أعوذ بالله من الشيطان الرجيم باسم الله الرحمن الرحيم
السيد رئيس الجمهورية المشير عمر حسن أحمد البشير
زمان كان زول داير يوصل ليك كلام أو داير يقابلك سنتين ما بقابلك ولا سنة كاملة
الناس تحت ليك والجنبك والناس المسؤولين ديل ما بخلو الزول يقابلك
وما بتسمع إلا كلامهم هم
الكلام الساكت حق الناس الشعب الصحي ..كلام الشعب الصحي صحي يلا تلقى أخباره
حتى وفود الولايات لما تجيك وتلاقيك ما بقولوا ليك إلا الكلام السمح
لكن حال الناس وجوع الناس وعطش الناس ما بقولوا ليك
وهم ذاتهم سواء كان في البرلمان والآخرين ديل (أملأ كرشك)
لما دخل البرلمان أو مسك وظيفة ومسك ليه (ديت) حق حكومة برضع تاني ذاتو كان قلت له زح من (الديت) تاني من بزح ليك
***************
الكلام دا جايك من دار المسيرية هناك غرب كردفان
((الرأي قالوا اخذه من راعي الغنم وزولين كان قالوا ليك اهبش رأيك دا أهبشها))
*****************
فالأمور ما كل مرة بتجي عديل.. انتبهوا !!
((حقار الرجال مويت)) ...
ما تحقر الناس .. ما تحقر الناس ...السيد الرئيس
الحراك البسيط بسيط دا ما تحقرها ...
***
انتم بدل الجيش البتودوهو هناك دا وكله بموت دا
الجبال دي أصلاً ما بتداوس
أمريكا بمنعها دا ...قندهار حقت افغانستان ضربتها بالراجمات ومصائبها الكتار
***
يا عمر البشير:
((العاصرك ما بحس جعيرك))..
الجوع دا هلك الناس كله كله
والدولار دا كمان يعني بضرب في الجنيه كف في كف وبرميه وبضرب فيه كف وبرميه
انتو الاقتصاد دا يعني غلبكم عديل كدا ما بتعرفوه ليه ...ولا دا الحظر شغولكو دا ...ولا شغلكم عدم بصيرة ...ولا ما لو الدولار فطس الجنيه السوداني دا والامور كلها إلا طايرة السماء دا؟ والسعودية دي اسع تنطي في مصر في القراريش ونحن اقتصادنا لسع رااقد في التراب ...!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سيف الدين بابكر
فيس بوك
تويتر
انستقرام
يوتيوب
بنتيريست