وأنا اقول شوفتك وين؟؟

Quote: شكرا يا منى على شعورك النبيل والله يبارك فيكى برضو باسر رجعى . اها النواصل ليكم بعد وفاة الوالد طبعا بقينا انا وماما وعندى خالى كان مريض اتوفى الله يرحمه . قاعدين فى البيت برانا ومرة مره كده بطلو علينا بعض الاهل المقربين شديد الى ان عدت فترة الحزن وكل زول رجع لى شغلو اها عندى صاحبتى مسيحيه على فكرة دى الصاحبه الوحيدة المسحييه بين صديقاتى قمته صارحتها بالموضوع وكانت بتعرف الفاتح كويس لانها درست معانا فى الاكاديميه اها حكيت ليها من الالف الى الياء فقامت اتعاطفت معاى جدا وقالت لى حقوا تمشى الكنيسه تقابلى واحد من القسس عشان تشوفى حل للموضوع وفعلا عملت بى نصيحتها ومشيت قابلته المطران شخصيا بتاعنا اللهو ارثوزوكث قابلنى الرجل بكل ترحاب فحكيت ليهو القصه باختصار شديد انى انا على علاقه شريفه جدا جدا بشخص مسلم ونريد ان نتزوج وهو على دينه وانا على دينى . واريتكم ما معاى الراجل قام وانتفض اها والحصل شنو فى حاجه غلط انتى كويسه مشكلتك عريس انا اجيب ليكى ميه اختارى العايزاهو بس ابعدى عن الزول ده وكيف تفكرى فى زول دينه غير دينك المهم الراجل ما ادانى فرصه ارد بينى وبينكم لما لقيت دة كلاموا قمت استاذنته وقلته ليهو انا ماشه وطبعا هو من البدايه اخد عنى بعض التفاصيل اسمى منو وساكنه وين ووريتو بكل وضوح ما انا اساسا ما خايفه من حاجه ولابعمل فى حاجه غلط. اها ومن ديك الراجل كرهنى ليكم البيت كل يوم والتانى جايينا الساعه كم مامهم باليل بالنهار مامهم اها بقينا فى الاستقبالات واسئلة نكير ديك بتصومى؟ .. بتصلى؟ .. ما تجى الكنيسه ليه؟ .. ما بعرف شنو داك اها كرهنى حياتى وطريقة زوغه مافى الزول فى بيتنا امشى وين مافى طريقه ..اسافر اجى من المطار على بيتنا اقول انا فى السفر اتزكرته وفاء وجيت بى هنا طوالى اها الحال دة استمرا فتره من الزمن لحدتت ما فى يوم قلته ليهو الناس بداو اسالو سبب الزياره شنو اناعندى شنو ذى الكانو فى مشكله وانت جايى تحلهاوفعلا هو داير اطفش العريس المسلم وكان داير احاول اجيب لى عريس وانا ما صدقته خلصته من العندى .اها قمته رجعته لى صاحبتى وحكيت ليها قلته ليها ناسنا ديل مافى معاهم طريقه قالت لى خلاص ارح نشوف كنيستنا احنا الكاثوليك وفعلا قلته ليها ما كلهم مسيحين واتفقنا على يوم سوى ومشينا كنيسة الخرطوم بتاعت الكاثوليك واناطعا بحكم انى دارسه مدارس الراهبات ومرات بمشى المدرسه بالترحيل بدرى بالتالى كنت بمشى الكنيسه وبحضر الصلاه عادى وماكانت فى اى مشكله . اها نرجع لى مشية الكنيسه وسالنا من القسيس المسئول فقالوا لينا اسمه ابونا اميل (الذى توفى قريبا الله يرحمه كان ليهو فضل عظيم فى زواجى ) فقابلنا الاب اميل وشرحت له الموقف بكل تفاصيله والراجل كان مهتم جدا ولم يهاجمنى بشئ ولكنه بدا فى اصدار بعض النصائح العاديه التى يمكن ان يقولها اخ لاخته الصغيره ..نقيف هنا ونواصل فى مشوار الكنيسه ابقوا معنا......