|
|
 Re: يوميات مغترب فى إجازة ... (Re: Munir)
|
عرس رجب (القصة كاملة )
اجتمع رجب ,والدته وشقيقه الزاكي وشقيقته نعمات على شاي الصباح، ، ودار الحوار:
نعمات: انت يا رجب ما تعرس ، انت خلاص كبرت حصلت خمسين سنة،
حاجة مسكة: رجب متين بقى للعرس، هسي الحلة دي منو القدرو عرس، بعدين هو راجع من السعودية قرش ما عندو عرس شنو العليهو.
نعمات: دي ما مشكلة نشوف ليهو واحدة مرتاااااحة ،،
الزاكي : انتي أكيد خاتة ليك واحدة في راسك،،،
نعمات : أيوة، في واحدة جارة ناس خالتي أم بلينا، أخوانا كلهم برة السودان وقاعدة في عمارة مع امها وأبوها ، وقالوا بعد ما يعرسوها أمها وأبوها حيمشي يقعدوا في بيت عادي في الدخينات، ويخلوا العمارة لبتهم وعريسا.
رجب : والله انا الطريقة التقليدية دي في الزواج ما من أنصارا ، وأنا زي ما قال الشاعر (أحتاج امرأة دفء تختصر الشفة بيني وبين الرب)، ولازم يكون في توافق واندماغ عاطفي بيني بين الزولة الحاتزوجا،،،
الزاكي : اندماغ في راسك، انت قايل نفسك صغير،، أنا والله لي سنتين داير أعرس، والجماعة مثبتني يقولوا لي لامن أخوك الكبير يعرس.
حاجة مسكة: والله الكلام دة صحي ، انت يا رجب مادام البت دي وضعهم كويس اخير تتلم عليها ممكن حظك يتصلح شوية، ومنها الزاكي كمان يعرس، وتفضوا البيت ممكن يجي عريس لأختكم نعمات دي كمان ونقعدوا معانا هنا،،
رجب: والله انتو كدة زي بتتدخلو في شأن خاص بي ، ما مكن زول مثقف زي يتزوج بالطريقة دي ،، لكن كمان ما في حل تاني والظروف بقت صعبة شديد ، والواحد لازم يتخذ حلول مرة زي تجرع السم ، خلاص انا ما عندي مانع كلموا خالتي أم بلينا ونمشي نشوف البت.
نعمات: البت تشوف ليها شنو ، أمشي شوف العمارة من برة وتعال ، وكمان نسيت أقول ليك أخوانا مشترين أمجاد واقفة جنب البيت وقالوا دي للزول الحيتزوج أختهم.
رجب: كان كدة خلاص نمشي نشوف البيت والأمجاد.
**
كان السوق الصغير مزدحما في ذلك اليوم حين قال الخزين لخدوج:
أسمعي يلا خلاص قفلي نرجع البيت،
خدوج: في شنو يا راجل الليلة السقط شديد وناس كتار بفطروا ملوحة ننتظر شوية،،
الخزين: يا ولية الملوحة طايرة رجعيها أدفنيها تحت الواطة تاني ، انتي ما عارفة الليلة عرس رجب، هسي معاذ كان بتكلم معاي قال لي الجماعة جابوا فطور العريس تلاتة بكاسي ملانة علي الحرام معاذ قال لي الصينية الواحدة فيها اتنين وعشرين صنف منهم عشرين صنف لحمة ومشتقاتا، يلا نلحق المولد دة،،
خدوج: فطور شنو يا راجل البتطلعو مسكة للناس دي حتدس الحاجات دي كلها حتى العيش حتدسو،،، .
الخزين: يا زولة أكل قدر دة الا يدسوهو في تلاجة موز، يلا أرحكاكي .
