|
|
 وقعوا معى تضامنا لتكوين فصيل مسلح من دناقلة ومحس وحلفاويين الشمال
|
الجماعة فى الجنوب ، ناس الحركة ، زبطوا نفسهم وتقاسموا الثروة والسلطة مع ناس المؤتمر ، وقامت الحركات وهاجت وماجت فى دارفور وسينالوا نصيبهم بعد التوقيعات الأخيرة ، وكذلك قامت حركات شرق السودان وبالطبع سينالهم ما نال حملة السلاح من قبلهم فى القبل الربعة ،
نحن الدناقلة والمحس والحلفاويين لايصين ساى ، ومفلسين ، وحارسين بيوت الأمراء فى الخليج ، نطبخ ونكنس ونسوق العربات ونوصل النسوان ، بدراهم معدودة والمتعلمين مننا لايصين ساكت لا حس لهم ولا خبر
لذلك ، وبما أن الفلس وصل منا مبلغا عظيما ، أدعو من هذا المنبر لتكوين فصيل (مسلح) للنهب (المصلح) من حكومة الإنقاذ ، وعايزين حقنا (قلع)
فتضامنوا معى أيها الأخوة الدناقلة والمحس والحلفاويين الشرفاء لقلع حقنا قلع من ناس المؤتمر ، وبالعربى كده ، مفلسين ن عايزين (نهبر) مع الهابرين ولا حول ولا قوة إلا بالله العظيم
علينا جاى
|
|
 
|
|
|
|
|
|
|
 Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: محارب)
|
يازول يا ظريف
أنا ما من الجماعة الفوق ديل لكن عندي حنك قوي وبتكلم كم لغة أوروبية واسمي زاتو زي الأوروبي فأعملوني المتحدث الرسمي بأوروبا "ما بخلي الراحات" وما عايز أي قرش منكم غير 20ألف يورو في الشهر والبحيكم من الحكومة كله حلال عليكم
الرد بسرعة لو سمحت قبل ما توزعوا المناصب ونضيع وهم مع أخر معقل للتهميش والما بهبر في دي تاني مافي ليهو إلا يبيع مخدرات ودي خطرة في أوروبا خاصة لو ما مافيا وإيطالي كمان
الناطق الرسمي لحركة المهمشين بأوروبا
فرانكلي
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: Frankly)
|
يازول
علمت قبل قليل أن جهة فنية تتكون من الاساتذة/ وردي والموصلي والبلابل وفنانين طمبور رطانة
آخرين يتفاكرون الان حول إختيار (نشيد وطني) للفصيل وباكثر من لغة ولهجة... شفت شغلنا كيف
وعشان اخونا جهينة مبدع كبير كلفوه بصياغة النشيد
اما مجموعة الكورال ستظل أسماؤهم محجوبة لاسباب امنية عشان فيهم من سيخرج على النص ويقول كلام
ما سمعو بيهو الناس في الراديو قبل كده
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: يازولyazoalيازول)
|
لكن بي تكوين الفصيل (الرطاني) ده تكونوا زي الحسبتونا(شوايقه يا رسول الله) علي الوسط (لو ما قاموا ناس الوسط انفصلوا برضو عننا)
شكلو البلد كلها ماشه تنفصل ويبقى المفصول عنه كده بقى واضح عديييييل (مشلخ لا ورا)
عموما نلحق الفضل ونرسل إشارات للإخوه الجعليه مفادها:-
* النكات اللافه اليومين ديل مقصدها واضح (الإيقاع بيننا وبينكم) ماتاخدوها بالجد
* من أجل تكوين فصيل (مشلخ) سنعمل على توحيد الشلوخ معكم، ولإبداء حسن النية يمكننا التنازل عن (لا ورا حقتنا دي) إن ما طرح شعار (أقصد شلوخ بديله)
* سنعمل على تهجين (الدلوكه مع الدليب) وطالما إن كليهما يبدأ بحروف (ال دل) فأن الآلة المهجنة يمكن أطلاق إسم (بعد مزج ما تبقى من الكلمتين) وتصير (الويكوبه) وسنجد أن نفس الويكه واضح في الإسم الجديد
في البوست القادم (الإستفاده من تجربة العمل المشترك لفصائل التمرد في الغرب وإستفرادية الوصول لإتفاق) إشارات من الفصيل (المشلخ) للفصيل (الرطاني)
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: يازولyazoalيازول)
|
بصراحه يا زول وبواقعيه شديده فعلاً الشمال هو المهمش من ناحية الخدمات والاهتمام بكل ما يهم المواطن .. مثلاً يا حبيب أنا محسي من ريفي أرقو - دار العوضه ، قريتنا ياحبيبي وبفضل تكاتف الأخوة المغتربين هنا .. نحن الذين قمنا بكل شيء .. الكهرباء ، الماء، المركز الصحي .. أين بالله قل لي هو دور الحكومه.. وعلى ماذا وبأي وجه تفرض على المزارع المسكين الضرائب التي تثقل كاهله ... وأين تذهب هذه الأموال ... حقيقة يجب على أبناء الشمال الوقوف وقفة صلبة والمطالبة بحقوقهم المشروعه ...
