|
Re: شوفو العب اللقاها (Re: يازولyazoalيازول)
|
إزيك يا هشام وكيف الأحوال
والله يا هشام نفس الصيغة البايخة دى أنا سمعتها وبالنص تماما وما نسيتها وما حانساها طبعا
لكين قول لى وين ومتين
أقول ليك
الكلام ده يمكن قبل اربعين سنة عديل كده وقبل إنقلاب مايو بى سنة
أنا اتذكر يا داب دخلت سنة أولى فى المدرسة الأولية
وكنت فى اليوم داك، وكالعادة زى كل يوم خميس، تعرف كنت بايت وين، ما حتصدق والله
فى القصر الجمهورى
كدى اقراها تانى، القصر الجمهورى
كل خميس وجمعة كنت بقضيهم هناك والله يا هشام
إنت طبعا اكبر مننا وعشت فترة ما قبل مايو وبتكون واعى بيها كلها، عشان كده أكيد بتكون سمعت بالزول العظيم الفريد الطيب ده
العميد/ عبد الحميد خير السيد
ده كان الياور الرئيسى بتاع الزعيم إسماعيل الأزهرى ولو لقيت أى صورة قديمة للأزهرى بكون هو الزول البكون معاهو وخلفه طوالى فى أى مناسبة رسمية
طيب أنا علاقتى بيهو شنو؟
العلاقة يا هشام هى إنه جدنا خير السيد والد عبد الحميد، كان وهو وجدى محمد عوض، أبو الوالد، كانو شركاء فى شياخة "العربجية" فى الخرطوم عموم كلها، طبعا فى بداية القرن الفات لا كان فى عربات ولا لوارى ، والوسيلة الرئيسية لنقل البضائع وحتى الناس كمان كانت عربات الكارو
جدى محمد العوض وخير السيد والد عبد الحميد كانو هم "البرنجيه" بتاعين العربجية، وبعدين المربط الرئيسى بتاع الخيل والعربات تعرف كان وين، كان فى وسط السوق العربى، فى الميدان غرب عمارة المدرسة الأهلية محل موقف باصات الشجرة القديم
بيوت خير السيد وجدى محمد عوض كانت بالضبط خلف فندق المريديان ولحدى اليوم موجودة، وجيرانهم كان حسن عطية الفنان وعبد القادر سليمان وأخوهو حسن سليمان "الهاوى" المطرب الجميل
المهم ما اطول عليك
العلاقة بين الرجلين بقت علاقة أهل وبيت واحد، وعبد الحميد وأبوى بقو اكتر من اخوان، وواحدة من بنات عمتى اتربت فى بيت خير السيد لحدى ما اتزوجت، وولد اختها عايش مع أولاد عبد الحميد فى البيت لحدى اللحظة دى فى الخرطوم اتنين جوار مدرسة دار النعيم زمان والمبنى بعد الإنتفاضة بقى دار الجبهة الإسلامية
عبد الحميد خير السيد عنده أخت واحدة السودان كله بكون بعرفها، وخاصة كل نساء الخرطوم الدرسن فى مدرسة الخرطوم الثانوية بنات العتيقة، ونعيمة كانت مديرة المدرسة، وأول سيدة اشوفها سايقه عربية، هى وزوجة يعقوب نيشان، جارنا اليهودى فى الخرطوم شرق
طولت عليك مش
طيب بعد السرد التاريخى الممل ده، ارجع بيك للموضوع
جدنا خير السيد والد عبد الحميد، اصوله ترجع لقبايل الجنوب تقريبا، ما متأكد بالتحديد
بعدين فى اليوم الأنا سمعت العبارة البايخة دى، اتذكر جيت الصباح "قهوة الواثق" فى السوق العربى، وعمنا الواثق هو والد الفنان الجيلانى الواثق وأخوهو عثمان الواثق، جيت عشان الاقى ابن عمتى الكان شغال فى القهوة وبعد داك امشى البيت
اها كنت بحكى لجماعة من اهلنا كانو قاعدين فى القهوة، وهم ناس كبار طبعا، بحكى ليهم عن بيت عبد الحميد داخل القصر الجمهورى، وتحديدا بين الكنيسة وحوض السباحة شرق مبانى القصر الرئيسية، بحكى ليهم عن الفخامة والأناقة والذوق الإنجليزى
قام واحد عوير طوالى نطا وقال لى
بالله شوف اللقاها العب ده
وكان خليتنى تانى بواصل واحكى ليك عن عمنا عبد الحميد خير السيد
حاجات تحير ومآثر فريدة وأعمال عظيمة
ياخى معليش زحمتك الليلة
بس ساى والله مزعلانى "عدم عِرفة" الناس وعوارتهم
|
|
|
|
|
|
|
العنوان |
الكاتب |
Date |
شوفو العب اللقاها | يازولyazoalيازول | 08-01-06, 02:43 AM |
Re: شوفو العب اللقاها | أبوذر بابكر | 08-01-06, 03:51 AM |
Re: شوفو العب اللقاها | تولوس | 08-01-06, 04:11 AM |
Re: شوفو العب اللقاها | يازولyazoalيازول | 08-01-06, 04:13 AM |
Re: شوفو العب اللقاها | أبوذر بابكر | 08-01-06, 04:43 AM |
Re: شوفو العب اللقاها | حيدر حسن ميرغني | 08-01-06, 04:54 AM |
Re: شوفو العب اللقاها | يازولyazoalيازول | 08-01-06, 06:26 AM |
Re: شوفو العب اللقاها | يازولyazoalيازول | 08-01-06, 05:29 AM |
Re: شوفو العب اللقاها | بكري الصايغ | 08-01-06, 06:07 AM |
Re: شوفو العب اللقاها | يازولyazoalيازول | 08-01-06, 06:31 AM |
Re: شوفو العب اللقاها | رأفت ميلاد | 08-01-06, 09:16 AM |
Re: شوفو العب اللقاها | عبد الله عقيد | 08-01-06, 10:50 AM |
Re: شوفو العب اللقاها | أحمد أمين | 08-01-06, 11:55 AM |
Re: شوفو العب اللقاها | يازولyazoalيازول | 08-02-06, 03:06 AM |
Re: شوفو العب اللقاها | bob | 08-02-06, 03:08 AM |
Re: شوفو العب اللقاها | يازولyazoalيازول | 08-02-06, 03:14 AM |
Re: شوفو العب اللقاها | الصادق صديق سلمان | 08-02-06, 03:27 AM |
Re: شوفو العب اللقاها | يازولyazoalيازول | 08-02-06, 03:32 AM |
Re: شوفو العب اللقاها | Haytham Abdulaziz | 08-02-06, 03:58 AM |
Re: شوفو العب اللقاها | امير عوض الجمري | 08-02-06, 04:29 AM |
Re: شوفو العب اللقاها | بكري الصايغ | 08-03-06, 11:19 AM |
|
|
|