مرحب مرحب بالزوار .......شئ جميل جدا برنامج الزيارات ورفع المعنويات شكرا ليكم جلادونا و ود المدير ...... نموذج الإخاء نتمنى أن يحزو بقية الأصدقاء حزوهم ......شكرا ليكم تانى مرة والف مرة . جلادونا ان شاء الله ما يكون عندكم كمسارى قطر ...... عشان تكون الإقامة طيبة .
01-12-2017, 03:37 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3461
هذه الزيارة تمثل عمق التواصل الإجتماعي بين أعضاء سودانيز أون لاين. شكراً بكري أن خلقت لتا وطن بديل مزيدا من الزيارات مزيدا من العمق سودانيز أون لاين، تواصل ومحبة
والله زي ما قلت يا حيدر عظمة في عظمة ما دام صاحب الحوش الكبير بنفسه هيمسيلف جا يرحب بود المدير.... بس هنا عندي سؤال ،بس ما تضحكوا من السؤال هل ود المدير ،المحتفى به، وجلالدونا المحتفي، اصدقاء من زمن الطفولة، ام المعرفة فقط من خلال حوش الباشمهندس وانه دي اول مرة يتقابلوا فيها ..وبعدما نسمع الرد عندنا قول اخر... والله يديك الصحة والعافية
01-12-2017, 11:05 AM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11825
Quote: والله زي ما قلت يا حيدر عظمة في عظمة ما دام صاحب الحوش الكبير بنفسه هيمسيلف جا يرحب بود المدير.... بس هنا عندي سؤال ،بس ما تضحكوا من السؤال هل ود المدير ،المحتفى به، وجلالدونا المحتفي، اصدقاء من زمن الطفولة، ام المعرفة فقط من خلال حوش الباشمهندس وانه دي اول مرة يتقابلوا فيها ..وبعدما نسمع الرد عندنا قول اخر... والله يديك الصحة والعافية
انا دا اتعرفت على ود المدير هنا مع انو حبوبتي وجده اخوان
والله زي ما قلت يا حيدر عظمة في عظمة ما دام صاحب الحوش الكبير بنفسه هيمسيلف جا يرحب بود المدير.... بس هنا عندي سؤال ،بس ما تضحكوا من السؤال هل ود المدير ،المحتفى به، وجلالدونا المحتفي، اصدقاء من زمن الطفولة، ام المعرفة فقط من خلال حوش الباشمهندس وانه دي اول مرة يتقابلوا فيها ..وبعدما نسمع الرد عندنا قول اخر... والله يديك الصحة والعافية
محمد الشيخ لا..لا..دي ما بصدقك فيها... ووين ما شفناك في البوست العطبراوي.. كمان نسمع من ناس جلالدونا ما يقولوا في حياتهم ما اتقابلوا قبال كده... والله يديك الصحة والعافية
01-12-2017, 03:40 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
غايتو يا ود المدير كان تمشي ليهم في الصيف عشان ما يقولو زيارتك دي هروب من برد كندا. اقامة سعيدة و بالله تتصور مع الزعيم ابوصلعة الاخر و عاشت وحدة الصلعات الكندية و الامريكية
01-12-2017, 04:01 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
ضابحين بتيخة يا حمد بتيخة مصقول عوارضها تمشى الهوينا كما يمشى العجل بيت الشعر ده عشان خاتر الدبلوماتيك بارتى فى القطر ياخى ما تلحقنا بى صينيتك بتاعت الانداية ديك --- صاحبكم ده لا هسى بردان .. شوفوهو مردّف كيف !!!! ياخى ده لابس الدولاب كلّو مع طارق عبدالله نسيبى و زميلى فى الشغل
01-12-2017, 04:40 PM
جمال ود القوز جمال ود القوز
تاريخ التسجيل: 01-25-2013
مجموع المشاركات: 5925
تحياتنا لمعاوية المدير واجازة سعيدة .. والله يا جلال البرد ما حبابو .. بيعمل نفسيات يأخ .. تقعد تكتكت وحنكك يطقطق وتكوس لي الشمس كواسه .... أنا بقترح تصاقعوهو بي قراريص كااربة تكون 4 بوصة .. بي تركين ني .. حيشيل منو برد كندا قطع شكـ ..
01-12-2017, 04:50 PM
Hamid Elsawi Hamid Elsawi
تاريخ التسجيل: 09-22-2005
مجموع المشاركات: 3450
سيد الحوش شخصيا ياخى كلّو من فضلة خيرك لكن ال blood orange ما عندك ود المدير بسم الله ما شاء الله قرضو كلّو بالمناسبة طعوة الغداء يوم السبت ان شاء الله و الدعوة لكل بورداب فينكس و ضهاريها
01-13-2017, 06:36 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
اووووو زهير الزاهى و زاهر كلّو موجود خاصة المعبا فى قزاز العصير بس كدى هو ال يلعن الشيطان و يقول خير شايفك اليومين ديل طالع فى الكفر على حسب رواية اخونا سيف اليزل يا حبيب امشى نوم نومك و على ضمانتى و ان شاء الله تنوم قرير العين هانيها
ملهم يا فنّان .. وين الحى بيك يااخ تظهر و تغيب و تغيب و تظهر الظاهر زهير ح يكون نجم البورض لسنة 2017 و يا ريت الزمن يجمعنا بى كل البورداب و نشوفن شوف العين
01-13-2017, 06:48 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
يا هلا بى عمدة عطبرة عبدالرحمن ود الخليفة غايتو مونة الدفو دى إلّا تعمل ليها خت انابيب ياخى الزول ده بردان ليهو برده لى درجة انتا لو قاعد جنّبو تبرد و موعدنا باكر ان شاء الله و الاسرة الكريمة
01-13-2017, 06:55 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
يا هلا بالقبانى و يمين الله قطعت رقبتو امس دى ضبحة على سنة الله و رسوله زى ما جاتك فى الصورة عشمّتنا و فى رجاك و نزيدك تحفيز الليلة عندنا قعدة ونسة مع استاذنا الكابلى متّعه الله بالصحة و العافية بعد صلاة الجمعة
01-14-2017, 02:21 PM
Kabar Kabar
تاريخ التسجيل: 11-26-2002
مجموع المشاركات: 18537
كل الحب للناس الممكن اقول ليهم جلابا ولاد لذينا، دون ان يرمش لي جفن،و ما يتعقدوا ، ويقولوا لي غرابي حاقد وما اتعقد..!! حبيبنيا العطبرواي المفكر الجميل دكتور طلعت الطيب.. حبيبينا الأمدرماني دكتور المعز ابو نورا (انا بحب نعمات وراشد اكتر منك يا صاحب )، واحسب الفرق ياااخ ، قبال ما نمرقها في جدنا مكي شبيكة..!! حبيبنا ألأمدرماني، الحليبي ، مهندس يحي قباني..صاحب المقولة الظريفة (هوي يا غرابي ياحاقد انتا اتعقدت ولا شنو يعني؟؟).. حبيبنا الخلوق المهذب ، مهندس حامد الصاوي ، الذي اهداني كل كتيبات ابونا محمد ابراهيم نقد ، وهو ينتظر ليختبرني ، مثلما تفعل امريكا مع حكومة امسودان ، ينتظرني ان اجتاز الإختبار ، ليهديني قراءة اعمال دكتور محمد سليمان و اخر اعمال دكتور منصور خالد ، وبعض اعمال من حقيبة الفن الموثقة ، حتى لا ننجرف في بروباقندا ألإمام الصادق المهدي بتاعة (ذخيرة الفن) ولا شنو كده ما عارف!!! ثم... كل الحب لأستاذنا عبد الرحمن الخليفة..!!
عارف يا جلال ، لاقيتو، عمك العريبي ود المدير، في اخر السنة ، بتاعة 2016 ، في حفلة فنانها شريف الفحيل(شريف ... على قولو)..!! سالتو عن فاطنة* ، قال لي مشت ادمنتون .. سبيت ليهو (في سري) وسبيت لعمر البشير ، والجبهة الإسلامية ، والجلابا من منيرعبد الرحيم لغاية حسبو عبد الرحمن وحميدتي، وكل جماهير امسودان، في سري ، !!! ثم طفق صاحبنا، معاوبة المدير ، اي واالله ياجلال، يجوعر فينا: اليوم نرفع راية استقلالنا..!!! غني، ال############ معاوية المدير ، بصوت ذكرني عمارالسنوسي في ذات نفسو (يا اميرة السيد اوعك تصدقي ،عشاان ما يعمل لينا معاوية المدير حاجة ، فنحن برضك بنحب عطبرة يااااااااااااااااااخ...!!!)..غني يا جلال حتي رمي التلفون علي الحضور,,,!! الكلام ده صحيح يا جلال ، ال############ معاوية المدير، عندو صوت غنائي بيذكرني بالليجند عمار السنوسي..! ودي خاصة جدا ياجلال: اتناقرنا انا ومعاية في حضرة الليجند ميسرة غاندي..!! ميسرة قال لينا: اتشاكلوا في المنابر ، لكن مافي القلب يبقي صافي..!! بصمنا نحن الإتنين..!! معاوية قال ليهو" شكلنا في سودانيز اونلاين..حاجةتانية ، والمحبة باقية..!! وانا قلت: شكل سودانيز اونلاين حاجة تانية ، والمحبة باقية...!! عارف يا جلال ، نفس الصالة اللاقيت فيها بكري ابوبكر (سيد اللبن) قبل سنوات ، هي تفس الصالة اللاقيت فيها معاوية المديرفي اواخر سنة 2016، والحفلة كانت بابننا الكردفاني الجميل شريف الفحيل ( اوعك يا جلال تعصر علي عشان اوريك ككيف ال############ معاوية المدير كان بيرقص المردوم...!!) ثم يهرب ال############ معاوية المدير لسخانة اريزونا ، ويترك صحابو للجليد..شينة منك تب يا عمك..!! شكرا ياجلال ، وهي فرقة دفء نتمناها لأنفسنا ولغيرنا ، ووكتين وقعت على معاوية.. برضك كويسة ، المن السما الأر ض مجبورة تتحملها يا صديقي..! وحقد ساكت ،يا معاوية المدير ، ان شاء اهل سخانة اريزونا ما تنفعك...!!
كبر
• الآنسة فاطنة هي ابنة صديقنا معاوية المدير وهي زميلة ابنة محمد النور كبر ، الآنسة شهد محمد كبر..!!!
01-14-2017, 02:35 PM
Kabar Kabar
تاريخ التسجيل: 11-26-2002
مجموع المشاركات: 18537
وبعد ابواتنا بلا1ص وبابكر ود السافل ، ومحمد جبارة كان عيسى بروي...!!! فشنو يا جلال ، ما تخلي صاحبك يسمع عيسى بروي في سخانتكم دي ، لأن بعد شوية ح يشوف ليهو شدرتين ويقوم يتمرد لينا في السهلة ياااااااااااااااااااااخ... ابعد اذنك ياجلال نضيف حاجة لميسرة غاندي..ومعاها شوية نقة.. اما الان ليك عمنا عيسى بروي امونة بت الشيخ حمد..اوعك يا جلال تصحي امنة مختا ر وبشاشا,.. عشان ما ندخل في حيص باص يا غنمك
كبر
01-14-2017, 03:14 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: كل الحب للناس الممكن اقول ليهم جلابا ولاد لذينا، دون ان يرمش لي جفن،و ما يتعقدوا ، ويقولوا لي غرابي حاقد وما اتعقد..!! حبيبنيا العطبرواي المفكر الجميل دكتور طلعت الطيب.. حبيبينا الأمدرماني دكتور المعز ابو نورا (انا بحب نعمات وراشد اكتر منك يا صاحب )، واحسب الفرق ياااخ ، قبال ما نمرقها في جدنا مكي شبيكة..!! حبيبنا ألأمدرماني، الحليبي ، مهندس يحي قباني..صاحب المقولة الظريفة (هوي يا غرابي ياحاقد انتا اتعقدت ولا شنو يعني؟؟)..
صاحبك القباني اليومين ديل قلبوا مكتول في حوش بيت ناس بت تاور ...
ما تتوسط لينا ... و الله وليداتي رجال ولاد رجال ما شاء الله عليهم ... :)
الا فرق العمر خايفوا يكون مشكله هههههه
تعرف يا كبر ... ولدنا الفحيل عمل حفله يوم 7 ... ابدع فيها بي فن و حسن اخلاق ...
اسر قلوب كل الناس ...
01-14-2017, 03:00 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: يا هلا بالقبانى و يمين الله قطعت رقبتو امس دى ضبحة على سنة الله و رسوله زى ما جاتك فى الصورة عشمّتنا و فى رجاك و نزيدك تحفيز الليلة عندنا قعدة ونسة مع استاذنا الكابلى متّعه الله بالصحة و العافية بعد صلاة الجمعة
القدم ابى يا جلال ...
و الله قدر ما تحايلت على الشغل ... لكنها قفلت بي جاي و بي جاي ... زنقة جد ...
و الله لي امس حاولت ارتبها ... ما استعدلت ...
و انت عارف شغلنا لا بعرف سبت لا بعرف خميس ...
لكن الجية يمين بالله ما اخليها ...
كان الله هونها عندي مشوار لي ميامي ... ان شاء الله يكون عن طريقكم في المشية كمان ما في الرجعة ...
استاذنا محمد النور كبر التحيات النواضر والله مما قريت الشكلة الكانت بينك وبين ود المدير العطبراوي قلت خلاص ديل بقوا اعداء على المستوى الشخصي.... ولكن عجبني قولكم ،انتم الاثنين، هذه الجملة المطلية بماء الذهب.""..شكلنا في سودانيز اون لاين حاجة ثانية..والمحبة باقية"" اجزم ، وبعد ان قرات هذا الكلام السمح، انكم انتو الاثنين سمحين ومكملين السماحة... كما عجبني وصفك لسيد الحوش الكبير الباشمهندس بكري، قائد الاوركسترا، بسيد اللبن..ففعلا هو سيد اللبن الذي يسقينا لبنا مصفى كالشهد بادارته لهذا المنبر الاسفيري الرائع.. واصل في حديثك الطاعم والحالي(من الحلو..الطعمه حالي).. وبالمناسبة بت عطبرة هي بسمات بت الشيخ عبد الرحيم..وانا نوبية الاصل ولدي جذور غارقة في عمق الرافدين... والله يديك الصحة والعافية.. ..ود قباني:: ما دام وليداتك بقو رجال ،ما شاء الله عليهم، ليه ما تختار واحد منهم لترشحه عريس لبنتنا بسمات بت عطبرة وفرق العمر ما يهم اذا كانو اكبر منها او اصغر منها وهي ستعود للسودان نهائيا قريبا وبقت تفكر في العرس عشان شايفنها بتسرح كتير...وعندي وصية اهمس بيها في اضانك ..اي واحد من اولادك عاوز يترشح خليه يكتب اي كلام سمح عن عطبرة وهي بنفسها حتجيكم لكندا وتخطب لنفسها ( وجه ضاحك).. وخطبة البنت لنفسها ما عيب...والسيدة خديجة، ام المؤمنين، خطبت لنفسها...وبالمناسبة تقدم لها الكثيرون من السودان ومن هنا ...ولكن كل شئ مرسوم بقدر.. والله يديك الصحة والعافية
01-14-2017, 03:58 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
مرحبابك ايمن النواى يا سلام ياخى ... الزيارة دى كسرت رتابة مملة و قاتلة برنامج زيارات ساكت غير حاجات كتيرة و لسه ماشين فى السكّة نمد الزيارت بدت بى زميلنا عبدالرحمن الخليفة و من ثم مستر همسلف و ختمناها امس بى زيارة لى استاذنا العملاق الكابلى و جلسة لى اكتر من ساعتين و شاى احمر من يد رفيقة عمره امنا الفاضلة عوضية و زى كلامك يا ريت الناس تتواصل و بجيك لى بركات هذه الزيارة
Quote: جلادونا ان شاء الله ما يكون عندكم كمسارى قطر ...... عشان تكون الإقامة طيبة .
يا زول كمسارى القطر ده انا ذاتى بجليهو زى السلام عليكم
01-14-2017, 05:13 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
Quote: هذه الزيارة تمثل عمق التواصل الإجتماعي بين أعضاء سودانيز أون لاين. شكراً بكري أن خلقت لتا وطن بديل مزيدا من الزيارات مزيدا من العمق سودانيز أون لاين، تواصل ومحبة
فعلا سودانيز اون لاين كما قلت و الشكر لى مستر همسلف ياخى حاولنا نتواصل معاك لكن تلفون نمرة دبى ما برد اخر معلومة عندنا انك اليومين ديل فى كالفورنيا لكن ما لمينا فى تلفون ليك يا ريت تختف رجلك و تجينا ,, كلها 4 ساعات سواقة و نص ساعة جوّاً و يا ريت تشرفّنا
01-14-2017, 05:20 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: ود قباني:: ما دام وليداتك بقو رجال ،ما شاء الله عليهم، ليه ما تختار واحد منهم لترشحه عريس لبنتنا بسمات بت عطبرة وفرق العمر ما يهم اذا كانو اكبر منها او اصغر منها وهي ستعود للسودان نهائيا قريبا وبقت تفكر في العرس عشان شايفنها بتسرح كتير...وعندي وصية اهمس بيها في اضانك ..اي واحد من اولادك عاوز يترشح خليه يكتب اي كلام سمح عن عطبرة وهي بنفسها حتجيكم لكندا وتخطب لنفسها ( وجه ضاحك).. وخطبة البنت لنفسها ما عيب...والسيدة خديجة، ام المؤمنين، خطبت لنفسها...وبالمناسبة تقدم لها الكثيرون من السودان ومن هنا ...ولكن كل شئ مرسوم بقدر.. والله يديك الصحة والعافية
كلام عديييل يا بتنا ...
و يا ريت تشرفونا كلكم هنا ... الإقامة و الفسحة كلها علينا ...
هداك المسنجر ... و هدا تلفوني 4168331414
و خالتكم ام الشباب تفرح بي جيتكم و الله ...
01-14-2017, 05:29 PM
معاوية عبيد الصائم معاوية عبيد الصائم
تاريخ التسجيل: 06-09-2010
مجموع المشاركات: 22458
ااوووو اخونا الطوربيد يمين الله الحاجة دى ما مقصودة مع انو فى البوست ده ألزمت نفسى بالرد الراتب و مداخلة منفردة لكل متداخل ياخى اعفى لى ياااخ قريبك يا صاحب اسكرنى بالزيارة دى و الطربقة فى الردرد حصلت العمرة فى البال و التواصل مع بورداب جدّة من هسى معلّق فى رقبتك دى
01-14-2017, 05:55 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
حبيبنا ود البشرى اهديك القصة المصورة دى عشان الفرابى الحاقد كاره ضاتو داك يعرف حاجة لامن يآمن ذاتو الصورة الاولى و نحنا ماشين على المزرعة فى السكّة قعد يونسنى عى استار بكس عرفت نومتو و غشيت بيهو استار بكس كما فى الصورة التانية فى الصورة التالتة و عشان اخونا كبريعرف حاجة الخملة بيضبح تور .. هسى الغرباوى الحاقد ده بيعرف يضبح عتود !!! المهم بعد شوية اسمع ليك مديرنا يكورك حاوشا بى غادى .. طلعوها من تحت العريبة و شفع المكسيكان يتجارو و المزرعة جاطت لحدى ما جابوها فى حتة كدة و كانت الصورة الاخيرة دى قمت قلتليهو هسّى الجوطة دى كلها عشان الصورة دى قال كيف ما اجوطا صورة زى دى ماب تتلقى بالساهل ياخى قادر تتخيل انو ساكى الجدادة دى زيو و زى اي لامه عكليتة http://GulfsUp.com http://GulfsUp.com . http://GulfsUp.com http://GulfsUp.com
01-15-2017, 06:11 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
يا سلام يا محمد ود الشيخ ياخى بركات حمار جدّك فايتة الحد عليك الله عاين جنس البركة دى ___ و تتواصل مواكب التواصل "" تأكّد وصول الصديق رانى السمانى غداً الاثنين ... يا الف مرحب بى رفيق درب الشقا ايام مصر و شتا فينكس صار ربيعا
01-15-2017, 06:38 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
هى اتشرفت و بس .. و تزداد شرفا بقدوم الود رانى السمانى ابى يركبا .. قال نسى ركوب العجلة هو لحدى الان عايش فى حتة كل ما نمشى حتة يقول ليك تشبه السيالة و يشيل و يصور فى شدر الدوم و النخيل و المستي
01-16-2017, 06:15 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
Quote: هنيئا لكم نعم الصحبة جمعنا الله واياكم في ود و محبة
آميييييييين يا رب العالمين حالف يمين يا ود ابسن كان ربنا كتب لينا سفرة للسودان اصلكم واحد واحد ياخى من بركات الزيارة دى عشرة ونسة طويلة مع العزيز دينق بالتلفون ياخى سماع صوتو ساهى غيّر حاجات كتيرة و الشكر فى الحتة دى لى سيد الحوش همسلف الصورة دى لقّيط القرفتن .. تقرأ قريب فروت .. فى حوش بكرى شخصيا
01-16-2017, 06:33 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
حبيبتنا اللميرة بت السيد عساك طيبة يا أخية و المعاك
Quote: بس هنا عندي سؤال ،بس ما تضحكوا من السؤال هل ود المدير ،المحتفى به، وجلالدونا المحتفي، اصدقاء من زمن الطفولة، ام المعرفة فقط من خلال حوش الباشمهندس وانه دي اول مرة يتقابلوا فيها
ما اتلاقينا قبل ده .. ياها عرفة الحوش المزدهى بى جمال ناسو ده الزميلين العزيزين يا اميرة , حسين نوباتيا و عمر التوم برضو ما شفتهن قبل ده لمّا مشيت بوسطن مع بتى للجامعة .. طرقت ابوابن و سلمتّهم ليها بى احساس كامل انهم خير الاباء ليها .. وحاتك ما قصّروا تب من هنا اجزيهم كثير الشكر و التحية و التقدير
01-18-2017, 12:52 PM
Kabar Kabar
تاريخ التسجيل: 11-26-2002
مجموع المشاركات: 18537
ياخي راني ، ده افتح ليهو شارع ، تلات خمسة مربوع كده ، وخليهو ، يقوم يوديك ويجيبك في الشارع ده لمن الشمس تشرق..!! والله صحي...!! ياخي قريبي ده لو فتح ليك في الحكاوي ، ينسيك الشغل وتلاقيط الرزق ذاتو..!!
ده المقدمة..
كبر
01-18-2017, 01:00 PM
Kabar Kabar
تاريخ التسجيل: 11-26-2002
مجموع المشاركات: 18537
بعد اذن جلال وضيوفه..! هي مجرد بشكة ساكت ، عابرة ، يا عبد الرحمن الخليفة ويحي قباني..!!
بت ابا اميرة السيد..حبابك يا صديقتي.. كتر خيرك كتير ياااااااااااااااااااخ... عارفة يا اميرة ، قبال المس كول والتكست مسيج والإسكايب و الواتس آب..كانت الشغلانة بالجوابات.. أي والله..!! جواب ، وريقة ، في حافتها اليمني (الزاوية) رشة عطر حميم ، وفي الحافة اليسرى (الزاوية التحتانية المعاكسة ) حريق ، لا تعرفو من شمعة ولا تعرفو من عود كبريت...!! وكانت هي تتبع للطريقة البرهانية ( اوعك تسأليني البرهانية ديل منو ولا هم شنو).. اول سطر: بسم الله ، والصلاة على المصطفى الكريم ، وبعد.. العزيز محمد.. كلما حاولت انساك..!!
هههه..!!
لمن تتجهجه وما بتقدر تعرف المصطفى ده منو؟ يا هو انت ولا المصطفى الواحد داك..!!
عارف يا يحي (عبد الرحمن الخليفة، مراقب) ، كنت ح اجيب ليك (حبيبي انا فرحان).. والفيرشن الفي بالي ، كان عزف عود وبصوت محمد ميرغني.. ثم ضاع الفيرشن ، ولقيت محمد ميرغني باوركسترا ، ولكن متأخر شديد (فيهو بتفتقد شباب محمد ميرغني)..!! وانا بكتب رواية يا يحي ، امبارح رسلوا لي بروفة الغلاف..يعني نظام ممكن باكر تلقاها قدامك في وشك ذات شعبطة في مكتبة ولا معرض كتب..كان محمد ميرغني حاضر في الأحداث ، في حفلة بنادي الشرطة في بري ، البطل بيلاقي البطلة ناس (كلما حاولت انساك)..ويقوم ينحب نحيب داخلي ما انزل الله به من سلطان ، ثم تقوم تسوقو لجهة ما ، عشان في نفس الليلة يشهد اغتيالها برصاصة مقصودة..لمن صاحبك (بطل الرواية) يحتار ذاتو، هل يحب (حبيبي انا فرحان) ولا يحب (كلما حاولت انساك ، قلبي زاد في جروحو ، وريني كيف الحي يودع روحو)..!!
شفت عيال امسودان ديل صعبين ككيف؟!!
طبعا يا يحي ويا عبد الرحمن ، انا عنصري شديد وكتين الأمر يرجع للمهندس عز الدين احمد المصطفى ، لكن احمد بركات ده حاجة تانية يااااااااااااااااخ..!!..حاجة لا بتنبلع ولا بتنطرش..!!
بالطبع كل الحب للعميد..وكان عميد ولازال..!!
كل التحيات لأحمد بركات..!!
وزي ما كتبت لي ، هي ، يا احمد بركات ، زمااااااااااااااااااان ( حاولت انساك)..!!
وباقي الحكوة يا اميرة ، في القاهرة ، في ذات استديو(استاذنا عبد الرحمن الخليفة بتذكر الملامح كويس ، في الحي السابع ، بعد كم مربوع من دار الحركة الشعبية ، ومطعم الشبراوي)..هفت لي ، وقمت مشية اخدت لي صورة فيها بسمة باهتة وحزينة وصامدة..!! وده كلو هين يا اميرة..عارفة المفارقة وين؟.. لون البدلة الكنت لابسها ، هي لون بدلة فاروق حمد الله ، لمن ابتسم ، قبال الموت بثواني ، وكان بيقول للمصور( لو سمحت دقيقة) عشان يشوف الوجود عمق ابتسامتو وهوماشي على الموت..!! وانا كنت بقول في سري ، للمصور ، لو سمحت ثواني عشان اقول في سري (حاولت انساك ، وقلبي زاد في جروحو ، وريني كيف الحي بيودع روحو..!!!)..وانا ماشي علي موتي الخاص (المسمى تهذبا المنفى).!!! والصورة لسع معاي ، ياخي لمن قربت اقول للبشير: اعمل لي طابور اعدام..عشان البس البدلة وابسم البسمة ياها..وانا اقول (كلما حاولت انساك) ، ومن احاول نسيانه امسودان وناس امسودان بتاعين (بسم الله..الخ)..!
عارف يا يحي ، في مكتبتي كتب كتار ، من ضمنها (اولاد حارتنا) وصاحبو راني السماني، وكتاب اخر (الخبز الحافي) صاحبو منتصر حسن ادريس ، وتعرفت عليهو بواسطة راني ، وراني هواول من قدمني لسودانيز اونلاين (لكن على بالحلال لو عتب على أي بوست يخصني ح امعطوا ليك سنسرة للطيش..!!) ويا جلال ، عميد الفن السوداني ، اسمو احمد المصطفى بركات..ولغاية هنا عادي..!!
عميد الفن يا جلال من قرية صغيرة ، جابت احمد المصطفى ، وسيد خليفة ، والشاعر العظيم ، صاحب ديوان (امدرمان تحتضر) دكتور محمد الواثق (قلت لي يا يحي مكتول في بيت ناس منو؟ ويا عبد الرحمن الخليفة: يا ترى ماذا يقول الواثق؟..كذب الرجل ، لأن امدرمان مو هينة تب وسرها باتع ياااااااااااااااااااااااااااخ..!!) وعارف يا جلال ، راني عندو جذور ممتدة لغاية الدلنج ، ناس جيران (للمعلمة) بتاعة غنية عبد الرحمن عبد اهلم (ودبارا) ، وباليمين بيت الشقيق الأكبر لأستاذنا صديق عباس (عمنا الأستاذ الهادي عباس) ، وبعد خطوتين ، (المدينة) يعني يا جلال لو بتسمع الهادي الجبل عندو غنية غريبة في مشهد الغنا السوداني اسمها (المدينة) مطلعها (طلعت..)..! وباليسار ، بيت زول سوداني نادر للغاية ، اتشوكش وصابو الجنون ..وجكسيتو كان اسمها (امبلينا السنوسي)..!! شفت الغرابي ده حاقد ككيف؟.. طبعا يحي ح يتغاتت عليك وما ح يجيب سيرة الفردة التالتة للثنائي السوداني المشهور (ميرغني المأمون واحمد حسن جمعة)..وخلي بالك واحد فيهم من اهلك المسيرية..!! وبرضك..!!
كل الحب ( لأمدرمان) ايوه (امدرمان) ، والعارف اوع يقول للما عارف..!!
ويا اميرة..الزولة من الدلنج ، وخريجة سايكولوجي (اداب جامعة الخرطوم) ، وليها اشغال جميلة في الدلنج ، اشغال انسانية (يعني نظام محاولة لملمة الأطفال المشردين في الدلنج)..في لحظات البريك ( الإستراحة) بتفك الخمار ، عشان تطلع خصلة شاردة ترقص مع النسيم ، عشان صاحبتنا تقعد تناجيها بكلام من شاكلة (شغلت افكاري ، يا حاجب احلامي ، في مسرح الأعاظيم مثلت افكاري ، جود يا سمير الروح...!!!)
وهكذا.. وهكذا..!!
ياخي حالة اخير منها الواحد يطلع عصيان مدني ذاتو..!!
Quote: تحياتنا لمعاوية المدير واجازة سعيدة .. والله يا جلال البرد ما حبابو .. بيعمل نفسيات يأخ .. تقعد تكتكت وحنكك يطقطق وتكوس لي الشمس كواسه .... أنا بقترح تصاقعوهو بي قراريص كااربة تكون 4 بوصة .. بي تركين ني .. حيشيل منو برد كندا قطع شكـ ..
اول حاجة معليش يا ود القوز فة التجاوز الحصل ده تانى شى اصحابكم اكرمناهم بالشمش الساطعة و ما قصرنا معاهم فى القراريص و الكسرة بى ام رقيقة و ام شعيقة و القرع و البامبى و الفولو مويتو ياخى ديل قامو بى حوض جرجير كامل بالجد شرفونى كتير بالزيارة دى
01-19-2017, 05:36 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
Quote: ايامك يا مدير يا ريت لو كنت معاك اتمني ليك اقامه طيبة مع احلي ناس تحياتي جلال و كل الناس الحلوه ال معاكم
ياريت لو كنت معانا ياخ... يمين الله كان تكون متعة فايتة الحد عمومنا زولك بخطط لى حاجة ز ان تمت حتكون احلى لمّة تلقى التفاصيل معاهو و ايديك معاهو عشان ننجز التحية ليك و الاسرة الكريمة و لى ناس سودانيز الفى جواركم
01-19-2017, 05:58 PM
Hamid Elsawi Hamid Elsawi
تاريخ التسجيل: 09-22-2005
مجموع المشاركات: 3450
الغرباوى ود الذينا امنوا .. كبر حيّاك الله و بياك ياخى اول حاجة جزيل الشكر على مشاركاتك فى هذا البوست و المطايبة تانى هام كان المفروض تكون معانا بس انت عشان تكب الزوغة من الجية عملت ليك شمطة مع ود المدير شفت التحليل ده كيف .... يا قول حبوبتى لمياء .. مصيبتى فى الدنيا دى انا ذكية ..... و التحية موصولة لكل الزملاء الكرام و أسأل الله ان يجمعنا بيهم فى ساعة خير فطونة بنت الايه دى كان المفروض تكون معانا لكن الله ما قدّر و طال ما البنيات بقن زميلات تودو وشوشكم العجيبة دى منهن وين كان اتشاكلتو تانى و قالو الما أدّبو ابوهو بأدّبو جناهو عشان كده امسكو فى كلام استاذنا ميسرة غاندى ده قوى و ما دام بيناتكم امثال اخوانا ابراهيم و ود الصاوى ماب تجيكم عوجة تب لكن طفق دى لذيذة خلاص .. اتفرجت على الفيديو بس جدعة التلفون ما ظاهرة فبهو و قبل كده اتفرجت على كم فيديو بغنى فيهم تصدّق صوتو طلع من طبقة التينور و الدعوة لازالت قايمة يا كبر ليك و للاخوان ابراهيم و حامد و فى اى زمان تختاروهو و الزول ده جاييكم بى خطّة امسكو فبها قوى و التحية لى فاطنة و شهد البنيات السكرات عملن الما قدرو يعملوهو الكبار ..
01-19-2017, 11:00 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
و لو تصدّق يا كبر شيخنا عبدالرحمن ود الخليفة و الغلباوى رانى السمانى علافة قديمة من نناير 2001 و ازقة و حوارى القاهرة و الاسكندرية تشهد بذلك ياخى هو كان جنس بكا هو رقم قساوة تلك الايام الا انها الان اراها كأجمل ايام العمر __ عاشق ام بلينة السنوسى و قاشر بى ود الجبل و دارع اشواقك فوق رقبتك و تدندن بى مالك يا حب و مالك علينا و منو الهداك لينا عشان تجينا تقول لى جواب و منديل منقوش جانبه ياخى الاسمو شنو ده كنا بنجرى عديل كده منّو __ ياخى عميد الفن السودانى احمد المصطفى مولود فى قرية فى شرق النيل و اسمها الدبيبة و منها ايضا الخالد سيد خليفة و من نفس المناطق ديك شاعرنا ود الرضى و مبارك حسن بركات لو جيت نازل شوية بتلقى الشيخ اللمين و ابو قرون و من هناك صلاح ابن البادية الدبيبة دى تقع فى الطريق من العسيلات غربا فى اتخاه ام ضواَبان و الحلال النابعة بالصدق و الجمال ابرق .. الشيخ غوض الكريم و تجر لى غاية ابودليق و تمبول بس فى حلة اسمها القصينابفوق درب الهوا .. ما بهديك تمش عليها ديل اهل ...ابسودان ....الجد جد ..ناس فلان لى فلانة و حررررررم ينتم مش ناس شوكشتنى و كسرت فينى ضلعة و النياصة الجابوها لينا بتاعين ال جى ام اتش و ال بى ان و جات قاعة الصداقة تمت الناقصة قاعة الصداقة دى بنوها الجاينيز يا كبر ايام النميرى و من اليوم داك الكيمان اتفرزت اولاد ابسودان فى درب و اولاد امسودان فى درب تانى .. لاجل التثاقف ناس امسودان ديل اهل حيرت افكارى و الليل ما بنومو و نلقانى واقف مرتعش و هلم جرّا اما ناس ابسودان ديل اهل استنينى و لو حاولتى تصدى حنينى ياما حتشقى و ما اظن تلقى و لو حصلت اى لكلكة ممكن نطلع بيها مظاهرات و نسقط الحيكومة كمان بنلعب نحنا كمان تحياتى ليك و الاسرة الكريمة
01-20-2017, 08:35 AM
Hamid Elsawi Hamid Elsawi
تاريخ التسجيل: 09-22-2005
مجموع المشاركات: 3450
حبيبنا الخلوق المهذب ، مهندس حامد الصاوي ، الذي اهداني كل كتيبات ابونا محمد ابراهيم نقد ، وهو ينتظر ليختبرني ،
مثلما تفعل امريكا مع حكومة امسودان ،
ينتظرني ان اجتاز الإختبار ، ليهديني قراءة اعمال دكتور محمد سليمان و اخر اعمال دكتور منصور خالد ، وبعض اعمال من حقيبة الفن الموثقة ، حتى لا ننجرف في بروباقندا ألإمام الصادق المهدي بتاعة (ذخيرة الفن) ولا شنو كده ما عارف
للحقيقة و التاريخ كتيبات ابونا محمدابرهيم نقد جات محدودة جداً و تم بيعها للناس ال بِتِحتَرم القراية في كالقري و كان منهم صديقنا كبر الذي استحي أن يقول انو اشتراها و دفع قروشها و أداني فضل انو أنا اهديتها ليهو و أنا اشكره علي ذلك. لكن بس عاوز اوضح حقيقه انو اشتراها ما أهديتها ليهو. أحياناً بتجي كتب محدودة للبيع و بتم الاتصال ببعض الناس البتشكل القرايه جزء من همهم في كالقري. و محمد النور كبر دائماً علي قمة القائمة. و بالمناسبة دي انا ح اهديهو كتاب ختير (خطير) بمناسبة البوست ده و مشاركته فيهو
بعدين أنا ما عاوز اختبره زي ما قال و لا بتعامل معاه زي ما بتعمل امريكا مع حكومة السودان زي ما هو متخيل. انا بتعامل معاه ك خريج نفس المؤسسة الجامعية (جامعة الخرطوم) بتعامل معاه ك صديق قابلتو و اكلت و شربت معاه في بيتو و بيتي و بيوت اصدقاء أعزاء لدينا. بتعامل معاه ك جار و زميل غربة و شقاء بتعامل معاه ك زميل منبر و زميل قلم بتعامل معاه ك مراية بتشوف الحاجات من زاوية غير ال شايفها انا و بتعلم من كده و استفيد لمن قدمت كبر في جمعيتنا للحديث عن ثقافة كردفان كنت عاوز الناس تعرف اكتر عن ثقافات السودان لأن نشر هذه الثقافات واجب لكل من يحترم التعدد الثقافي و التباين بين أهل السودان و يحرص علي الافتخار به و نشره بين السودانيين. وقد أبدع كبر في ذلك اليوم بشهادة الجميع و طلبوا يسمعوا ليهو مرات أخري.
