ايام الجامعة ، كانت لي زميلة وصديقة من بنات سنار ، امتحنت رياضيات بحتة..يعني الناس المفروض يمشوا هندسة وكده ، لكن الظروف الخاينة جابتها لينا في قانون..اها يوم جيت لاقيتها بالصباح ، ومعاي باقي نعاس كده..نوع النومة الما تمت ، عشان تلحق ليك محاضرة قانون دولي خاص..اول ما شافتني قالت لي: مالك عيونك حمر كده ، امبارح كنت مساهر ولا شنو؟.. قلت ليها : ايوه ما نمت كويس.. قالت لي: ليه؟ قلت ليها: ناس هندسة ياخي.. ساهروا بينا.. (العادة في تلك الأيام ، انو ناس هندسة بيخشوا البركس بعد الواحدة صباحا ، وكان عندهم عادة شينة : يقعدوا يغنوا ليك غنا ما انزل الله به من سلطان..!!).. قالت لي: مالهم ناس هندسة..؟ قلت ليها: بيغنوا غنا يساهر بي الما بعرف السهر ..! ضحكت الضحكة اللذيذة ديك.. وقالت وهي تطيب خواطري : ياخي ناس هندسة ديل بيكون قاعدين يذاكروا..! صريت وشي وقلت ليها: يذاكروا كيف يعني؟..ياخي ناس بيغنوا وانتي بتقولي لي بيذاكروا؟ قالت لي: بتكون عندهم (دالة) ولا (منحنى) ولا (زاوية) ولا (جيب زاوية) رايح عليهم ، وعشان يفهموهو بيقوموا يغنوا.. لأنو الغنا برضك هندسة يا عم..! غايتو..قطعتها في حناني وسكت ساكت..حتى لا اكتب عند زميلتي زول من ناس قريعتي راحت..!
وانا بأسمع في اداء الثنائي ..ابوداود والعطبراوي.. اتذكرت كلام صاحبتي ، الله يطراها بالخير ..!!
غايتو الشغل ده يا يحي قباني ، فيهو هندسة.. فيهو (دالة) ، (منحنيات) ، (زوايا) ، (جيوب زوايا) ، واضيف عليهم (تفاضل وتكامل ) عدييل..!! ويا ناس هندسة.. اشتغلوا معانا فلسفة..و اسمعوا الشغل ده..يعني دايرين تحرجونا مع صاحبتنا ولا شنو المعني؟.. ولو زغتوا.. نبقى مهندسين برانا بطريقتنا ونشرع يمين وشمال..(علي بالحلال ظتا وقتا الإتنين قاعدات هنا..!!..ناهيك عن اللوغريتمات..!!!!!!) كنت اتمنى أن اسمع نفس الأصوات في ثنائي جديد..و اقرب ناس..الهادي الجبل ، عادل مسلم وحيدر بورتسودان.. ويا ريت يحي قباني يقنع لينا نفرين أو الثلاثة جميعا يشتغلوا نموذج واحد فقط..!
السؤال: عن الغنا والهندسة.. والتداخلات بينهم..!
خارج الموضوع يا يحي: واحد من اهلنا كان مسافر ماشي نواحي دارفور..اها قابلوهم ناس النهب المسلح.. ملصوهم ليك تب..وصاحبنا ما خلوا ليهو غير طاقيتو.. اها مشى الحلة ميطي اللهم الإ الطاقية الفوق راسو..وقعد يحكي لناس الحلة الحكاية بالتفصيل الممل ، وهو اكثر حرصا انو يوضح دورو البطولي في مواجهة ناس النهب المسلح.. اها قام واحد غتيت من ناس الحلة وقال ليهو: كيف يعني ناس النهب المسلح ما شالوا طاقيتك؟.. عمنا ارغى وازبد وقال ليهم: كيف يعني يشيلوا طاقيتي ؟.. على بالطلاق لو شالوا طاقيتي كان عرفوا حاجة..!! فشنو ، كويس صاحبك اتبرع بــ (النهاية).. لأنو لو اتبرع بـ (حاجة فيك) ولا (اضحكي).. ولا (جان والكريسماس) كان عرف حاجة..!!
وبرضو ناس (النهاية) يا ريتهم يفهموا سطر واحد من شاكلة (زي نقر الأصابع لما ترتاح للموسيقي) أو (ضحكك شرح قلب السما)..هذا اذا ما قالوا ليهو: هو بالله السما عندها قلب..ولا الأصابع بتعرف الراحة..!!
جلال تاني ما تناديني.. الإ بعد الفطر يااااااااااااااخ..!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست