الوزيــر .. الذي...ســـرق الجضــوم
......حمدت الله انو الديمقراطية جاية جارية جري....وكل زول شايفو فرحان بيها..... لكن نحن يا اخوانا السودانين.. قاعدين نضيع حقوقنا بايدينا..... ما قاعدين نسعل المسعولين الكبار من شيتات كتيرة...... لازمن وحيث انو يكون في قانون اسمو من اين لك هذا؟......... المسعول يجي وينسعل مننا لمن يزهج.... مافي زول بيقولو تلت التلاتة كم............قانون من اين لك هذا.... ضروري ضروري......... اول حاجة .... انا شوف عيني الوزير يعينوهو معفص ومطفق وبعد اسبوع تلقاهو فرهد وسوى ليهو جضوم.... زي دا يجيبوهو ويسعلوهو من أي لك هذا الجضوم؟.....انتو قايلين الجضوم براها..... جضوم وعنقرة...وحاجات تانية ان قلتها بي يلحقوني امات طه......لكن تاني مافي نضم زي دا زمن الفوضى خلاص راح...ونحن داخلين في منعطف خطير ياقول النضمجية بتاعين السياسية..... الوزير اول ما يجي يحلف... يورونا مقاس جضومو ومقاس عنقرتو....ومقاس دفاراتو........كلو اسبوعين نشرة بالمقاسات..... أي زيادة... من حق أي مواطن يسعلو من اين لك هذا الدفارات؟.....ما يغشنا ويقول عندي حِبن....نسوي لجنة وفرتقو حتة حتة وتعرف كان دا حبن ولاّ زيادة دفارات ساكت....بصراحة نحنا ما عندنا قروش فايقات عشان يمحقوهن المسعولين ويسووهن شية جمُر وشعيرية.......... في مسعولين قبال ما يعينوهم تلقاهو لابس سفنجة ورابط كراعو بي شاش.... فيها عوّارة تكون.... بعد شوية يجيبوهو في التفلزيون ولابس جزمة جديدة وخالف كراعو ومقابلنا بيها.....لازمن وحيث ان.....و يسعلوهو.. من اين لك هذا الكراع الجديدة؟.... الكراع القديمة المربوطة بالشاش وديتا وين؟......وواحد يعينوهو وكرعيهو رقااااااق....بعد شهر تلقى الكرعين اتلكدمن وادرمن.........وبقت غُلااااااد.......دا برضو لازمن وحيثُ انو يسعلوهو من اين لك هذا الكرعين الغُلاد؟....... الحاجة الوحيدة الما نسعل منها الصلعة..لو مسعول جانا وعندو شعر وبعد يومين لقينا عندو صلعة لي نص راسو..... دا يحفزوهو ويشترو ليهو باروكة من حزينة الدولة.....وفي مسعول يعينوهو ونشوفو بطنو في ضهرو.. بعد يومين يسوي لو كرش.... ويقعد يقرقر ويضحك ويهز فيها ويتبوبر بها قدام جماهير الشعب الوفية..... دا لازمن من اخد مقاسات البطن قبل المسعولية....وبعد المسعولية كل اسبوعبن.... اي زيادة.....لازمن وحيث انو يسعلوهو...من اين لك هذا الكرشة؟...... وتلقى مسعول .... يعينوهو عندو فلجة في سنونو..... بعد شهرين تشوف الفلجة راحت..... دا برضو لازمن يسعالوهو وديت الفلجة وووووووين؟.... حيثُ انو الفلجة دي فلجة الشعب .....وملك الشعب...ومن اين لك هذا العُضام الردمت بيها الفلجة؟......وعُضام الشعب ملك الشعب........ وفي مسعولين قبال يبقو مسعولين..تلقى الواحد مشيتو في الواطا دي شترا وما بيعرف يمشي...... ياخد لو يومين تلقاهو بقي يقدل ويتفلهم في المشي.....اها زي دا يجيبوهو قدام لجنة من اين لك هذا....ويزرزروهو.....وينهزروهو ويسعلهو من اين لك هذا القدلّة؟.....لانو زي دا لو اتعود علي القدلة ..تاني ما بيخليها...وان شالوهو من المسعولية.... يحرد ويزعل ويطِرم ويمشي اهلو وتاني يوم يسوي انقلاب عشان يقدل فوق عينا...........ويبقى السلام الجمهوري:- الرايق النعسان.... الدلال غاريهو البيكاوي الناس قدلة قدلة مشيهو (عدل بواسطة سجيمان on 01-20-2005, 05:48 AM)

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]