الكلام كتير لكن أكتفي بهذا القدر
شكراً جلال و ان شاء الله نتقابل في أسعد الاوقات.
01-20-2017, 04:58 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
Quote: غايتو يا ود المدير كان تمشي ليهم في الصيف عشان ما يقولو زيارتك دي هروب من برد كندا. اقامة سعيدة و بالله تتصور مع الزعيم ابوصلعة الاخر و عاشت وحدة الصلعات الكندية و الامريكية
ههههه .. فعلاا شارد من البردام صيفنا ما بقدر عليهو .. صيفنا كعب يا محجوب
01-22-2017, 01:23 AM
جلالدونا جلالدونا
تاريخ التسجيل: 04-26-2014
مجموع المشاركات: 9387
Quote: بوست جميل يا جلجل .. احييك واحي ضيوفك السمحين.. والبركة الشفت ود المدير ابو زلعة .. وشايفكم واقعين في البتركان والقريبفرود وتاكلو في اللحوم ... ولا سالين فينا .... بختكم ... مافي حاجة بتهضموا بيها ؟؟؟ شكرا سودانيز التي جعلت كل شي ممكناً
يا سلام يا سعادة اللوا ياخ ايام مرّت زى النسمة .. زيارة روعة و اجمل ما فيها جيّة رانى المفاجئة حاجات سمحة شديد حصلت سمعنا صوت دينق ..معاوية الزبير .. حامد الصاوى و عثمان عووضة و لمّة حلوة للزملاء و الزميلات بى اريزونا و ياخى كنّا بنهضم بالقهوة تصدق اول مرّة فى حياتى ادخل استار بكس غايتو فرقو معاى كتير
جلالدونا وضيوف البوست الكرام التحيات النواضر عرفت اليوم حاجات غريبة وما ممكن نصدقها لولا معرفتي جيدا انكم لا تكذبون ...لان محتوى هذا البوست يدل على انكم ناس سمحين بالحيل... بوست اوسكار في اوسكار... من الحاجات الغريبة قولك انكم لم تتعارفوا الا من خلال حوش الباشمهندس بكري...ويجيكم زوار من بلد تانية وتستقبلوهم بهذه المحنة والود وكانكم اهل ...مش اهل وبس ولكن صلة قربى من الدرجة الاولى.... ..وبرضه صورة شجرة القريب فروت داخل بيت الباشمهندس ...معقولة دي... حاجة ما يصدقها العقل...ولايتكم العايشين فيها دي بتشبه جنة عدن ولا شنو!! وبقينا نفكر القاعدين ليها شنو في نيويورك مدينة غابات الاسمنت ... والحاجة الاغرب قولك ان في اشجار نخيل في ولايتكم....معقولة اشجار نخيل في نورث امريكا الفيها جليد وامطار طول السنة وشتاء قارص ...والمعروف ان اشجار النخيل ما بتقوم الا في بلاد شهور السخانة فيها اكثر من شهور الشتاء.. الا اذا كانت ولايتكم جوها زي السودان والسعودية والعراق... ..والشكر ايضا لمحمد النور كبر والذي جاء ليزين البوست بالحكاوي الطاعمة والتي لا نمل ولا نكل من قراءتها... والشكر مرات ومرات لقائد الاوركسترا الذي جعل كل هذا ممكنا وميسورا... والشكر ايضا لك ،بالنيابة عن المحتفى بهم، لاحتفائك بهم بهذه الصورة الروعة واثبت لكل الناس ان الدنيا بخير وان السودانيين بخير ما دام فيهم امثالك .. واخيرا وليس اخرا الشكر لك لهذا البوست الروعة الاوسكار .... والله يديكم الصحة والعافية ..واللقمة الدافية
اووو مولانا محمد النور كبر ياخ تشكرات على باقات النغم المعبر ..وصدقنى امكانيه القدره على الانتقاء والوقوف فى السمح فى فقه التكليف ..ما فى وسع كل شخص الا سيده المشبع بالجمال ...فامرق شمسك الفى جواك وتوجه لشمس همسلف وجلالدونا والسيدين .. وفى انتظارك فما زالت الدعوه قائمه كسره صديقك اللدود معاويه غادرنا وهو يشع حراره تكفى لاناره البرتا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
جلالدونا
ابراهيم ناصر
حيدر حسن ميرغني
علي دفع الله
حمد عبد الغفار عمر
معاوية عبيد الصائم
بكرى ابوبكر
زهير عثمان حمد
ملهم كردفان
يحي قباني
أيمن نواى على
محمد البشرى الخضر
MOHAMMED ELSHEIKH
Deng
معاوية المدير
عبدالحفيظ ابوسن
Mahjob Abdalla
جمال ود القوز
Hamid Elsawi
Kabar
محمد مجيدو
فيس بوك
تويتر
انستقرام
يوتيوب
بنتيريست