|
|
 Re: الجمرة للواطيها .. بلقى مرادي مع المريود ... (Re: Kabar)
|
سواقة العريس(بخصوص تساؤل الصديق كبّر عن اسم الرقصة بالضبط)
أولاً التحية للناس المرقو بهنا كلهم وحباب صاحب البوست والجايين.
يا ول ابا مساك طيب شايفك من البداية ركزت في غناء الشباب كتير في الفيديو ربما لأنو صوت الشباب أوضح في المقطع ؛ عشان كدة جا رصدك (لكرتهم) " قصة الجلكسي" ودا مدخل جيد على العموم .
أولاً فيما يخص الرقصة اسمها " ام رُدس" وهي جائلة في الطرقات -كما تراها- أبدا. و الأحداث البتترقص فيها اتنين فقط احدهم استثناء وهو سواقة عيال الطهور اما الأساسي فهو الظاهر على الفيديو الفوق واسمه " سواقة العريس" وهي سيرة العريس المعروفة في ربوع البلاد التانية ؛ والسواقة دي بالذات ليها طقوس عجيبة خلاس ياعمك؛ وخساير كمان .
أصل الرقصة هو غناء النسوان الماشات ورا العريس وهو غناء خفيف لاتتعدى كلماته بيت شعري واحد على إيقاع التوية مع صفقة سريعة يُضبط ضرب الارجل ليأتي مخالف لها. والغناء القصير دا اسمو (الشيلان) وهو غناء يمجد العريس على العموم . اما غناء الشباب الجماعي الانت رصدته -بجلكساته ومقاشيشه- فاسمو "كرير" الكرير الواحد دا بتاع السنجك والعريج والكاتم والجراري ووو" وهو ضروي لرفع ريتم الردس وكتل الارض في الطرف الاخر - الطرف الناعم- وعشان كدة زي ما شايفو غزل حصيف وكدة" جلكسي مقشاشة سواني شماشة".
سواقة العريس بتكون في اليوم القبل ليلة الدخلة وتوقيتها عصر كبير ومن الطقوس الاساسية فيها ركوب العريس في حصان ؛ وعادة بكون جواد بدين ومانع يقوم بإلجامه وزير العريس ( الشاب ابو بدلة اشتراكية رمادية في الفيديو) حتى يجاري تمهل القافلة و الواضح انو الفيديو الفوق دا مصور في مدينة تعذر وجود جواد فيها؛ ثم الهلال العلى جبين العريس؛ قلائد الدهب والسوميت ؛ ثم السوط او السعفة؛ بعدين لازم تبدأ رحلة سواقة العريس من بيت أمه وتنتهي في بيته الجديد مارة ببيوت الفريق/ الحلة بيت بيت؛ وفِي النهاية تكمن الخسائر ياصحبي!؛ حيث يتمثل الطقس الأخير المسمى "دليان العريس" ودليان دي من تدلى يتدلى تدلياً. والتدلي عندو مقطع غنائي ثابت تغنية النساء ( الخلف العريس كما في الفيديو) ومتنه
(ادلى… ادلى …صقير الخير ادلى)
هنا يأبى العريس ان ينزل من جواده مالم ينزله اخوانه وأبناء عمومته واصحابه والتابعين وتابعيهم الى اخر القافلة الرادسة. ويُقصد بالتنزيل هنا الهبات والهدايا بمناسبة الزواج السعيد؛ مثلا كأن يقول احد اصاب العريس:( نزلتك بناقة بكرة؛ او نزلتك بعجلة جدعة او عبور او جواد او قروش او اي شيء ذي قيمة ) والوزير( الشاب ابو بدلة اشتراكية رمادية في الفيديو ) هو المفوض بقبول الهبات أو رفضها. وبعد انتهاء الطقس الشباب البكرو بالجلكسي ديل حيحلوا غردة سرج الحصان ويدخلوا العريس بي سرجه في بيته وحينتهي الدور ليتحول الجمع للسهر في الساحة عريج /كاتم /سنجك جراري/ كشوك /حجوري … الخ.
والسيرة او والسواقة الماشة في الفيديو دي حتطوف الحلة بيت بيت وفي كل بيت حتستقبلهم ست البيت راشة عليهم فتيل كامل من عطر فلير دمور او صاروخ او بالعدم بخاخ.
أشهر مقطع غنائي في سواقة العريس هذا البيت (عريسنا هلال ياهلال … العز والدلال)
ومن المقاطع الشائعة التي أتذكرها في ام ردس البيت الاول من أغنية غنتها شادن حسين :
كسوا غادي المامننا… العز الصافي هَنَ* جدنا.
وكذلك مقطع اخر:
العريس صندل بي دكانا … الزول عزه بي خيانا
وأيضا :
أمه زغردت أنحنا جينا … الليد* قلب الخيل بالشتيمة.
تحياتي
تلبو
———
*هوامش
هَنَ: حق؛ للتملك. هناه حقه او ملكه.
الليد: الولد او الشاب.
|
|
 
|
|
|
|
|
| العنوان |
الكاتب |
Date |
| الجمرة للواطيها .. بلقى مرادي مع المريود ... ( الحقنا يا شيخ كبّر ) ... | يحي قباني | 09-15-17, 03:46 AM |
| Re: الجمرة للواطيها .. بلقى مرادي مع المريود ... | Kabar | 09-15-17, 10:13 AM |
| Re: الجمرة للواطيها .. بلقى مرادي مع المريود ... | عمر السلمة | 09-15-17, 04:44 PM |
| Re: الجمرة للواطيها .. بلقى مرادي مع المريود ... | Haytham Ghaly | 09-15-17, 05:03 PM |
| Re: الجمرة للواطيها .. بلقى مرادي مع المريود ... | الصادق اسماعيل | 09-15-17, 08:36 PM |
| Re: الجمرة للواطيها .. بلقى مرادي مع المريود ... | الصادق اسماعيل | 09-15-17, 08:39 PM |
| Re: الجمرة للواطيها .. بلقى مرادي مع المريود ... | امجد الجميعابى | 09-15-17, 08:48 PM |
| Re: الجمرة للواطيها .. بلقى مرادي مع المريود ... | امجد الجميعابى | 09-15-17, 08:58 PM |
| Re: الجمرة للواطيها .. بلقى مرادي مع المريود ... | يحي قباني | 09-15-17, 10:41 PM |
| Re: الجمرة للواطيها .. بلقى مرادي مع المريود ... | Basamat Alsheikh | 09-16-17, 07:06 AM |
| Re: الجمرة للواطيها .. بلقى مرادي مع المريود ... | حامد بدري | 09-16-17, 07:41 AM |
| Re: الجمرة للواطيها .. بلقى مرادي مع المريود ... | Kabar | 09-16-17, 08:05 AM |
| Re: الجمرة للواطيها .. بلقى مرادي مع المريود ... | Kabar | 09-16-17, 08:58 AM |
| Re: الجمرة للواطيها .. بلقى مرادي مع المريود ... | Kabar | 09-16-17, 09:44 AM |
| Re: الجمرة للواطيها .. بلقى مرادي مع المريود ... | Dahab Telbo | 09-16-17, 01:15 PM |
| Re: الجمرة للواطيها .. بلقى مرادي مع المريود ... | Dahab Telbo | 09-16-17, 01:16 PM |
| Re: الجمرة للواطيها .. بلقى مرادي مع المريود ... | عمر أبوعاقلة | 09-16-17, 09:56 AM |
| Re: الجمرة للواطيها .. بلقى مرادي مع المريود ... | Kabar | 09-16-17, 11:43 AM |
| Re: الجمرة للواطيها .. بلقى مرادي مع المريود ... | Kabar | 09-16-17, 11:55 AM |
| Re: الجمرة للواطيها .. بلقى مرادي مع المريود ... | Kabar | 09-16-17, 11:56 AM |
| Re: الجمرة للواطيها .. بلقى مرادي مع المريود ... | عمر السلمة | 09-17-17, 04:57 PM |
| Re: الجمرة للواطيها .. بلقى مرادي مع المريود ... | الصادق اسماعيل | 09-18-17, 07:50 PM |
|
| |
Dahab Telbo
فيس بوك
تويتر
انستقرام
يوتيوب
بنتيريست