جنية تسكن مع أسرة سودانية قتلت اثنين من الشيوخ.

Quote: فيلم الإنس والجن معاهو يسرا لكن الفيلم الجاضم كلو كلو City of Angels (1998) لما الملك نيكولاس كيج يعشق الإنسية ميج رايان عندي زميلي في الشغل حنسني تحانيس كتيرة خلاص أحضر سلسلة أفلام رعب وانا بقول ليه الرعب دة أنا ما زوله داير افلام عميقة ياخ .. قال لي يا زول دة شغل بتاع جن وشياطين وعمل قلت ليه كماااان !!!! قال لي والله أفلام تركية تجنن. قلت ليه وكمان أتراك؟ ياخي أفلامك دي ما فيها ولا أيييييي حاجة من المفضل بتاعي لكن أصر إلحاج شديد هم 3 أجزاء أنا حضرت منهم جزئين. المهم للناس البتستهويهم المواضيع دي أفلام جميلة وحبكتها كويسة السلسلة اسمها سجّيل أيوة سجيل المذكورة في القرآن ذاتها لكن هم بنطقوها سجين (Siccin).

Quote: السلام عليكم عارف ، وضيوفك الكرام لماذا لايظهر الجني او الجنيه في الدول الاوربية او الاميركيه او الغرب عموما ؟ وهل هو حصري علي الدول العربية فقط ؟ فلم اسمع بوجودهم هناك قط .!! اؤيد كلام الاخوة الرافضين لتصديق هذا الشئ كما قال الاخ حاتم الحوري. فالامر يتعلق بثقافة الشعوب ليس الا ، اذا هناك مورثات داخليه ، تترجم في الواقع "نفسيا" ان شئ خارق قد حدث . لو رجعنا بالزمن فترة ، ورأو الهاتف ، والحاسب الالي ، والريموت كنترول ، سيتم تفسيرها فورا انه عمل غيبي وسحري ، من عمل الشياطين.

Quote: عاوزين تخوفونا عشان ما ننوم بالليل ....،!!!! لكن عجبني قصة زول الحواشات الكان بيربط المراية في بطنه.... .كدى نغير الموضوع شوية :: هوي يا ناس حي الطائف في الخرطوم :غيروا اسم حيكم من الطائف الى اسم سوداني ١٠٠في ال١٠٠.. .ما معقولة عشان سوداني واحد كان مغترب في الطائف(المدينةالسعودية الجدعت الرسول صلى الله عليه وسلم بالحجارة) وجا بنى ليه بيت سمح في المنطقة دي وتقوموا تسموا المنطقة باسم الطائف،هذه المدينة المشؤومة التي يسكنها الشياطين،،،،.. .يا اهل حي الطائف غيروا اسم حيكم قبل ان ينزل على حيكم غضب الله فان الله يمهل ولا يهمل،،،و قبل ان تسكن معكم العفاريت..... واقترحنا عليكم من قبل تسمية الحي باسم الاعتصام ...او ممكن تسميته باسم احد شهداء ثورة ديسمبر الظافرة ....

Quote: حكايات الجن والجنيات دي لا تخرج من التهيوات النفسية و معاها هلاوس سمعية وبصرية واستعداد نفسي يعني زول يجي جاهز ومصدق ومؤمن بوجود الجن فما عليه الا يسمع ليهو صوت كركبة ولا يشوف ليها لمبة هنا ولا هناك والباقي بتمو براهوووو اوهام ليس الا والمغالط يقبض لينا جني ولا جنية ويكتفو لينا نجي نشوفو.

Quote: بالنسبه للدين فيهو جانب مهم عشان كدا لازم نتعامل معاهو فى فهم القصه فى الدين الجن كائنات تعيش وسطنا والدين ادى بعض التوجيهات عشان مايحصل نوع من الاحتكاك والتصادم زى ماورد فى السنه عن مايقال عند دخول بيت الادب :الخلا او عند دخول المنزل وتغطيه الانيه والاكل باليمين وحتى لما تجى ترقد فى السرير نفضو باى قطعه قماش او رداء قبل الرقاد . الهنود فى القرى حيث الحيشان فيهم من لايترك السرير كما عند الصباح وانما بقلبو على جنب او يتكيهو على الحائط . عاده تانيه غسل او رش ارضيه المنزل فى ايام معلومه عندهم بماء مع (روث البهائم) طلبا للبركه والمال . حاجه تانيه عندنا فى السودان حكايه منع رش الارض بماء ساخن.

Quote: حبس حابس وشهاب كابس البوست دا مسكون امس جيت لقيت المستنير في البوست دا ومعاهو شواطينو المن سلخانة تمبول ديلاك. كتبت مداخلتين طويلات وعريضات. هسه جيت لا لقيت المستنير لا لقيت مداخلاتي.

Quote: غايتو قصص الجن دي بتذكرني قصص السحاحير ، قدر ما تمشي النيل بالليل في مناطق مقطوعة وجزر غير مأهولة في اي ساعة من اليوم ، ما حصل سمعت حاجة كشكشت ! نفس الشي لمن يقولو ليك البيت الفلاني ده مسكون ، الكلام ده كلو في الحلة طبعا ، لفيت الحلة دي زقاق زقاق من اولا لي اخرا سنوات طويلة لمن طلعت منها وبقبت ما بجي الا اجازات ، ما حصل في يوم واحد شفت او سمعت بي اضاني اي حاجة بأدب على انو في جن. رغم القصص البتتحكي ، ماحصل يوم في زول قبض ليهو سحار بحر ، او جني ولا قدر يحجز دربو بي طبق ولا اي مصيبة مثلا زي الحرامي لحد ما الناس يجو يشوفو دربو ولا حصل زول قدر يشيل حاجة من متعلقاتو .. غريب انو بعد الحكاوي دي كووولها مافي زول يطلع بأي دليل مادي ولا دليل ظرفي حتى طيب اسي ونحن في الزمن العجيب ده ، اقصد انو زمن وسائل التصوير بقت موجودة في اي جيب وأي زاوية ، وبرضو مافي زول قدر يصور حاجة واضحة؟ ام ان مادة كتلة الجن (ده اذا عندو كتلة) لا تخضع لقوانين حياة البشر على الارضي ويلزم وسائل تصوير خاصة بالعالم السفلي؟ عارف ناشد ، عايزين صور

Quote: انا عندي تجربة حقيقية مع الشياطين والجن .. سكنت في الرياض في غرفة في حوش في خلاء السلي مقطوعة من العمران .. صحيت من النوم فجأة نص الليل عاوز اشرب .. فتحت النور المفتاح جنب الباب الا اشوف ليك زول طويل وشعرو منكوش وعيونو حمر واقف في الركن جنب الباب .. بي خلعة وعشرقة قلت ليهو شنوووو !! اسمعوا ليك قال لي الليلة وين ؟؟ وهاكـ يا جرية ما وقفت الا قريب من منطقة العمران قاصد صديقي حسين دفع الله قعدت في حجر اخد نفسي وافكر في المصيبة دي .. ارحل كيف وكان رحلت بيباريني وعديد من الأسئلة ثم ..قمت واتوكلت وانا قريب من حوش السيد حسين قمت اتذكرت موضوع مهم ..! العصر كنت غشيت حراج القاسم وشلت لي مراية طويلة بطول قامة الزول وختيتها جنب باب الغرفة ونسيتها ..! المهم بعد تردد رجعت الغرفة .. وقلبت وش المراية على الحيطة وولعت النور وشغلت التلفزيون للصباح .. لكن عمك الشين اب شعر منكوش ما ظهر للآن !! وما حكيت القصة دي اطلاقاً قبل كدة لو ما الشيطان وسوس لي :)