|
|
 Re: مدايد نورين .. (Re: محمد عبدالله مختار)
|
العام 2002 , السنه الثانيه الجامعيه في قسم الهندسه الكهربائيه و الإلكترونيه بجامعة الخرطوم , وبعد ان باءت كل محاولاتي لدفع الرسوم الدراسيه قبل انتهاء التسجيل بالفشل , قررت الجامعه انو تجمد لي السنه , وقفت بحيره قدام البورد العليه القرار و كنت مافاهم يعني شنو جمدولي السنه. مشيت سألت في القسم و شرحو لي انو معناها أمشي البيت و آجي السنه الجايه ابدا سنه تانيه من جديد, الكلام ده كان بعد زي شهرين كده من بداية سنه تانيه, و بتذكر انو أول سؤال سألتو انو أنا مافاهم لانو أنا خشيت الكليه دي بـنسبتي مابـقروش , كيف عشان ماقادر ادفع في الوقت المناسب تضيع مني سنة؟؟؟!!!و في اللحظه ديك قررت انو أنا ماح اخلي السنه دي تضيع بـاخوي و اخوك , إذا اصلا السنه ضايعه ضايعه , أحسن اضيعها هنا وأنا بدافع عن حقي .
استمرت محاولاتنا أنا و معاي كم و عشرين طالب لاقناع الجامعه بفتح التسجيل من جديد والسماح لينا بمواصلة الدراسه , حاولنا بكل الطرق الممكن تتخيلوها , كنا بنتلاقى أنا و معاي المجموعه الما قنعت و كنا زي سته انفارعلى مااذكر , بنتلاقى الصباح و نمشي نعدي اليوم كلو في ضل الشجر في عمادة طلاب جامعة الخرطوم , املا في انو نلاقي مسئول يحل لينا مشكلتنا , و مع انو لاقينا مجموعه من المسئولين لكن دايما كان الرد واحد , أمشو ماتضيعو زمنكم و تعالو السنه الجايه .
امتحانات السمستر الأول قربت و نحن ماكنا عارفين نقرا ولا خلاص نخلي اللياقه , بتذكر انو شباب دفعتنا طمنونا و قالو لينا تعلو امتحنو نحن ماحنخش الامتحانات من غيركم.
أول يوم في امتحانات السمستر الاول الصباح جينا الجامعه و وقفو كل ناس دفعتنا بره القاعات و قالو انو ماحيخشو امتحانات الا الجامعه تسمح لينا انو نخش نمتحن . ناس الجامعه في الاخر , قالو لناس دفعتنا , خلاص خشوا امتحنو ونحن حنحل ليهم المشكله و حنخليهم يمتحنو مع ناس الملاحق . الحقيقه نحن ذاتنا فرحنا لانو ماكنا قارين حاجه .
نزلنا السمستر التاني و نحن مقتنعين انو مشكلتنا اتحلت , لكن ناس الجامعه قالو لينا انو مافي طريقه ليكم حنجمد ليكم السنه و تجو السنه الجايه (شكلهم نسو انو وعدونا و وعدو ناس دفعتنا ).
في بداية السمستر التاني ومع انو كنا كم وعشرين نفر في موضوع التجميد ده , الا انو معظم الشباب فقدو الأمل وخلاص سلموا بـانو السنه ضاعت, و بقينا زي تلاته أو اربعه بس اللسع "بيتلايقو ",لكن في الوقت داك كان خلاص قنعنا من مسئولين الجامعه و بدينا نفكر في الطلبه زملائنا والإعلام . في الفتره ديك كانو واقفين معانا و بقوه مجموعه من السناير من سنه رابعه والحقيقه الشباب ديل كان ليهم الفضل الأكبر في الأحداث الحصلت بعد كده .
بدينا مع شباب رابعه نعمل أركان نقاش و نوصل مشكلتنا لي باقي الكليه , كانت الأركان بتكون شبه يوميا و كان في تفاعل كبير من شباب الكليه .
في نص السمستر التاني قرر طلاب كليه الهندسه ( أيوه هندسه جامعة الخرطوم كلها كلها ) قررو انو يعملو اعتصام مفتوح لحدي ماالجامعه ترجعنا و من هنا الأحداث بدت تاخد مسار مختلف .
الإعتصام كان بيكون يومين وبيفكو يوم (شغل جهجهه ) لأنو إذا اعتصمو أكتر من يومين على حسب القانون ممكن الإداره تعلق الدراسه. المهم لما هندسه اضربت الشارع سمع , وبتذكر الأيام ديك كانت اهميات شديده , كنت بكون بتكلم مع صحفي و بيكون في صحفي تاني منتظرني, و استمرت الإعتصامات لي فتره .
