Quote: A. Establish a network for direct patient involvement Engage patients to contribute their comprehensive tumor profile data to expand knowledge about what therapies work, in whom, and in which types of cancer.
هذه النقطة هى نقطة أنطلاقة جيدة .. أراكم نتواصل مع مجموعة الأبحاث .. لكي نصلوا لأرفاق معلومات الأخ هجو معهم .. وكيف يضموا الأخ هجو إلي مجموعة ال "سيرفايفال" .. وكيف يشارك في أبحاثهم ..
الأخ هجو .. أركم ننكشوف في هذا الأتجاه ..
بريمة
09-29-2018, 11:02 PM
احمد سيد احمد احمد سيد احمد
تاريخ التسجيل: 01-23-2013
مجموع المشاركات: 1257
السلام عليكم الاخ هجو والف حمدلله على سلامتك وتجربة كبيرة وسردك ليها قمة الابداع والامتاع والفائدة ومنتظرين باقي الطرائف والمواقف الحصلت ليك اثناء رحلة العلاج.لو عندك زمن شوف الموضوع دا يمكن يكون مفيد
Quote: شكراً يا ول أبا أحمد وشكراً يا هجو .. لدعم الفكرة ..في الغرب هنا .. مثل الأخ هجو ك ناجي survival .. ممكن يصير متحدث بأسم المنظمات التى تدفع الجهات المختصة نحو أكتشاف العلاج .. وهجو أنت نفسك فكر في أستثمار هذه التجربة .. أرمي أي شيئ تاني .. وقدم نفسك لمنظمات الأمم المتحدة والمنظمات العالمية ..وهنا البرنامج الذي تدعمه حكومة الولايات المتحدة .. وكان ومازال يقوده نائب الرئيس السابق جو بايدن ..Cancer Moonshotالاخ هجو تصفح الصفحة الفوق دي .. وتابع اللنكات .. أنا حاولت ومازلت لم أصل إلي جهة .. وقدم نفسك لهم ك ناجي من المرض ولديك تجربة تريد أن تشارك بها .. وأبدأ خطوة خطوة .. وأنا عايزك تكون في المنصات الدولية .. دي غير أنو بتفيد الأنسانية .. تساعدت أنت في مسألة تحاليك المستقبلية ..وخلونا نطور في أفكارنا .. خطوة خطوة .. عسي ولعل الله يفتح للأنسانية بفتح من خلال تجربة الأخ هجو ..أصدقاء هجو في المنبر .. العشم فيكم .. أيدكم معانا ..بريمة
ول ابا بريمه انا والله سعيد جدا بما تقدمه من أفكار وانا علي استعداد أقدم اي حاجه تفيد الآخرين من خلال تجربتي وفي اي مكان واي زمان والفكره بنبدا من المجتمع الحولك وتكبر ...وانا متاكد ممكن نعمل حاجه لو ختيناها في بالنا ...وانا مستعد زي ما ذكرت لذلك....اطلعت علي الرابط ودي حاجه ممتازه جدا ..وخلينا نشوف كيف نتواصل ولو ما عندك مانع تلفونك في الماسنجر الف الف شكر ول ابا بريمه
Quote: السلام عليكم الاخ هجو والف حمدلله على سلامتك وتجربة كبيرة وسردك ليها قمة الابداع والامتاع والفائدة ومنتظرين باقي الطرائف والمواقف الحصلت ليك اثناء رحلة العلاج.لو عندك زمن شوف الموضوع دا يمكن يكون مفيد
الاخ احمد سيد احمد الله يقبل حمدك وما تشوف شر ي رب الف شكر ...فعلا اطلعت علي البوست مفيد جدا جدا والف شكر ولسع في ذكريات وحكاوي كتيره حصلت أثناء فترة العلاج وكل مره ح احكي .... تحياتي
09-30-2018, 07:24 AM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
حتي اخوتنا في شمال الوادي لم يسلمو من التشخيص الخطأ .... هاتفني صديقي من القاهره وبدأ يحكي لي تجربته في مصر ومعاناته من القاوت أو داء الملوك .فقد أصبح شئا مرهق بالنسبه له وانه ظل يتردد علي القاهره علي مدار تلاته سنوات ولم يتحسن واخد الكثير من علاج القاوت.وحالته بداءت تمشي للأسوأ وقرر يجي بانكوك وسألني عن المستشفيات والأوضاع فقلت ليه رسل لي تقرير الطبيب وخليني اعمل ليك حجز في المستشفي وعلي ضوءه تاخد التاشيره وفعلا في خلال أيام قليله وصل بانكوك ونزل معانا في نفس العماره ...فقد وصل وضهره منحني كانه عجوز في الثمانين من عمره وعينيه وجفونه تدلان علي الارهاق والوهن..وحركته بطيئة جدا .وحجز في نفس اليوم في المستشفي وبداء الفحوصات وقد كان مهموما ولكن الأطباء طمنوهو وبعد يومين ظهرت جميع الفحوصات وطلع عنده رطوبه في الدم وما عندو قاوت وادوهو علاجات في خلال تلاته يوم اشوف ليك زولي مشي شارع العرب اشتري لبس الرياضه والجزمه الاسبورت الماخمج . وبقي لافي كداري. بعد ما كان الأيام الأولي يتحرك بالتاكسي .ما فضل ليهو الا يقول عايز تكسي للحمام .من شدة ما كان يعاني وبقي شغال تمارين حسب وصية الأطباء والضهر الكان منحني بقي مستقيم زي عمود الكهرباء وقمة في النشاط والحيويه وسال من اسواق الخضار والجزاره وفعلا مشي الجزاره وجاب لسان البقر و، أم فتفت الكان محروم منهن سنين طويله وبقي كل يوم يتفنن ويبدع في طبيخ اللحوم الحمراء ذات البروتين العالي كانما عايز ينتقم من فترة الحرمان. وقضي معنا ايام جميله واصبح مهتم ببرنامجي الغذائي فكان يجيد طبخ الاسماك و الكائنات البحريه ورجع في صحه عال العال .وقال لي والله القاهره دي تاني حبوب نزله ما اشتريهم منها
ياخ إنت زول ضكران لمن بي هناك يا هجو ربنا يلطف بيك دوما ..ما بعرفك لكن يشهد الله الواحد من خلال الإطّلاع على تجربتك عرف فيك إنسان قوي ونادر. ربنا يحفظك ياخ
09-30-2018, 02:04 PM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
Quote: ياخ إنت زول ضكران لمن بي هناك يا هجو ربنا يلطف بيك دوما ..ما بعرفك لكن يشهد الله الواحد من خلال الإطّلاع على تجربتك عرف فيك إنسان قوي ونادر. ربنا يحفظك ياخ
الاخ فيصل فتح الله الله يديك العافيه وانشاءلله دايما بخير ي رب الحمدلله علي نعمة حباني الله بها حب الاصدقاء والآخرين فقد كانت تمنحني القوه والثبات في مواجهة الكثير من الصعاب الف شكر .....وربنا يديم العافيه
10-01-2018, 10:19 AM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
أعطني الناي وغن فالغناء سر الخلود و أنين الناي يبقى بعد أن يفنى الوجود هل اتخذت الغاب مثلي منزلا دون القصور فتتبعت السواقي وتسلقت الصخور هل تحممت بعطر وتنشفت بنور وشربت الفجر خمراُ في كؤوس من أثير أعطني الناي وغن فالغناء سر الوجود وأنين الناي يبقى بعد أن يفنى الوجود هل جلست العصر مثلي بين جفنات العنب والعناقيد تدلت كثريات الذهب هل فرشت العشب ليلاً وتلحفت الفضاء زاهداً في ما سيأتي ناسيـًا ما قد مضى أعطني الناي وغن فالغناء عدل القلوب وأنين الناي يبقى بعد أن تفنى الذنوب أعطني الناي وغن وانس داء ودواء إنما الناس سطور كتبت لكن بماء ****************** الوجود سؤال كان يؤرقني أثناء الألم فقد كنت دائما أهرب من الألم الصباحي بانغام فيروز فالغناء سر الوجود والالم عدو الوجود مابين الغناء والالم محطات كنت ارتادها بكل حب وامل في أن تكون محطة الالم ترازيت وعلي ان اعبرها وانا اغني وازرع الابتسامه فيروز تغني وسماء بانكوك تمطر وبناتي هناك يصلين من أجلي إخوتي يدعون لي ويصلون أصدقائي في انتظاري لنشرب نخب العوده من رحله قد اختارتني ولم اختارها فالناي ينسيني الداء والدواء وأستدعي العصريات في الذاكره امي تقلي البن لابي المدد في ذلك العنقريب الهبابي رائحه البن تتخلل مسامات رئتي وتتفتح شرايني علي رائحة الياسمين التي تتعطر بها حبيبتي حينما كنا نلهو ونعيش سنوات الحب وحينما تغني اتخذت الغاب منزلا تتحول الذاكره الي شوارع تعج بالحرية وحياة كريمه وحقول وقمح واطفال يتهامسون الدرس الدرس المستقبل..وقد كان الفجر حلمي والعودة مستشفيا واعانق الاحباب .وفجاءه يدخل جاري العزيز دون استئذان كانه قادم من عصر ظلامي يجهجه أفكاري ويخرص فيروز بصوته الجهور اللعلاع...هسع انت من الصباح بدل تصلي ...تسمع في الغناء مش كان احسن تصلي عشان ربنا يغفر ليك ذنوبك قلت بي سري شوف بالله الفهم ده ناسي انه الله بيغفر الذنوب بي رحمته ..وليس بي صلاتي ولو صليت العمر كله ممكن ما يغفر لي وممكن ما اصلي ويغفر لي ..ان الله مخير فينا نحن عباده. لم احتاج ان ارد له ...فردت فيروز. انين الناي يبقي بعد أن تفني الذنوب.انس داء ودواء إنما الناس سطور كتبت لكن بماء وقلت رجائي ي جاري تاني تعال بعد فيروز..لانو كل ما اشوفك بتذكر السرطان ...فضحك وخرج. كنت متأكد بأنه لم يفهم شئا..ولكن انا في نظره عبدا عاصي....