في منزل رجب كان المكان مزدحما بالأهل والأصحاب والجيران ومغنيتن تملآن المكان صخبا ونساء يزغردن وفتيات يرقصن ، وشباب يرفع يده مبشرا ومهللا ، ورجب يحوم بين الجموع، أبشروا بالخير ، أبشروا بالخير ، وتصدح المغنية الأولى:
رجب الليلة ساير
نورو باين وجاهر
فرح أماتو الحنان
لامن حد الجزاير
ودون توقف تواصل المغنية الثانية :
رجب المال ما هماهو
ما ختاهو ما دساهو
في شان الله قام زكاهو
وهنا يهمس معاذ لحمبريب ( بالله شوف المرة الكذابة دي ، هو رجب ذاااتو مستحق الزكاة لي روحو ، مال شنو البزكيهو) ،،،
ويستمر الغناء والصخب والفرحة الغامرة ، وصواني تخرج مليئة بالخيرات لتعود فارغة، وهكذا دواليك ، وجلس رجب وسط أصدقائه معاذ وحمبريب وأشادوا بالفطور وبالنسايب ، وهنا قال رجب : والله الناس ديل تمام بس في حاجة واحدة قصروا فيها ، ما جابوا شاي وقهوة.
**
بعد أن أكملت فترة التدريب افتتحت مكتبا صغيرا للمحاماة، ومضت فترة من الزمان لم يحضر فيها زبونا للمكتب فقد كانت الأيام عصيبة والحالة لاقتصادية للبلاد في أشد حالات تدهورها قبل اكتشاف البترول، وفي يوما نهاريا ساخنا ، أتى أحدهم يطرق باب المكتب فاذا به رجب، كانت قد مرت أكثر من سنة كاملة من تاريخ زواجه الأسطوري ولم أره فيه ، وان كنت رأيته قبل شهورا وهو يقود سيارة أمجاد داماس بحالة جيدة جدا في شوارع الخرطوم، بعد السلام والتحية قال لي رجب :
عندي قضية يا أستاذ وعاوزك تمسكا لي ،،
وهكذا يطاردني رجب في كل مراحل حياتي وحتى في مجالي المهني وأول القضايا التي أستلمها يكون طرفها رجب فيا لسخرية الأقدار، سألته :
أها قضية شنو انشاء الله خير ،،
رجب: ده موضوع طويل احكي ليك بالتفصيل، طبعا انت آخر مرة قابلتني كان يوم العرس في الصالة، وبعدا مشينا سكنا في العمارة مع زوجتي وأبوها وأمها مشو سكنو في بيت الدخينات زي ما اتفقنا ،،،
أنا: كلام كويس ،،،
رجب : أصبر شوية ، بعد تلاتة يوم من الزواج جاتني قالت لي انو أبوها نسى نضارتو الطبية في البيت ، قعدنا نفتش فيها يومين ما لقيناها ، قلبنا البيت حتة حتة ما لقيناها ،، بعد دة المرة قعدت تكورك واتهمتني بأني سرقت نضارة أبوها ،،،،
أنا: يا زول دة كلام شنو ،،،
رجب : ده الحصل بالظبط ، طلعت مرة عبيطة ولا متخلفة ، قعدت تكورك و لمت الجيران كلهم فيني، نص الجوطة دي جا أبوها قال انو لقى النضارة بتاعتو في بيت الدخينات وانها كانت واقعة ورا الدولاب،،،،
أنا : وما اعتذرت ،،
رجب : تعتذر شنو ياخي ، أصبر لسة التقيل جاي قدام، يوم قاعد في البيت بالعصرية جونا تلاتة أنفار قالو انهم سماسرة وانهم هم الجابو البيت لي نسابتي ديل ودايرين حق السمسرة ايجار شهر ، قلت ليهم انتو نصابين زول بيشتري عمارة وتحسبو ليه السمسرة بالشهر كيف ، تصدق طلع شنو ،،،
أنا : (بخلعة) شنو ،،
رجب : العمارة مؤجرة ما ملك أهل زوجتي، دفعوا حق تلاتة شهور بس، مشيت عملت مشكلة معاهم، أبوها قال لي نحن أصلا ما قلنا ليك العمارة بتاعتنا ،، غايتو في النهاية أجرت شقتين من الباطن وضربت لي خالي عبدالمجيد رسل لي ألف ريال دفعت أيجار تلاتة شهور ،،، وبقيت أشتغل بالأمجاد شوية شوية وأطلع مصاريفي،، لغاية ما جات المصيبة التانية ،،،
أنا : يا زول مصيبة شنو تاني،،،
رجب: الأمجاد طلعت مشترينها بالتقسيط برضو ما ملكهم، طبعا ما مشيت سألت أبوها لأنوح يقول نحن أصلن ما قلنا ليك انها بتاعتنا،، لغاية ما بعد فترة بقيت ما قادر أدفع الأقساط جو ناس الشركة قلعو الأمجاد،،
-أنا : لا حولة ولا قوة الا بالله ، بالله المصايب دي كلها تتحدف عليك يا رجب بعد ما قلنا خلاص دربك مرق،،،،،
رجب: لسة كمان باقي مصيبة أخيرة ،،،
أنا : مصيبة شنو تاني،،،،
رجب: قلت أطلقا بس، وأرجع أقعد في بيتنا، فعلا مشيت لي مأزون وطلقتها ورسلت ليها ورقتا ،،،
أنا: أيواااااة انا كدة عرفت المصيبة الأخيرة،، مؤخر الصداق مش كدة ،،
رجب : أيوة يا أستاذ، تتذكر انت وقت العقد قلت لي كيف أهل العروس يختو مؤخر صداق خمسة ملايين وانو ده مبلغ كبيير وأنا قلت ليك خليهم يختو انشاء الله عشرين مليون هو الحيطلق منو تاني ،،،
أنا: أيوة متذكر ،،،
-رجب : أها،، أهلها هسي رافعين فيني قضية مطالبين بي خمسة ملايين مؤخر الصداق ،،،،
**
(شوف يا رجب أنا حل قانوني ما عندي ليك، لكن لو طلقت المرة طلقة واحدة أحسن ترجعا ووديها تقعد في بيتكم مع أمك مسكة ونعمات، شهر واحد بس مرتك يا انتحرت يا جنت ،، يا طلبت الطلاق، وبي كدة يسقط المؤخر، أمك دي نسوان الحلة البتأخر في دفع الصندوق بيهددوها انو حيرفعوا الموضوع لي حاجة مسكة ، تدفع في يوما، وأختك نعمات دي برضو صعبة ، خلي المرة تقعد معاهم بيأدبوها أدب المدايح) ،،،
كان هذا آخر ما قلته لرجب وغادر بعدها المكتب ومرت حوالي ثلاثة أشهر لم أره فيها ، وان سمعت من الخزين حين ذهبت للسوق الصغير لشراء ملوحة منه أن رجب يسكن في بيته وأحضر زوجته معه، ولم يكن لدى الخزين كثير من التفاصيل.
في ذلك الصباح كانت السماء ملبدة بالغيوم ، وكتاحة قوية تملأ عنان السماء ، وجاءني رجب في المكتب حتى أنني لم أعرفه الا بعد أن أزاح قدرا كبيرا من التراب من على وجهه وملابسه، كان يبدو في حالة نفسية سيئة جدا كعادته ، وبادرته قائلا:
أها أمورك ماشة كيف ،،،
أجابني: يا زول ماشة زي الزفت ،، جبت المرة وقعدتها في البيت ، ووصيت أمي ونعمات أختي يأدبوها تمام ، وهم أصلن ما عايزين وصية، دوروا فيها يومين وروها النجوم في عز الضهر ،بقت تهضرب وتكورك الليل كلو ،، لمن قلت خلاص كلها كم يوم وتطلب الطلاق،،،
سألت رجب: أها وحصل شنو ،،،
أجاب رجب: يا زول في يوم قالت لي أمي أنها أخوها جاي من السعودية ، وانها مرشحة نعمات أختي تكون زوجة ليه ، وانها كلمتو في التلفون وقال ما عندو مانع أول ما يصل السودان يجي يشوفا،،،
قلت لرجب: يا زول دي استعملت السلاح الكيماوي عديل كدة ،،،
رجب: أها من ما قالت الكلام ده ، أمي ونعمات أختي قلبو 180 درجة ، بقو يشكرو فيها اليوم كلو ، وانها أحسن مرة ، وزيها مافي ، وبقو يرسلو ليها الغدا بتاعا في أوضتا ، واليوم كلو شايلين العصير مودينو ليها ، والشاي اللبن المقنن،،، بقت قاعدة زي الملكة في البيت ،،،وأي مشوار يسوقوها معاهم ، وكلما أجيب سيرة الطلاق لي أمي تقول لي ما عافية منك لو زعلتها ،، وبقت امي الوصية عليها ،، من الصباح أي حاجة مرتي عاوزاها تكلم أمي ،، أمي تجيني وتحلف الا أجيبا ليها ، وانها ما راضية عني لو ما جبتا ليها حاجاتا كلها ،،،،،،،،
لم يكن أحدا من الجيران يعرف اسم زوجة رجب ، فأطلقوا عليها لقب رجبية، حتى انداح هذا الاسم وانتشر حتى أصبحت حاجة مسكة ونعمات ينادونها برجبية، ولن نشذ عنهم، شعرت رجبية أنها قد تورطت حين قالت أنها قد حدثت شقيقها بشأن زواجه من نعمات ، فهي لم تشاوره، بل وأن أخوها لم يكلمهم منذ سنوات ولم يسمعو أي خبر عنه لا بالخير ولا بالشر، ولكن الكذبة كان لها مفعول السحر وأصبحت أمورها (سالكة) في البيت تمام، ولكن طالت المدة، والجماعة في انتظار أي خطوة تجمع بين الرأسين في الحلال، خاصة وأن رأس نعمات قد أصبح مليئا بكثير من الهواجس والظنون وأصبحت تتشكك في صحة الموضوع، فقررت رجبية أن تحسم الموضوع ، خاصة وأن رجب قد أبدأ استياءه الشديد ، وصارحها مرة أنها (مرة مستنكحة) وبتغش في أهلو ساكت، وفي يوم تجمعت الأسرة السعيدة حول شاي الصباح، وكان الخريف قد بدأت تظهر بشائره برزاز من المطر فقررت رجبية أن تستغل هذه الأجواء المنعشة لتتخلص من كذبتها الكبرى، فقالت للجمع:
والله يا جماعة أنا أخوي كان جاي جاهز للعرس وجمع قروش كتيرة لكن اتضرب في سوق الأسهم في السعودية وفلس بقى قرش ما عندو ،،
ليقول رجب : اتضرب في سوق الأسهم هو أخوك ده الوليد بن طلال،،
حاجة مسكة: يا رجب اسكت خلي البنية تكمل كلاما، هو مالو لو فلس ، القروش دي ما صلها بتمشي وبتجي، ولو جا هنا يشتغل ربنا بيرزقو ، وهو ونعمات الاتنين مع بعض بيشيلو البيت ، ونعمات بت كسيبة بتشتغل التياب ، وتعمل الخبيز تبيعو ، بيمشو أمورهم مع بعض ،،،،،
رجبية : أيوة صاح يا حاجة، أصلو الحياة مشاركة،، لكن أخوي ده قالو بعد ما اتضرب في الأسهم بقى يسكر يومي وخلى الشغل ، وتحت تحت سمعنا قالو بقى يشرب مخدرات ،،،،
رجب : أمك ، جابت ليها مخدرات كمان،،، الحياة انتي لو عارفاها مشاركة ، انتي مشاركة بي شنو ، حتى الحصة العينية بتاعتكم طلعت كذب سااااكت ،،،،،،،
حاجة مسكة: ده كلو ما طيش شباب ساكت يا بتي ،، هسي رجب ولدي ده ذااااتو كان بيضرب البنقو لغاية قريب ، هسي لو ما الفلس ساكت مجننو كان رجع ليهو ،، حتى جدنا الشيخ بتاع الطريقة كان بيقول أي زول عندو كوتة من الشراب بيكملا وبعدا بيتوب ،، انتي بس خلي يجي ،، الباقي ده كلو هين ،،،،،
رجبية: والله كلامك كويس يا حاجة، لكن أخوي نحن سمعنا برضو انو متزوج ليه نيجيرية في حتة اسمها الكرنتينة في جدة، وعندو منها تلاتة شفع، هو غايتو ما اعترف بالحكاية دي ، لكن كم نفر جو من هناك قالوا كدة ،،،
حاجة مسكة: ديل بيكونوا ناس بتاعين لخبطة ساكت يا بتي ، وما دام أخوك نكر الحكاية دي ، مالكم بتصدقو الغربا وتكذبوا أخوكم ، وحتى لو طلع متزوج ، الراجل محللاتلو أربعة نسوان ،،
رجبية: بس يا حاجة هس لو رجع هنا ، محل قعاد ما عندو ،، يقعد وين ،،، والعرس ذاتو عاوز ليه قروش ، يجيبا من وين ،،،
حاجة مسكة: شوفي يا بتي نحن بنشتري راجل، ما مهم القروش ،، ويجي يسكن معانا هنا في البيت دده ، وأنا غير نعمات ما بقدر أقعد، أكان لي رجب ، يرجع يقعد في البلد يمسك الزراعة بتاعتنا هناك ، وأنا بكلم أخوي عبدالمجيد يشتري ليهو بابور للزراعة ،،،،،،
|
|
  
|
|
|
|
|
| العنوان |
الكاتب |
Date |
| يوميات مغترب فى إجازة ... | Munir | 06-10-18, 02:28 PM |
| Re: يوميات مغترب فى إجازة ... | Munir | 06-10-18, 02:31 PM |
| Re: يوميات مغترب فى إجازة ... | Munir | 06-10-18, 02:33 PM |
| Re: يوميات مغترب فى إجازة ... | Munir | 06-17-18, 10:17 PM |
| Re: يوميات مغترب فى إجازة ... | الصادق آدم | 06-17-18, 11:42 PM |
| Re: يوميات مغترب فى إجازة ... | Munir | 06-18-18, 11:09 PM |
| Re: يوميات مغترب فى إجازة ... | Munir | 06-26-18, 10:29 AM |
 Re: يوميات مغترب فى إجازة ... | تماضر الطاهر | 06-26-18, 10:58 AM |
| Re: يوميات مغترب فى إجازة ... | Munir | 06-26-18, 10:46 PM |
| Re: يوميات مغترب فى إجازة ... | Munir | 06-28-18, 00:55 AM |
| Re: يوميات مغترب فى إجازة ... | Basamat Alsheikh | 06-28-18, 04:28 AM |
| Re: يوميات مغترب فى إجازة ... | Haytham Ghaly | 06-28-18, 04:50 AM |
| Re: يوميات مغترب فى إجازة ... | عبدالحفيظ ابوسن | 06-28-18, 05:17 AM |
| Re: يوميات مغترب فى إجازة ... | عبدالحفيظ ابوسن | 06-28-18, 05:33 AM |
| Re: يوميات مغترب فى إجازة ... | علي محمد الفكي | 06-28-18, 08:45 AM |
| Re: يوميات مغترب فى إجازة ... | علي محمد الفكي | 06-28-18, 08:54 AM |
| Re: يوميات مغترب فى إجازة ... | نعمات عماد | 06-28-18, 09:12 AM |
| Re: يوميات مغترب فى إجازة ... | عبدالحفيظ ابوسن | 06-28-18, 09:16 AM |
| Re: يوميات مغترب فى إجازة ... | Munir | 06-28-18, 10:54 AM |
| Re: يوميات مغترب فى إجازة ... | Munir | 06-28-18, 10:47 AM |
| Re: يوميات مغترب فى إجازة ... | Munir | 06-28-18, 10:39 AM |
| Re: يوميات مغترب فى إجازة ... | Munir | 06-28-18, 10:28 AM |
| Re: يوميات مغترب فى إجازة ... | Munir | 06-28-18, 09:47 AM |
| Re: يوميات مغترب فى إجازة ... | Munir | 06-28-18, 10:58 AM |
| Re: يوميات مغترب فى إجازة ... | احمد الشيخ | 06-28-18, 01:15 PM |
| Re: يوميات مغترب فى إجازة ... | Munir | 06-30-18, 02:37 PM |
| Re: يوميات مغترب فى إجازة ... | Munir | 06-30-18, 03:55 PM |
| Re: يوميات مغترب فى إجازة ... | Munir | 06-30-18, 04:00 PM |
| Re: يوميات مغترب فى إجازة ... | Munir | 06-30-18, 04:05 PM |
| Re: يوميات مغترب فى إجازة ... | Munir | 06-30-18, 04:07 PM |
| Re: يوميات مغترب فى إجازة ... | Munir | 06-30-18, 04:09 PM |
| Re: يوميات مغترب فى إجازة ... | Munir | 07-02-18, 11:03 AM |
| Re: يوميات مغترب فى إجازة ... | Sayed Bekab | 07-02-18, 02:20 PM |
| Re: يوميات مغترب فى إجازة ... | Munir | 07-07-18, 10:32 AM |
| Re: يوميات مغترب فى إجازة ... | Munir | 07-07-18, 10:35 AM |
| Re: يوميات مغترب فى إجازة ... | Munir | 07-07-18, 09:53 PM |
| Re: يوميات مغترب فى إجازة ... | Munir | 07-07-18, 10:06 PM |
| Re: يوميات مغترب فى إجازة ... | Munir | 07-08-18, 04:01 AM |
| Re: يوميات مغترب فى إجازة ... | مدثر صديق | 07-08-18, 05:27 AM |
| Re: يوميات مغترب فى إجازة ... | Munir | 07-08-18, 10:25 PM |
| Re: يوميات مغترب فى إجازة ... | Mohammed Abdullah | 07-08-18, 01:31 PM |
| Re: يوميات مغترب فى إجازة ... | Munir | 07-08-18, 10:34 PM |
| Re: يوميات مغترب فى إجازة ... | Munir | 07-08-18, 10:40 PM |
| Re: يوميات مغترب فى إجازة ... | Munir | 07-08-18, 10:51 PM |
| Re: يوميات مغترب فى إجازة ... | Adam Youssif | 07-09-18, 10:53 AM |
| Re: يوميات مغترب فى إجازة ... | Mohammed Abdullah | 07-09-18, 01:40 PM |
| Re: يوميات مغترب فى إجازة ... | Munir | 07-09-18, 06:03 PM |
| Re: يوميات مغترب فى إجازة ... | Munir | 07-13-18, 05:34 PM |
| Re: يوميات مغترب فى إجازة ... | ابو جهينة | 07-13-18, 07:48 PM |
| Re: يوميات مغترب فى إجازة ... | Munir | 07-13-18, 08:16 PM |
| Re: يوميات مغترب فى إجازة ... | Munir | 07-13-18, 10:09 PM |
| Re: يوميات مغترب فى إجازة ... | ALWALEED ALSHEIKH | 07-14-18, 08:17 AM |
| Re: يوميات مغترب فى إجازة ... | Munir | 07-15-18, 03:55 AM |
| Re: يوميات مغترب فى إجازة ... | ALWALEED ALSHEIKH | 07-14-18, 08:32 AM |
 Re: يوميات مغترب فى إجازة ... | عمر التاج | 07-15-18, 12:27 PM |
| Re: يوميات مغترب فى إجازة ... | Munir | 07-15-18, 03:00 PM |
| Re: يوميات مغترب فى إجازة ... | Munir | 07-15-18, 03:30 PM |
| Re: يوميات مغترب فى إجازة ... | Munir | 07-15-18, 03:38 PM |
| Re: يوميات مغترب فى إجازة ... | Munir | 07-17-18, 00:16 AM |
| Re: يوميات مغترب فى إجازة ... | Munir | 07-19-18, 10:48 AM |
| Re: يوميات مغترب فى إجازة ... | Mohammed Abdullah | 07-19-18, 01:11 PM |
| Re: يوميات مغترب فى إجازة ... | Ahmed Yassin | 07-19-18, 02:36 PM |
| Re: يوميات مغترب فى إجازة ... | امتثال عبدالله | 07-19-18, 02:39 PM |
| Re: يوميات مغترب فى إجازة ... | Munir | 08-02-18, 01:12 PM |
| Re: يوميات مغترب فى إجازة ... | Munir | 08-03-18, 04:23 AM |
| Re: يوميات مغترب فى إجازة ... | Munir | 08-19-18, 12:24 PM |
| Re: يوميات مغترب فى إجازة ... | Munir | 09-08-18, 03:56 PM |
| Re: يوميات مغترب فى إجازة ... | Munir | 09-08-18, 03:59 PM |
| Re: يوميات مغترب فى إجازة ... | Munir | 09-08-18, 04:01 PM |
| Re: يوميات مغترب فى إجازة ... | Munir | 09-08-18, 04:05 PM |
| Re: يوميات مغترب فى إجازة ... | Munir | 09-08-18, 08:23 PM |
| Re: يوميات مغترب فى إجازة ... | Munir | 09-08-18, 08:28 PM |
| Re: يوميات مغترب فى إجازة ... | Munir | 09-08-18, 08:34 PM |
| Re: يوميات مغترب فى إجازة ... | Munir | 09-10-18, 09:18 PM |
| Re: يوميات مغترب فى إجازة ... | Munir | 09-11-18, 11:22 AM |
| Re: يوميات مغترب فى إجازة ... | Munir | 09-11-18, 11:27 AM |
| Re: يوميات مغترب فى إجازة ... | محمد عبد الله الحسين | 09-13-18, 06:58 AM |
|
| |
Munir
فيس بوك
تويتر
انستقرام
يوتيوب
بنتيريست