هل ممكن ان تطلب المراة الزواج من رجل تحبه؟

سلامات للجميع
اولا يا مايا من الناس المااندهشوا لموضوعك
تانيا ختي في بالك نوعية المجتمع السوداني وهو مجتمع ذكوري المنشأ يعني السلطه "بضم السين وتسكين اللام" للرجل واحيانا كذلك السلطه "بفتح السين اللام" لانو اغلب الرجال حسي رقدوا "سلطه"
لكن بالرغم من ذلك وزي ما قال الاخ اسامه الخاتم المسالة دى بقت اكتر من متوفرة
وزمان كان في اهلنا الراجل لمن يغترب "الخرطوم" ولو بالغ مصر وقبل ما يرجع البلد عشان يعرس بيكلف اخوهو عشان يجهز ليهو مره على زوقو ويبلغ اهلها... اها العريس ده لمن يجي ولسبب من الاسباب عرسو يطرشق بيقوم يتنازل عن المره لاخوهو او ود عمو بنظرية "الاقربون اولى بالمره" يعني زيها زي اي سلعة
وجا الوقت البقو بيسالوا فيه المره وحسي بدت البت تجي لابوها وتقول ليهو يا بابا يا دادي يا بوي او ياحاج "كل حسب طبقته" اناما دايره "الخواض" انا دايره "وليد 500" مثلا يعني
ويا يابا عليك الله ما تقول ليهو لا

واها يا انسانه رايك شنو عقلية الرجل السوداني بتستوعب لا لا ؟ بس انتو براحه عليهو شويه شويه
صحيح في ناس بيروا انو البت البتصارح الرجل بالحب او رغبتا في الزواج بت جريئه زياده واحتمال توصف بالاباحيه لكن اكيد في فئات اخرى حتشوف الامر عادي وتوصف البت بانها انسانه مسؤوله وعمليه وعشان كده بيقولو لولا اختلاف الاراء لبارت السلع.....امسك شفتو تاني شبهنا المرأه بالسلعه...احي انا من الرجال ديل
بالمناسبه لغاية تاريخنا ده انت عارفه البيحصل شنو في الجنينه غرب السودان لو الراجل داير يعرس ليهو مره وهي ما دايراهو او اهلها ما موافقين او تكاليف العرس كتيره على العريس او اي سبب آخر... بيقوم العريس بخطف المره بنفسه او بيكلف اخوهو او ود عمو وبعد ده بتعتبر المره دي عرض من اعراضه كان ابت ام شاءت