|
|
 Re: أحزان الجمهوريين: أمنا خديجة بت الشريف وس� (Re: ست البنات)
|
كل الشكر لكم الأعزاء محمد المسلمي ومنى بت عمسيب وست البنات
تقبل الله منكم وشكر لكم ولا اراكم مكروها في عزيز لديكم
عزتني بالهاتف قبل قليل الدكتورة اماني عبداللطيف عمر وقالت لي غايتو بت الشريف انتو ما ما كنتو بي جوة محل التكل عشان تشوفوها ..... النهار كلو مع النيران..... تعوس ... تعوس ... تعوس
ترملت بنت الشريف بعد فقدها لزوجها مختار محمد طه شقيق الأستاذ محمود وقد كانت شابة وقتها لم تبلغ العشرين وترك لها بنتين وثالث في بطنها اسموهو مختار
نذرت بقية حياتها في خدمة الناس كما حكت أماني
حكيت لأماني رؤيا صالحة لوالدتي عليها الرحمة ميمونة بت محمود
قالت انها ظلت تعوس يوميا منذ ان تزوجت وهي دون العشرين الى أن اوشكت على الخمسين
قررت يوما ان تواجه والدي عليه الرحمة وتقول ليهو خلاص كفاية تعبت ترزيتك ديل شوف ليهم زول يعوس ليهم
قالت كان والدي يصلي
انتظرته ليكمل صلاته ولكنها نامت
ترى في النوم وهي قد عايشت فيضان سنة ٤٦ في منطقة منصوركتي
تقول ترى بحر دميرة هايج اكتر من فيضان ٤٦
بلغ منها الخوف مبلغا تكاد تسمع وتحس دقات قلبها بأظافر رجليها
فجأة ينبني سد يوقف مد الفيضان تجاهها فيغمرها فرح طاغ وتلفت لوالدي
وتسأله: ده شنو يا عثمان؟!
يقول ليها دي كسرتك العوستيها
قالت اتلفت تاني عاينت ليها عرفتها سنسنة سنسنة زي ما بعرف اولادي
اللهم انفعنا بجاه بت الشريف وبجاه امهاتنا اللآئي افنين حيواتهن في خدمة الناس
|
|
  
|
|
|
|
|
| |
عبدالله عثمان
فيس بوك
تويتر
انستقرام
يوتيوب
بنتيريست