|
|
 Re: اللقاء الأول (Re: عليش الريدة)
|
توقفت العربة الصغيرة الحمراء على بعد خمسين مترا من الصراف الآلي،كانت سونا تتحدث مع سامي رفيقها المنتخب لهذا المساء..
:دايرا لي لبانة من البقالة البيغادي للشارع ديك..لبانة محددة اسمها جونت..
:كويس ،جيبي القروش..
:هي بجنيه واحد..الساندوتشات عرفناها،جنيه للبانة ماعندك؟
:إنتي أديتني فرصة أشيل قروش..أطلع ،أطلع..لمن طلعت كما ولدتني أمي..
أخرجت سونا جنيه وأعطته له..
الشارع دائما في حالة زحام،استهلك سامي بعض الوقت قبل عبور الشارع،ثم توجه نحو البقالة..وبعد لحظات من دخوله ،تلقى من سونا اتصالا
:معقول اشتقلتي سريع كدا..
:بلا اشتقتلي بلا عبط..أنا دايرا أقوليك ماشة..
:ماشة وين يابت الناس؟
:والله ماعارفة،مشتتة بس..
:وأنا البوصلني منو؟
:ما هوعشان كدا أنا ضربتليك،شوف الشغلانية بسيطة جدا،وقّف أي حافلة واركب عادي،ولما يجيك الكمساري مطقطقا،قوليهو معلّم الله ... بوصلوك ملح..
:ياسونا بطلي الجن البتعملي فيهو دا..
:إت مفتكرني بكضب،والله (معلم الله ) دي توصلك القصر الجمهوري ذاتو،خلي بيتكم الشين دا..بس أحفظا كويس ،معلم الله آآآ؟، ماتمشي تقول حاجة تاني كدا وللا كدا،يقوموا يرجموك في حافلتن دي،الناس ديل الأيام دي مسخنين سخانة شديدة...باي سمسمة..
ياسونا..
:اللبانة أكلا ،عفيتا ليك..
:ياسونا..
لكن سونا أغلقت الهاتف..وتحركت.
أمام الصراف كان هناك رجل عجوز،يرتدي أبرول عليه شعار شركة بالا..
:إت ياحاج جابوك جديد هنا؟
:أيوا..
:وين خلودي؟
:مابعرفو..
:خلودي ياخ،الولد الوجيه العندو خصلة..
:مابعرفو..
:عليك الله ياحاج ،الناس ديل مش دواعش،كيف يشيلوا خلودي ويجيبوك إنت؟
: ....
: لكن أنا ما ح أسكتليهم،من حتتي دي وطوالي لحماية المستهلك،لمتين نسكت على السبهللية والاستهتار بصحتنا بالطريقة دي، هو العمر دا بقا لبان جونت كمان؟
: .......
توقفت عن الكلام وتأملته للحظات،ثم تناولت كيسا من الداخل وقذفته به
:هاك أُكل... الظاهر عليك ليك تلاتة أيام ما أكلت..
لو كانت مدت بالسندوتش بطريقة طبيعية لما أخذه صابر،لكنها قذفت به،فلم يكن هناك بد من استقباله..وهكذا تأتي المصائب..
نظرت في المرآة فرأت سامي يكاد يلامس مؤخرة العربة،فضغطت على دواسة الوقود بعنف،حاول سامي مجاراة العربة ،نجح لبضع خطوات،ثم تعثر وسقط على وجهه في التراب..
أخرجت سونا وجهها من النافذة وصاحت:حظك ياحاج ،الليلة ح تاكل كبدة..
غرفة الصراف الآلي مكتظة بأوراق الإيصالات تنتظر الخلاص،صابر لديه ساندوتش كبدة في يده، سامي وقف ونفض الغبار،ثم توجه نحو صابر
:معليش ياحاج،بس الساندوتش دا بتاعي أنا، وأنا والله جعان شديد،وما دايرو كلو،بس أقسم لي معاك حتة،معليش يعني ماشايل معاي قروش،كان بخليهو ليك.
:بالعكس،إنت حليت لي مشكلة كبيرة..
وناوله إياه..
:إنت فطرت ياحاج؟
:أنا ماشاعر بالجوع
وبدا سامي مباشرة في مضغ الساندوتش..
:البت دي قالت لي كلام غريب..
سأل سامي بلا مبالاة:قالتليك شنو؟.
:قالتلي الظاهر عليك ليك تلاتة أيام ما أكلت.
:معليش ياحاج،دي أصلها مجنونة،ماتشتغل بكلاما..
:لا ما كدا،المسألة في إنو أنا فعلا لي تلاتة أيام ما أكلت..البت دي غريبة..
توقف سامي عن الطعام،وأخذ يتأمل في عم صابر ذاهلا..
|
|
 
|
|
|
|
|
| العنوان |
الكاتب |
Date |
| سونا المجنونة وعم صابر | عليش الريدة | 11-05-16, 09:47 AM |
| Re: قبر وأبرول وممسحة | عليش الريدة | 11-05-16, 12:53 PM |
| Re: تقاليد الانجراف الأخير | عليش الريدة | 11-05-16, 09:52 PM |
| Re: نجمة الصباح ...العوير | عليش الريدة | 11-06-16, 10:38 AM |
| Re: وجاءت من أقصى الكوخ مدينة تسعى | عليش الريدة | 11-11-16, 10:25 PM |
| Re: منعطف جديد | عليش الريدة | 11-12-16, 08:36 AM |
| Re: الطريق معبد | عليش الريدة | 11-12-16, 08:48 AM |
| Re: الطريق معبد | معاوية الزبير | 11-12-16, 07:29 PM |
| Re: الطريق معبد | عليش الريدة | 11-12-16, 07:49 PM |
| Re: الطريق معبد | معاوية الزبير | 11-12-16, 08:11 PM |
| Re: الطريق معبد | عليش الريدة | 11-12-16, 09:11 PM |
| Re: الطريق معبد | عليش الريدة | 11-16-16, 09:43 AM |
| Re: عليش الريده | محمد قسم الله محمد | 11-16-16, 11:23 PM |
| Re: عليش الريده | عليش الريدة | 11-17-16, 11:23 AM |
| Re: الحلبة | عليش الريدة | 11-17-16, 07:43 PM |
| Re: الشركة | عليش الريدة | 11-29-16, 04:09 PM |
| Re: اللقاء الأول | عليش الريدة | 12-01-16, 08:26 AM |
| Re: اللقاء الأول | عليش الريدة | 12-07-16, 07:47 PM |
|
| |
عليش الريدة
فيس بوك
تويتر
انستقرام
يوتيوب
بنتيريست