لحـظـة مـن فضـلك!

خبر عاجل، سعر المواد نقص
الأخت منى
سلامات
جيت أبشرك بإنو سعر المواد، نقص كتير جدا
اول التبادي الجير ده بلاش
بدل ما تمشي وتشتري شوالات جير ولا صفائح جير هايلوكس من السوق، وده بالشئ الفلاني. جنب البكان الدايرة تبني فيه ده، في وادي مليان جير. بس ترسلي الراجل سيد الكارو يحفر شوية كدي ويعبئ الشوالات ويجيبن ليك. يعني جير الأرض ده بلاش، ما رحمة. تكاليف البناء ما نقصت شوية؟
والراجل زاتو العربجي سيد الكارو دي أنا بعرفو واسمو خدر و أنا بكلمو ليك يجيب ليك أحسن جير.
ما كلام سمح؟
لكن عليك الله الراجل ده تديه حق اليومية أول بي أول. الراجل ده محمول وعندو مرتين. مرتو الكبيرة والده تسعة ، خمسة بنات وأربع أولاد. والصغيرة عنها بس ولدين وتلاته بنات. حق اليومية ياهو السبعة آلاف ديل. وكمان ما تنسي الراجل ده مرتو الكبيرة دي والله بجيها صداع طوالي كدي و وجع راسها ده غلب الداواي والفكي. وقالوا ليها تسوي صور مقطعية في الخرتوم. الرسول كان ما سقتيها معاك و قطعت ليها عند أحسن طبيب مخ وأعصاب. ده ما عمل لي الله يا بت فكي خوجلي. ولا شنو؟ مالك مبلمي؟
وعليك الرسول ، بنات المرة الصغيرة دي حلاتن ثلاتة بنات بطلن المشي لي المدرسة عشان ما عندهن هدوم وقالن البنات بضحكن عليهن، فصلي ليهن فساتين سمحات و ينوبك خير، بتقصري يا بت الخليفة؟ ما لك سكتي؟
والراجل ده زاتو قصدي خدر والله كراعو اليمين دي تاعباهو تعب ، وياهو شغلو بيها هي. والله تورم بلا سبب وبقى يعتب منها، ويشيل الليل قنتي، والدكاترة قالوا ليهو يسوي صور أشعة ويقابل أخصائي في الخرتوم. سوقيه معاك و على الأقل ده الراجل العليهو الحمل. ترضي أولاده يشلهتو ويتبهدلوا ؟ حاشاك والله ما بتخليهم.
نسيت أقول ليك بت المرة الكبيرة دي قبلوها في جامعة أم درمان، سوقيها تسكن معاكي في البيت واتولي مصاريفها، عشان لمن تنجح وتتخرج تقدر تساعد أخوانها. مو كدي؟ ما تنضمي.
وكمان قالو لي كلام يوجع القلب ، قالوا بت المرة الصغيرة دي ، اسمها يا ربي عديلة؟ أظنو كدي. قالوا عندها حالة نفسية، ما بتتكلم مع زول وبتسرح ومرات تشرط هدومها اللأبساهن ديل ذاتهن ، والدكتور قال الفقر دا ذاتو هو سبب حالتها دي. وديها لي دكتور نفساني و رقديها في مستوصف خاص، آآآآآي عشان المرض ده داير جو. ولا زم تهتمي بيها. ولا شنو يا الملكة؟
كدي قبال ما أنسى ( ما تخافي برجع بتم ليك قصة خدر وأولاده عارفك حنينة) عندي ليك خبر سمح.
عندنا دومة وقعت . وأنا قلت ليهم ما تتصرفوا فيها، دي هديتي ليك عشان تسويها مرق في السقف وتقلل ليكي المصاريف، ده ما واجبنا كمان . ولا شنو؟ مالك ماليكي حس؟
والله الدومة دي حلاة الدنيا عليها. الدومة دي قالوا جدي زرعها يوم الترك دخلوا البلد. عليك الله ما تاريخ؟ ما تقولي شئ لكن؟ بتسكتي كدي لي متين؟ والله كلامي ما عاجبك؟
برجع بحكي ليك ولي قصة الدومة دي وسبب الشكلة البين ولاد عتمان و أخوالي بي سبب الدومة دي.
أسع بجيك بس أشرب لي موية.