لعناية كبر...

Quote: أنت أمريكا دى وزعوك ليها من سادسه أبتدائي , لسه شايل التركيبة النفسيىة بتاعت الطفوله هسع فى منتدى حوار كبير زى دا تجى تناقش الناس وتتكلم فى البالتوك بعقلية الناس بتشك فى كتابتك ولا كلامك (عشان أنت جنوبي) أنت قايل نفسك الجنوبي الوحيد المنخرط فى الحوارات السياسية ؟ يأخ الواضح أنو معرفتك بالجنوب نفسها معرفة متواضعة جداً وشغال بأشكال مندثره من حساسيات التعامل مع الأخر بتعتقد أنو أى زول بكون عندو رأى فيك عشان ( أنت جنوبي) وكأن العنصرية دى هى جسم عضوى فينا زيو وزي الكلى والقلب والرئة...عليك الله كلام بتاع أخوان كدا ومافيهو زعل حاول فتش كتابات بروفسير روفائيل بادال وتعال شوف الشباب الصغار النلدهم أنا وانت من مثقفي جنوب السودان شوف كتاباتهم وشوف حواراتهم , والقصة دى من زمان طبعاً لكن أنت معتقد أنك (ظاهره فريده) وبالمناسبة أنت زيك وزى ناس الخرطوم وأمدرمان القدامي لسه شغالين بذاكرة المدينة القديمة تحضرهم القديم والبلد حولهم أتغيرت ودخلوا ناس تانين وحركة الحضاره والمدينة استوعبت اخرين وكسحت.. أنت خارج التاريخ بشكل مريع , بفتكر أنو لو نزلت نفسك شويه من فكرة الود (الشفت )) الزمان ديك والتى مازلت تستعيدها بيمن جنبات البورد بتكون مفيد وبتكون جزء من حوار مثمر بدلاً من أن تتحول ( لآلة هدر لاتتوقف فى ترديد الهرطقات) تدفعك روح الثأر والتشفي وقصة أنو عصرتو ليك وجاب الزيت وجضمتو وسخرت منو الى أخر المنوال الصبياني الذى أنمسخ أليه الحوار فى هذا البورد...بتكون مفيد فى الحوار العام..هسع المثقفين فى الشمال والجنوب كلاهما خرج من صدمة الأنفصال , لو بتفتكر أنو الأنفصال على ناس شمال السودان كان صدمة عميقة تلقوها فى كيانهم وراسخ تصوراتهم ,وهم يعاينون أحساس أن الأخر الذى معك يمكن ببساطة لو فشلت فى أنك تحقق لهو ظروف عيش محترمة (موش فى الأكل والشراب) لكن حتى تصوراتك عن الأخر دا لمن تختو درجة ثانية فى المواطنة ولايرقى لمستواك ببساطة بتخارج وبمش يفتش دوله وينفصل عنك..يعنى الأنفصال فتح الباب أمام مراجعات عميقة فى وعى الشماليين العاديين ديل وبنفس المستوى طرح أسئلة حاده وسط الجنوبيين أنو أعباء بناء دوله لايخلقها الشعار فقط ولامجرد وجود شماليين يحاربو فيك ويظلموك هو دافع لتاسيسي حلم الأستقلال الزاهي...فى حوارات هنا فى الشمال والجنوب بين مثقفين شماليين وجنوبيين وفيها كمان متنفذين كبار فى السياسة هنا وهناك لطرح أسئلة جديده تساعد على بناء مستقبل جديد ليس بالضرورة وحده مرةً ثانيه ولكن محاوله للأستفاده من التاريخ بين الشعبين على نحو أيجابي وخلاق ينفع الناس هنا وهناك.. أنا افتكر أنك مفيد لهذا الحوار جداً وبأمكانك أن تستحضر أكثر ماهو أيجابي فى قيم الحوار...بدلاً من هذه الورطه التى أدخلت فيها نفسك ودخلتنا معاك فيها. (عدل بواسطة حاتم الياس on 06-03-2016, 08:34 AM)