إليك هذه القصيدة التي كتبتها بمناسبة إنعقاد المؤتمر النوبي الأول ...
يا ســعفات ...
يا سعفات النخل الباسقه ...
رايات عز ساميه وخفاقه ..
راميه جذورها على التاريخ ..
حاضنه بعانخي وروح ترهاقا...
ظل تانهسو ينادي النوبه...
أمة خير عامره ودفاقه...
عازه خليل بالشوق ناداها...
دمها يروي ويحكي الفاقه ..
بكره فرحنا يعم وادينا ...
وتبقه مناهل الخير إشراقه ..
***
أصحا وأعرف وين أقدامك...
هوي يا النوبي كفاك نحيب ..
وينو وراك ووين قدامك...
مين اعداك ومين هو حبيب ..
مين الطعنك وهو بيضحك ..
بالخنجر المسموم رهيب...
يحرق هلالك شان يقيم ...
جرس الكنايس والصليب...
وانت بشوفك شمعه تضوي ...
وتحرق روحها كفاك تعذيب...
ولد النوبه كفاك تهميش ...
كفاكا هوان وكفاك تغييب ...
أنت العز ومنارة مجد ...
وانت العلم الزاهي قشيب ...
حقق كل اهداف منطقتك .. .
في سودان واحد ومهيب ...
إدريس محمد إبراهيم
الرياض 20/07/2005م
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: مريم بنت الحسين)
|
الأستاذ مريم بنت الحسين (شخصيا)
تحياتى يا استاذة ، وحضورك تشريف لنا
ما خلاص إتفقنا على إنضمام الجعليين والشوايقة والبديرية ، وخلينا كلهم نصنفهم (نوبة الشمال) او أى مسمى تتفقون عليه ، عشان يمكن الجعليين ما بيحبوا تصنيف (نوبة) وكده ، الشغلة معقدة زى ما شايفة 
بعدين يا أستاذة ، تستاهلى منصب (ملكة جمهورية السودان) هو قال ليك اليزابيث احسن منك؟
تسلمى استاذتى
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: يازولyazoalيازول)
|
| Quote: وقعوا معى تضامنا لتكوين فصيل مسلح من دناقلة ومحس وحلفاويين الشمال |
هشام يا أخوي عرفنا نحنا ما معاكم والله يحنن لينا قلب ودالجاز ويدينا شوية جاز نولع به القليبة...
والقليبة بلغة الشايقية اللمبة الصغيرة أم شريط بتولع بالجاز وبدون زجاجة ودخانة يكتم النفس وضوها يعمي كان بقى عندها ضوء...
بس حلفاويين خشم القربة والشرق ديل ذنبهم شنو ؟؟؟
شردوهم ناس عبود والآن تفكوهم عكس الهوا!!!!
وبعدين قول لي إنت مالك ومال الشمال ؟
ما تخليك في الشرق ... القضارف مالا ما سمحي ورقاصة وناسا حلويييييييييييييييين...
