منشور للصحافيين والإعلاميين والمترجمين

Quote: أنا ما بقرب من المطبخ خالص. وقبل كدة حكيت ليكم قصتي مع المطبخ، خلوني أحكيها ليكم مرة تانية. كنت برة البلد وجوني اتنين من أهلنا واحد مريض وأخوه مرافق ليهو. المريض كان عندو مشكلة في أضانو مقفولة ما بسمع بيها ولفوا بيهو العالم عشان يعالجوهو. مرة مصر ومرة الأردن ومرة وين ما عارف بدون فايدة. أنا كنت عزابي وما بعرف البوتاجاز ذاتو بولعوهو من وين. كان عندي واحد صاحبي دارس طباخة وشغال في مطعم كبير بجوهوا مشاهير المجتمع. المهم كنت بمشي ليهو في بيته بيطبخ لي حاجات كتيرة وبجيبها معاي البيت في كونتينرات وبختها في التلاجة وأقعد أسخن ليهم. يوم كدة كان مشغول أو مسافر ما بتذكر قال لي أنا بوريك حاجة ساهلة تعملها. قام اشترى معاي "كبدة" ووراني كيف أعملها. المهم الزول كان بيقول لي الكلام بيدخل بي أضان وبيطلع بالتانية. مرة يقول أحلب الليمون عشان الزفار يروح وكلام كتير كدة. المهم مشيت البيت لما وقفت قدام البوتاجاز الكلام طار لي ونسيت المقادير. قمت ختيت ليك 5 معالق من "أي حاجة لاقتني في المطبخ". بعد "نص ساعة" من النار الملهلبة الكبدة بقى لونها بقى "تركوازي" ولما لمستها ما عارف اتذكرت رمي الجمرات ليه! بعد داك كبيت ليك الكبدة وعملت لي سلطة وختيتها للجماعة. الجماعة وقعوا ليك في الكبدة وفي لسانهم طعم الأكل بتاع صاحبي. وأنا عشان عارف الحاصل ما دخلت يدي في الكبدة ووقعت قريض في العيش. بعد كم ساعة ناسك بدوا يتلولوا لغاية ما جبت ليهم الإسعاف. الغريبة تاني يوم أضان الزول فتحت ولغاية ما مات الله يرحمه ما قال لي زول: ما سمعتك!