الليلة أثناء مابشوف علم السودان ركزت في صقر الجديان شديد صقر الجديان هو شعار السودان الرسمي وهو طائر جارح وليو هيبة وجميل (قرض عديل) مكسر القمريات والبلابل وكل إناث الطيور . وبالرغم من إنو صقر الجديان بعيش في بعض مناطق السودان (كردفان ودارفور) إلا إنو ما(قومي) ، أنا شخصياً ماحصل شفت لي صقر جديان - ياهو بس بنشوف صقور الكوش الزرقا دي - ، وربما 95% من أهل السودان ماشافو صقر جديان في حياتهم . لذا وعليه قررت إنو لازم نجتمع كسودانيين ونقرر نعمل شعار جديد لدولتنا الحبيبة ويكون شعار بمثلنا كلنا وبعبر عننا تعبير جيد وأنا شخصياً حأقترح عليكم عدة شعارات ممكن تختارو منها ولو في أي زول عندو شعارات حابب يضيفها ممكن برضو ونتفاكر لحدي مانصل للشعار المناسب . الشعارات البقترحها هي التاليه : 1- الجمل الجمل حيوان صبور ونحنا صبورين أكتر من الجمل زاتو والدليل على كده إننا صابرين على حكومة السجم دي وصابرين على فرقنا السودانيه العمرها مافرحتنا وصابرين على الحر والبشتنه وصابرين على الصبر زاتو - رجيتك وفي انتظار عينيك كمّلت الصبر كلو ... أنا وأشواقي والساعة- 2- الباعوضة مافي سوداني أصيل ما عضتو باعوضه وجاتو ملاريا ، والبعوضه أختنا برضو ومتربيه معانا في بيوتنا ودمها الفي جسمها ياهو دمنا -ياناس أنا بريدو وبتغذى بدم وريدو ياناس- 3- الماسورة يتخيل لي تسمية ماسورة دي سببها إنو مواسيرنا مابتجيب مويه لذا بقينا نقول على المهاجم المابجيب أقوان ماسورة وعلى العربية البتقيف كتير دي عربية ماسورة وهكذا ، والسودان بلد يشتهر بالمواسير ذات الأحجام الضخمة من 5 بوصة وإنت طالع ، لذا أقترح شعار الماسورة - حبك كان لي اسطورة وانتي طلعتي ماسورة- 4- قدرة الفول الفول طبعاً مامحتاج شرح لأنو مربينا كلو ولحم كتافنا من الفول لذا من العدل إننا ننصفو ونعملو شعار لدولتنا المحبوبة -يامقلي خالص على الصواني يافول ياسوداني- 5- الشمس الشمس ترمز للسخانه وكل السودانيين مسخنين (سخانة جيب وسخانة جو) ، وحمانا الله في ناس كمان عندهم سخانة في المسالك البولية ، والشمس عمرها ماقطعت مننا منوره لينا بالصباح وبنجازفها بالشمع بالليل -شمسك طلعت وأشرق نورها بقت شمسيييييييين-
07-20-2016, 02:06 PM
متوكل حسن متوكل حسن
تاريخ التسجيل: 03-04-2014
مجموع المشاركات: 123
نحن من الدول القليلة التي بقيت فيها الامراض البدائية مثل مرض الملاريا
دولة سيريلانكا كان يستوطنها المرض وهي دولة فقيرة تعتمد على الزراعة وشئ من السياحة ولكن بالتخطيط والبرمجة والعمل الجاد احتفلت منذ سنوات بالقضاء التام على مرض الملاريا
نحن محلك سر وكل سنة يفاجئنا الخريف وترقد عندنا المياه وتركد وتتحفر شوارع الاسفلت المصروف عليها ميزانيات ومليارات وتنهار سدود مشاريع (حصاد المياه) والتي كان التلفزيون الرسمي يذكرها بالكثير من المباهاة
يا عزيزي اؤيد شعار الباعوضة
أجدع رسام يرسم لينا أثنى الأنوفيليس ودا شعار هيبته عظيمة جداً ويخيف أعتى الدول في العالم
أحمد الشايقي
07-20-2016, 05:36 PM
hassan bashir hassan bashir
تاريخ التسجيل: 02-17-2006
مجموع المشاركات: 1302
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر عبد الكريم علي
متوكل حسن
أحمد الشايقي
فيس بوك
تويتر
انستقرام
يوتيوب
بنتيريست