعن
وشوق رؤياك زمان مشدود..على أكتاف خيول... هجعن
وصوت ذكراك .. مكان يجرى يلاقى السيل ...وسر مدفون بصدر النيل
***
والله نحنّ مع الطيور....الما بتعرف ليها خرطة ..ولا فى إيدة جواز سفر..
نمشى فى كل المدائن.. نبنى عشنا بالغناوى..وننثر الأفراح .. درر
والربيع يسكن جوارنا..والسنابل تملا دارنا..والرياحين .. والمطر
****
نمشى فى كل الدروب..الواسعة .. ديك..والرواكيب الصغيرة ....تبقى أكبر من مدن
***
بتطلعى من نفس طورية..ضامـّة الطين
***
فى عيونك ....ضجة الشوق والهواجس..ريحة الموج البنحلم ....فوقو بى جية النوارس
***
يا ما شان زفة خريفك..كل عاشق أدّى .. فرضو
ومافى شمساً طاعمة طلـّت..إلاّ تضحكى ليها برضو
والغمام الفيكى .. راحل..فى الصنوبر بلقى أرضو
والصباح امتد .. ياما..كل ما جاوبتى نبضو
***
طوبى للرجال العصافير..كلما حطّ طائرهم فوق غصن
غنوا بشجيى الكلام .. بديع الصور..وبؤساً لنا نحن الرجال .. الشجر
***
أظنك عرفتى. . .عواصفك مهبـّى..أبارى فى خيالك..يسوقنى ويودّى
ونهرك يعدى ويجهل مصبّى..هواجسى البتزرع وظنـّى البربى
**
ايد مبسوطة تقابل الحنة..نغم الليل السال شبال
نخلة تغازل فى عيون طفلة ..طفلة وحفلة ورقصة فال
**
حاجة زى ماتكون ..محلـّق فى العواصف.. فجأة .. تهبط فى السكون
حاجة زى نقر الأصابع..لمـّا ترتاح .. لى الموسيقى
***
كل المجرات .. النيازك والشُهُب..ودع راميهو الله على السما
****
أنا ليه تجينى الموية حفيانة ....وأدنقر ألبِّسا فى شبط أخضر
وأبيت مبلول .. وأصلِّح فى الرباط
***
ومرت مراكب نوح محملة بالطيور..واقف مع نوح الغراب
ينضم ويأشر فى إتجاه..باقى الطيور يتوسوسوا
إلاّ الحمام .. إتوضا مارق للصلاة
القانقرد فى حزنو يغزل ..شالة من صوف
الطواويس شارّة قمصانا ..المزركشة فى الضحى
الزرازير بى عراريقا.. المغبشة ..جات على
**
إدفقى ما تبقى رقراق..أبقى يا ضُل .. يا شموس...غطى المساحات بالوضوح
***
إتوهجى وإنتى الشمس..إتلهجى نورك سطع
نوّر بوادينا الكساح..رقصت مزامير الصباح
مبكية قرية وقنبلة..متكية دمعة .. وسنبلة
***
ولا برقت شموس منّك..ولا دخلت شموس فينى
ولا أظنّك بتدّى شموس..ويطلع من عيونك ضى
ولا لِمِس الجفاف خدّك..ولا ركّ الندى المحروق
فراشات فى شذاك .. دخان..شعاعات من بريق لحظك
***
هاهى الأرض تغطت بالتعب..البحار إتخذت شكل الفراغ
وأنا مقياس رسم..للتواصل والرحيل
***
ارتدى اللون البنفسج..اعتلى شكل الهوية
آه لو تأتين اه وأتجاه..من عميق الموج ..من صلب المياه...
****
الصحرا فى عينيا تتواثب جناين..ماخدة صوتك من جداول
وما خدة صورتك من كهارب..مولداً ميدانو حافل
***
على قمراً مات فى مطر الليل..يتّم نجمات بكاها السيل
**
يا سر مكتوم فى جوف أصداف.. الريح القاسية عنيدة .. تمام
طـفــت الـقـنديل .. الكان مـقـدوح من دمع الليل
رمت القُـنديل الكان نديان..فى جــرف النيل
رسمت أحزان .. وسؤال حيران .. فى عيون أيتام
**
شايلاهو وين النيل معاك..عصفورة جنحاتا النجوم ..
وأنا بى وراك..بسأل عليكى مدن .. مدن..وأعصر سلافة الليل .. حزن
بسأل عليك فى المنفى ....فى مرفا السفن.... يمكن طيوفك أُخريات الليل تمر
***
للسحابات التلوِّح قوس قزح..بُشـْرَة هطول
ولى ضِيا القمر المقرّح..ضد قوانين الأفول
***
غيرت فى الزمن الملامح..طعم الكلام .. لون الغُنا
وطبع البذور .. كيمياء التراب..طقس المطر
**
يراقصنى عجاج البحر....ترعد داخلى الامطار
يكلمنى تراب الارض..يضفى قلبى الاوتار
***
كانك من وراء صفحة...زجاج مبلول...
***
طوريك فى الطين مرمية..وكوريك يابسة ومجدوعة
**
حتى الفصول صابة الجفاف..لا غيمة لا زفة هرع
والسمبر البفرح صفيرو...غشانا واتقاطر رجع
وشجرنا من لفح السموم..غصنو الرقص رويان وقع
لا شابا لى ريح الدعاش..لا هش لى برقا لمع
****
أمشى فى درب السحابة...وجيبة لى أماتنا
زى حطب الفزع..وأرفع الفاس كسرة...ينزل مطر ...
*****
الليلة بقيت فى ايد غيرك..جنياتك تحلم بالقمحة
يطل بالموية بشار خيرك...ماتتاتى واطاتك تمحى
اخواتك اماتك فاتن...والدنيا تباريح منطرحة
غابات وشجيرت أماتك..لا مقنع فوقن لا طرحة
***
(عدل بواسطة sheba on 12-22-2004, 07:58 AM)
|
|
 
|
|
|
|
|
| العنوان |
الكاتب |
Date |
| الىمهدىالامين..مصطفى سيد احمد التشكيلى..ثلاث لوحات رسمها بريشته وتاج محل علىجدارمدرسة ودسلفاب | sheba | 12-22-04, 07:06 AM |
| Re: الىمهدىالامين..مصطفى سيد احمد التشكيلى..ثلاث لوحات رسمها بريشته وتاج محل علىجدارمدرسة ودسلف | sheba | 12-22-04, 07:07 AM |
| Re: الىمهدىالامين..مصطفى سيد احمد التشكيلى..ثلاث لوحات رسمها بريشته وتاج محل علىجدارمدرسة ودسلف | sheba | 12-22-04, 07:08 AM |
| Re: الىمهدىالامين..مصطفى سيد احمد التشكيلى..ثلاث لوحات رسمها بريشته وتاج محل علىجدارمدرسة ودسلف | sheba | 12-22-04, 07:09 AM |
 Re: الىمهدىالامين..مصطفى سيد احمد التشكيلى..ثلاث لوحات رسمها بريشته وتاج محل علىجدارمدرسة ودسلف | معتز تروتسكى | 12-22-04, 07:16 AM |
| Re: الىمهدىالامين..مصطفى سيد احمد التشكيلى..ثلاث لوحات رسمها بريشته وتاج محل علىجدارمدرسة ودسلف | sheba | 12-22-04, 09:17 AM |
| Re: الىمهدىالامين..مصطفى سيد احمد التشكيلى..ثلاث لوحات رسمها بريشته وتاج محل علىجدارمدرسة ودسلف | sheba | 12-22-04, 11:09 PM |
| Re: الىمهدىالامين..مصطفى سيد احمد التشكيلى..ثلاث لوحات رسمها بريشته وتاج محل علىجدارمدرسة ودسلف | malamih | 12-23-04, 00:59 AM |
| Re: الىمهدىالامين..مصطفى سيد احمد التشكيلى..ثلاث لوحات رسمها بريشته وتاج محل علىجدارمدرسة ودسلف | mahdy alamin | 12-24-04, 03:57 PM |
| Re: الىمهدىالامين..مصطفى سيد احمد التشكيلى..ثلاث لوحات رسمها بريشته وتاج محل علىجدارمدرسة ودسلف | Kostawi | 12-24-04, 04:15 PM |
| Re: الىمهدىالامين..مصطفى سيد احمد التشكيلى..ثلاث لوحات رسمها بريشته وتاج محل علىجدارمدرسة ودسلف | nadus2000 | 12-25-04, 04:58 AM |
|
| |
sheba
فيس بوك
تويتر
انستقرام
يوتيوب
بنتيريست