يعلم الله انتزعت مني ضحكة ماكنة وعريضة..ياخي قربت اتشرق عديل..!!
حتة اثنوغرافية صغنونة..كلام نادر تلقاهو يا عادل..!!
هي حاجات بسيطة ..احتمال تفيدك في معرفة بعض من اهلك في امسودان وثقافتهم وطرائق تعاملهم مع الحاجات حتى لو كانت مآسي عدييل..!!
اخونا الفاضل حامد الجبوري..شاب يا عادل ، وصغير السن ، ومن طريقة كلامو ممكن عادي احدد ليك عمرو كم سنة..!!
اهلك المسيرية بيحبو التصغير شديد..وبيستخدموهو بصورة بليغة للغاية..بالضبط زي منهج النحو (في اللغة العربية) الزمان درسناهو في الشهادة السودانية..ونوع اخونا الفاضل ده بيقولوا عليهو (حرامي) وتصغيرها (حريمي)..!!.وهي تعني مستهبل..!!..وعكس ناس البندر ، هناك عند اهلنا..اللص بيقولوا عليهو (سراق)..اما المستهبل فهو (حرامي)..!!
جدنا محمد ولد الجبوري (الإسم الثالث لأخونا الفاضل) هو الناظر الثاني لأهلك المسيرية الزرق ، الأول كان جدنا زكريا ابوخديجة (من خشم بيتنا) ، والثاني ولد الجبوري (حضر زمن المهدية) والثالث جدنا حماد محمد دفع الله (والد عمنا اللواء فضل الله حماد ، وعم عمنا اللواء فضل الله برمة ناصر ، وكانوا ضباط ثلاثة من فريقنا ، ثالثهم عمي لزم العقيد فضل الله دينج فضل الله شنة ، والد احد اعضاء هذا المنبر ، واصغرهم سنا عمنا فضل الله برمة ناصر..!!)..ولو بتحب الأغنية الشهيرة الإسمها (العجكو) الفرتقو بيها الكيزان ذات حفلة في جامعة الخرطوم زماااااااااااااااااااان..فيها عبارة بتقول:
الصغار هم التلاميذ ، والحكامة كانت بتباهي بالتعليم وبتشجع عليهو..والجــُهال هم الصبيان أي الشباب ..(راكبين طيار ) العبارة دي مقصود بيها واحد من اعمامك العساكير المذكورين فوق ديل..!!!!!!!
اسم (الفاضل) جاي من اسم والد عمنا السياسي المعروف (مبارك الفاضل)..!!
مفردة (فنلة) مفردة مستحدثة ولا توجد في قاموس المسيرية..ولكن بالرغم من ذلك تم التساكن اليها ، وتصغيرها زي الترتيب (كما هو نطق اخونا الفاضل ليها) بصورة تحتار فيها جميع مجامع اللغة العربية ..!!..وصدقني ، الفاضل ده واهلو..خصوصا ناس الخلا..عادي ممكن يقوم بتصغير مفردات مثل (واتساب ، كمبيوتر ، انترنت..الخ)..!!
اهلك المسيرية يا عادل ، عندهم مشكلة كبيرة مع الحاجات الحمراء (متذكر حكاية الحمرة الأباها المهدي؟!!!)..و(الحمرة) عندهم تم تجييرها ثقافيا عشان تحمل مدلولات جديدة ومستحدثة.. مثلا ..عندهم لو واحد جاتو بيهمة رايحة وعمل نايم بيها..بيقولوا عليها (مال الحرام) ، وبصورة ادق (الخيط الإحيمر)..وفي معتقداتهم (الخيط الإحيمر) لو ما مرقت الأمانة ومرقتو من سعيتك..ح تنقطع (تنعدم الثروة) ويركبك الفقر اب فينيلة حميرا..!!
عندنا اهلنا كتار بعثيين وشيوعيين..طبعا البعثين..قبال الواحد ما يعرف نفسو بجيب سيرة المرحوم (صدام حسين) وبغداد بلد الرشيد..عشان كده اهلك بيقولوا (الزول ده كويس وما تتغبوا فيهو المعرفة) ، اما اقربائنا الشيوعين..مافي طريقة تب..عشان كده الواحد ..لمن يجي يعرف نفسو قدام المسيرية .. بيقول ليك (انا احمر)..والجماعة بيتريقوا عليهو وبيقولوا ليهو (احيمر ساكت)..يعني زول أي كلام..!! دي حتة الإسقاط المنطلق منها الفاضل حامد الجبوري..ولأنو البقارة مستهبلين شديد.. فعمنا فكاها والناس تشيل وتنظر..!! (الكلام ده توثيق لحظات ثقافية ، وما عندها علاقة من قريب او بعيد مع نقتنا مع الشيوعيين..!!).. في واحدة من التجليات النادرة ، زميلنا عضو المنبر دكتور محمد حيدر المشرف ، قال عندو عمو اسمو(حامد محمد الفقير)..والبعيد شنو يا عادل ان اسم (حامد ، عم دكتور المشرف) جاي من اسم حامد الجبوري (والد اخونا الفاضل)..شفت السودانيين ديل متشربكين في بعض ككيف يا عادل؟..
طبعا الناس عرفت اخونا الفاضل حامد الجبوري ، بموجب التسجيلات الأخيرة في الواتساب..وعشان نربطهم بالصورة الكبيرة..!!
(كجام) هو لقب..والناس هناك ، بالرغم من انهم مسلمين لكن بيحبوا استخدام الألقاب كثيرا ، وكجام تعني الزول البيقرم الحاجات..وفي ثقافة المسيرية..بيتم الباقي باهزوجة وبيقولوا (كجام مرفعين الضلام)..المرفعين هو الهايينا او الضبع في ثقافة ناس الوسط والشمال ، وهو كائن لا يصطاد الإ في الليل..!!
قبل سنتين او تلاتة سنين تقريبا ، اخونا الفنان طه سليمان عمل فيديو كليب..شغال فيهو على ايقاعات المردوم..وقام واحد كتب في الصحف انو ح يشاكي طه سليمان لأنو خرب التراث ولم يعرضه كما هو..!!
الواحد الشاكي ده ، كان هو اخونا ول ابا الفاضل حامد الجبوري..!!
ويا الفاضل ، لو بتقرا الونسة دي..اهلنا قالوا: مافي تور بيفتر من شيلان قرونو..وانت قرون يا قريبي..!!..زي ما شلت اخونا احمد تاجر..في ناس بتشيلك زي الترتيب ومن غير نقة فترنا وعينا طلعت وشنو كده ما عارف..!!
امامتي ام امي..سليمانية يا قريبي..!! اوعك تقول لي..داير استعين بي صديق عشان يحسبها..!!
كتر خيرك يا صديقنا عادل ، وياريت تعفي لينا في هذا التسيب..!!
اخر حاجة اهديك هذا الفيديو كليب..!!
الحتة التم فيها تصوير هذا الفيديو ..هي البادية التي جاء منها الفاضل حامد الجبوري..ومرات لو تابعت تسجيلاتو..بيقول من (السنوط بغرب كردفان)..ودي ياها ملامح منطقة السنوط..!!.. والفنانة السودانية شادن محمد حسين والفاضل الجبوري ..وغيرهم ناس كتار..جات من نفس المنطقة وبتحاول تعكس حاجات اهلها بطريقة بسيطة (لا تخلو من كوميديا وفكاهة) وفي اعتقادي الناس دي نجحت كتير للغاية..نجاح تجاوز مما يسمى بالمؤسسات الحزبية السودانية ،وقنوات الثقافة الرسمية التي كانت تعكس جانب واحد من الثقافات السودانية..يعني حتى لو داير تعبر عن نفسك لازم تتقولب في القالب الجاهز بتاع ثقافة (هنا امدرمان)..!! ).البحاول صديقنا الخلوق دكتور احمد طراوة يجازفها عشان يقرب المعاني ، وهو يدرك ان صحابه الشيوعيين والشيوعيات من طبقة البرجوازية المتعفنة من حناكيش الحزب الشيوعي السوداني بانهم اخر من يعرف قيمة ثرثرة احمد طراوة..ولا عليك يا صاحب..ناس كتير بتعرف قيمة ما تقول وبتعرف كيف تفهم تجلياتك الباتعة..كتر لينا من حكاوي الشيخ الياقوت..والباقي ان شاء الله نتمو موية..برضك ح نفهم الإشارة يازول...!!
زمان يا عادل ، وذات ونسة في المنبر ده..اتجليت واعلنت التبرع لأمنة مختار وتراجي مصطفى ببقر وتيران..والناس كانت بتستغرب من هذا التخلف العجيب..واليوم نفس الحاجات زادت..لأنو عادي جدا اتبرع باسم الفاضل حامد الجبوري..وح يدفع غصبا عنو..ويرجع يملآ جماهير الواتسات بحكاوية المدهشة..!!..شفت السودان ده متشربك ككيف يا عادل؟..ياخي لغاية كتابة مناغمتى معك دي بدفع عود وديات ناس لا بعرفهم ولا بيعرفوني ذاتو..وكذا الفاضل الجبوري..!!..المهم..على قول صديقنا ول ابا تبارك شيخ الدين (ولو الفاضل عرف تبارك ، على بالحلال يقوم يحاسبو من سنة حفروا البحر ويقول ليهو تعال ادفع عودك في حق الناس الضاعت سمبلا ساكت..وتبارك زي الترتيب ، لمن يحسبوا ليهو النسبة ، يقطع من حق لبن العيال ويدفع زي الترتيب..!!..دي اخلاقنا يا عادل ، دي اخلاقنا واخلاق اهلنا واعرافهم ، ومافي زول ولا زولة بيقدر يبتزانا ويضطهدنا كما يفعل صغار الأوباش من حزب النياصة الحزب الشيوعي السوداني..!!)
من خشم بيت ناس الفاضل حامد الجبوري ،ياعادل ،..كان عمنا النائب في مجلس الشعب بتاع جعفر نميري ..عمنا محمد صالح البقاري ..والد استاذنا الناقد الجميل الربيع محمد صالح البقاري..الذي (اهدانا) ذات تجوال ما في الأصقاع السودانية البعيدة رواية (البحث عن وليد مسعود) للكاتب جبرا ابراهيم جبرا..وراية (عالم بلا خرائط) التي كتبها عبد الرحمن منيف وجبرا ابراهيم جبرا..والغريبة ما حاول تجنيينا لحزبه الذي يؤمن بمعتقداته وايدولوجيته..التحية لمحمد الربيع محمد صالح البقاري والتحية للفاضل حامد الجبوري..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست