عارف يا صديقي حيدر..امسودان حاجتين: جانب نظري ، وجانب واقع..!!
والواقع دايما فايت التنظير ، جمال وملامح..!!
هنا فيديو كان في خاطري اضيفو هنا لمن ابكر جاب سيرة اهلنا ناس بحر الغزال ، وديل ناس نحن ما بنعاين ليهم فقط حتة الجمال الظاهر ( فيزكال ابيرنس وشنو كده ما عارف) ولكن بنعاين لجمال الروح فيهم (دي الحتة الما قادر يقولها لينا صديقنا المنظراتي الجميل ابكر ادم ، وربما الرجل شغال بحكاية التدرج ولا شنو كده ما عارف..!)
اول غنية ، بالمزيكا ، مسجلة في اذاعة هنا امدرمان ..زمان..وخبرها بيجيبوا ليك استاذنا وصديقينا الجميل احمد الأمين (ربنا يجبر بخاطرو في الفقد الحديث..!!)
الريتم الراقص ، تويستي..!!..والتويستى اسم عاصفة في نورث امريكا..وبرضو كل الحب للفنانة عائشة ميتانق (احمد الأمين ، عنصرية ساكت ، ح يقول ليكم دي بتنا..ونحن معاك يا صاحب ..هي بتنا..والله يجازي السبب يااااااااااااااااااخ)..!!
في بداية الفيديو ، المغنية ألأساسية (اسمها اتوك) بتعمل تموجات بحركة اليد..تموجات بتشبه عنق طائر الغرنوق (القاعد يتكلم عنو ابكر ادم ، كتشبيه جمال في ثقافات نحن ما قاعدين ننتبه ليها..!!!) ولكن..!! ليه ، زولة دينكاوية ، في نورث داكوتا ولا شنو كده ما عارف ، بتخاطب جماهيرها بلغة الدينكا ، ولغة عربية (بتاعة الإسلاموعروبية القاعدين يحدثونا عنها صديقنا ابكر ادم اسماعيل وغيرو!!!؟؟؟)؟ لمن مغنية دينكاوية ، امها بت عم ابوها ، تخاطب جماهيرها بلغة الدينكا المخلوطة بالعربي ، فهنا معنى جمال شارد محتاج تنظير وتقعيد..!!..ابكر بيتكلم عن ناس بحر الغزال ، اها لمن نجيب للناس مشهاد ناس بحر الغزال.. ابكر ح يقول شنو؟.. زي حكاية ، البنية العريبية(الغريبة من البطانة يا حيدر) البتلاعب سجيل روحها حبيبها ، لعبة البينق بونق (كما ذكرنا لأستاذنا عثمان تراث سابقا ، وهو عارف ، ونحن نعرف..!!)
وبرضو ، يا حيدر نرجع لسؤالك ، ابونا الباحث الطيب محمد الطيب ، لمن قالها بكل يقنية ، الجمال في رفاعة وبارا ، فهو كان بيقول السوشال كونتريكست بتاعو..يعني الإختراع الإٌخترعوهو ناس قبالو ، وما كان عندو غير يقتنع بيهو ويروجو..!!
ولكن يا صاحب ، الحتة الفايتة على ناس ابكر ادم اسماعيل والطيب محمد الطيب..انو رفاعة ، الكبابيش..ديل بعض من شريط بيمتد شرقا من جيبوتي والصومال والحبشة (اثيوبيا) ونص امسودان ، والنيجر ، ومالي ، والسنغال وغامبيا..ودي الحتة بتاعتنا نحن يا صديقي.. فيها بنات برنو البيقول ليكم صديقنا ابكر ادم بانها مجرد مرحلة ثقافية انتقالية ساكت..مجرد ايقونة اصيلة..يعني تشبيه جمال العنق بالغرنوق (كما قال لكم ابكر ادم)..فيهو معاني خفية ، غابت عن ابكر ادم لمن شاف بنات برنو ونكرهن ايد وكراع..!!! نرجع لفكرة السوشال كونستركت كما قال صاحبنا ابكر ادم..!!
الجمال يا حيدر ، جمال المرأة في البطانة ودار الكبابيش ، معايرو عجيبة وغريبة..هنا يا صاحب الناس بتعاين لحتة غريبة في جسم المرأة,,وهي ألأنف المستقيمة (جدي الريل ابو كزيمة ، وقسم قسم يا ام كزمة ، الزول فريد يا ام كزمة)..ثم شكل المشاط ، مشاط الشعر القام وثقو استاذنا العريبي محمد طه القدال (مشاط كردفاني)..!!!
الناس الشافهم ، ابكر ادم بعد ما اتمرد ..ناس بحر الغزال التحت..!!
استاذنا الطيب يا حيدر ، بيتحدث عن ملمح غريب ، ملمح الناس الناتشروال ..الناس النقية الما شافت كريمات وتسريحات شعر بتاعة صوالين(كوافير) وشنو كده ما عارف (وصدقني ، يا حيدر ،الناس ديل حقيقة وقاعدين هناك لغاية الليلة ، ولو داير تشوفهم ممكن نوديك ليهم..!!).. الفات على الطيب محمد الطيب ، ياهم ناس بحر الغزال الشافهم ابكر ادم ، والفات على ابكر ادم ..ناس تانية ، وفي امسودان برضو ، ناس جميلة ، انيقة ..لطيفة..!!!
كنت ح اضيف فيديو عشان الناس تشوف بنات البرنو..لكن..!! نضيف بعض من ناس شمال كردفان ، ناس عمنا الطيب محمد الطيب..جراري..الزول جميل يا ام كزمة..!!
انتو عاينو وجوه البنات ، وخلو لينا المعاني ، فطائر الغرنوق مش طول عنق وبس..وانما معاني ومعاني..وهذا ما سكت عنها ، تهذبا ، صديقنا الجميل ابكر ادم..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست