لحـظـة مـن فضـلك!

Quote: باكر تجيبي التراب والرملة و تدفعي حق الموية، باقي موية السد لب هسع ما فتحوهالينا، وكمان حق اللواري البنقلن التراب، وحق الطلب البعجنو المونة وحق الأسطوات البدقو الطوب. بعدين حق البنايين تدفعيهو مقدم. وحق العرش والأبواب وحق ترحيل الخشب ذاتو. وبعدين في النهاية لازم تدفعي حق برميلين زيت رجوع نجيبن من كريمي عشان نمسح بيهن العروق و المروق ، باق الأرضة دي حشرة سغيلي وما بتخلي ليك الخشب الأبيض، والله تلحسو زي الدقيق. بعدين دايرين حق تراب تاني عشان يردمو بيه البيت. والله قالوا السيل السنة دي ناوي نيةً سوداء. وتدفعي حق الرجال البيحفرو ليكي المجاري لي الموية ، عاد كيفن عايزة بيت الطين ده يتماص زي السكر. هي نسيت السباليك حقات الموية. و حق البوهية والجير، الشجرة دي قالولك بتلد الخشب مضروب بوهية ولا شنو؟ و العمال البيبنو في البيت ديل لازم تسوي ليهم الأكل بي رقبتك، ما برضهم ضيوف ولا شنو؟ واعملي حسابك البنايين والطلب ديل أكالين، الواحد فيهم حرف القراصي الواحد ما بكفيه لا زم خمسة لي كل نفر في الفطور وخمسة في الغداء، تصحي بدري وتخمري عجينك وتوقدي الدوكي. و الدنيا الحارة دي لازم تسويلهم أكان عصير ليمون ولا قريب، عاد دايراهن يموتوا بالحر ولا شنو؟ وحق السجاير والتنباك باق الناس ديل كييفيين ولا بد من القهوة والشاي و الحمد لله الشيشة دي ما بعرفوها ، ربنا نقذك منها. جيبلك بروش لي الصلاة وأباريق وكيزان ألمونيا كبار وكان مالقيت إن شاء الله حقات طلس، باق الناس ديل ما بدورو الشحتفه وشراب الكبيبيات الصغيرات ديل ، عاد مالهن كمان بقوا زي ناس المدن اللا بعرفوا الأكل ولا الشراب. وبعدين كان يوم ما جوكي لي الشغل ما تقلقي ، أصلهم إن قالولك باكر إمكن بعد شهر، لكن شغلهم بي صراحة نضيف وما فيه كلمة، بس ما تنفي فيهم.