*عمركم سمعتم بحكومة تمتن على شعبها؟!.. *بالله عليكم من سمع فليخبرنا عشان ما نتحامل على الإنقاذ.. *ولكن أنا شخصياً ما حصل سمعت بشيء كهذا.. *لا في السودان، لا إفريقيا، لا العالم العربي، ولا أمريكا اللاتينية.. *ولا حتى القذافي المجنون ما امتن على مواطنيه.. *ما قال ليهم عملت ليكم وسويت ليكم وفعلت ليكم رغم إنه فعل.. *طيب يا جماعة: (من أين أتى هؤلاء؟!).. *وأعني الذين يمتنون علينا ليل نهار من قادة الإنقاذ.. *يوم علي محمود ويوم مصطفى إسماعيل ويوم الحاج آدم ويوم ما عارف مين.. *مرة لبسونا، ومرة أكلونا البيتزا، ومرة انتشلونا من الشحدة.. *وأنا ما عارف لو كانوا سووا اللي سواه مهاتير كانوا عملوا فينا شنو؟.. *لأن الحاصل هو العكس تماماً ورغم ذلك يمتنون.. *فاقتصادنا الآن هو الأسوأ الذي تشهده بلادنا طوال عهودها السياسية.. *وكذلك معيشتنا وتعليمنا وصحتنا وعملتنا و(نفسياتنا).. *والأهم من ذلك سمعتنا الخارجية بين الدول بعد أن كنا مثل الجنيه الإسترليني.. *فليه كل هذا المن- والأذى- الغريب على أخلاقنا؟.. *وهل كنا فعلاً مقطعين وجعانين وشحاتين وسجمانين قبل ما (تنقذونا)؟.. *وعلى من ينطبق هذا الكلام بالضبط يا ترى؟!.. *أو على قول عادل إمام: والله كل واحد يشوف نفسه بأى.. *يا جماعة الإنقاذ نميري رغم تهذيبه صدرت منه حاجة بسيطة هيجت الناس.. *قال ليهم: ضروري يعني تاكلوا كل الوجبات؟.. *وقال ليهم: بثينة دي زوجة رئيس جمهورية، مش زوجة نجار.. *وقال ليهم: ما في قوة بتقدر تشيلني من السلطة.. *وأنتم تتفاخرون الآن بصبر الشعب السوداني عليكم كل هذه السنوات.. *والحقيقة هو صبر على ما هو أقسى من قسوة سياساتكم.. *صبر على قسوة المعايرة والإهانة والاستخفاف والاستهزاء و(الامتنان).. *شنو يعني البيتزا وهو لما أكل السجق العرب ما بعرفوه؟.. *ومتين ما كان عنده كبريت ولا صابون ولا قمصان؟.. *ومنذ متى كان حاله يشبه الشحاتين- من شدة الفقر- إلا في زمنا ده؟.. *ولأي سبب كانت صفوف الرغيف والبنزين أحياناً؟.. *ببساطة لأن الأنظمة السابقة ما كانت بتتخلى عن مسؤولياتها تجاه الشعب.. *كانت تتحمل هي وطأة الأوضاع الاقتصادية عوضاً عنه.. *كانت بتواصل دعمها للسلع الأساسية على حساب تقشفها هي.. *لا فارهات لا عمارات لا امتيازات لا (كثرة) وزراء.. *فعلى الأقل أرحمونا من سياط ألسنتكم ما دمتم لا ترحمونا من (سياط سياساتكم).. *حتى (صبر) أيوب عليه السلام (كان له حد!!!).
assayha أبرز عناوين سودانيز اون لاين صباح اليوم الموافق 14 ديسمبر 2016
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة