الله يغطي عليك يا بنيتي..! هيا ترا كي بيت امك (مكة ومدينة منورة)..!!
كلامك يا بريمة ما وقع واطاة تب..! كل كتابتك عن ثقافة اهلك..اهو جابت حقها.. صحيح صفاء قد تكون امتداد لشادن ، لكن تظل الفكرة الأجمل باقية.. وياريت كل عيالنا وبناتنا من ناس الغناء والتأليف والموسيقى يتجهوا لعمل مثل هذه الفيديوكليبات..التي تعكس ملامح الناس التحت وحاجاتهم..!!
المدخل..
ترانيم المزيكا..اول الدخول كمنجة..زي بداية اشغال اخونا الفنان ادم حمودة..!! الخلفية مجموعة ابقار..بنات مادوك الفُـضة ام صوف كما يسميها البقارة..!! يعني نظام زولة سارحة (راعية) بالبقر..! تجلس تحت شدرة (شجرة هجليج) وهي تضفر طرقاية (الضـُفارة هي طريقة صناعة البروش)..وتترنم..وهذه هي الطريقة التي تؤلف بها البقاريات الغناء والأشعار..! ثم تحمل العصاية على اكتافها وهي تهش الأبقار..نظام سايقاهن على الفريق..يعني نهاية اليوم..!! ثم مارقة من الكوخ الصغير..وبتقوم بتحرك الجمرات (جقجاق النار)..وهي تستعد لتجهيز الشاي..ياخي الكفتيرة الحرقانة دي بتعمل حنين غريب..!!..طبعا البقارة جنهم شاي..!! كفتيرة (براد) الشاي قاعدة على تلاتة حجارة..اسمها اللدايا ( الأثافي )..!!
شخيط التراب..لمن عملت اربعة خطوط طولية ..تحتها ثلاث خطوط..دي عادة ضرب الرمل..وفي تلك المناطق اسمها (الرمــُل) وهي عادة معروفة في الثقافة العربية القديمة..وتدخل في باب (العرافة)..!
الزينة والإكسسوار..الفستان ملون..وهناك بنسميهو (العراقي)..يعني العراقي ليس فقط هو لبس الرجال..والألوان العديدة تعبير عن حب الحياة..! المشاط (تسريحة الشعر) هي طريقة قديمة سادت في اواخر القرن التاسع عشر..والمساير (الضفاير القدامية) ظاهرة..! الخرز على الرأس يسمونه التلال (الجمع تلاليل)..! اما الخرز على العنق يسمى الخناق (الجمع خنانيق)....هناك ايضا الورقات (الحجبات)..!..واضافت على ذلك (المحفظة) وهي نظام جزلان خاص بالنساء..!! الحلقات على الأذن تسمى (الخــرُوس)..! الأساور على اليد تسمى (العاجات)..طبعا صفاء في الفيديو لابسة اتنين..كل واحد في يد..!! الأساور على الأقدام (حول الرسغ) تسمى الحجول..!!
في الدقيقة 2:52..يلاحظ انها تضع عمامة صغيرة على رأسها..العمامة دي اسمها (الــُوقاية)..وبيقولوا فلانة وقت وقايتها..وذلك انها تريد ان تحمل حمل ثقيل على راسها..ويلاحظ انها بعد ان وضعت الوقاية..وضعت حزمة حطب على راسها..وطريقة جلب الحطب تسمى الفزع للحطب..ويقولون فلانة فازعة للحطب .. أي ماشة تجيب ليها حطب للوقود.. الوقاية ممكن تكون قطعة قماش منفصلة..او جزء من التوب..التوب السوداني الواحد ده..ولمن البقارية تعمل جزء من توبها وقاية..بيكون الجزء التاني ملفوف حول الخصر..وهنا بيقولوا ليك فلانة كاتلة توبها امقعير..!! ولو حصل في زولة من غير تكون فازعة للحطب وكتلت توبها امقعير.. فارجى الراجيك..دواس للطيش..لمن الدم يسيل للركب..!!!!
مطاردة كور (مراح) الماعز بتكون لغرضين: اما لفصل صغار الماعز عن امهاتها أو لمسك احداهن لحلبها من اجل لبن الشاي..!!.. والبقارة في كردفان ودارفور..لغاية تشاد..عندهم تربية الماعز موجودة..ويستغلون الماعز فقط من اجل لبن شاي الصباح..طبعا مرات بيستغلوهو للذبيحة واكرام الضيف..والذبيحة عندهم درجات: الماعز الأقل درجة..ثم الضان..ثم البقر..!! يعني لو مقتدر (عندك ماعز وضان وبقر) وجات نسيبتك وضبحت ليها تيس..الله قال بي قولك..ح تبقى حديث القرى والفرقان (فلان نسيبتو جات وضبح ليها تيس ساكت)..!!
في زمننا ..لمن كنا ناس خلا..الماعز مطلوق ساكت..ومافي زول بيرعى بيهو..لأنو السرحة (الرعي) بالمعيز حاجة شينة كلو كلو..!!
يلاحظ ان صفاء قامت بربط ارجل الحمار الأمامية..وهذه الحركة تسمى (القيد) يقولوا ليك فلان قيد الحمار..!!..اما اذا ربطت القدم الأمامية مع الخلفية (في نفس الجانب) فهذه تسمى (الشــُكال) ويقولوا ليك فلان شكل الحمار..والشائع استخدام الشكال في الخيل اكثر..اما الثيران فلا تقيد ولا تشكل..لأنها بتكون مزمومة (الزمام يوضع على الأنق..ومنها حكاية زينة الزمام ، سواء كان زمام ابو رشمة أو زمام ابو تيلة)..!
عيد الحول ما يغضب زول يا عيال ابا..زايدين ماني ناقصين..والعيد الجاي ان شاء الله معيدين في جبيل عرفات..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست