محمد حيدر المشرف

Quote: لكن أهو نتوكل علي الله ونقولها والعشم أكيد أنة تقبلوها كلماتي دي زي ما عهدناكم بدون مفاحض

الاستشاري ود الصائم عليك الله فط المداخلة دي و ما تبلني !! دي مكتوبة لهيثم بس !! وانا عارف هو ح يقراها كلها !!!
تعرف يا هيثم يخيّل ليْ واحدة من مشاكل الحوار في البلد دي انو دائما نحن بنركز في النقطة الضعيفة عند الاخر و نخلي الكور او النقاط القوية -او نقول كلامنا اللاحق في الـ(قاب) او الثغرات المتروكة - مثلا حسع الرد الاخير للبروف ما اقنعني لكن ما بحاول ارد عليهو لانو بفتكر جزء كبير من كلامو مبني علي (القاب) ! وهل تتخيل انا كنت مضمن جزء من كلامو في مشاركتي عشان ما يجيني من الحتة دي لكن شلتها عشان المداخلة ما تكون اطول من كدة !
الكلام دا بقولوا عشان اشرح ليك انو انا في ردي علي المشرف مسحت اكتر من نص المداخلة !! تخيل !! و ابوحمودي لسع بطالب بالاختصار ! و بالجد زمن الاسفير ممحوق و الناس ما فاضية - لكن المشكلة بدل التاني يكمل الناقص في كلام الاول - بيجي
بقصد او دون قصد يعتبرو نقطة ضعف ! وببني كلامو عليها !وعشان كدة حواراتنا ما بتنهي الا بالتعب الـ بلا صالح !
طيب- اجيك لكلامك الـ هو رد (للقاب) و الممسوح من كلامي و الخليتو عشان يكملو المشرف !
يا هيثم انا لامن قلت كلامي للمشرف اصلا ما قصدي انو منو فيهم الغلطان او اشتغل قاضي حيثيات ! و ممكن نجاة تكون نبذت المشرف قبل ما يقول ليها
زاتو كلام الانقاذ -اضافة كلامي ما موجه اصلا لنجاة و لا عندي "حق" اوجه ليها اصلا - لكن بحكم المعرفة بحس اني عندي حق في المشرف ! و لو هو ما اقتنع بي كلامي او حس اني ظلمتو -ما حيجي يبلني ! في اسوأ الحالات ح يشيل في خاطرو بس ! و لقدام نتصالح !
و حتي في كلامي للمشرف اصلا ما حاكمتو في "الاتهام " كسلوك شخصي - لانو حسب معرفتي هو ما الزول بتهم الناس جزافا و عشان كدة اعتبرت كلامو ازمة خطاب سياسي و ليست ازمة اخلاق شخصية ! و بعتبرو وقع في فخ الخطاب المعارض و الناس ممكن تمسكها ليه سقطة او مذلة اخلاقية شخصية و انا ما ماخد الحكاية كدة و من ناحية تانية قاعد اعتبر شتائم نجاة(بغض النظر عندها حق ولة ما عندها ) اقرب للسلوك الشخصي لانتزاع الحق الشخصي و ليس ازمة خطاب !!
و لو المشرف ما اقتنع بكلامي بيبقي تحليلي لازمة الخطاب المعارض يبقي خطأ - بس !
(اتخيل كلامي دا فحوي الجزء الممسوح - لكن افتكرت انك او المشرف ممكن تكملوا لي
--
اساسي تشكر علي الرد وعدم البل
-

تحياتي للجميع
----
ود البشري :عجبتني فكرة الحياد الايجابي -هههههههههههه


التعديل لاضافة تعليق البشري! يا داب لاحظت مشاركتو التحفة !!

(عدل بواسطة هيثم طه on 05-30-2012, 10:45 PM)