لحظه من فضلك..3

Quote: يا حليل ايام السفر بزوادة قراصة البلح المخمرة والمبيت بقهوة ام الحسن ووجبة العشاء فى قنتى وخاصة فى موسم الرطب والفواكه , والمبيت بالباجا شمالا والوصول الى دنقلا فى وقت الظهيرة وده طبعا فى اليوم التالت من تحرك الزول من امدرمان والكلام ده ايام اللوارى بت فورد والتيمس واستمر هذا الوضع حتى النصف الثانى من سبعينات القرن الماضى الى ان ادخل الكورتاوى عمر عبدالسلام بصات النيسان فى الخط فى عام 1975 كاول شخص ادخل بصات النيسان فى طريق امدرمان -كريمة -مروى - دنقلا -المحس ومع بصات النيسان ظهرت قهوة التمتام وطريق بصات النيسان (الطريق الفوق)الذى غير خط السير المارى بقهوة ام الحسن ويسمى (الطريق التحت)(طريق اللوارى) ودائما عند اهل الشمال تحت معناه فى الاتجاهات اتجاه النيل ومع بصات النيسان ظهر اشهر سواقين فى الخط , على سبيل المثال المرحوم طه على طه والمرحوم صابر جيرا وسيداحمد نورة وفيصل الحر و ود ابوزيد وكثير من شعراء و فنانى المنطقة غنوا لهؤلاء العظماء من السواقين بطريقة مباشرة وغير مباشرة واشهرهم الاستاذ صديق احمد (صديق الدبة) وانا من هنا اناشد الاخوة الذين يمتلكون اغانى صديق احمد لهؤلاء السواقين ان ينزلوا لينا الاغانى دى هنا وعلى وجه التحديد الاغانى الاتية : 1- اغنية صابر جيرا 2- اغنية سموم يا فيصل الحر ومقطع من الاغنية يقول وارجو ان يصححنى الاخوة اذا اخطات فى كلمات الاغنية ( يا جماعة بالله فى البص قمر والحفير جدعة حجر وهنا يقصد بالحفير (حفير مشو)) واتمنى من شاعر الاغنية الاستاذ عبد الله محمد خير ان يمدنا يالتفصيل الممل مناسبة وقصة هذه الاغنية اذا هو متابع معانا هذا البوست او اى شخص من طرفه وهى من اغانى سبعينات القرن الماضى واصل قصة الاغنية هذى حسب معلوماتى البسيطة على ما اذكر فتاة جميلة من بنات حفير مشو كانت ضمن ركاب البص الذى كان فيه الشاعر من امدرمان الى دنقلا بقيادة السائق فيصل . 3- اغنية ود ابوزيد( يعنى التلاتة اغانى لهؤلاءالسواقين بالترتيب صابر جيرا , فيصل وودابوزيد واتخيل لى التلاتة اغانى من كلمات الاستاذ عبد الله محمد خير واداء صديق احمد. والله يامنى خليتينا نتذكر ايام ليها ذكريات جميلة رغم قساوتها فى بعض الاحيان وهى الان على وشك الانتهاء او ممكن نقول عليها انتهى مع ظهور طريق شريان الشمال واختصار المشوار فى بضع ساعات بدلا عن ايام وليالى زمان!