أمهات..غربه وصمود..

Quote: Re: الثنائي/ د.( محمد جعفر +الصادق حسن).. بجمهورية مصر في الثمانينيات...تجربة ثرة يجب أن لا ننس (Re: Atif Makkawi) .. .. وفي قصيدة محجوب شريف المكتوبة بلسان حال واقع اليوم ، بنرجع نعيد قراءة موقفنا و فهمنا الجديد لقضية المرأة في بلاد السودان .. قصة العمل المنزلي غير مدفوع الاجر .. كدح النساء اليومي و أفاق الحركة النسائية الديمقراطية الجديدة في المسار الكلي لحركة الثورة السودانية .. موضوع احست بيهو الاصيلة رباب لمن كنا تحت صدي 8 مارس الفات .. و عثمان محمد سعيد .. لانو من زمن وقعة عمارة غمرة عايش علي قانون الدهشة البحرك الحياة اليومية و بخليها اجمل ، و شغال حاليا طبيب في عنابر المجانين الامريكان ( و يا بختك يا عثمان) قال لي في ونسة هوائية من نوع الكلام جاب الكلام : ياخي حاجة غريبة .. تتصور في أمهات و حبوبات في السودان ليهم حوالي 50 سنة بعملوا يوميا فطور و غدا و عشا و بأكلوا الابو و اولادو و ضيوفم .. فعلا كدح سرمدي عجيب .. بستحق عبارة العمدة إحيمر بتاعت الاستغراب و الاستعجاب ( دأ شنو ! ) دا شنو بتقابلا عبارة دهشة و تظلُم ناس مجوك و دينق علي لونيةعربي جوبا : ( وآآآآآآآه ) .. تابعوا الهادي هباني و محمد جعفر محمد الفاضل حصريا علي بوست رفاق مصر أم اليتامى. ---------------- شعر: محجوب شريف. ................ بين العمل والبيت فصّد جبينها عرق.. أم اليتامى بكت لمن حسابها فرق ماهية تمشي السوق مركب مصيرها غرق حق اللبن والزيت الكسرة والكراس هم في عيونها برق الما بحس ما بهم والخان همومو سرق هذا المرتب تب ما بسدها الفرقة.. القعدة في المكتب والإمضا في الورقة العبرة في الخبرة الأيدي لو تعمل جرح الزمن ببرا اتباصرت مكنة ماكوكها يتقدّل بين خيطها والإبرة زي ما القلب ساساق الخطوة ساساقة وعيونها منتبهة تباري زقزاقها لا شك ولا شبهة والسترة أشواقها والشفع القصر والدمعة رقراقة يا حليل شريك العمر الدنيا فراقة اتيقنت أحسن من تبقى نقناقة شقشق مقص في ليل نامت خلايق الله طاير سُقد حلّق في بيتها واتدلّى تدّي الولاد بصة وتجرب القصة وتقلّب الحلة جاهز عمل بكرة أسأل تقاريرها السرية والسمعة هل ركلست يوماً حتى ولو جمعة مشكورة في المكتب مستورة في الحِلة رغم الشجن هبت لم تعرف الذلة ما فارقت سرباً تتفهم الموقف تستدرك العلة ولم تعد أماً مسكينة بتشفِّق تفرتق وترتق قُصاصة في إيدها كالوردة بتبتِّق ريانة منشرحة هدِم قدِم يصبح في لمحة كم طرحة لا بد من تكية لا بد من بكية لا بد من غمدة لا بد من سرحة أنعم بها أماً بين العمل والبيت يا مرحىَ يا مرحىَ