الوالد طول الله في عمرو كان في زيارة من السودان لقطر والسعوديه معاهو اختنا وزوجها بتكلم مع زوجها كخبير سفر وطلع بره كثير ونسيبنا اول مره اطلع من السودان وهم ماشين علي مطار الخرطوم قال ليهو: (( يا زول تمبل بطنك مويه كان طلعنا من مطار الخرطوم ولي قدام مويه لي الله تاني مافي الناس هناك ببيعو المويه)). طلعت الشغل ماشي علي البيت وقفت العربية جمب ميدان كوره شايف الولد بتمرن منظر عادي في اجازات المدارس اللفت نظري شفت لي سوداني لابس لبسه رياضيه ومعاهو وليدين وبنتين صغار الاولاد ماشي اما البنات وزول نازل الشارع بكل اطفالو غريبه سلمت علي ولدي طوالي كب لي الشمار يا بابا سلم علي عمو فلان جاي من السودان جديد بتمرن معانا هنا وقع لي الكلام قلت نتونس معاهو الجديد شديد الراجل جديد كرت مهندس شغال في شركه ومستغرب قفلت السعوديه هو والاولاد طلع الشارع قايل الحكاية زي السودان .....طوالي خشا في سهولة الحياة هنا والرواتب كويسه بس الحاجات غاليه، مستغرب في حكاية المويه الغالية والتلتلة بتاعتها من البقالة بشيلها في ضهرو قلت ليهو ما تتعب نفسك ممكن تحصل عند الحارس مويه بجيبها ليك فوق مرتاح هنا دخلنا في مقولبة الجنيه بالريال اتكل في الحيطه الوراوهو وجره عليهو البت الصغيره وقال لي. المويه في البقالة بستة ريال وقالو ناس العربات بتاعين المنهل بالجملة ببيعوها ارخص من كده والحارس ببيعاها بسيعة ريال لو انا لميت في بتاعين العربات افضل لي من البقالة ممكن اشتري منهم خمسين قارورة كبيره اختها في البيت بتاعت الشهر واوفر لي مبلغ محترم ممكن إعادل في السودان مرتب عامل. قلت ليهو خمسين قارورة تختها في البيت وين ، انت عايز تفتح ليك محل مرطبات و ل عايز تربي قعونج خمسين قارورة لما تجي داخل البيت والله الا تبقي مسي و ل رونالدو. ما اشتغل بي كلامي واصل.... تعرف انا ناس الشغل عندهم مجمع سكني فضلوني بين المجمع و ل بدل السكن قلت ليهم خلوني ادرس الموضوع لقيت لو اجرت شقة ممكن اوفر ستة الف ريال يعني شهريا خمسمائة جنيه ياخ دي ماهية موظف في السودان وممكن تساعدني في قراية الاولاد هنا المراة قالت عايزة تقريهم مدارس اجنبيه الصغار الكبار خلاس مافي طريقه. هنا الزول جاني محل انا عايز خاصة انا جاي من الشغل تعبان والناس البتجي من السودان جديده كلامها بكون كثير وفي تفاصيل واسئلة ممله قلت ليهو: تعرف المدارس الاجنبيه لطفلين عايز ليك كم سنويا تقريبا مدرسه كويسه اربعين الف ريال. الراجل قطع واتبكم وشو اتغيير حسيت قسيت عليهو وهدمت امالو قلت نخف عليهو.... في مدارس اسعارها كويسه بشوفها ليك واديك خبر ممكن تعمل لي رنة من جوالك عشان احفظ رقمك طلع الجوال بتاعو وقال لي اديني رقمك عشان ما عندي رصيد اعمل ليك رنه الناس البتجي كرت لذيذه حتي الرصيد مافي. اتذكرته اول ما جيت السعوديه بنين بالباخره وكان عندنا نسيبنا عندو اقامة بمشي بجي لارتباطات بعض الاعمال مع اخوانو هنا اها الراجل دا كرما منو عندو خمسة وخمسين ريال ادناني ليها وقال لي البص من جدة للرياض بخمسة وستين ريال شوف ليك عشرة تم بيها حق التذكرة. وانا جاي في الباخره قلت اتم العشره ريال بتحويل المبالغ السودانية لقيت لي واحد من المعلمين السودانيين عندو عربية وعايز زول إرافقو للرياض قلت خلاس نوفر قروشي اها ركبت معاهو واحنا ماشين في الطريق وقفنا في اسواق عشان الراجل اشتري ليهو مويه وعصائر وبعض الفطائر دخل لقط من جوه ملي ليهو كيس كبير شاورت نفسي قلت الراجل بكب في البنزين وموصلني الرياض ما بخليهو ادفع حق الكيس قعدته اصارع فيهو جمب الكاشير واحلف والله ما تدفع يا زول انا حلفت الراجل لما شافني مصر قال لي ادفع الحساب طلع تسعة وتماتنين ريال وانا عندي خمسمة وخمسين ريال قلت اعمل فيها الود مفتح طلعت قزازات المويه بره ومعاها فطاير مدردمه قلت ليهو المويه مافي ليها داعي ممكن نشرب من اي سبيل و ل ثلاجة في الشارع والفطاير دي شكلها زي اللقيمات مافي داعي ليها ممكن تكون مدتها منتهية او الزيت كثير وانا عندي القولون . الراجل طلع ليهو مية ريال مداها لبتاع الكاشير وختف الكيس وطلع بقيت في موقف محرج ركبنا العربية وعمك اكوضم وانا ما قادر امد يدي للكيس منتظر اعزمنى... ولا حياة لمن تنادي... بقيت في حالة صعبة زي الزول الصايم رمضان وفوت مواعيد أذان المغرب ما لقي موية ولا اكل ، فجاة عمك قال لي سواقتك كيف قلت ليهو طياره اسوقها وقف ونزل لي مسكت الدركسون نص ساعة براقب في سواقتي بعد اطمأن وانا براقب فيهو بنظرة من قعر العين الراجل نام صحيتو في الرياض والكيس فاضي لا فيهو مويه لا عصاير لا فطاير والخمسة وخمسين ريال كانت قاعده معاي شهرين.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عباس الدسيس
فيس بوك
تويتر
انستقرام
يوتيوب
بنتيريست