بسم الله الرحمن الرحيم يوسف البروف بلاغ ضد الوزير.... انا المواطن يوسف البروف اتقدم ببلاغ ضد الوزير الاتحادى لوزارة التربية والتعليم ووزير التربية والتعليم بولاية غرب كردفان ومدير تعليم الاساس بالولاية ومدير تعليم الاساس بمحلية ودبندا.. لكن قبال ما تعرفوا سبب البلاغ تعالوا نحكى ليكم حكاوى وعجايب التعليم فى بلادى...قرية املس ...اتحدى الوزير يكون سمع بيها ساكت...ياخى املس؟...قال املس قال...هو عليك الله ودبندا ما سمع بيها يسمع باملس ...املس دى يا البتجهزوا لاستقبال السيد الريس وتوروا انجازاتكم وما حققتوهوا من تنمية ما تنسوا لزوم انكم تكفوا العين تضربوا بيها مثال فى القصور تجاه التعليم...مدرسة ابن هشام بقرية املس اسست عام 2007...املس دى تبعد حوالى عشرين كيلومتر غرب ودبندا ...فيها من سنة اولى لحدى سنة ثامنة...فيها اربعة اساتذة فقط...استاذين واستاذتين...عدد طلاب المدرسة 314 طالب وطالبة...اوعك تسالنى عن اجلاس ...الجميع ارضا مؤخرات...بكبوا للطلاب برميل موية واحد فى اليوم...نتمنى من اصحاب العقول الحسابية حساب ما يشربه الطالب من جرعات الماء فى الظروف الطبيعية وارجوا استبعاد الحالات الاخراجية بشقيها السائلة والناشفة...دا كلوا كوم...المدرسة دى من اسسوها ما جابوا ليها معلم لغة انجليزية....نهائ...بعدين ما تنسى اللغة الانجليزية بدرسوها من سنة خامسة...كدا عليكم الله احسبوا معاى...خامسة دايرة انجليزى...سادسة داير انجليزى...سابعة داير انجليزى...ثامنة دايرة انجليزى...اربعة فصول دايرة انجليزى...اها الاربعة فصول دى ما عندها استاذ انجليزى...لكن المفاجاة جاياكم لسا يا احباب...انتوا مستعجلين ولا حاجة؟...ما مستعجلين ؟...جميل...المدرسة دى امتحنت تلاتة مرات وفى التلاتة مرات بتسجل نجاحا باهرا ...نجاح بدون استاذ انجليزى؟...ايوا ...نجاح بدون استاذ انجليزى...طيب مش يمكن بنجحوا فى المواد التانية وبسقطوا فى الانجليزى لانوا النتيجة بتطلع بدون تفاصيل؟...حلاتك انت يا للى...انت قايلنى انا جيت البلد دى ساكى كيس؟...انتوا الكيس الساكنوا دا فيهوا شنوا؟...انا طلعت التفاصيل لاخوى الاصغر الذى امتحن السنة الماضية واحرز كم وسبعين فى مادة اللغة الانجليزية...الله اكبر...الله اكبر...لا لعلم قدعملنا نحن للانجليزى فداء ...فليعد للغش مجده او تحرق مدرسة املس...فليعد للخداع مجده او تعودوا جهلاء تركبون الجحفة وترعون الضان الحمرى...
نواصل شـــــــــطة
العنوان
الكاتب
Date
شرفاء الحوش ويوسف البروف يقدمو بلاغ ضد وزير التربيه والتعليم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
خالد أحمد شطة
فيس بوك
تويتر
انستقرام
يوتيوب
بنتيريست