إمتداد بوست الموسيقى

Quote: لم ترق لمتخصص مثل عزيز حين قال: Quote: كل ما أتيت به من معلومات لا تفيد طالب أبجديات الصوت الموسيقي أو النغم أو التون. بشي. بل هذا أبعد ما يكون عن صلته بالموسيقي لبادي في تخصص دراسة الموسيقي ناهيك عن من يبحث عن ثقافة موسيقية تمكنه من إدراك ما يسمعه من موسيقي..

انت راقت ليك ولا لا؟

أولاً عزيز (ما متخصص) بالمعنى الحرفي، يعني ما (professional)، الأخ عزيز دارس للموسيقى. مشكلتكم إنو أي زول رفع في وشكم شهادة حيلكم بموت وتعطلوا تفكيركم، يعني يا أسامة ليوم الليلة انت مثلاً ما قادر تشرح أو تحدد فهمت شنو من الكبسولة بتاعة (أصواتهم جبلية وأصواتنا صحراوية)، دا لأنك شطبت وعيك وبالكسل السوداني المعهود انتظرت الوجبة يدوك ليها (spoon feeding) وبعد دا أول ما طلبنا منك تفهمنا نططت عيونك، فهمت المشكلة وين؟ طيب، نجي لكلام عزيز، ودا ما رد رسمي ليهو لأنو سؤالو في موضوع مختلف يتعلق بالمدى الصوتي، لكن نشرح ليك انت ليه أنا فصلت في أكتر من اتجاه: فلما يجي واحد زي أمبدة يقول عن صورة الأذن (لا يمكن أن يفهم تفاصيلها الا طبيب اختصاص انف واذن وحنجرة.) وتقوموا بلا فهم كلكم تلتقطوا الجملة وتقعدوا تكوركوا (أنف وأذن وحنجرة) ويتضح في النهاية إنو تشريح الأذن بنفس التفاصيل دي وبشرح أوسع مقرر للأطفال في الصف الثامن دي تبقى فضيحة ليكم كلكم، لأنو الصورة وردت ضمن الباب الأول لتعليم الموسيقى للأطفال، يا كبار يا فاهمين. والنزيدك: المقدمة عن الصوت وتوليده ميكانيكياً وإلكترونياً ونقله ميكانيكياً وإلكترونياً ضرورية جداً جداً عشان تفهم آليات عمل الآلات الموسيقية وتجهيزاتها وليس كما يقول أو يقترح الأخ عزيز بل ضرورية جداً عشان تفهم الصوت البشري وعلاقته مع الموسيقى في كل أنماطها وليه المدى الصوتي بيشمل كل النغمات البيقدر على توليدها المغني بدون استثناء. المدى وحساسية الأذن ضرورية للاستماع للموسيقى، عشان تعرف يا أسامة الفرق بين الأصوات وتحس باستايلات الموسيقى والجنرات بتاعاتها، كيف؟ لمن تفهم المدى بتاع أضانك (وكل أضان براها بالمناسبة) حتعرف تختار أجهزة الاستماع المناسبة لاضنينك (زي عدسات النضارة بالضبط) ولنوع الموسيقى العايز تستمع ليها، لأنو أي استايل وأي جنرة عندها ضبط معين وما بتلقى سماعات راس ولا سماعات خارجية ممكن تغطي ليك كل المدى، وعشان تفهم يا أسامة وين تقعد في أفضل بقعة إذا الله وداك تحضر كونسيرت راقي ولا أوبيرا ولا باليه، انت أظنك بتاع (البنسلين يا تمرجي) عشان كدة ما فارقة معاك، خايف تكون بتاع (ورا ورا ورا واللبن أبو لي بي) وأظني أشرت إلى أنو محبي الموسيقى الحقيقيين بيعرفوا من وين يشتروا السماعات، مش بتاعات (ضربوا رماهو) البدوك ليهن هدية مع الوجبة في الطيارة. الأشكال الموجية للصوت والتوافقيات وعلاقاتها ببعضها ضرورية لتحليل الإيقاعات وفي الموسيقى الإلكترونية وفي عملية التخليق للنغمات والمزج والمعالجة وإضافة الفلترات للأعمال الموسيقية ودا كلو حيكون لما نتكلم عن (انتاج الموسيقى) يعني الاستوديوهات والتسجيل والانتاج بتاع الألبومات يا اسامة، بدون دي حتكون فني صوت ساي تعلي وتوطي، وهو المضيعكم شنو يا سودانيين؟ أشكال التوافقيات وعلاقاتها مهم جدا جدا عشان تعرف تضبط الآلات الوترية وعشان تعرف تختار المايك المناسب والبرنامج الإلكتروني المناسب لو حتسجل أعمالك، وأهم من دا كلو، التوافقيات شرحها ضروري لما نجي للهارموني والكوردات لأنو النموذد بتاعنا حيكون آلة اسمها (جيتار) "قيثارة بكلام الكيك المهووس بالعربي داك" وبرضو فهم آلية تداخل التوافقيات ضرورية جداً عشان نشرح شغل الكورال ومجموعات الآلات (ensembles) وعشان تعرف ليه في التسجيلات الغربية الكمنجات نضييييييييفة. وأي حاجة وردت في الباب الأول كانت مجرد راس خيط، والباب التاني تفاصيله أعمق وأصعب، لأنو بيفصل في المفاهيم الأساسية للصوت الموسيقى (النغم واللحن والإيقاع) عشان تعرف الفرق بين دليب السودان والفولان وعشان لما تسمع فنان بيغني ما طوالي تصدق إنو دا (فيهو حداثة) وعشان تفهم المصطلحات الكاتلة حيلكم دي ناس كاونتربوينت وهارموني وقهقرية بالجنبة لوراء. المداخلة الفيها المحتوى بتاع الأبواب دي أخدت مني أسبوع عشان أرتبها بطريقة منطقية تراعي اعتماد المواضيع على بعضها فأنا بتكلم عن (علوم الموسيقى) مش (نظرية الموسيقى)، لكن الظاهر انت فهمت إنو حاتم حيبدأ بالنوتة الموسيقة مش؟ وبعدها أقول سوبرانو وتينر وآلتو والكاشف وزنقار وحداثة ما بعدها حداثة وشوية فيديوهات ونخش على الدليب وننتهي في أكرويالي وكالاماتا ويا سلام موسيقتنا تاني موسيقى في العالم وسلمنا خماسي، ما ياهو فهمك؟ كدي يالمناسبة أكرمني ياخي بدل شغل العجائز التنويني دا، النماذج الصوتية اشتغلت معاك؟ يعني عرفت النغمة الأساسية (A440) صوتها كيفن؟ أو زي ما حيقول الكيك (how does it seems like) وعرفت الواوا دي عاملة كيف والأوفردرايف ولا مركز في الإملاء؟ المسألة دي ضرورية لأنو الموسيقى صوت، ما صورة نوتة. _______ غايتو جنس وغش، هسع انت قاعد في أم ريكة؟ محل بيونسى وشاكيرا؟