كتب الكاتب الفاتح جبرا المتوفرة بمعرض الدوحة
|
Re: أوتار وأشعار "9" - ياناس انتو وين انتو ما بنتو--- الفنان مح (Re: sympatico)
|
sympatico العزيز
تسلم كتير علي الروائع التي تتحفنا بها
الفنان محمد حسنين .. من الفنانين الذين لا يعرفهم الكثيرين وانا واحد منهم فقد عرفته من خلال حلقات من الامس .. وكم ادهشتني ابتسامته الطيبة .. وهندامه الجميل والراقي .. فعلا تحس انو فنان فعلا .. وين من فنانين زمنا الحلو دا .. تلقي الواحد لابس كل فردة من بلد
تحياتي
تنقو
| |
|
|
|
|
|
|
Re: أوتار وأشعار "9" - ياناس انتو وين انتو ما بنتو--- الفنان مح (Re: sympatico)
|
رحم الله محمد حسنين ذلك الفنان الانيق ...جاء الى الخرطوم من عطبره
وكان والده يعمل فى السكه حديد..قال لى ان له جزوره مصريه فجده
السيد مصرى قدم للسودان وتزوج من الدامر.على فكره محمد حسنين
شقيق المرحوم ربيع حسنين الاتحادى والمناضل الساير.كان محمد
ابل الله تربته انسان مرهف،حتى عندما كنت ازوره فى محله فى الرياض
وهو يعمل يحدثك عن الغناء وعن الخرطوم زمان،وقال انه تعلم الصنعه
الخياطه الافرنجيه من احد اليونان وهو وله بحرفته،لذا كان
يزور الدول الاوربيه ليقف على اخر واحدث الموضات،وكان فى
الستينات يمتلك سياره نوع (بليموث)وعندما كنت امازحه،واقول له
فى زول فى الستينات يركب سياره سته امتار يغترب اخر عمرو
كان يقول ،نعمل شنو لكن مع الحكومات التافه دى،وكان كلفا
بالحياة شغوف بالجميل فيها.جلس بالسعوديه مغتربازمنا طويلا
ولم يرجع السودان مع انه يكن للبلد موده جمه،ولكن فى اخر
ايامه رجع ولم يمكث بالسودان اكثر من عشرون يوما
وهو الذى قضى اكثر من عشرون عاما خارجه فاذا بارادة الله
ان تنفذ ،توفى محمد حسنين وترك بيننا اكثر من ثلاثون لحنا
وكلاما عذبا لاينقطع وقد اقام الاخوه بالمنتدى السودانى الثقافى
عزاء له عرفانا لما قدم للسودان،وكان عضوا نشطا بالجاليه
حينما كانت هنالك جاليه سودانيه،والشكر هنا لاهل الرياض
وفى مقدمتهم بروفيسر عثمان الخليفه الحسن والشاعر(الحبيب العائد)
صديق مدثر.رحم الله محمد حسنين ابوسريع بقدر ما اثرى وجداننا
وبقدر ما قدم للسودان وللفن.
| |
|
|
|
|
|
|
Re: رحم الله ايام زمان واذاعة ام درمان (Re: sympatico)
|
الوالدة الله يمد في ايامها، يا سمبتيكو لها غرام خاص مع صوت محمد حسنين ، رغم انها انسانة بسيطة لا تعرف تفك الحرف ، ولعلها هي التي لفتت نظري الي هذا الصوت الملي بالشجن
حديث محمد سبيل عن ذكريات الطفولة وعلاقتها برادي ام درمان اثار داخلي كوامن من الاشجان المكبوتة، فعلاقتي بالرادي علاقة فريدة من نوعها، فانا مدين للرادي بكل خلفيتي المعرفية والثقافية، فمنذ تفتحت عيوني وجدت الرادي امامي في بيئة قروية لا تعرف من المؤثرات الثقافية سوي الرادي، اتذكر ايام الرادي ابو بطارية ،غير حجارة البطارية المعروفة، كم كانت فرحتي عندما تنتهي البطارية واشيلها العب بيها، لا زلت اتذكر عشية هزيمة جمال عبد الناصر1967 وانا عمري خمس سنوات كان اهل الحلة يتحلقون حول ابي وهو ممسكا بالرادي ، يتصيدون ببساطتهم اخبار الهزيمة،وانا لم يقرع سمعي سوي اسم جمال، ومن يومها لم تضعف علاقتي بالرادي الا ايام الجامعة،
كتير جدا من الاغاني التي تذكرني بمرحلة الطفولة يا سبيل، فترة الفطور والعصرية كانت تبث فيها عادة مجموعة من الاغنيات المتنوعة، فطور المدرسة مرتبط في ذهني باغنية: ليلة السبت لابن البادية، لا ادري لماذا؟
تصور يا سمبتيكو من البارح ما قادر اكف عن سماع هذه الاغنية ، الله يديك الفي مرادك
| |
|
|
|
|
|
|
Re: أوتار وأشعار "9" - ياناس انتو وين انتو ما بنتو--- الفنان مح (Re: انا بنت النيل)
|
اخي عجب الفيا هنالك اشياء متعبة ايضا ورطتني فيها والدتي من ذلك سكة السفر الطويل من الربيع الى الشعر اذكر انها لقنتني ابياتا شعرية وطلبت مني ان اشارك بها في عيد الاستغلال ، وقد اعجبت الناظر ايما اعجاب حتى كاد يعشقها ( أقصد الابيات وليست امي اعمل حسابك !) نحن ما بنعرف الريا ولا بنخاف القنابل الذرية سود لكين اسود الواحد يقابل المية بالدين الحنيف تكون وقفتنا قوية ومن اصل الجدود معروفة الشجاعة للسودانية
كنت يومها في تانية تاكل بامية أو تانية بيووووت ، تانية تلك المجاورة للمزيرة حيث حلوووقك ابو الدنان يقطع رقووبك وكرطع كرطع كرطع وانا قبالك وانت بعدي ، والفتوات لا يلقون بالا بمعاهداتنا وتوجهاتنا المؤسسية الباكرة الفتوات المفتحين زراير قمصانهم كلما صعدوا الى المزيرة باستكبار .. يأخذون نصيبا كنصيب الألفا الذي كنا نمنحه الأولوية اتقاء لشره لأنه لا يفرق بين العام والخاص ، بين وضعه في الفصل وخارجه تماما كشيح الحلة والعمدة نفس الرهبوت والجبروت لقد تذكرت الآن أن ابتسامة الألفا كانت تعني ألف رحمة ومغفرة ونجاة من العذاب ولكن ما يحيرني الآن أن أفاواتنا لم يكونوا أكثرنا سعة في الجسم وانما يجيئون بمعايير غير واضحة ولا معلن عنها يتألفون فحسب فينالون تلك الامتيازات المحسود عليها كالأفضلية في المزيرة وعدم التعرض لعقاب ناجم عن هرجلة وعدم الضحك عليه حتى حينما كان يقول لأحدنا أتكلم في سرّك ! مع جارك فنتحول فورا الى معاقين سكم بكم تعرف يا عجب ماذا حدث لألفانا الآن ؟ اشتغل ممرض غير انه يقوم بمهام اخرى موسمية مثل مناصرة احدهم في الانتخابات نظير شئ بسيط لكنه - والحق يقال عثمان زول كويس وما حصل كتبني مع المهرجلين واذكر انني دعوته لعزومتنا الخاصة بطهور اخواني السُغار جزاءا لبلائه الحسن في موضوع تغييبي من غايمة المهرجلين رغم انني لم اكن ثرثارا المهم اعود الى حكاية سكة الشعر وكيف كنت اطرب وانا اردد مع بقية الفصل نحن اذا جاء المطر
| |
|
|
|
|
|
|
Re: أوتار وأشعار "9" - ياناس انتو وين انتو ما بنتو--- الفنان مح (Re: sympatico)
|
العزيز Sympatico
غير إفتتانى بأغنيات محمد حسنين على قلتها، زيه زى حسن سليمان الهاوى ومحمد الحويج، والناس العجيبين ديل، إلا انه عندى معاه ذكريات حميمة جدا
الوالد كان برضه من عتاق الترزية و"الخياتين" ونحن لسه فى الإبتدائى، بتذكر بكتير من السعادة والله، لمة مجموعة عجيبة من الناس المتميزين الفنانين فى محل الوالد، وعلى راسهم كان محمد حسنين، وعلى ما اذكر محله كان فى السجانة او نمرة تلاتةن ما متذكر
كان بتلم معاهم حسن عطية، وهو زميل الوالد فى الدراسة وجارهم فى السكن والبيوت كانت فى المنطقة بين الميريديان وكلية الصيدلة، ومعاهم بابكر على التوم بس ما عارف ايه صلته معاهم، وتانى كان فى واحد اسمه عباس، صاحب ورشة فى المنطقة الصناعية، وسيد عبد المحسن زعيم الترزيه الأفرنجيين، ويوسف موسولينى صاحب سفريات الركبى (الخرطوم مدنى)
مجموعة غريبة جدا جدا، وما تسمع الضحكات تعلو وتزيد الا لمن يجيهم محمد حسنين، كان زول بشوش ولطيف، لكن اكتر شى ملفت فيهو، كانت الاناقة، واذكر انى اول مرة اشوف الفنايل "نص الكم" المصرية، شفتها عند محمد حسنين
وكنت معجب بطريقة تسريحة شعره، وشكله المميز مع إضنينو ذات الشكل المتوثب
وقليبى عليك وديمه مساهر ليك يا الرساى
وكتير من الشدو الجميل عند محمد حسنين
عطر الله ذكراهم بمثل ما عطرو حياتنا
وتانى شكرا ليك يا سيمباتيكو
أبوذر
| |
|
|
|
|
|
|
Re: أوتار وأشعار "9" - ياناس انتو وين انتو ما بنتو--- الفنان مح (Re: sympatico)
|
عن إذنك يا أختي بنت النيل .. وبت أصحاب أمات صهيل .. أهل أمي الكرام الجعليين .. استعير كلماتك السمحات ديل.
عزيزي سمبتيكو:::
لك زهرة الياسمين اخ سمبتيكو ..وانت تذكرنا بالجميل ..المعتق
محمد حسنين يتدفق صوته حنيناً ..وطربا ..يذكرني بالشرفة الحبيبة ..مسقط رأسي ومرتع الصبا والأيام الجميلات ..
والإشارة جاي ولا جاي ..رحمك الله محمد حسنين وجعل مثواك الجنة.
العم تنقو وين خميسياتك الظريفة ديك؟
التحية لكم ولمن خلوا النار في الضلوع وخلوا الروح في الدموع.
أخوكم ..
جاد
| |
|
|
|
|
|
|
|