يوم و أنا ماشي في الجامعة الصباح , و الجامعة فاضية سلم علي واحد من سنايرنا و قالي نورين!!! قلت ليه أيوة أنا نورين . قالي عندك مقابلة مع أمين وزارة التعليم العالي, أنت و معاك اتنين من الشباب الجمدو ليهم السنة. حوالي الساعة عشرة اليومداك مشينا الوزارة و دخلنا المكتب العجيب . لسبب ما صورة و فخامة المكتب دا ظلت عالقة في راسي حتي الان. بتخش من الباب علي يدك الشمال في جلسة و مكتب أمين الوزارة واذا مشيت لقدام جوة المكتب في غرفة اجتماعات و بعدين في تلفزيون كبير ما متزكر اذا كان معاه قعدة ولا لا. المهم قال لينا سلام يا شباب احكو لي الحاصل شنو!!! حكينا ليه. قالينا أول حاجة عاوزينكم تفكو الاعتصام دا بأسرع فرصة, و قالينا انو جاتم توجيهات من رئاسة الجمهورية انو الاعتصام دا لازم يتفك. قمنا قلنا ليه انو نحن عاوزين يحلو لينا مشكلتنا أول و بعدين حنفك الاعتصام فقال لينا شايفين الورق الفوق طاولة الاجتماعات داك !! كان معاي مدير جامعة الخرطوم هنا و اتناقشنا في الموضوع و حايحلو ليكم المشكلة لكن لازم تفكو الاعتصام أول لانو الجامعة ما ممكن تتنازل عن قرار زي ده وهي مضغوطة. فكو الاعتصام و أنا اوعدكم مشكلتكم حتتحل.
رجعنا الجامعة و عملنا ركن نقاش في نفس اليوم و قلنا لشباب هندسة انو خلاص المشكلة انتهت و حيرجعونا و خلاص فكو الاعتصام. قالو لينا ما حنفكو الا لما يسجلوكم. قلنا ليهم فكو عشان يسجلونا , قالو لا ما حنفكو, يا جماعه انتو مش معتصمين عشان مشكلتنا ؟؟!! نحن مشكلتنا اتحلت فكو الاعتصام ياخي خلو اللياقة . قالو لا(واسيفا).
تاني يوم الجامعة نزلت قرار انو الإداره الجامعيه حتعمل مقابله مع أي فرد من الطلبة الجمدو ليهم السنة و حيسجلونا. بالفعل بعد يومين دخلت المقابلة كان فيها مدير الجامعة , عميد الكلية و المسجل و مجموعة من الاساتذة بعد المقابلة ديك دفعت جزء من الرسوم(الجزء الكان عندي) و سجلونا.
فرحت شديد انو سجلونا و السنة ما حتضيع علينا لكن اليومداك فرحت أكتر اني قريت هندسة الخرطوم لأنهم كانو صناديد وقفو معانا ووقفو مع بعض بقوة. وقفو وقفة حيرت الادارة و حيرت البلد و مرات كتيرة كان في شباب بدوني احساس انو دي مشكلتهم ما مشكلتي أنا. وقدروا بـوقفتهم دي انو يغيرو قرار اصرت الجامعه و لفتره طويله انو مايتغير.
سنة تانية نزلنا امتحانات السمستر التاني مع باقي الدفعه و بعديها طوالي نزلنا امتحانات السمستر الاول مع ناس الملاحق. مع انها كانت عصرة شديدة لكن الحمدلله مرينا من سنة تانية بسلام.
"نظرا لي طول القصه, و عشان مااختصر أكتر من اللازم حا أواصل الأسبوع الجاي وحأوريكم كيف كانت سنه تانيه جامعه هي اخر سنه أشيل فيها مصاريف من ابوي لحدي يوم الليله, و كيف وصلت لي استقلال مادي في بدايات سنه تالته جامعه "
“Look at a stone cutter hammering away at his rock, perhaps a hundred times without as much as a crack showing in it. Yet at the hundred-and-first blow it will split in two, and I know it was not the last blow that did it, but all that had gone before.”
Jacob A. Riis
محمد نورين ,
تكساس , الولايات المتحده
|
|
 
|
|
|
|
محمد عبدالله مختار
فيس بوك
تويتر
انستقرام
يوتيوب
بنتيريست