10-01-2018, 11:34 AM
الطيب عباس الطيب عباس
تاريخ التسجيل: 09-22-2015
مجموع المشاركات: 2269
Quote: احتاج ان ارد له ...فردت فيروز. انين الناي يبقي بعد أن تفني الذنوب.انس داء ودواء إنما الناس سطور كتبت لكن بماء
والله يا هجو انا متابع سطر سطر الف حمد لله علي السلامه تاني وربنا ما يوريك شر والاقتباس اعلاه عميييق يخ .. انت زول فنان واكيد ربنا بريدك لو ما بريدك ما ابتلاك وما ابتلاك الا ليعافيك وحمد لله علي السلامة يا ضكران
10-01-2018, 07:15 PM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
Quote: والله يا هجو انا متابع سطر سطر الف حمد لله علي السلامه تاني وربنا ما يوريك شر والاقتباس اعلاه عميييق يخ .. انت زول فنان واكيد ربنا بريدك لو ما بريدك ما ابتلاك وما ابتلاك الا ليعافيك وحمد لله علي السلامة يا ضكران
الاخ الطيب عباس الله يديك العافيه وشكرا كتير علي الاطراء.وطبعا ده من ذوقك الراقي.. هي محاولات كنت دائما اجعل من فترة المرض تجريب وبقنع نفسي مرات بقول امكن اطلع بي علاج جديد للسرطان مره بقول استخدم الموسيقي لقتل الخلايا السرطانية فبكون حايم مع فيروز مارسيل خليفة ويتني هيستون وكريج ديفيد وبوب مارلي واسماعيل عبد المعين والحوت وخضر بشير وخلف الله حمد ..وأولاد حاج الماحي والشيخ البرعي وابوكساوي ..القائمه تطول ومرات كتيره بقول الفرح والضحك نصف العلاج بخلق جو فرايحي..واحيانا كتيره بقول اشعار ود الرضي خير علاج .فبسرح مع الحقيبه..زي ما قالو الغرقان بتعلق بي قشه. فكنت بتخيل القشه دي عباره عن مركب ضخم وانا متعلق فيهو لازم اصل القيف...والحمدلله علي نعمة الصحه والف شكر علي المتابعه والمرور. وربنا يديك العافيه
(عدل بواسطة Haju Muktar on 10-01-2018, 07:17 PM) (عدل بواسطة Haju Muktar on 10-01-2018, 07:19 PM)
10-02-2018, 06:55 AM
نعمات حمود نعمات حمود
تاريخ التسجيل: 07-14-2008
مجموع المشاركات: 2521
الاخ ابن العم ...هجو ..حمدلله السلامة والقوة والحمدلله العافية .. كنت قوي في كل المراحل ولانك انسان نقي كانت هذه الشفافية ... كنت اتابع اخبارك من مكان لاخر ولكن كان لتجاربي خوفي اكبر من هذا المرض اللعين ...الحمدلله اعدت لي ثقتي بان المرض مابكتل زول وانه الموت لايحتاج لسبب والعندو عمر بعيشو باب حال
انا فرحانة انك تغيرت اولا كما كنت احتج دوما لك بانك يجب ان تتغير والحمدلله انني تيقنت تغييرك اما امر المرض فهو الشافي والكافي ..ربنا فقط اتمنى نتلاقى في الدنيا وترجع تمام لاسرتك ولاهلك ولبناتك وزوجتك بالف خير واحسن مايكون ويااارب كااامل الصحة ياهجو ...وتحياتي لعبدالباقي وكل الاهل
نعمات حمود
10-02-2018, 07:48 AM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
Quote: الاخ ابن العم ...هجو ..حمدلله السلامة والقوة والحمدلله العافية ..كنت قوي في كل المراحل ولانك انسان نقي كانت هذه الشفافية ...كنت اتابع اخبارك من مكان لاخر ولكن كان لتجاربي خوفي اكبر من هذا المرض اللعين ...الحمدلله اعدت لي ثقتي بان المرض مابكتل زول وانه الموت لايحتاج لسبب والعندو عمر بعيشو باب حال انا فرحانة انك تغيرت اولا كما كنت احتج دوما لك بانك يجب ان تتغير والحمدلله انني تيقنت تغييرك اما امر المرض فهو الشافي والكافي ..ربنا فقط اتمنى نتلاقى في الدنيا وترجع تمام لاسرتك ولاهلك ولبناتك وزوجتك بالف خير واحسن مايكون ويااارب كااامل الصحة ياهجو ...وتحياتي لعبدالباقي وكل الاهل
بنت العم العزيزه نعمات حمودالله يقبل حمدك ويديك العافيه المرض عمرو ما كتل زول ولكن لكل زول عمر محدد وساعات محدوده اذا تمت صاحب الامانه بياخده والحمدلله التغير دايما يكون تغيير النفس واتمني ان الله يغير ما بنفسي للأحسن...وبعدين انت ما تحتجي خالص ..انت تامري..او بالأصح احلام سعادتك اوامر وانشاءلله نتلاقي في ساعات خير ..وتحياتي الاهل جميعا ...وتوصل تحاياك لي عبدالباقي كوني بخير ي رب
(عدل بواسطة Haju Muktar on 10-02-2018, 07:59 AM) (عدل بواسطة Haju Muktar on 10-02-2018, 08:02 AM)
10-02-2018, 02:51 PM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
الورد شئ جميل ....كنا نشاهده في المسلسلات عند زيارة المريض في المستشفيات وأحيانا في زيارة المقابر ..والعشاق حينما يتهادون ويتبادلون الحب الورد يكون حاضرا..في ثقافتنا أو في تربيتنا الريفيه كانت لزهرة شجر العوير..حضورا في لهونا ونحن صغار كما أن وردة شجرة الياسمين الصفراء تمثل قمة علاقتنا بالجمال ليس لشكلها الجميل فقط ولكن لذلك الرحيق أو السائل الذي يشبه اللبن في داخلها حيث كنا ننافس النحل في رشفه بعد قطف الورده ورشفه من اسفلها .هذه قمة ثقافتي عن الورده التاريخيه ..وفي أثناء وجودي في المستشفي وانبوب التغذيه مركب في أنفي وضاغط علي الحلق من الداخل كان الألم صعب واعاني من القدره علي الكلام فكنت استخدم ورقه وقلم للمخاطبه أو الردود .وفي تلك الأيام كانت العماره بها سودانيين كتار جدا وصادف جارنا وصديقنا محمد حسن من أبناء مدني وكنا بحكم المنطقه قد تداخلنا مع بعض فهو مرافق لابناءه ربنا يكتب لهم الشفاء ويديهم الصحه فهو شخصيه اجتماعيه ويحب الهظار فكنا كثيرا ما نتناقر زي ما بقولو فبدأ النقار حينما كان ينزل لمكنات الغسيل في أسفل العماره وطبعا المكنات اتومتك بتخت الملابس وبترمي العمله( كوين) وتشغل المكنه ترجع ليها بعد ساعه او خمسه وأربعين دقيقه بتكون انتهت ...فكان صاحبنا بنتظر بالقرب من المكنه كانه حارس مويه في ابوعشرين...( ابوعشرين عباره عن جدول داخل الحواشات) فكنت دايما بشاغله يقول ليهو ياخي قوم لف انت حارس مويه..القصه دي بتشتغل براها فكنا نضحك ...فجاءني زياره في المستشفي يحمل ورد ...قال لي والله ما تقول حاجه الا تقبل الورد ده لانو جايبو من ابوعشرين ...ما عرفت اضحك ولا اقول شنو ..بس كتب ليهو في الورقه ...ورد يا .......
10-02-2018, 03:36 PM
يوسف الطيب احمد إدريس يوسف الطيب احمد إدريس
تاريخ التسجيل: 03-03-2014
مجموع المشاركات: 1226
ألف حمد لله على السلامة وزي ما قالوا الاخوان قبلي انت انسان قوي قهرت مرض جبار أسأل الله يمن عليك بوافر الصحة والعافية وأن يديم عليك نعمة الصحة والعافية
يلا منتظرين الكرامة وصور الخرفان (وش ضاحك)
10-02-2018, 06:15 PM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
Quote: ألف حمد لله على السلامة وزي ما قالوا الاخوان قبلي انت انسان قوي قهرت مرض جبار أسأل الله يمن عليك بوافر الصحة والعافية وأن يديم عليك نعمة الصحة والعافية
يلا منتظرين الكرامة وصور الخرفان (وش ضاحك)
الاخ يوسف الطيب الله يقبل حمدك وما تشوف شر ي رب والكرامات لو في طريقه تتوزع في المنبر خرفان كان وزعتها مداخله مداخله وبوست بوست .ضبايح بي عدد الكلمات شكرا كتير علي المرور
10-02-2018, 09:56 PM
Sudany Agouz Sudany Agouz
تاريخ التسجيل: 04-28-2002
مجموع المشاركات: 9014
Quote: الإبن الحبيب هجو ..كم أنت حساس يارجل .. لأنى أشعر بشعورك الجميل ..ومما زاد تأكدى وتأكيدى من إحساسكم المرهف هو حبكم الجميل للفنانةالجميلة فيروز .. بالفعل .. ولاسيما وهى تغنى .." أعطنى الناى وغنى " ..فهاهى الأغنية بذاتها ..فكلنا الآن نستمع إليها ..
العم العزيز أرنست لكي حبي وتقديري دايما انا علي موعد مع فيروز ففي صباحات كمبالا ابدا يومي بغنجان قهوه علي أنغام فيروز....وانا بشرب قهوتي الصباحيه اليوم فتحت البوست كأني علي موعد مع مداخلتك والناي بيننا كانه أثير الروح حتي تلتقي أرواحنا في هذا الصباح الاستوائي الف الف شكر علي هذا الاستماع المتحضر
لك حبي وتقديري وامتناني
(عدل بواسطة Haju Muktar on 10-03-2018, 06:26 AM) (عدل بواسطة Haju Muktar on 10-03-2018, 07:06 AM) (عدل بواسطة Haju Muktar on 10-03-2018, 07:07 AM)
10-03-2018, 05:46 PM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
ومن طرائف الورد أيضا كان أحد السودانيين رجل ستيني لطيف وكنا كثيرا ما نتهاظر ونتبادل القفشات فهو جاء مرافقا ...المهم كان مولع بي امراءه سودانيه كانت تتعالج في تلك الأيام..وكان عمنا هذا ينزل من شقته في الصباح الباكر ينتظر هذه السيده ويراقبها واحياننا كثيره يسير خلفها إذا ذهبت الي شارع العرب او المولات فقد كان معظم سكان العماره يقضون حوائجهم من هناك ...فهو يمشي خلفها من بعيد .فكانت قمة متعته متابعتها وما ناقص الا يكتب شعر . واحيانا يغازلها كانه مراهق...فكنت كثيرا ما اشاغلوا بيها ونضحك ونقضي وقتا ممتعا في النكات والهظار..وفي أحد الأيام تعبت هذه السيده ورقدت مستشفي ..وانا كنت تحت في العماره جاءني عمنا هذا وقال لي فلانه في المستشفي وعايز امشي ليها اشيل شنو معاي ..قلت ليهو طبعا تشيل ورد .وقال لي الورد بجيبوهو من وين ..وصفت ليهو امراءه تبيع الورد بالقرب من العماره ..ولكن هذا الورد كان يباع خصيصا للبوذيين حيث يضعونه في تمثال بوذا والملفت للانتباه انه كان في كل مبني أو منزل تمثال لبوذا وفي مدخل بانكوك وانت طالع من المطار تقابلك لافته كبيره مكتوب فيها بوذا ليس ديكوريشن. لكي يعلم الزائر ان بوذا في المباني يجب أن يحترم .يبدو أو يقال أن أحد السواح العرب كان قد تبول علي تمثال بوذا .ولهذا كتبت هذه اللافته..اذن الورد ليس ورد طبيعي بل ورد مقدس ...فذهب وأرسلت خلفه أحد الشباب ليتبعه ويصوره ويرسل لي الفيديو في الواتساب .بعد جا راجع سالتو ..اها ي حاج اشتريت الورد .قال لي ابدا الورد بتاعه طلع قديم وما عجبني...ضحكت قلت ليهو يا حاج ست الورد طردتك وقالت ليك ما ببيع ليك صاح قال لي عرفت كيف وريتو الفيديو وقلت ليهو ده ورد خاص بي بوذا...زعل وهاج..قال لي انا غلطان البستشيرك انت .والله ذاتو ما غلطان عليك لمن جاب ليك السرطان ي ...... وضحكنا ....
عبدالحليم رجل حليم سوداني كان يعمل في ال UN في تايلاند سوداني جد فقد تعرفت عليه أثناء جلسات السبت في عمارة معاويه وهو من الحرقه شرق مدني وهو يعقوبابي حتي النخاع فكان أول ما لفت انتباهه اسمي بحكم أن اسم هجو خاص باليعقوباب ..الشيخ هجو ابقران..فقد حكيت له علاقتي باليعقوباب فقد كان والدي رجلا متصوف فقد أطلق علينا جميعا اسماء شيوخ مكاشفيه ويعقوباب . فكان عبدالحليم يناديني دوما بالشيخ هجو ابقران واصبح مهتما بحالتي فيزورني بصوره يوميه في الشقه بعد انتهاء الدوام او بعد المغرب ونتجاذب أطراف الحديث لوقت متاخر فهو يسكن بالقرب من عمارة معاويه ..ومن شدة اهتمامه اتصل علي اهلنا اليعقوباب تلفونيا وأخبرهم بأنني مريض بالسرطان وطلب منهم الدعاء لي فقد كان يدعوا لي دوما بالشفاء ويندههم بأن يغيثوني..فكان يقول لي اليعقوباب ما بنسوك انا كلمتهم ..اليعقوباب اهل الله دعواتهم واصله ..حليم رجل مهذب ووقور عكس صديقنا عمر مختار صاحب لسان سليط وفالت والغريبه هم اصدقاء حتي كاد عمر مختار ان يهد في حليم فالإثنان يتمتعان بروح مرحه وقلب صافي كما الحليب. فكثيرا ما يترددا علي سويا فعمر بلسانه المتبرئ منه وحليم بلسانه المهذب نتبادل القفشات والونسه وفي احدي المرات تعبت وكنت راقد في المستشفي زارني حليم ووجد معي عمر وكنت لا استطيع الكلام واخاطبهم بي ورقه اكتب عليها او بالاشاره وجاء مع حليم سوداني زميله فأخذ يقرأ لي القرآن وكنت انظر الي حليم وجدت عيناه مرقرغه كادت الدموع تنهمر منها ودموعه كانت قريبه خلاص وعمر يشاغب ..وحينما فرغ صاحبنا من قراة القرآن وودعاني خرج معهم عمر نحو باب الغرفه قال له حليم .بحزن شديد وصوت متحشرج ي عمر تلفوني عادة بقفلو بالليل لكن ح اخلي فاتح لو في اي حاجه اضربوا لي طوالي ...ربنا يستر...عمر ضحك وجاني كلمني ...كتبت ليهو في الورقه قلت ليهو قول لي حليم اقفل تلفونك ساي الشقي عمرو بقي وضحك عمر مختار..وقال لي انا قلت ليه فعلا اقفل تلفونك ال....ده بكره يبقي كويس ويجي يطلع ...بي لسانو...عاينت ليهو ورفعت يدي وبسط راحة كفي ورفعت الاصبع الفي النص الي اعلي وتركت الأربع أصابع مستويه دلاله علي .....
من اول ايام سكنت في عمارة معاويه كنت دائما اجلس تحت في العماره بها فناء كبير عباره عن موقف للعربات وشبه حديقه و بها تمثال بوذا ولاحظت وجود امراءه منقبه وترتدي عبايه سوداء كل ما اعاين ليها القاها تعاين لي واحيانا تجي تجلس بالقرب مني وتعاين لي لمن بقيت اخاف منها والهواجس بقت تدور في راسي ياربي تكون من داعش ..ولا انا لاقيته في مكان ما وعندها معاي مشكله ..ياربي تكون دي من الجن ولا انا بتخيل ..ولا احتمال السرطان حولني لي زول مجنون بتاع خيالات ...خصوصا هي بتعاين لي وما بتتكلم خالص وما ظاهر منها الا عينيها وهي عيون كبيره محدده بكحل مما يجعلها تبدو متسعه و الرموش متدليه في خطوط مستقيمه مرسومه بعنايه وبريق العيون يلسع القلب مما يجعله يرجف.كانت دائما ترتدي اللون الاسود وحذاء اسود وكل شئ اسود الا بياض العيون .مما جعلها بالنسبة لي غامضه .كنت اعمل نفسي منشغلا بالتلفون واتحرك من مكاني الي نهايه فناء العماره وما أن أجلس الا واجدها تحركت وجلست بالقرب مني ...فاشغل نفسي بالتلفون واتحرك من مكاني فتتحرك معاي..فاقرر ان أهرب من ملاحظتها. اطلع الي شقتي.انعل سلافيل الشياطين التلتاشر الخلو خيالنا كله شك في شك .فأحيانا اشك في انها العميل رقم صفر او زعيمة مافيا .او تاجرة أعضاء تكون متفقه مع ناس المستشفي .لمن يعملوا لي العمليه عايزه تشيل مني كلي .شكوك تظنون ما عندها معني غير خزعبلات درامية ..ونا علي هذا الحال كم يوم .وفي مره من المرات زرتني زرة غنمايه في طاحونه..حيث كنت نازل من شقتي في الطابق الرابع مستخدم الأسانسير وكنت لوحدي وفجاءه وقف الأسانسير في الطابق التاني وفتح وظهرت ذات النقاب تنظر إلي بعيونها ودخلت الأسانسير وانا في سرعة البرق خرجت من الأسانسير في الطابق التاني ونزلت بالسلم ولمن نزلت الطابق الأرضي القاها ليك في بير السلم.طوالي رجعت بالسلم في حركه لا شعوريه الي الطابق الرابع .وقررت الا انزل في ذلك اليوم ..واحيانا كتيره انزل القاها في فناء العماره برجع طوالي .وفي يوم سالت معاويه عنها .قال لي دي يمنيه ليها سنتين ساكنه معانا هي وزوجها وبناتها.فحكيت ليهو قصته معاي ..ضحك وقال لي هي مسكينه بتحب تتونس ....
عن ابوعبدالله الكويتي ابو عبدالله او كبسور العماره كما كنا نطلق عليه في يوم من أيام الزهج والنرفزه بتاعت الكيموثربي نزلت في العماره تحت قاعد في كتبتي المعهوده في منتصف النهار جاءت عربيه مكتوب فيها مستشفي باولو ونزلت منها أسره كامله امراءه ستينيه في العمر ورجلين في الاربعينات يمتاذون باجسام ضخمه ورياضيه حيث العضلات تبدو بارزه مع لبس الفنايل المحزقه ومعهم بنت شابه عشرينيه وشاب صبي واستقبلهم توني عامل العماره ورفع لهم الشنط وصعدو جميعهم بعد أن بادلوني التحيه و ما تمت خمسه دقايق نزل أحدهم وجاء سلم علي ..الاخ سوداني .قلت ليهو نعم سوداني مرحب بيك .قال لي انا أبوعبدالله من الكويت واحب السودانيين كتير السودانيين اخوه عاصرناهم كتير درسوني في المدرسه وايضا دربوني في الجيش انا ضابط في الجيش الكويتي وبكتب شعر وبعرف العلامة عبدالله الطيب واقرأ ليك قصيده كتبتها وانا في الطياره .نحن جينا قبل الشويه من الكويت مع امي مريضه والام شئ عظيم وانا لو ما جيت مع امي ربنا يحاسبني وانا نفسي اتزوج سودانيه وبحب الاكل السوداني وايد...ده كلو وانا بس بعاين وعرفت انه انا قدام شخصيه ما طبيعيه. حاولت اقاطعه لكن سبقني وبدا يقرأ لي في قصيده .وانا اسمع واتململ في الطريقه التحلني وبعد شويه خش لي في انه ضابط في الجيش والحكومه ادتو طياره خاصه جاب بيها امه وانه شال اجازه من الملك شخصيا بعد ما البرلمان رفض يديهو اجازه ...وفجاءه سكت انا قلت دي فرصه انا استأذن وانفد بي جلدي. لكن مسكني من يدي وسألني انت مالك هنا قلت ليهو جيت اتعالج قال لي الف سلامه عشان كده ضعفان عندك شنو قلت ليهو سرطان قال لي كفاره السرطان عايز اكل بس تاكل كتير بتبقي كويس .قلت ليهو وطيب انت جيت مع امك ماله قال لي عندها سرطان ثدي .قلت ليهو طيب جايبنها هنا لي هناك اكل ما كو....قال لي لا سرطان النسوان بختلف من سرطان الرجال ... نواصل عن ابوعبدالله
10-08-2018, 12:18 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27492
. أخي الحبيب هجو ألف حمد لله على سلامتك ، ونحمد الله كثيراً الذي ألبسك ثوب الصحة والعافية ، فهو الشافي وهو الكافي نعم المولى ونعم النصير ... كنت قوياً هجو في مواجهتك لذلك المرض اللعين ... سقف الثقة بالله كان عندك عالياً ... وإرادة الحياة كانت عندك قوية .. وروحك المعنوية كانت عالية في كل المراحل والتجارب التي خضتها في اكثر من دولة قبل مجيئك لمحطة شفاءك تايلند. . تجربتك أفرزت لنا دروس مستفادة كثيرة .. وهي مهمة كي يطلع عليها الناس ، أتمنى أن تخرج هذه التجربة في كتاب فهي جديرة بأن تلهم المرضى الكثير من معينات الشفاء ، خاصة إن أمراض العصر الذي نعيشه اصبحت كثيرة وخطيرة. . لي صديق وزميل في العمل وقعت والدته في الحمام وأجريت لها عملية بالسودان اقتضت عمل مسامير لتثبيت الكسر ... إلا ان الجرح لم يشفى وأُحضرت للدوحة فقرر الأطباء بتر الرجل ... أفأخذها فوراً لتايلاند وأُدخلت المستشفى الأمريكي وأعتقد هو نفس المستشفى الذي تعالجت فيه هجو... عادت لنا الحاجة بعد شهر وهي تمشي على رجليها. . القاهرة مضيعة فلوس ومضيعة زمن ليس في صالح المريض.. وأصبح يكثر فيها الغش... توجيه المرضى للوجهة الصحيحة رسالة يمكن أن يحملها ( الكتاب ) الذي نأمل ينال اهتمامك وينالك ثواب. . سعادة والله أن نراك وقد استعدت عافيتك ، ونرفع قبعاتنا ( عِممنا) عالياً لأسرتك التي صبرت وتحملت ولأصدقاءك الذين ساندوا وآذروا ... ولإبن خالتك الذي تمنيته إبن خالتي... . ..................................................................... ولك أمنياتي الطيبات هجو
10-09-2018, 10:42 AM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
Quote: . أخي الحبيب هجو ألف حمد لله على سلامتك ، ونحمد الله كثيراً الذي ألبسك ثوب الصحة والعافية ، فهو الشافي وهو الكافي نعم المولى ونعم النصير ... كنت قوياً هجو في مواجهتك لذلك المرض اللعين ... سقف الثقة بالله كان عندك عالياً ... وإرادة الحياة كانت عندك قوية .. وروحك المعنوية كانت عالية في كل المراحل والتجارب التي خضتها في اكثر من دولة قبل مجيئك لمحطة شفاءك تايلند. . تجربتك أفرزت لنا دروس مستفادة كثيرة .. وهي مهمة كي يطلع عليها الناس ، أتمنى أن تخرج هذه التجربة في كتاب فهي جديرة بأن تلهم المرضى الكثير من معينات الشفاء ، خاصة إن أمراض العصر الذي نعيشه اصبحت كثيرة وخطيرة. . لي صديق وزميل في العمل وقعت والدته في الحمام وأجريت لها عملية بالسودان اقتضت عمل مسامير لتثبيت الكسر ... إلا ان الجرح لم يشفى وأُحضرت للدوحة فقرر الأطباء بتر الرجل ... أفأخذها فوراً لتايلاند وأُدخلت المستشفى الأمريكي وأعتقد هو نفس المستشفى الذي تعالجت فيه هجو... عادت لنا الحاجة بعد شهر وهي تمشي على رجليها. . القاهرة مضيعة فلوس ومضيعة زمن ليس في صالح المريض.. وأصبح يكثر فيها الغش... توجيه المرضى للوجهة الصحيحة رسالة يمكن أن يحملها ( الكتاب ) الذي نأمل ينال اهتمامك وينالك ثواب. . سعادة والله أن نراك وقد استعدت عافيتك ، ونرفع قبعاتنا ( عِممنا) عالياً لأسرتك التي صبرت وتحملت ولأصدقاءك الذين ساندوا وآذروا ... ولإبن خالتك الذي تمنيته إبن خالتي... . ..................................................................... ولك أمنياتي الطيبات هجو
الاخ محمد فضل الله المكي سلامات والله يقبل حمدك وما تشوف شر ي رب الحمدلله ربنا وفقني في كثير من الخيارات وقدرني علي تحمل الكثير فكرة الكتاب شغال عليها وطبعا الكتابه علي المنبر مباشرة بتكون بالنسبة لي كتابه اوليه ومحتاج إعادة الكتابه... الف حمدلله علي سلامة والدة صديقكم .والشواهد كتيره ففي فترة علاجي شاهدت كم حاله جات من السودان وكان التشخيص خطأ. وفي واحده من الحالات التي اذكرها كان سوداني جاء من الخرطوم ومعاهو ولدو والظاهر كان عملوا ليهو منظار والمنظار كان فيهو بكتريا وكان رأي الأطباء بأن نصحو الابن بأن يأخذ والده ويرجع بعد عملوا الفحوصات وقالو ليهو المسأله دي متاخره ولو نحن مسكناهو في المستشفي انت ح تضيع قروش وصرف وما ح يكون في نتيجه .ولكن الابن اصر وفعلا بعد فتره بسيطه الرجل توفي .وايضا شهدت رجل سوداني كان في الغرفه الجمبي ونصح الطبيب المرافق بأن يأخذ المريض ويرجع لانهم ح يخسرو قروش والمستشفى ما عندها علاج تقدمة ليهم .وانا احترمت المستشفي والأطباء كثير جدا لانه لو كان ما امينين مع أنفسهم كان خلوهم واخدو قروشهم. طبعا تايلاند اتقدمت كتير في الطب والخدمات الطبيه .وفعلا الأخوه المصريين تدهوروا كتير في نواحي كتيره جدا منها الطب طبعا ...... الف شكر علي مرورك الجميل وربنا يديك العافيه انشاءلله
10-09-2018, 09:59 AM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
مع أبوعبدالله احيانا الجهل مفيد جدا .................. احتل أبوعبدالله كنبتي في العماره وأصبح من المداومين علي الجلوس فيها وكل ما انزل القاهو قاعد برجع طوالي وجميع سكان العماره حينما يشاهدونه يهربون منه لأنه في خلال يومين عرفه جميع السكان وقراء لهم شعر يكفي سوق عكاظ لمده عشره سنوات وأطلق عليه اسم كبسور البراي فالعماره وصلت حد الاستيكه .وأصبح سكان العماره يتحاشون الجلوس في فناء العماره... وطبعا طلع اكول جدا ما أن يلتقيك أول حاجه بيسالك فطرت ولو قلت ليهو فطرت بيزعل جدا ولو قلت ليهو ما فطرت ح يسألك طوالي فطوركم شنو ويقول ليك انا لي تلاته يوم ما فطرته ولازم تسوقني افطر معاك. وكان صاحب احمد جدا.فاحمد يمتاز بي طول البال . وفي ذات يوم فطر مع احمد الصباح ضربوا فول كارب جدا وفي نفس اليوم قابل احمد المساء سالو قال ليهو شو طابخ اليوم. احمد قال ليهو والله الخال قال نفسو في كفته وظبطها ليهو..قال ياسلام الخال ذواقو راقي وايد في الأكل و انا بحب الكفته وايد والله ..وانا ي أحمد لي تلاته يوم ما اكلت جوعان ممكن تديني منها صينيه .احمد قال ليهو ي ابو عبدالله هسع الصباح مش اكلت معاي فول .. استدرك ..طوالي قال ليهو والله انا كتبت قصيده جديده أقرأها ليك .احمد قال لا لالا لا . دقيقه خليني اجيب ليك الكفته انت ليك تلاته يوم ما اكلت. ... وفي يوم الوقوف بي عرفه كان السودانيين صايمين وعاملين فطور وجبات سودانيه.ومجتمعين في ساحه العماره تحت . نزلت لقيت أبوعبدالله تحت العماره قال لي والله السودانيين ماشاء الله عاملين اكل كتير واكلنا الحمد لله بس مشكلتهم بعملو اكل سوداني .وما يعملون كبسه ولا مندي .. وطوالي خش لي في قصيده عصماء وبقرا فيها وماسك يدي والقصيدة اطول من خط الاستواء ابت تنتهي وقمت نتلت يدي .لكن هو كان اقوي مني .ففكرت اتخارج منو نهائي .وقاطعتو وقلت ليهو تعرف ي أبوعبدالله انا ما عندي سرطان .قال لي طيب شو عندك قلت ليهو عندي ايدز في البنكرياس. طوالي فك يدي و رجع لي ورا ومن اليومداك بقي ما بقعد في الكنبه ولو لاقيتو سلمت عليهو طوالي بجري مني .ولو شافني بخلي لي الشارع ...وانا اضحك وبقيت انا بمشي أفتشه وهو يهرب مني
10-12-2018, 05:26 AM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
ام جميل هي أمراءه كويتيه تبدو في الاربعينات ولكن حينما تحكي عن أولادها واعمارهم تعرف انها ستينيه جاءت إلي بانكوك برفقة ابنتها .وابنتها شابه جميله تبدو في منتصف العشرينات حيويه جدا واجتماعية دايما في العماره تكون في حالة ونسه وهظار مع سكان العماره وهي كانت تتعالج من سرطان في الثدي ومنفصله عن زوجها ومعها ابنها ذو الخمسه سنوات طفل مشاغب وكثيرا ما يكون يلعب في فناء العماره ومعه جدته .في العماره يوجد جهاز انذار للدخان. لاحظت في احدي الشقق الظاهر كان في أحد السكان فاكر الجهاز كاميرا..لانه كان في منتصف سقف الغرفه وقصاد السرير .فالظاهر خاف من التصوير .فجاب ورق ولزاق وقفله ....اها ام جميل في احدي الايام ولعت بخور والدخان كبس في الغرفه .وأجهزت الانذار ضربت كأن هناك غاره حربيه وجميع سكان العماره في أقل من لمح البصر كانو في ساحة العماره وفي مقدمتهم ام جميل وايضا كانت هناك امراءه اثيوبيه كبيره في السن كنت دائما اشوف سايقنها بي كرسي متحرك .في ذلك اليوم نزلت السلالم بي رجليها فاحيانا الخوف من الموت يبعث قوه خارقه للانسان .وكان عمال العماره مدربون في لحظات كانوا في شقة ام جميل وهم يحملون طفايات الحريق .وحينما وجدوها بخور .وتحولت العماره الي هرج ومرج فانتبهت النساء الي نزولهن بازياءالنوم والبيت.وفجاءه صرخن وجرن ...ورجع الناس الي مساكنهم ما بين مستهجن ومستاء. وكانت ام جميل تضحك كأنها لم تفعل شئ. وذات يوم كانت تجلس معي في الكنبه تحدثني عن نسابتها وقساوتهم وطمعهم في ورثة بنتها وكيف ربنا خلص بنتها منهم وتتحدث عن ابنها جميل الذي تحبه كثيرا فهو رياضي ويحب السفر الي الدول الاجنبيه فكانت تقول له نذهب الي تايلند فيقول لها انا ما بحب مصر ولا تايلند .انا بحب الدول الاجنبيه ......فبعد فتره عرفت ان الدول الاجنبيه هي أوربا وأمريكا بدون ذلك دول غير اجنبيه ...عند ام جميل وابنها
First let me apologize for writing in English ...I'm not yet able to have Arabic keyboard but will rewrite once I have it. The point I want to make here is that I couldn't stop reading until you stopped writing. It is a real story with real people and real great way of writing to everyone which is not the case of many writers now. Until I write in Arabic, let us enjoy it time after time BIssalamah ya fardda
10-14-2018, 08:29 AM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
Quote: x Author: malik_aljack First let me apologize for writing in English ...I'm not yet able to have Arabic keyboard but will rewrite once I have it. The point I want to make here is that I couldn't stop reading until you stopped writing. It is a real story with real people and real great way of writing to everyone which is not the case of many writers now. Until I write in Arabic, let us enjoy it time after time BIssalamah ya fardda
حبيبنا مالك الجاك سلامات ياخي واول حاجه كويس انه الشاشه بتقرا عربي انت اكتب بالدايرو ونحن نرد .....وبعدين ياخي تغيب من المنبر كان عارف السرطان بخليك تظهر ....كان اتكلمنا من بدري ...جميل انك قريت السرد بي متعه ...ولسع مستنيك بي هناك تحياتي
10-18-2018, 06:02 AM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
مطعم ابودبه اليمني من أشهر المطاعم في المنطقه العربيه في نانا سكوير وسط بانكوك ويقع في شارع ضيق ممتلئ بالمحلات التجاريه والمطاعم .فهو مطعم يقدم وجبات ممتازه الشيه والفول والمندي والكوارع والملوخيه.....الخ وبه أيضا جزاره فكنت في الايام الولي بسمع به من سكان العماره واحمد كان بجيب منه كبدة الضأن فكنت بحكم اني بفقد دم ومصاب بالانيمياء فكانت الكبده حاضره دايما في الفطور .وكنت متشوق امشي لهذا المطعم من كثرة ما سمعت عنه وبعد شديت حيلي شويه بقيت من المداومين علي المطعم .فعندما ذهبت وجدت معظم العمال أصحاب أحمد بن اختي فقد خلق معهم علاقه جيده .وايضا كانوا يمتاذون بصناعة المخبازه .وأغرب حاجه بالقرب من المطعم أيضا مطعمين ولكن كل ما امشي بلقي ما عندهم ولا زبون واحد رغم أنهم مجهزبن بطريقه انيقه وأكبر من من مطعم ابودبه المزدحم دوما وسخن رغم التكيف من كثرة الازدحام صاحب المطعم من اليمانيه القدامي في بانكوك وهو شخصيه لطيفه وبشوشه وحينما يلتقيك تشعر بالكرم في وجهه ومعظم الويترات من مينمار هميمات يستقبلنك بي بشاشه ما أن تجلس إلا و يستقبلنك بالشوربه والبصل الأخضر صغار الحجم ولكن جمره والليمون والشطه وبعداك حتي يجيبوا ليك المنيو وفي يوم بعد هذه الشوربه والبصل جاء إلينا من الويترات شاب يمني شكله جديد.في البدايه استفذانا وقال بطريقه فيها نوع من العجرفه بأن نغير تربيزتنا لشباب من الخلايجه. فرفضنا بشده وقلنا ليهو نحن جينا قبليهم وما بنتحرك من مكاننا وبعد مشاده كلاميه بينه وبين أحمد تدخل أحد المشرفين وفضي المشكله فقد كان يغرف أحمد جيدا...وطلبنا فول بعداك من الويتر ..فقلنا ليهو فول مصلح كعادتنا بنجي نقول فول مصلح بجيبوا لينا طبق فول مظبوط سلطه وطعميه وجبنه وزيت زيتون ...فقال سألنا عايزنو مصلح علي الطريقه العربيه اليمانيه ولا الطريقه السودانية..هنا انتفض أحمد للمره الثانيه ودخل في مشاده معه كيف تقول طريقه عربيه يمنيه وطريقه سودانية...تقصد طريقه السودان طريقه شنو ...دي عنصريه وا ..وا ...وقامت شكله تاني...فتدخلت انا المره دي وقلت ليهو خلينا الفول ممكن تدينا سلطة اسود وملوخيه... ولو عندكم فستق عبيد برضو ادينا....
10-19-2018, 07:45 AM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
Quote: الف سلامة ليك يا شيخ هجو وربنا يديم عليك الصحة
عبدالحليم عثمان صديقي وكان زميلي في الجامعة وهو يعمل في ال UNHCR الان هو في تونس. رجل قل ان يجود الزمان بمثله
الاخ محمد الشيخ أرباب سلامات وربنا ينعم عليك بالصحه والعافيه فعلا عبدالحليم رجل أرباب وقل الزمان أن يجود بمثله فهو رجل فريد .عرفته في فتره قصيره وعصيبه وكان كأننا نتعارف من زمن طويل وربنا يديهو الصحه والعافيه تسلم كتير ي ارباب
10-19-2018, 08:16 AM
عثمان علي عثمان علي
تاريخ التسجيل: 06-07-2018
مجموع المشاركات: 190
في وجود زي ده يا ابو الشباب، طوالي كان مفروض تعملوا خلف دور وتدوا المطعم عرض اكتافكم. واضح جدا انه (مشحون) ضد كل ما هو سوداني. وبالتالي لا ضمان لسلامة خدمته لكم (اقل شيء، ممكن يبص× ويت×) فيما يقدمه لكم من خلف ظهركم.
10-19-2018, 10:49 AM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
Quote: في وجود زي ده يا ابو الشباب، طوالي كان مفروض تعملوا خلف دور وتدوا المطعم عرض اكتافكم. واضح جدا انه (مشحون) ضد كل ما هو سوداني. وبالتالي لا ضمان لسلامة خدمته لكم (اقل شيء، ممكن يبص× ويت×) فيما يقدمه لكم من خلف ظهركم
الاخ عثمان علي سلامات واضح انه شكلو كان قادم من اليمن جديد .بعد الحرب وعاصفة الحزم فبكون فعلا مشحون .لكن الشهاده لله صاحب المطعم وكل الاسطاف من اليمنيين القابلناهم كانت معاملتهم معنا مختلفه وفيها نوع من الاحترام .وطبعا هم قدام في بانكوك ويعرفوا السودان جيدا .وفي ذاكرتهم اهلهم الكانوا في السودان و المعلم السوداني في اليمن .فمن خلال ونساتنا معهم عرفناهم جيدا .ولكن طبعا آثار الحرب النفسيه عند هذا الشاب وجدنا له العذر تحياتي
بعد العمليه ونسبة لضيق ذات المعده وزني نزل كتير جدا وبعد رجوعي كمبالا في المطارات كانت صورة الجواز مختلفه فكان موظفي الجوازات دايما في حالة تدقيق لصورة الجواز والتحقق من شخصيتي فعندما وصلت يوغندا زارني صديق وكان قال اجمل تعليق ..قال لي شكلك تمام أعتبر نفسك صمت رمضان في احدي قري الجنوب ايام الحرب ورجعت المدينه . طبعا يوغندا من الدول التي حاربت الإيدز بالتوعيه عبر المناهج الدراسية والإذاعات المحليه التلفزيونات وحملات شعبيه كبيره ففي فترة التسعينات كان الإيدز منتشر جدا فمن كثرة التوعيه اصبح الناس متصالحين معه معرفيا .وبما أن الشعب اليوغندي طعامه صحي يخلو من الكيماويات فنادر جدا تلقي زول عندو سكري او سرطان او حتي ضغط فهم شعب يمتاز بالصبر وطولة البال ففي الشارع ما اظن تسمع عربيه في زحمه استخدم سائقها البوري او المنبه واحياننا ممكن تقيف بي عربيتك ومنها تنادي بتاع بقاله وتطلب احتياجاتك ويرجع يجيبم ليك من البقالة وتديهو القروش ويرجع يجيب الباقي وانت تكون واقف في نص الشارع وراك كميه من العربات .مافي زول يعترض يقول ليك انت عطلت الحركه او زول يضرب بوري ولو في زول ضرب بوري تعرف انه أجنبي. فبعد ما رجعت من بانكوك كثير من معارفي اليوغنديين يسالونني وين انت زمن طويل فكنت اقول ليهم كنت عيان يقولوا لي مالك لمن اقول لي زول كان عندي سرطان يفرو مني زي الأجرب. والحنين فيهم يبدا يسالك كيف السرطان كان وبعالجوهوا كيف وبيسمعوك في اندهاش والعجب لمن تجيب سيرة العلاج في تايلاند بتكون الدهشه فاتت حد بحيرة فكتوريا.كيف يعني زول يمشي يتعالج في تايلاند . ولو الواحد قال عندي ايدز يجويك قريب وينحوا عليك بي شغقه ويكفر ليك بي حنيه وممكن يحضنك ويقول ليك معليش انت بس ركز علي الخضار واستخدم الأدوية..وممكن طفل في الروضه يديك محاضره عن الإيدز تقول بروف عديل كده ...لكن تجيب سيرة السرطان كانما كفر بن يوسف ....
امي كأني التقيها اول مره في حياتي امي عليها رحمة الله كانت دائما حاضره معي في لحظات الالم بدعواتها *************** سماء بانكوك دائما في حالة أمطار ورعد وانا من غرفتي وفي سريري اصارع الألم وصوت الرعد يدغدق أحشاء الألم المبتل بعرق جسدي فقد كنت خارجا للتو من المستشفي بعد أن تم نقل دم الي عباره عن زجاجتين فقد كنت اتخيل الدم المنقول يمتزج مع دمي في تململ يتصارعان مع بعضهما مما جعل جسدي يفرز العرق بغزاره واهرب بي المي نحو نافذه الغرفه المطله علي محطة القطار فارقب حركة القطارات في حركه دؤبه رغم هطول الأمطار .فاحن الي دعوات امي وهي في العالم الآخر ففي تلك اللحظه صوتها يأتيني مع صافرة القطار حينما يدخل المحطه وهي تدعوا لي بالشفاء وتنده أولياء الله الصالحين ..كنت اتخيل منظرها وهي بي ثوبها الملون وشلوخها التي تقف في خديها بشموخ وكبرياء وسبحتها اللالوبه الالفيه التي لم تفارقها في حلها وترحالها..صورتها بين القطارات ورزاز المطر والضباب وتداخل صوت دعواتها وصوت القطارات وأنين المي والعرق يتصبب في جسدي كانه هارب من معركة امتزاج الدم المنقول ودمي الذي يقاوم الدخيل .وفجاءة أشعر بضربة سبحة امي في راسي وهي تلعن شيطاني وتدعو لي بأن يهديني الله الي الصراط المستقيم ..واعيد النظر الي النافذه فلا أري الا قطارات تتحرك والناس في حركه سريعه مابين راكب ونازل ويخرج قطار من المحطه ويدخل قطار من الاتجاه المعاكس في تناغم وزمن محدد .وأيقنت ان محطتي هذه ساغادرها وان الامل في الشفاء قريب جدا . وهاهي دعوات امي تغطيني و تمسح العرق من جبيني .فقد كانت تلازمني في مرضي وكنت كثيرا ما احلم بها وانا في صحوي واتزكر طفولتي حينما امرض وهي تغطيني بثوبها وتضع المبخر امامي وبه جمرات فحم بقايا من الكانون بعد أن انتهت من تسخين اللبن وفي طرف ثوبها دايما صرة بها كمون اسود فتداعب ربطه الصره باناملها وتحل عقدتها وتدعو ربي بأن يفك كربتي فتخرج الكمون وتبخرني به وهي تتلو آيات متداخله لم افهما ولن افهمها...كانما ربنا خصاها بها ..كل هذه الصور تتداخل في راسي وانا اصارع الالم في صمت ..
11-06-2018, 06:01 PM
احمد سيد احمد احمد سيد احمد
تاريخ التسجيل: 01-23-2013
مجموع المشاركات: 1257
جميل جدا يا اخونا هجو ومستمتع بسردك الجمال وكتابتك بسيطة وعميقة في نفس الوقت...لفت انتباهي جدا حديثك عن طولة بال الشعب اليوغندي فارجو ان تزيدنا من حكاوي طولة بالهم ولك جزيل الشكر... كيف الصحة الان عساك ما شكيت من شي تاني وامورك كلها طيبة؟
11-07-2018, 12:57 PM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
Quote: جميل جدا يا اخونا هجو ومستمتع بسردك الجمال وكتابتك بسيطة وعميقة في نفس الوقت...لفت انتباهي جدا حديثك عن طولة بال الشعب اليوغندي فارجو ان تزيدنا من حكاوي طولة بالهم ولك جزيل الشكر... كيف الصحة الان عساك ما شكيت من شي تاني وامورك كلها طيبة
الاخ احمد سيد احمد سلامات ..والحمدلله الصحه عال العال تعرف ي سيد احمد الشعب اليوغندي ممهول مهله عجيبه خلاص .يعني الفوره مليون وعندهم الحريق حريق مطافي...ممكن الكوشتينه موزعه من زمن عيدي أمين ولحدي اليوم ما في زول حرق .شفت طولت البال دي ..مره صديقنا مسافر من مطار عنتبي الإمارات وكان ما عندو حجز مؤكد .مشي المطار مع بتاع تاكسي وفي موقف المطار قال لصاحب التاكسي انتظرني انا احتمال ما اسافر عشان ارجع معاك ..ولو بقيت مسافر قبل اركب الطياره ح اتصل عليك عشان ترجع ودفع له الاجره. وصاحبنا دخل المطار ولقي مقعد في الطياره وعمل اجراءته وركب الطياره واقلعت من مطار عنابي حوالي الساعه تلاته عصر .ووصلت الإمارات حوالي الساعه عشره مساء وصاحبنا عمل اجراءته وطلع من مطار دبي وفي حوالي الساعه حداشر فتح تلفونو شغال رومين. بعد شويه الجرس ضرب لمن رد لقاهو بتاع التاكسي قال ليهو ....بوص وير اريو....انت وين ...صاحبنا اتخلع. قال الله انا نسيت بتاع التاكسي . قال ليهو انا وصلت الإمارات ونسيت اضرب ليك .بتاع التاكسي رد ليهو بكل برود قال ليهو ...اها يعني خلاص انا ارجع البيت .... تخيل لو كان بتاع التاكسي سوداني ....كان ممكن يحصل شنو انا اتخيل لي طولة البال من ثقافة الشعوب الزراعيه وعندها علاقه بي نمط الحياه والطقس
11-07-2018, 06:06 PM
احمد سيد احمد احمد سيد احمد
تاريخ التسجيل: 01-23-2013
مجموع المشاركات: 1257
سلام يغشاك أيها المقاتل الشرس لمدة يومين لم استطيع أن أخرج من هذا البوست ألف الحمد لله على السلامة وربنا يتم عليك العافية قادر يا كريم. تعرف أخي هجو رحلتك مع هذا المرض اللعين فتحت عيني على اشياء كثيرة، أحسست بتافهة ما ندعي كذباً إنها مُعاناة نعيشها بسبب قسوة الغربة والاحباطات التي نعيشها بسبب الغدر والخيانة والفشل . تعلمت منك أن أهم من النجاح القتال من أجل النجاح. كم هي جميلة الحياة. ربنا يطمنا عليك كمان وكمان، ويطمن أسرتك الصغيرة والكبيرة وبالتأكيد أنت آلان أقوي من ذي قبل. متابِعة لمزيد من هذا السرد المُلهم. أختك فاطمة الحاج
11-08-2018, 02:53 PM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
Quote: سلام يغشاك أيها المقاتل الشرس لمدة يومين لم استطيع أن أخرج من هذا البوست ألف الحمد لله على السلامة وربنا يتم عليك العافية قادر يا كريم. تعرف أخي هجو رحلتك مع هذا المرض اللعين فتحت عيني على اشياء كثيرة، أحسست بتافهة ما ندعي كذباً إنها مُعاناة نعيشها بسبب قسوة الغربة والاحباطات التي نعيشها بسبب الغدر والخيانة والفشل . تعلمت منك أن أهم من النجاح القتال من أجل النجاح. كم هي جميلة الحياة. ربنا يطمنا عليك كمان وكمان، ويطمن أسرتك الصغيرة والكبيرة وبالتأكيد أنت آلان أقوي من ذي قبل. متابِعة لمزيد من هذا السرد المُلهم. أختك فاطمة الحاج
الأخت فاطمه الحاج الله يقبل حمدك وماتشوفي شر ي رب هي رحله الحمدلله بقدر ما كانت صعبه وقاسيه الا انها كانت مفيده وبها الكثير من العبر وكانت فعلا محطة تغير في حياتي ...واكتشفت فيها ذاتي وقد عرفت كم هو حب الناس والاصدقاء عظيم تحياتي وربنا يديك الصحه والعافيه
11-08-2018, 03:57 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
سلآم أخي هجو وألف سلآمة ليك يا زول . والله قالوا اللوم بيجي بالغفلآت ؤ مرآت الحاجة تبقى جنبّك ؤ تفوت عليك، كل يوم بعاين للبوست واللوم ماسكني منّو. ألف سلآمة ليك يا زول وإن شاء يوم أصلك وأسلملك فوق راسك. دا خبر مُفرح مُبكي، الله يديك العافية ...
11-09-2018, 12:05 PM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
Quote: سلآم أخي هجو وألف سلآمة ليك يا زول . والله قالوا اللوم بيجي بالغفلآت ؤ مرآت الحاجة تبقى جنبّك ؤ تفوت عليك، كل يوم بعاين للبوست واللوم ماسكني منّو. ألف سلآمة ليك يا زول وإن شاء يوم أصلك وأسلملك فوق راسك. دا خبر مُفرح مُبكي، الله يديك العافية
اخي وحبيبي معاويه المدير ...ي مدير بس عليك الله في مدير بيلوموهو ..حاشاك اللوم. نمرض نحن ونكفر ليك انت ...والله يجعل لينا يوم نتلاقي ونتقالد وربنا يديك العافيه وما تشوف شر ي رب
11-10-2018, 01:45 PM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
صديقي( ك) التقيته في بانكوك كان معنا يسكن في عماره معاويه جاء إلي بانكوك برفقة ابنه صاحب العامين شفاءه الله كان قد ولد يعاني من نقص في الأوكسجين مما سبب له مشكله في الحركه ..جاءوا إلي بانكوك بقصد العلاج .كنت اري صديقي ك يخرج وينزل في نشاط برفقة أسرته وابنه لم نكن أصدقاء فقد كنا بالكاد تعارفنا ونلقي التحايا لي بعض واحيانا لا نلقيها فقد كنا نجتمع في أمسيات السبت وهو قليل الكلام ملتزم كثيرا ودار نقاش بينا في مواضيع شتي وكنا نختلف كثيرا فيها فهو جاء من العالم الأول يحمل جواز دوله متقدمه ونحن قادمون من مجاهل افريقيا ..وكنت اري في عينيه أحيانا كثيره نظرة عدم رضاء لتمردي في آرائي في الونسه وايضا استنكارا اراه في طريقة حياتنا وتعاملنا مع السرطان بي استهتار واستخفاف اتخيل لي الناس راسمه شخصيه لمريض السرطان وحينما يعرفونني يجون شخصيه غير التي في ذهنهم. هناك ناس يرون في مريض السرطان ذلك الإنسان المسكين المستسلم الذي يكون تبرع بثروته وأصبح ذاهدا في الدنيا وطابق مصلايتو ومصحفوا الاربعه وعشرين ساعه وأي شئ في الدنيا عباره عن معاصي يجب أن يبعد عنها .وطبعا في ناس بالشكل ده انا قابلتهم في المستشفى في بانكوك بجو شايلين المصاحف لحظه انتظار الدكتور أو الفحص وفي المستشفى شايف في رفوف في البهو بتاع الانتظار مرصوصه كميه من المصاحف بلغات عديده .دائما كنت أنظر إلي هؤلاء بنظره لا استطيع ان احددها ولكن قد يكون عدم ايمان مني او احتمال ايمان زائد وبه تصوف او شئ ما .فكان صديقنا مستنكر كل تصرفاتي خصوصا حينما يجد التلفزيون عندي شغال موسيقي وغني ودوريات أوربية ..الخ .واحيانا كتيره يكون في زيارتي أصدقاء والليالي بها ي حله تنوري وانا ذاتي ماسك عداد الكهرباء.فكانت علاقتنا غير مريحه بالنسبه له .وذات يوم جاءني وانا مستلقي في كنبتي وقت القيلوله تحت العماره بعد أن القي التحيه فكان في غير عادته وجهه مهموم وحيله مهدود ما ذلك الرجل النشط .ردت له التحيه وجلس إلي جانبي في تعب وقال لي كويس اني لقيتك هنا .انا كنت ح اطلع ليك في شقتك .قلت ليهو خير ي حبيب مالك .قال لي انا قبل كم شهر كنت في السودان مشيت الدكتور وفحصت قالو لي عندك جرسومه في المعده. وهسه قلت افحص هنا مشيت الدكتور فحصت.قالو لي احتمال يكون في ورم سرطاني المفروض اعمل فحوصات وقلت قبل اعمل اي حاجه اجي اقعد معاك ... نواصل
11-12-2018, 01:11 PM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
نواصل قلت ليهو ي زول خير .غالبا الفحوصات الاوليه دي مرات بتكون ما حقيقيه .انت الطبيب قال ليك شنو بالضبط .قال لي حكيت ليهو بالاعراض العندي وفحص الدم وقال احتمال يكون في ورم في القولون .قلت ليهو وهل عمل سيتي اسكان ولا بيتي اسكان .قال لي لا . وهل شال عينه .قال لا .لكن قال اجي اقابله بكره واكون صايم عشان يعمل منظار و سيتي اسكان .وانا ذي ما قلت ليك ما اعمل حاجه الا اجي راجع ليك .ولو في طريقه تحجز لي عند الدكتور البتتابع معاهو انت ..طمنته وقلت ليهو ما تشيل هم الموضوع يكون قابل لي احتمالات. كدي انت بكره صوم وخلي يشيليلو العينه ويعمل السيتي اسكان وبعداك نشوف كلام الدكتور شنو .ما في داعي هسع تغير الدكتور .وممكن بعد تقابله ونشوف كلامه. نشيل برضو الفحوصات وتمشي بيها لي دكتور صالح المتابع حالتي .لكن اطمئن. .وبدأ يسألني في قلق عن الورم العندي وظهر لي متين والعلاج ماشي كيف وهو لو الورم في القولون ما زي الورم الفي المعده وأسأله كتيره ومامرتبه ..عرفت انه صاحبي متوتر ولازم أهديهو. واطمنو .قلت ليهو ما تقلق غالبا الورم بتاعك ده يكون حميد لأنه معظم الأورام البتكون عندها علاقه بالقولون دي اصلا أورام غازات. المهم كان كلام غير علمي لكن كنت عايز اخفف ليهو وادرج الموضوع .واتفقنا ما يجيب سيره لي زول وينتظر لحدي تاني يوم يرجع الدكتور ويعمل السيتي اسكان ويشيلوا العينه وبعداك نشوف ممكن يحصل شنو .وفعلا تاني يوم الصباح اتوجه نحو المستشفي لعمل المنظار والسيتي اسكان .وفعلا الطبيب قال ليهو النتيجه بعد تلاته يوم نواصل
11-15-2018, 05:09 PM
محمد عبدالله مختار محمد عبدالله مختار
تاريخ التسجيل: 08-20-2009
مجموع المشاركات: 2896
Quote: عزيزي هجو ود مختار الف حمداً لله على السلامة .. أسأل الله تبارك وتعالى أن يديم عليك نعمة الصحة والعافية
العزيز محمد عبدالله مختار ربنا يقبل حمدك وما تشوف شر ي رب ويديك العافيه ونحمد الله كثيرا علي نعمة الصحه وتجاوز تجربة السرطان. التي تعلمت منها كثيرا ورغم قساوتها الا انها كانت مفيده .
11-20-2018, 10:02 AM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
نواصل كان صديقي مقلق جدا في خلال التلات يوم وفعلا بعد تلاته يوم ظهرت النتيجه وكان الخبر اليقين بأنه سرطان في المرحله الثانيه وبعد مشاورات اتفقنا مع احمد يمشي يحجز ليهو عند دكتور صالح في المستشفي الأمريكي وفعلا قابل دكتور صالح وألقي نظره علي الفحوصات وطالبه ببعض الفحوصات ومنها بيتي اسكان حتي يكون دقيق في وضع برنامج العلاج ويتاكد أكثر. وفعلا بعد نتيجه البتي اسكان قرر الطبيب أن يخضع لعلاج كيموثربي لمدة اثني عشر جلسه وبعد أن راجع التكاليف كانت مرتفعه جدا ووجد أن التأمين الصحي لايغطي العلاج في بانكوك بعد أن كان اتصل بسفارة بلده فنصحوه ناس سفاراته بأن يرجع الي وطنه حيث أن العلاج هناك متقدم والتامين الصحي يشمله . وفعلا حزم أمتعته ورجع الي عالمه الأول وهو الآن يتلقي العلاج هناك وفي تقدم ملحوظ فلا زلنا علي اتصال شبه يومي ومتابع حالته جيد ...ويحتاج لدعواتكم واتمني من كل من يمر علي هذا البوست أن يدعوا لصديقي بالشفاء العاجل ....واتمني من الله ان لاتشوفوا شر في انفسكم أو في عزيز لديكم ******************************************* هذه هي كانت رحلتي مع السرطان .الحمد لله اجتزتها .وقد كانت تجربه اظن انها من التجارب التي قال عنها المسيح عليه السلام اللهم لا تدخلني في تجربه ...واقول قول السيد المسيح اللهم لا يدخلكم ولا يدخل عزيز لديكم في هكذا تجربه . الحمد لله والشكر لله فالآن انا بصحه جيده . وأشكركم جميعا علي متابعة البوست وارجو ان تغفروا لي اخطائي وانفعالاتي ولكم مني كل الحب والتقدير واتمني منكم الدعاء لأبن عمي دكتور الباقر العفيف بالشفاء والدعاء لكل مريض تحياتي
11-20-2018, 11:02 AM
احمد حمودى احمد حمودى
تاريخ التسجيل: 01-11-2013
مجموع المشاركات: 4364
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Biraima M Adam
احمد سيد احمد
Haju Muktar
الطيب عباس
نعمات حمود
يوسف الطيب احمد إدريس
Sudany Agouz
محمد الشيخ أرباب
Adam Youssif
Rami Abdelkareem
محمد فضل الله المكى
malik_aljack
محمد حيدر المشرف
Fatima Alhaj
معاوية المدير
محمد عبدالله مختار
احمد حمودى
فيس بوك
تويتر
انستقرام
يوتيوب
بنتيريست