لك مودتي
الشايقي
______________
فاوضني بلا زعل
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: طارق جبريل)
|
يازول
الجماعة بيسالوك:
لو حصلت هناك مشكلة في اللغة التي سيكتب بها الدستور الدائم لدولة (بني رطان) هل يمكن كتابته
باللهجات الثلاثة للرطانة،ولو كانت اللهجات دي غير مستخدمة في الكتابة نعمل شنو؟
سبب المشكلة: في اللجنة المكلفة بصياغة الدستور بعض الاعضاء لايجيدون الرطانة يعني(رطانة هرتوم)
كما قال الفنان يوسف الموصلي
اللجنة في إنتظار ردك حتى لايحصل اول إنشقاق ونقعد (نهارب) في (بأضنا)
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: Tumadir)
|
يا تماضر إنتى لحدى يوم الليلة ما دايرة تفهمى الحكاية
قلت ليك مية مرة (بِكِر)
فهمتى؟ ولا اقول تانى؟
تماضر ، طبعا مظاهرة الدناقلة فيها شتارة وحاجات درامية ما حصلت
يهرق ميتينك يا إنقاز
والباقى يتمو الجماعة براهم
سألت مرة صديقى المحسى المهندس عبدون محمد عبدون ، فقلت له إنتو المحس ديل عنصريين شديد خلاص ، ده من شنو ده؟؟؟
فرد قائلا ، يا هشام نحن ما عنصرين ، نحن المحس بنحب بعضنا والناس بيفتكروها عنصرية
فتعجبت من رده
تماضر ، شكرا للمرور (أتّقول دكتورة)
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: يازولyazoalيازول)
|
لكين نتسلح بشنو قبل ما نوقع ؟يا اخوانا صحيح انى دنقلاوية مشكوك فى امرها باعتبارى منتمية لعدد من الجهات هسى كمان بقى فيها نصارى ,المهم يا زول يا زول ناس الابيض قالو حقتن ، ناس الحفير عينهم على ,ناس عطبرة , يعنى لحم راس ,من كل بلد غنا , لكين بالجد المسالة كان بقى فيها جهوية حنشتغل بنظام ( التمكين ) مش كلو بمكن ؟ طيب ما نمكن( بردك )مش كده ولا ايه ؟ على راى اهلنا ناس دنقلا ، وطبعا دى منطقة ما شفتها فى حياتى لكين امى تشيل وتقول لينا اننا من هناك من (الهفيريا شيهه) المهم معاكم تب وحرّم ماحتسكت ( اسلحتنا الما نارية وطبعا حندور اقلام الما بتكمل ديك وتعجبك اخيتك امانة ما لايوقة وكتين تعلق فى شى الا تجيب خبرو , ويا غرق يا جيت حازما وابشر بالخير يا عشا البايتات امانة ما بنسوى تقسيم سروة ما حصل نمرق ليهم لستات المن زمن تهراقا وبعنخى والمعابد السفروها بره (للعلاج وما رجعت )وراس الكبش الباعوه للانجليز ، ودهب ( حبوبتنا امانى شاختو المشى وين كده ما عارفة ، ويا ما فى الجراب يا حاوى بس بسراع جيبو لينا الحديد خلونا نتداوس حار حار)
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: سلمى الشيخ سلامة)
|
سلمى الشيخ سلامة
أفرحتينى بطلتك معنا هنا ،
إنتى معانا معانا ، والسلاح موجود ، صدقينى من دناقلة جدة بس ، ممكن نجيب ليكم صواريخ ، على باليمين ديل عندهم قروش ما بتنحسب ، يعنى الدعم المالى مشكلتو محلولة ، وما دام إنتى من (الهفير يا شيهه) زى ما قالت الحاجة فستكونى مسئولة أمانة المرأة ومعاك الحاجة كادر وطنى ، بعدين مسكناك الأمانة دى عشان (اللواقة) حقتك وبعدين إنتى إن شاء الله ما تغرقى ، إنتى بتجى حازماها تب ، عارفك شديدة ولضيضة كمان
تسلمى يا سلمى ، وشكرا للمشاركة فقد اسعدتينا
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: حيدر حسن ميرغني)
|
بتبقونى وزير بخش معاكم
اسمع الكلام ده كويس قبال ناسك يكتروا . . و البكانات تتحجز.. اصلنا اتعلمنا من زمن ابعاج الواحد لازم يخت طوبته من الدغش البدرى
ان ابيتوا عندى خطة بديلة
تكوين مجموعة ناس الجزيرة و وسط السودان اذ ان الحيكومة حاقرة بينا
وبما اننا ندعى العروبة ناس الغرب و الجنوب قالوا فينا ما لم يقله مالك فى الخمر و معتبرينناو الحيكومة حاجة واحدة
و لذلك حا نعمل استفتاء و ننفصل قبال ما ينفصلوا مننا و يجدعونا
و حا نصدر قطنا بالطيارات (لعدم وجود ميناء)-------للاسف ما فضل فيها قطن فمشروع الجزيرة قاعد يحتضر و مركبين ليهو ثلاته دربات
بنقبل بالجودية -الامريكانية فقط- فابونا الشيخ العبيد ود بدر قال لينا البيابا الجودية لا بد ينغلب
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: يازولyazoalيازول)
|
عينت نفسي مفتي الديار النوبية
بما أن المنطقة من حلفا وحتي دنقلا دينيا من المؤلفة قلوبهم وخوفا علي مستقبل هذا الفصيل المسلح نفتي بالآتي:
1.يجوز مع (الكراهة) ضم الشوايقة والجعليين الي الفصيل في الحالات أن يرفضوا الخروج من حدود آخر مملكة نوبية وعند اعترافهم بأن الطمبور والدليب والكركي وكل المفردات نوبية خالصة وهنالك تهجم علي التاريخ النوبي.
