11:34 AM April, 11 2018 سودانيز اون لاين وليد شداد-موسكو مكتبتى رابط مختصرفي تقديري ان العقل السلفي النمطي يعمل بنفس آلية العقل الملحد أو اللاديني..هذا بالطبع مع اختلاف الاهتمامات الفكريةفكلاهما يفكر بطريقة واحدة، اقصائيون،يلغون وجود الآخر، ينظرون نظرة سطحية مادية للأديان، ولا يتمكنون من رؤية البُعد الروحي فيها، ولا حتى الجانب الاخلاقي.. لا يعرفون "جدلية الحب الصوفي" بين العبد وربه، وإنما فقط يرى "أوامر" نازلة من السماء وطاعة أو معصية صاعدة من الأرض! وهذا شئ مرهق من الناحية النفسية وليس من الإسلام ولامن القرآن الذي يبدأ أول ما يبدأ باسم الله (الرحمن الرحيم) وليس القوي العزيز ...
و يعتقد كلاهما أن الله تعالى له شكل وحدود ويمكن أن نلتقط له (صورة)، وأنه جالس على عرش في السماء، لكن الحقيقة أن الله ظاهر في مخلوقاته بأسمائه وصفاته، فنحن نرى "الحيّ" في كل كائن حي، ونرى "المحيي" في فصل الربيع، ونرى "المميت" في فصل الخريف، ونرى "العليّ" و "الرافع" في السماء، ونرى "الباسط" في الأرض، ونرى "القوي" و "شديد البطش" في الأسد والوحوش المفترسة، ونرى "الرؤوف الرحيم" في فرس تلعق وليدها حديث الولادة، ونرى كل ذلك في الإنسان بمزيد بيان على تفاوت بين بني البشر في حظهم من ظهور الصفات الإلهية فيهم، على أن أكثرهم حظاً منها هم الأنبياء .الاثنين لا يمكنهم استيعاب أنه لابد من وجود طوائف ومذاهب مختلفة داخل الاسلام الواحد رحمة ببني البشر، لأن الإستعدادات والقابليات تختلف من شخص لآخر ومن زمن لآخر ومن مكان لآخر.. ومن هنا فلابد من التنوع والإختلاف المشروع الذي يقول القرآن أن الله خلق البشر لأجله (ولا يزالون مختلفين إلا من رحم ربك ولذلك خلقهم) أي خلقهم مختلفين لأنهم مظاهر للأسماء والصفات الإلهية، وهي مختلفة، فمنها صفات جلال ومنها صفات جمال ومنها صفات كمال، الأولى يحملها الكافرين والطغاة والمتجبرين، والثانية يحملها أهل الإيمان وفاعلي الخير، والثالثة والأخيرة تظهر في أنبياء الله تعالى والورثة المحمديين .
كلاهما حين تتحاور معه يلوح أنه أن غايتك وأمنيتك في الحياة أن تخرجه عن معتقده، لا أدري لماذا؟؟ لعل السر هو الصراع الذي يدور دوماً بداخله. مع أنك حين تتحاور مع أحد فإن الهدف الطبيعي لك .. لو كنت شخصاً سوياً .. هو بيان ما تعتقد أنه صواب، بغض النظر عما لو اقتنع الطرف الآخر أم لم يقتنع فهذا شأنه! والقرآن يقول (ليس عليك هداهم ولكن الله يهدي من يشاء) (فذكر إنما أنت مذكر لست عليهم بمسيطر) (فمن شاء فليؤمن ومن شاء فليكفر) الأمر واضح وواسع !كلاهما يرى نصف الكوب الفارغ ولا يرى النصف الممتلئ، ويعتقد أن الإسلام على وجه الخصوص هو الإسلام السلفي لا الاشعري مثلا، ويقرأ النص تبعاً لقراءة ابن تيمية لا قراءة الغزالي.
كلاهما يحيا على الصراعات، ويعيش على هامش الطرف الآخر، ويحرص كل الحرص على بقاءه ودعمه، فالسلفي يعيش على حماية العقيدة من تشويه الملاحدة (وكل الناس عندهم ملاحدة أو أشباه ملاحدة)، والملحد أو اللاديني يحرص كل الحرص على بقاء الفكر السلفي مستمراً، ولذلك:كلاهما يشتعل غضباً حينما يظهر ويلمع نجم مفكر مسلم مستنير ، والمفترض أن نحيي كلنا تلك النماذج النادرة التي تلمع كالنجوم في صفحة سماء سوداء مظلمة، هذا لو كنا شخصيات سوية تريد النور وتريد الإصلاح.. وأما لو كنا نعيش على الصداع والصراخ وضرورة وجود عدو خطر : فإن المفكر المسلم المستنير هو الخطر لأنه يهدم بنيان التطرف، وبالتالي لن يكون للمتطرفين وجود، ولا لمن يهاجم الإسلام الأموي "الذي يمثله المتطرفون"، ومن هنا يكون فضل كل طرف على أخيه إذ يعيش على وجوده...
كلاهما لا يقبل البحث التاريخي لاسكتشاف الحقيقة، النسخة الحقيقية من الإسلام النبوي لا السلطاني، ومعرفة التأثير السياسي على تشكيل الوعي الديني جيلاً من بعد جيل.. فلو شرحت له كيف أن كل شئ في هذه الحياة مختوم بختم السياسة حتى الأحاديث النبوية نفسها التي لا تتوافق مع القرآن، وأن هناك – كما يقول المستشار عبد الجواد ياسين – قرأناها في كتب الحديث فلم نفهمها فلما قرأناها في كتب التاريخ فهمناها، وهناك أحاديث قبلناها فلما قرأناها فيكتب التاريخ لم نقبلها، كحديث عكرمة مولى ابن عباس (من بدل دينه فاقتلوه) هذا الحديث اليتيم المشئوم الذي نسخوا به عشرات آيات حرية العقيدة في الإسلام (فمن شاء فليؤمن ومن شاء فليكفر) وغيرها مما لا يحصى، وكيف أن الإستبداد السياسي أجبر الفقهاء على تضخيم فقه العبادات وتقزيم الفقه السياسي الإسلامي وتطويعه لصالح الحكام بما عرف بـ "الآداب السلطانية"، وأجبر المحدثين على عدم رواية أحاديث عن العدل والعقل والمساواة، واختراع ووضع أحاديث عن السمع والطاعة والإستخراف والإستحمار، وأن الأصل في دعوة الأنبياء من القِدم هي التحرير والعدل والمساواة، ولذلك أنت تقرأ في القرآن المعصوم من التحريف آيات تأمر بهذا (إن الله يأمر بالعدل والإحسان وإيتاء ذي القربى وينهى عن الفحشاء والمنكر والبغي) ومئات الآيات التي تعلي من شأن العقل والتفكير والقراءة والتدبر، ونادراً ما تقرأ هذا في الأحاديث : لو قلت له هذا، فسوف يهاجمك ولن يقبل منك سواء كان ملحد/لا ديني أو سلفي لأنهما يعملان في نفس ورشة العمل.
كم يفرز الإستبداد السياسي من مواهب ونقاد وفلاسفة !
.....
التعميم ذميم..ليس كل الملحدين والسلفيين بهذه الصفات والشواهد، وما أطرحه ليس مقارنةً تُعطي الأفضلية لأحدٍ ، أو مناقشة حُجج ، ولكن ما يجري هو عبارة عن مُقاربات فكرية لفهم قد وصلني من جدالات...
*السلاحدة كلمة منحوتة من كلمتين...سلفية و ملاحدة...
(عدل بواسطة وليد شداد on 04-11-2018, 11:36 AM) (عدل بواسطة وليد شداد on 04-11-2018, 11:58 AM)
04-11-2018, 12:28 PM
مني عمسيب مني عمسيب
تاريخ التسجيل: 08-22-2012
مجموع المشاركات: 15691
ومشكور علي هذا البوست الذي ينشط ما نحمله من معتقد ولا معتقد .
ردآ علي : في تقديري ان العقل السلفي النمطي يعمل بنفس آلية العقل الملحد أو اللاديني..هذا بالطبع مع اختلاف الاهتمامات الفكرية فكلاهما يفكر ... بطريقة واحدة، اقصائيون،يلغون وجود الآخر بالمناسبة يا شداد لو كان كلامك بتتكلم عن الملحد الاصل ليست الكوبي اي الملحد بالفطرة يعني ما عشان مورست ضده حاجات غير لائقة باسم الاسلام وطلع بقي ملحد دا اساسآ ما عنده اي علاقة ... باقصاء احد لانه عدم ايمانه بوجود الله دا بكفيه عدم التفكير في .. اي اقصاء لانه اساسآ ما عنده مساحة نقاش جواه عشان يناقش في حاجه هو ما عنده ليها مكانة جواه ! وديل بالنسبة لي اخير لي ... من السلفين الزي ما شايفهم الزمن دا من دمار للبشرية والحياة عكس الملحدين اللهم هم كما قال عنهم هم الصالحون اي البعملوا في عمل الخيرات بكل انواعه للحياة وللبشرية .
كدي اسمع الفيديو دا ولو في العمر بقية بجيك للملحدين الكوبي اي النسخ من الملحدين الاصلين .
04-11-2018, 01:16 PM
صلاح عباس فقير صلاح عباس فقير
تاريخ التسجيل: 08-08-2009
مجموع المشاركات: 5482
وليد شداد مرحباً بك، وبكل ما يثير الفكر والتأمل، *** أما أن السلفية هي الوجه الآخر من الوضعية والإلحاد، فهذا ما أكده كذلك من قبل الأستاذ محمد ابو القاسم حاج حمد، أما فيما يتعلق بذات الله وأسمائه وصفاته، فالحديث ذو شجون، و.... عفواً يمنعني الانشغال الآن من الاسترسال، فإلى حين ميسرة.
04-11-2018, 01:41 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12482
حبيبنا وليد .. بوست فيه عمق ويحتاج إلى قراءات متعددة نعم الاستاذ وليد .. الراديكالية هي المصيبة الكبرى متى ما توفرت في أي بيئة كانت النتيجة الدمار التشدد في الأمور الدينية والحياتية ( إيماناً أو الحاداً ) هي المشكلة والنتيجة الحتمية هي التعصب والمواجهة والنزاع والحرب والقتل والدمار ..
نعود لقراءة المقال ..
شكراً وليد الحبيب ..
04-12-2018, 08:19 AM
بلال الطاهر بلال الطاهر
تاريخ التسجيل: 04-01-2017
مجموع المشاركات: 585
لك التحية وليد شداد المقاربة بين الملاحدة والسلفية منطقية جدا, ولا تنسي كذلك العلمانيين هم الوجه الآخر للسلفية, بل وأحيانا أشد تطرفا منهم, والغريبة هم ما شايفين عوجة رقبتهم, ويعملوا فيها بعد كل العنف الذي يمارسونه ومصادرة الحريات أوصياء علي المتدينين!
بل أنني أزعم أن السلفية وليدة السلطة العلمانية إبتداء من إنقلاب بني أمية, وظهور الخوارج, وتكون مذاهب فقه العبادات, وما سمي بأهل السنة والجماعة في الممالك العباسية والعثمانية, ومرورا بوهابية وإنتهاءا بداعشية النظام السعودي
الآن أكثر الدول والجماعات تطرفا ضد الدين تخصصت مخابراتها في تجنيد الداعشيين لهدم المساجد وقتل المصلين....
وأكبر مثال لذلك جماعات السعودية في سوريا, والسلفية المتحالفة مع الإمارات في اليمن والصومال, وما تقوم به مصر في سيناء, والسلفية المدخلية المنضمة لحفتر ليبيا
أكثر ما يحزن حال الشباب مغسولي الدماغ الذين يتبعونهم دون أن يعرفوا حقيقتهم!!!
04-12-2018, 08:49 AM
وليد شداد وليد شداد
تاريخ التسجيل: 06-14-2017
مجموع المشاركات: 38
بالمناسبة يا شداد لو كان كلامك بتتكلم عن الملحد الاصل ليست الكوبي اي الملحد بالفطرة يعني ما عشان مورست ضده حاجات غير لائقة باسم الاسلام وطلع بقي ملحد دا اساسآ ما عنده اي علاقة ...
الاخت العزيزة مني بعد التحايا و الاحترام
انا اتحدث عن الملحدين المحليين ذوي الخلفية السنية لان معظم تجاربي كانت معهم ( بالمناسبة انا مسميهم الملحدين الجزافيين...لكن ملحدين الكوبي عجبتني ) فهم ادري القوم بالتراث السني....
اما الملحد الاصلي فهو زول واعي جدا يبحث عن الحقيقة و كونوا لم يعتنق الاسلام فده مش عشان هو مكابر لكن عشان ما قتنع بالطرح و بي كده في قناعتي انو لمن يمشي لي ربو ما حايحاسب علي عدم الايمان
لانو ما اقيمت عليه الحجة بل سيحاسب بالقانون الانساني العام ( الكذب كعب عند كل البشر و القتل كذلك و اكل حق الغير الخ الخ الخ ) تماما كما يحاسب كونق وونق لي المزارع الامي في وسط الصين الذي لم يسمع لا بالله و لا بمحمد حتي مماته...
بالنسبة لي يا عزيزتي منى الملحد الاصلي ليس صاحب هوى، وإنما في الغالب هو باحث عن الحقيقة أكثر من المقلد لكنه وجد ثقافة مزيفة عن الله والنص والنبي والعدل الخ او ربما حتي لم يطلع عليها من الاصل... فرفض كل هذا الزيف عن الله والوجود وهو محسن من هذه الناحية
لكنه لم يستكمل البحث والنظر في البديل وربما عجز عن ذلك فتوقف في المنتصف.
التصور السلفي الذي ينطبع في الأذهان عن الله ووجوده وذاته وافعاله وحكمته وعدله فيه خلل كبير يؤدي إلى الالحاد أو نسبة السخف والظلم إلى الله.لذلك لابد من الاهتمام بهذا الموضوع وإعادة ضبط التصور والمعرفة وفق النقل القرآني والعقل الفلسفي وانتاج المعرفة المادية..
الملحد الغوغائي كالمتمذهب الغوغائي، لا يبالي بهما الله؛ هذا عبد سؤالا بطيئا؛ وذاك عبد إجابة سريعة!
تصدق قبل اسبوع كده كنتا معتنق نظريتك دي لمن لاقيت لي ملحد بيقول بقدم القران و انو الله مجزاء و لمن قلتا ليو زي ما انتا قلتا كده قال لي انت زول ساي و انت وانت و شنو البيمنع هههههههههههههه
تصدق قبل اسبوع كده كنتا معتنق نظريتك دي لمن لاقيت لي ملحد بيقول بقدم القران و انو الله مجزاء و لمن قلتا ليو زي ما انتا قلتا كده قال لي انت زول ساي و انت وانت و شنو البيمنع هههههههههههههه
فاااا شنو نظريتك دي طارت لي......
سلامات يا وليد
معليش يا وليد لكن دا ما ملحد .. لانو مصطلح ملحد دا معروف منذ قرون انو يطلق على الشخص الذي لا يؤمن بوجود آلهة ومفردها إله
وهاك تعريف مختصر من الويكبيديا
الإلحاد بمعناه الواسع عدم الاعتقاد أو الإيمان بوجود الآلهة. وبالمعنى الضيق، يعتبر الإلحاد على وجه التحديد موقف أنه لا توجد آلهة. ... حيث مال الملحدون الأوائل إلى تعريف أنفسهم باستخدام كلمة "ملحد" في القرن الثامن عشر في عصر التنوير.
عشان كدا يا وليد مفترض بدل ما تطيرلك نظريتي دي كان تقعد الزول القالك انت زول ساي وبرضو الملحد الكفرك زي ما قلت فووق هناك في علبو
لكن باين انك فاتت عليك المسألة دي او انت غير ملم بالمصطلح ومعناهو من اساسو عشان كدا اتقبلت تغيير مفهومك بكل اريحية وببساطة تحسد عليها
عموماً بعد ما وضح تماماً ان الملحد لا يؤمن بأي إله
اها بعد كدا وجهة الشبه شنو بين الملحدين والسلفيين ؟؟؟
تحياتي
04-15-2018, 07:57 AM
وليد شداد وليد شداد
تاريخ التسجيل: 06-14-2017
مجموع المشاركات: 38
الكلام انو ما معناتو ما مؤمن بالشي معناتو ما اقدر انظر فيهو .... و زي ما قال الزول داك انت مامؤمن بي قيامة المسيح او صلبو فكيف تناقش فيها او تاخد موقف في القضية دي؟؟
فدي يعني قضية فكر محض و فلسفة لا علاقة لها بالاعتناق....
لذا من العادي انو الزمن ده تلقي ملحد و سلفي في نفس الوكت و كمان يفتي بي ايمان و كفر غيرو من واقع موقفو الفكري كما يقول ....
كدي وريني و منكم نستفيد اقعدو في علبو و بي ياتو حجج لانو انا جديد في الشغلة دي كما يبدو من بساطتي المحسود عليها دي...
Quote: الكلام انو ما معناتو ما مؤمن بالشي معناتو ما اقدر انظر فيهو
ابداً انا زاتي ما قلت كدا يا وليد .. انا اديتك تعريف لمصطلح ملحد وانت قلت في ملحد كفرك
وفي ملحد مؤمن بوجود الله بدليل انو بقدم القران .. الخ المهم
لذلك قلت ليك مافي ملحد حقيقي وفاهم موضوع الالحاد بعمل زي جماعتك ديل الا يكونو جايبنلهم الحاد جديد كرت
الشي التاني في مسألة التنظير القلتها في المقتبس اعلاه ، نقاش الافكار لا يتطلب الايمان بها يا وليد
يعني الملحد ممكن يناقشك في فكرة وجود الاله المتبنيها انت كربوبي ولكن لا ينقاشك من واقع ان الاله موجود فعلاً
بل يناقش الدوافع الخلتك تؤمن بفكرة وجود الاله والاسباب الادت الى هذا الايمان وفق منهج علمي ويحاول يفندها اما اقنعته او اقنعك
Quote: لذا من العادي انو الزمن ده تلقي ملحد و سلفي في نفس الوكت و كمان يفتي بي ايمان و كفر غيرو من واقع موقفو الفكري كما يقول ....
انت هنا يتخيل لي زي الخلطت بين الملحد والعلماني ، مافي ملحد مؤمن بإله يا وليد لذلك مستحيل ان يؤمن بالقرآن وطبيعي انو مستحيل ينضوي تحت لواء السلفيين هههههههه
لكن معظم المسلمين الان علمانيين بالرغم من رفض المجتمع الاسلامي للعلمانية وهو رفض غريب وغير مبرر لكن واقع الحال في كل الدول المسلمة تجد ان العلمانية
واضحة وممارسة ممارسة فعلية في كل مناحي الحياة.
Quote: كدي وريني و منكم نستفيد اقعدو في علبو و بي ياتو حجج لانو انا جديد في الشغلة دي كما يبدو من بساطتي المحسود عليها دي...
تقعدو في علبو يا وليد بالتوضيح له انو غير ملحد ، فقط لو طلبت منو تعريف مصطلح الحاد كانت النتيجة حا تظهر ليك جلية جداً وكان حا يسكت لانو حا يطلع هو القاعد ساي
والعفو يا وليد انا ما قصدت انك جديد في الشغلة ولا قصدت انك بسيط ، لكن الزول البقول كلام عجيب زي دا تفويت فرصة بستفتو شي صعب جداً
ياخي يقولك انا ملحد ويكفرك وتخليهو هههههههههههه
عموماً ياخي لو كلامي دا اكل معاك اي جنبة غير مقصودة مني فتقبل اعتذاري عنها
ولك الاحترام مع الشكر
04-15-2018, 09:18 AM
وليد شداد وليد شداد
تاريخ التسجيل: 06-14-2017
مجموع المشاركات: 38
الزول الكفرني ده كفرني في مناظرة و المناظرة امتدت بعد داك و ما تفتكر اخوك لحمو حلو هههههههههههههههه
يلا الخلاني اجيب الكلام الجبتو من اساسو انو فعلا في نماذج مدعية الالحاد الصافي لكن عقليتها في نقد الدين عقلية سلفية لا ينتطح فيها عنزان و موقفهم المتبني تجاه القضايا الخلافية موقف سلفي بامتياز ...
و لا يرضون ابدا بالمناسبة ان تنتقد انت كمسلم المذهب السلفي ولا تكون عندك نظرة مغايرة سواه و يرون ان المذهب السلفي هو الدين الاسلامي و عداه في احسن الاحوال زول ما عارف شي ساي او كافر ما مسلم عديل
فمن رايك كده زي ديل تسميهم شنو غير سلاحدة؟
و لو لاحظتا انو في نهاية الكلام نوهتا انو ما كل الملحدين كده بس ده النموذج اللاقاني.....
عادي ياخ ما تتحسس لانو مافي شي
و يبقي الود بيننا و الاحترام....
04-15-2018, 08:16 AM
Hani Arabi Mohamed Hani Arabi Mohamed
تاريخ التسجيل: 06-25-2005
مجموع المشاركات: 3515
Quote: و لا يرضون ابدا بالمناسبة ان تنتقد انت كمسلم المذهب السلفي ولا تكون عندك نظرة مغايرة سواه و يرون ان المذهب السلفي هو الدين الاسلامي و عداه في احسن الاحوال زول ما عارف شي ساي او كافر ما مسلم عديل
فمن رايك كده زي ديل تسميهم شنو غير سلاحدة؟
طبعاً يا وليد ممكن تتفاجأ لو قلت ليك النموذج دا هو نموذج الملحد الفاهم هو بسوي في شنو
وعارف يضرب وين بالضبط وطبعاً دا في حالة ان كان الشخص البناقشو مسلم سلفي او قل مسلم بصورة عامة
طبعاً المنهج السلفي وباين من الاسم والفكرة انو اكتر منهج من مناهج المسلمين يحاول تطبيق الاسلام كما طبقه الرسول (ص) في زمانه
عشان كدا دايماً واقعين في التناقضات الموجودة في بعض الاحكام الغير متماشية مع زماننا ولكنها تمثل لهم اوامر إلهية يجب تنفيذها بحذافيرها دون نقصان
والمصيبة انهم فشلوا في التطبيق لسبب بسيط لان العالم تطور وتغير ولم يعد كما كان زمن الرسول (ص)
لذلك مثل هذا الملحد هو يعي تماماً الفكرة الاساسية للدين الاسلامي والتي في منظور الملحدين لا تصلح الان كمنهج للحياة او كأثبات لوجود خالق من اساسو
عشان كدا بكون حريص حرص شديد لاثبات ان المنهج السلفي هو المنهج الصحيح والنموذج الحقيقي للاسلام.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
وليد شداد
مني عمسيب
علي عبدالوهاب عثمان
بلال الطاهر
Hani Arabi Mohamed
فيس بوك
تويتر
انستقرام
يوتيوب
بنتيريست