2.لا يجوز قتل أوأسر أي شخص سوداني تبين انه وحدوي.
3.يفضل جنس الشوايقة والجعليين في التعامل اكثر من النوبيين (التايوان) لان الشوايقة والجعليين جيراننا في الارض وهم ذهبوا الي اقاصي الدنيا.
4.تقسم السلطة كالآتي
منصب زوير الخارجية (إحقاقا للحق) يعطي لشايقي لما لهم من بلاغة بس (ما يقعد يغني لأمه) لعامل الزمن ما عندنا زمن نضيعه في الحنين والشوق فاض بي.
منصب وزير الدفاع لجعلي (اصلي)ويجرد من سلاحه شريطه أن يكون غير متزوج (عشان ما يقضيها لينا علي الطلاق).والبلد ناس العدل والمساواة قالوا حدودها دنقلا والجعلي بندقية ما عنده قاعد يطلق.
كل الوزرات الباقية تخص النوبيين فقط وتستحدث فيها وزرات جديدة مثل التثقيف الديني.
وزارة المالية تعطي لمحسي مسرف من النوع البيجي اجازة وبيقطع وبيلموا حق التذاكر..عشان يوزع القروش كااااااش نقدي...لانو سئمنا من مسألة الاستراتيجيات والخطط المالية ووغيرها من السياسات.
وزراة الثقافة والاعلام لشخص من السكوت (صاي) وفي زيهم ..الخليل ودهب شار والجيلي وقرية الالف معلم؟؟
الناطق الرسمي حلفاوي اخلاقه ضيقة(انا ما بفسر وانت ما بتقصر)...بس عشان يتعب الشايقي وزير الخارجية (سهر الجداد ولا نومه).
باقي الوزارات تنزل كرتلة
اي خروج من هذه النصوص يعتبر زندقة خروج عن اولي الامر مافي صكوك غفران..في جلد في تهجير نار جهنم زفت طين.
مفتي الديار النوبية
شكرا..كرجي لكا كرجوجام(الله يكسركم)
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: GamarBoBa)
|
قمربوبا:
لقد أتيتنا بأفضل مداخلة فى البوست ، ولذلك نحن نوافق على تعيينك مفتى الديار النوبية ، بس ابعد من فتاوى الترابى الأخيرة
(يجوز (مع الكراهة) ضم الشوايقة والجعليين)
مع الكراهة دى بالغت فوقها عديل كده
بعدين جننت وزير الخارجية الشايقى مع الناطق الرسمى (الحلفاوى)
ياخ ، والله السودان ده (معكوك) عكة صاح ، حتى أسيادو ما قادرين يفرتقوا العكة دى
تحياتى كمان وكمان
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: GamarBoBa)
|
يازول
قمربوبا ده عاوز يودينا في ستين داهية قال نعطي الخارجية للشوايقة
تعرف في وزارات كده مافيها لعب أبدا زي الخارجية دي ووزارة الثروة
التركينية حقت السمك وأي شيئ عايم في البحر
الشوايقة والجعليين حبابهم عشرة في دولتنا بس من دون إستوزار
أصلو الناس ديل يخرمو للإنقلابات العسكرية مثل خرمتهم للتمباك
ناس تفتيحة شديد .. ماسمعت بالشايقي اللي دخل في صندوق مع شيطان وقال
عاوز الصرفة الأولى... ولما مسك القروش في إيدو قال للشيطان ... بسم الله ..
بعدين نحن ناس على نياتنا وطيبين نتغشى في كباية موية
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: خالد عبد الله محمود)
|
خالد دقست...بترولنا بندكنوا والمغتربين معفيين من الضرائب ولما يجوا عايدين الحكومة بتعتذر ليهم وبتعوضهم سنين الغتراب لكن ممكن نديك حفريات الآثارات النوبية والمقابر القديمة وممكن تجد الاعلانات دي مفيده معاك:
عطاءات حكومية
تعلن وزارة الدفاع النوبية عن حوجتها لقوات جنجويد من الجيل الثالث(Muktitask) يجيد كافة اعمال العسكرية من ضابط الي عسكري اي قاطع طريق الي شركة الهدف (سكيورتي).
الشروط:1.فرد الجنجويد ما يشغل مخه
2.يقيف لما يقولوا ليه يقيف
3.الاستعداد للسكن في صعيد مصر بعد الاحتلال.
4.حراسة سجون ابو ارغين
وزارة التعليم العالي:
انشاء جامعات خاصة وعامة ونص نص
الشروط
(اوع المباني ماتقع)
الاختلاط علي سنقة عشرة
التدريس باللغة الهيمغلوفية.
وغدا نواصل باقي عطاءات الوزارات
مفتي الديار
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: hatim)
|
من هسع قبال الكوم يكبر
الديش الليلنا الترقيات بالرجالة يعنى تقتحم تكتل كتير, ما تلاوز من الرصاص ياكلك يدوك دبورة زيادة , (الفكرة دى لطشتها من اهلنا ناس دارفور) وبالمناسبة برشح شخصى الضعيف لمنصب تانى ارجل زول (ارجل زول اتنافسو فيها كلكم)
حسم اى مشكلة داخلية بالرجالة و بدون استعمال سلاح يعنى مسموح عكازى و عكازك و المطالعة فى الخور
شعار الدولة القادمة تمرتين و نبقة و الفقرا اتقسموا النبقة
و ارمو لقدام
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: BAKASH)
|
بسم الله نبدا
بالبنط العريض نعلن تضامننا وانضمامنا لهذا الفصيل ولكن .............
سئل الملك الفرنسى لويس الرابع عشر عن دولته فاجاب ( تسالوننى عن الدولة وانا الدولة )
انتو ياشباب كل الدولة ومن غيركم ما فيش دولة بس وزعوا المناصب وادونى منصب
محافظ الجزيرة لانو الجزيرة غالبيتها محس زى الخرطوم كدا وليكم على اى زول اديه
حواشة قدام بيته بشرط يجيب اللقاط ( بتاعين اللقيط .. الحاشية دى لناس الراحات )
شرط يكونوا خليجيين عشان نتسدا فيهم طبعا موافقين
تحياتى للجميع وافيدونى عن خبر استهداف دنقلا من جماعة العدل والمساواة
حد يمسك العقرب من شوكتها عجايب
المحسى
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: Mahmoud Mustafa Mahmoud)
|
يازول
شفت ناس الحكومة ديل عاوزين بخوفونا كيف لما عرفو بنيتنا الانفصالية
قالو ناس دارفور يستعدون لشن هجوم على دنقلا
ده ما تحريش عديل كده عاوزننا نمشي نقاتل اهلنا الفور نيابة عنهم
لانهم عارفين مقدرتنا القتالية
لكن دي نكتة لاتنطلي علينا
نحنا اجبرنا عبدالله بن ابي السرح على الاتفاق
وقلنا ليهو رجالة كده بلدنا دي ما تقدر تدخلها وقال خلاص تعالو نتفق وكان الاتفاق
بالله ماعندك منو نسخة بالرطانة عشان نستعين بيهو في حاجات قادمة
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: حيدر حسن ميرغني)
|
يا زول اخوي: ممكن تقرأ المقطع هو جزء من مقال كتبته بمناسبة استهداف الشمالية من قبل حركات دارفور:
لا ادري لماذا تصر الحكومة على تذكيرنا بطفولتنا التي كدنا ان ننساها من هول المصائب التي نزلت على نافوخ السودانيين- في طفولتنا وبالمدارس الابتدائية و بكتب المطالعة درسنا قصة محمود والنمر والتي يتذكرها معظم القراء الكرام – حيث اراد محمود ان يضحك على اهله فصرخ النمر النمر هجم النمر على الغنم-فلما اجتمع القوم ضحك عليهم لكن عندما هجم النمر في يوم اخر لم يجد من يسمع استنجاده.
اقول هذا وقد طالعتنا صحف الخرطوم نهاية الاسبوع الماضي خبر مفاده ان حركات المسلحة بدارفور تنوي ضرب دنقلا ومدن اخري بالاقيم الشمالي.
الاقليم الشمالي مثله مثل منطقة التكريت العراقية والتي باسمها حكم صدام حسين وقلة من ابنائها الشعب العراقي بيد من الحديد والنار دون اي منفعة او جرم لباقي ابناء التكريت. لكن عندما انقلبت الاوضاع بالعراق دفع ابناء التكريت وما ذالوا يدفعون ضريبة ما اقترفتها القلة الصدامية- الامر نفسه ينطبق على الاقليم الشمالي السوداني بتقسيماته الجديدة- قلة من اناس(مع اسرهم واصهارهم) ينتمون الي الاقليم الشمالي يحكمون السودان ويظلمون الناس باسم ابناء الشمالية وبمسميات اخرى ديكورية( مثل الحركة الاسلامية).
لم ينل معظم ابناء الشمالية من الحكم الاقطاعي لابناء منحدرين من الشمالية سواء البؤس والفقر والمرض والتهميش اسوة بباقي ابناء السودان( لكن معظمهم مغشوش تحت مزاعم ان ابناء منطقتهم يحكمون السودان اذا هم حكام ) في الوقت الذي فيه يتمتع الحاكمون بيخوتهم (جمع يخت) وعماراتهم يعاني انسان الشمال من امراض الفشل الكلوي والسرطانات غير المعروفة السبب والمصدر دون وجود مركز واحد لغسيل الكلى او للعلاج الكيميائي لمرضى السرطانات . رغم هذا كله يتعرض انسان الشمال الي الظلم مرتين – مرة من قبل ابناء منطقته الذي يسومون الوطن سؤ العذاب و باسمه وتارة اخرى نعت ابناء الهامش له بانه من الحكم الاقطاعي الشمالي وذلك باحتكار السلطة والتنمية لمنطقته …… من اين وجد هولاء الغلابة التنمية………..؟؟
ان كنت قد اعيب على كل ابناء السودان وخاصة ابناء الخرطوم والوسط والشمالية على موقفهم السلبي تجاه اهلهم من النازحيين و المشردين من ابناء دارفور بالمعسكرات( تخيلوا معي كيف يكون موقف خمسين الف طفل بمعسكر كلمة والذين نصفهم سوف يكون نساء ورجال راشدين خلال السنوات العشرة القادمة لو ان اهل السودان قاموا بمبادرة اطعامهم وذلك بتسير حملة تبرعات باشراف الامام الصادق المهدي والاستاذ ابراهيم نقد او اي شخصية وطنية نظيف اليد واللسان لتجوب سيارات التبرعات شوارع مدني والخرطوم الابيض وشندي وعطبرة( ليدفع كل مواطن و مواطنة مبلغ خمسمائة جنيه فقط- تخيلوا كيف يكون حال اهلنا- لكن هذا لم يحدث- و اكثر لومي على الرأسمالية الوطنية التي اتخذت موقف لا يختلف كثيرا عن موقف الجانجويد- لا ادري لماذا لم تقدم الرأسمالية الوطنية يد العون الي اهلهم في دارفور ……….؟؟
رغم هذا ليس هناك اي سبب لاستهداف الاقليم الشمالي من قبل الحركات الثورية بدارفور – ولا اظن ان فردا واحد بتلك الحركات يفكر او مجرد يتخيل استهداف اهله الغلابة بالشمالية وذلك لموانع اخلاقية بحتة. بالاضافة الي الجوانب الاخلاقية في عدم استهداف الشمالية هنالك جوانب سياسية وإستراتجية واخرى عسكرية تقاوم فرضية اي عمل عسكري ضد المنطقة
فالجوانب السياسية تتلخص في ان سلام دارفور قادم لا محال والحركات مقبلة على العمل السياسي الحزبي فهي في حاجة الي كسب اي دعم او مجرد تعاطف من اي مواطن سوداني .من الاخرق جدا ان تقوم بمثل تلك الخطوة . والعامل الاخر هو ان تلك الحركات وقضية دارفور ومعاناتها تجد دعما معنويا مقدرا من قوى الاستنارة من الاكاديمين والصحافيين من ابناء الاقليم الشمالي وهذا الدعم لا يمكن التلاعب به.
اما الجوانب العسكرية والإستراتيجية: الاقليم الشمالي منطقة قاحلة ومكشوفة لا جبال لا وديان ولا غابات الامر الذي تستحيل معها عمليات الكر والفر و حرب العصابات كما انه يبعد الاف الكيلومترات عن اماكن تواجد تلك الحركات فمن اين تجد الحركات الامداد والدعم اللوجستي................؟؟ ثم هناك جانب اقليمي مهم هو ان مصر لن تقبل باي توتر امني بحدودها الجنوبية.
فوق هذا كله لم يتمكن انسان اقليم الشمالي العادي من التعرف على الحركات في جو محايد فهو تحت مرمى الاعلام الحكومي المباشر الامر الذي لا يخلق قبولا لديه تجاه تلك الحركات على الاقل في هذه المرحلة
مما سبق يمكنني القول و بالدارجي( دي طلعت فشنك شوفوا غيرها).............................!!
د. حامد برقو عبدالرحمن
[email protected]
| |
|
|
|
|
|
|
|
|
|
Re: وقعوا معى تضامنا لتكوين فصيل مسلح من دناقلة ومحس وحلفاويين الشمال (Re: hamid brgo)
|
البرقواخوى ان شاء نحن و انتو ما نتفرقو
نحن بس شفنا القسيم كتر قلنا ناخد لينا كضمة
ابونا الشيخ فرح قال "راكوبة ابوك لو اتشلعت شيل ليك منها شلية"
الله لا يجيب اليوم ده
| Quote: ان كنت قد اعيب على كل ابناء السودان وخاصة ابناء الخرطوم والوسط والشمالية على موقفهم السلبي تجاه اهلهم من النازحيين و المشردين من ابناء دارفور بالمعسكرات |
العاصمة شكلها بقى الساكنين عشوائي و نازحين فيها اكتر من سكانها الاصليين
اطلع شارع مدنى الخرطوم شوف فى كم قرية جديدة سكانها من الذين نزحوا من دارفور- منذمنتصف الثمانينات و الى الان
حصلت مشادات و لكن اهالى المنطقة قبلوا بهم امثلة السمير - سوبا- الباقير- المسيد
فى المسعودية حى اسمه حى التاما - التاما ديل ما من وسط السودان
| Quote: اما الجوانب العسكرية والإستراتيجية: الاقليم الشمالي منطقة قاحلة ومكشوفة لا جبال لا وديان ولا غابات الامر الذي تستحيل معها عمليات الكر والفر |
زمان كنا قايلين عمليات الكروفر (كلمة واحدة كما يقول السيد احمد الميرغى) بقت ما محتاجة لغابة الزول يخشها و يتمرد فيها و ذلك بعد التطور التكنلوجى دارفور مكشوفة والزرقاوى ظااطو فى بلد مكشوفة
| Quote: كله لم يتمكن انسان اقليم الشمالي العادي من التعرف على الحركات في جو محايد فهو تحت مرمى الاعلام الحكومي المباشر |
بطمنك اخوى - اصحابى و اخوانى الفى السودان قاعدين يشوفو البشير لمن يطلع فى الجزيرة و السى ان ان وفى واحد كمان بيخوف شفعه بالبشير
| Quote: ( دي طلعت فشنك شوفوا غيرها |
غيرها شنو مثلا
نحن مستعدين لقبول كل الاقتراحات ةو حا نعمل صندوق جنب الباب اسمو صندوق الاقتراحات
و دمتم
تانى ارجل زول (حتى لا تختلط الامور اعنى المشى كدارى اعنى القوة -الاتنين)
| |
|
|
|
|
|
|
| |
يازولyazoalيازول
حيدر حسن ميرغني
Frankly
Hani Arabi Mohamed
كمال حسن
BAKASH
Rasha Hatim
ترهاقا
إدريس محمد إبراهيم
مريم بنت الحسين
Al-Shaygi
طارق جبريل
Tumadir
سلمى الشيخ سلامة
فيصل محمد خليل
Mohamad Shamseldin
GamarBoBa
خالد عبد الله محمود
hatim
عبدالرحمن خلف الله
Mahmoud Mustafa Mahmoud
فيس بوك
تويتر
انستقرام
يوتيوب
بنتيريست