|
|
|
 Re: حوار الأرزاق (Re: ادريس خليفة علم الهدي)
|
حوار الأرزاق
63
بعد أن تناولت أسرة الفاتح العشاء واستعدوا للنوم في أسرتهم .أستلمت شقيقته للنوم مبكرا .. وبقى الفاتح مع والدته .
- أمي أنا عاوز أخطب .
- يا ولد قول بسم الله أنت لسع ما قبضت راتب شهر .
- يا أمي أنت عارفه الحمد لله بقى عندي دخل حتى قبل ما يخلص الشهر ..
- طيب أها مين المحظوظة ست الحسن والجمال التستاهلك دي .
من تحت البطانية ترد أخته .
- هو في غيرها يا أمي ما ياها ذاتها .
- أنت صاحية يا جنية ؟
- وأنت تخلوا حد ينوم تنقو الليل كله ؟
- أها هي منو ؟
- طبعا هالة .
- منو ؟
- بسم الله ما لك اتخلعت كدا كأنه ما كان عندك معها ارتباط .
- أصلا ما كان عندي معها ارتباط . ولا حصل وعدتها ..أمور كانت ماشة كدا بحكم العادة .أو التعود .
- طيب أها قول أنت .
- يعني ما عرفنها .. ما هي سحر بنت عم الزين .
- لا طبعا عارفين وفرحانين وراضيين لكنها الحاجات أحسن الكلام يكون فيها واضح مباشر .. طيب على الأقل كمل الشهر وهي تكون أجزت ونشوف الحا يحصل شنو .
- وهو كذلك بس لكن أنا ما بعرف المقدمات كيف .. أكلم عم الزين مثلا ..
- يا خ أول شاورها هي ذاتها يمكن تكون مرتبطة ..
- معقولة بعد دا كله تكون مرتبطة ؟.
- ما نحن ما عارفين دا كله تفاصيلها شنو عندك .
- ماشي خلاص فهمت قصدك . لكن اؤكد أنها ما عندها غيري ..
- خلاص يا ولدي نوم .. ولو لقيت الجو مناسب مع عم الزين فاتحه في الموضوع ما فيها شي الراجل شاريك لو وافقوا نسوق أبوي وأمي وخالتك ونمشي نتقدم لهم رسمي .. بعدين نرتب الأمور الباقية .
- وهو كذلك
الفاتح قبل أن ينام قرر أن يرسل لها رساله فكتب فيها مقطع الأغنية
( يا زينة الشباب يا السمحة أنا جاييك عريس )
وردت هي بسرعة بزغرودة فقط ( ايوي يويويو يا)
مما جعلته ينفجر بالضحك .
- بسم الله في شنو يا الفاتح ؟
- تعالوا شوفوا براكم ..
- والله صحي البت دي شقية وميتة فيك .
- الله يسعدكم يا ولدي .يلا خلونا ننوم أنتو ما عندكم شغل وجامعة ؟
في الصباح الباكر كما أصبح معتاد أوصل الفاتح شقيقته لجامعتها وتوجه ناحية الشغل . وكالمعتاد ايضا فتح باب الورشة الرئيسي وأعطي باقي المفاتيح لأحد العاملين .. وبدأ العمال يتجمعون ..
جلس على المكتب ..أحضرت له بائعة الشاي راتبه من القهوة .. سنة استنها جديدة بدلا للذهاب الى رواكيب ستات الشاي بعد الحادثة الأولى بأقتراح من عم الزين ( خلي ست الشاي هي تجيب لك طلباتك هنا ما تقعد مع الناس ديل تاني )
وبدأ في مراجعة شغل اليوم .. أتصل بصاحب السيارة اللاندكروزر .. حضر وبفرحه بأصلاح السيارة دفع قيمة الصيانة بالزيادة ..أستلم سيارته بكل رضا .. استمر العمل بعد توزيع الفاتح .
أصبح شئ بديهي أن يحضر اليه أحد الميكانيكية ليستشيره في شئ أستعصى عليه تحت غيظ وغل الخصوم .
وكان هو يقدم مشوراته بكل ثقة ودائما ما تنجح وتحل الاشكال .
أصبح مرجعا مهما ..
بل في ظاهرة جديدة عليه .
وقف أحد العاملين في ورشة أخرى .
- مهندس الفاتح عمنا المعلم عبد القادر صاحب ورشة النجوم قال لم ممكن تمر عليه خمسة دقائق عاوز يستشيرك في موضوع .
هنا أرتبك الفاتح .. ماذا يفعل .. ها هو الآن إمتدت سمعته للورش الأخرى .. هل هذا يعتبر خيانة عهد ؟ هل سيغصب عم الزين؟ .. هل يجعل علمه وخبرته مبذولا للجميع . وهل بمقابل مادي ؟ كيف يرد الآن ؟
- خلاص يا كابتن قول له هو قال مشغول حاليا أول ما يفضى حا يمر عليكم .
أراد أن يكسب وقتا ويشاور الخبرات .
- يا عم عبد الله لو سمحت دقائق .
- أيوا يا ابني ؟
- في جماعة هنا أسمهم ورشة النجوم صاحبها اسمه عبد القادر طلب مني استشارة . تفتكر مفروض أمشي ليهم ولا لا؟ .. أصلا في تعاون بينكم في مواضيع زي كدا .
- والله يا ولدي الفاتح دي حاجة تقدرها أنت . وأنت زي ما عارف أنه الورش دي في منافسة حادة بيناتنا وأنت بقيت الميزة الوحيدة لورشتنا وخطفنا بيك الجو من كل الورش .. لو عاز تكون متاح للجميع وبحقك هذا شي يخصك ومن حقك لكن أنا رأيي تشاور عم الزين لانه يمكن ما يقبل .
- وهو كذلك أنا كمان فكرت في الموضوع من الناحية دي .
وفي حوالي الساعة الحادية عشر وصل عم الزين وفرح بتسليم السيارة اللاندركوزر وأصر على الفاتح أنه يستلم نصف مبلغ قيمة الصيانة مثل ما كان سيفعل خالد سجارة لو أصلحها. والفاتح كذلك تعلل بأنه شغال براتب .أخيرا وافق على ربع المبلغ ..
بينما هو وعم الزين يتناقشوا في عمل اليوم والفاتح يتيحين الفرصة ليطرح موضوعين ..أولهم طبعا التقدم لطلب بنته وثانيا موضوع الاستشارة يقف موتر باب الورشة الرئيسي والفاتح وعم الزين ينظران له الفاتح لم يكترث في الأول بمن يكون .. أما جحوظ عينا عم الزين والتركيز جعلت الفاتح يلتفت مرة أخرى ليعرف من هذا ؟
شاب طويل القامة يرتدي بنطلون جينز وقميص من الجنز قصير الأكمام يبرز منه عضلاته المفتولة . شعر كث مجعد وشنب كذلك ونظارة شمسية سوداء وحزاء عسكري ( بوت).. خمن الفاتح أن يكون هذا هو خالد سجارة ..
- السلام عليكم يا جماعة .. وين عم الزين زمن ما شفناه .
( صوت غليظ أجش )
- أهلا أهلا معلم خالد . وينك يا راجل ..؟
- وين عم الزين ؟.
- في المكتب ما شفته .؟
بعد شوية يقتحم عليهما المكتب .
- كيفيك يا عم الزين زمن ما شفناك كفارة قالوا عيان .. أزيك يا كابتن .
- دا ولدنا مهندس الفاتح .
- بالله هو دا المهندس الفاتح .. سمعنا به وكدا .. يا الفاتح يا تفتيحة هاع هاع هاع اسم على مسمى والله ..
ينبع
| |
 
|
|
|
|
|
|
|
|
Re: حوار الأرزاق (Re: درديري كباشي)
|
حوار الأرزاق
64
الفاتح : الله يبارك فيك يا مهندس خالد أنا كمان سمعت بيك ومعجب بعبقريتك .
- عبقريتي مرة واحدة كدا ؟هاهاهاها ما تبالغ يا باشمهندس وبعدين نحن لا مهندسين ولا يحزنون نحن ناس جربندية ساي الحديد دا اتعلمناه هنا في الصناعية دي .. قعدنا نخبط فيه كدا لغاية ما عرفنا سره .
- ما هي دراسة الهندسة هي كدا بس الفرق الدراسة بتديك النتائج جاهزة وتختصر ليك الزمن يعني ما محتاج تخبط الحديد هاهاهاها .. بيوروك أي حاجة تعملها نتيجتها شنو والآلات بتشتغل كيف ..
- أتفضل يا خالد أقعد نطلب ليك قهوة ..
- والله قهوتك ما ناباها يا عم الزين .. وكلام الباشمهندس دا سمح بالحيل .
جر أحد الكراسي وجلس معهما بعد الاغراء بالحديث والجلوس.
الفاتح أسعدته هذه المشاركة .. من باب الفضول يريد أن يعرف كيف اكتسب خالد خبرته وما الذي يعرفه عن اسرار السيارات بالذات الحديث منها .. وهل هو يعرف سر الحساسات أم هي صدفة عشوائية ظبطت معه وتمسك بها جاعلا لها سر من أسراره .. أكثر من ذلك هل نجح الفاتح في كشف سره فعلا ؟.
أما عم الزين فقد أنزعج من هذه المشاركة وخاصة من الحوار .. لأن خالد يتمتع بذكاء خارق وسيعرف أن الفاتح كشف سره وربما يضمر له شرا في المستقبل .لكن كيف يتخلص من هذه الورطة وهو من دعاه لتناول القهوة .. لكنه لم يتوقع الاستجابة منه .. الله يستر .. قالها في سره محاولا أن يحذر الفاتح بالنظر الا يخوض معه في سره الذي انكشف .
أما الفاتح قد كان فطنا كفاية فهو قادر على أن يستدرج خالد في الحوار دون أن يبين له كشف سره .
- تعرف يا باشمهندس خالد على قولك الحديد ( السيارات ) قدر ما تقول كشفت سره لكن الخواجات ديل كل مرة يضيفوا حاجة ويعقدوا الشغل زيادة ..أها تتعطل منك عربية تكتشف أنه كل شئ مظبوط لكن ما تدور معك .. الا بعد معافرات وبالصدفة تدور بدون ما تعرف أنت ذاتك عملت شنو بالظبط .
- أيوا كدا الشغلانة عايزة خبره ومقارنة واحتكاك الدراسة براها ما كفاية .. نحن لمن كنا في الوكالة كان كل ما يجي موديل جديد الشركة المصنعة ترسل لينا مهندس يشرح لينا التطورات الجديدة والتعقديات عشان كدا استفدنا منهم جد يعني .
- طيب دي ما ياها الدراسة الانا بقول عليها يعني أنت مهندس دارس فعلا .
- أيوا بس لكن ما عندنا شهادات زيكم كدا وما في زول بيعترف بينا غير ناسنا في الصناعية هنا الناس الطيبين زي عم الزين .
- لا يا باشمهندس الخبرة تفرض نفسها .. هسع أنت مش في مهندسين كتار في شركات وفي الحكومة جابوا ليك عرباتهم بدون ما يعرفوا مشكلتها وصلحتها ؟ ..أكيد حصلت أكتر من مرة .
- والله ياخ فعلا حصلت معاي كتير أنا بالذات والحمد لله أهو ربنا خلق لينا اسباب رزق بدون ما ندرس . ...... الشباب قالوا لي كان عندكم عربية لاندكروزر معصلجة معاكم . لكن لمن جيت عرفت أنك صلحتها وكمان سلمتوها .. المشكلة كانت شنو ؟.
عم الزين جحظت عيناه ونظر ناحية الفاتح ليعرف كيف سيكون رده .
الفاتح : لا مشكلة بسيطة بس هم ما انتبهوا ليها .. في مقوامة في الكمبيوتر كانت مركبة بالمقلوب أستعدلناها دورت .
- بالهو يعني ما احتجت تجيب لها حاجة من برة أو تركب شي جديد ؟.
- الفاتح بعد ضحكة مصطنعة .. لا ياخي الظاهر لأنه أنا سبتهم شغالين وطلعت أصرف روشتة دوا للوالدة أها رجعت ظبطت المقاومة طوالي دورت هم فاكرين جبت حاجة من بره .
- هاهاهاهاها بالله هم ناس عطوة ديل لسع في تسطيحهم داك يا عم الزين ؟. يمين ديل لو قعدوا خمسين سنة في الصناعية دي ما يتطوروا . أها يا جماعة فتكم بعافية .
- شكرا يا خالد شرفتنا ياخ .
- شرف الله قدرك يا حاج .
الفاتح : انشاء الله يكون بينا تعاون كبير يا باشمهندس خالد .
- أكيد أكيد نحن ذاتنا عايزين نستفيد من علمك دا ونديك من خبرتنا شوية .
غادر خالد وفي وداعه الفاتح حتى باب الورشة .. والروح الجميلة بينهما خلقت موجة استياء من عطوة وعصابته إذ خاب مسعاهم ..
عاد الفاتح الى مكتبه .
- صحي أنت ناوي تتعاون معاه ؟..
- والله ما في مانع مش أحسن من نخسره ونقول له زمنك راح وندخل في حرب وخباثة ومؤامرات نحن ما فاضين لها ؟
- تفكيرك سليم الله يحفظك يا ابني . أها أنا أمشي .
- دقائق يا عم الزين كنت عايزك في موضوع الحقيقة موضوعين .. واحد مهم والتاني أهم منه .
- قول المهم في الأول .
- المهم في جيران هنا طلبوا مني استشارة .. ورشة اسمها النجوم صاحبها اسمه عبد القادر انا قلت ما اروح الا اشاورك .
- يا ولدي ما تبخل على أي زول بالعلم .. العلم دا كل ما تبذله للناس ربنا يزيدك منه ويزيدك اكتر واكتر .
- يعني أمشي ؟
- أكيد تمشي وتحل لهم مشاكلهم .
- طيب بمقابل ولا بدون مقابل ؟.
- دي حاجة متروكة لك أنت .. لكن أنا رأيي لو استشارة نظرية ساكت بدون ما تدخل يدك خليها مجانا وأجرها على الله .لكن لو دخلت يدك من حقك تاخد ثمن تعبك .
- الله يحفظك يا عم الزين والله أنت رجل بركة .
- اها الموضوع التاني شنو ؟
- أنا عايز أطلب يد بنتك سحر .
- ألف مبروك وربنا يهنيكم .
الفاتح فرحا ومندهشا : بس بالبساطة دي؟ ما عاوز تشاور ؟أو تسأل ؟زي ما بيقولوا .
- - أشاور منو سحر ؟ هي لو ما انت اتقدمت ليها هي كانت اتقدمت ليك هاهاهاهاها . وأسأل عن أهلك الربوني واتعلمت منهم الحياة . ؟ شد حيلك وربنا يسهل .
ودع الفاتح وعيناه تكادان تدمعان عم الزين ودخل المكتب من جديد سعيدا ومندهشا من السهولة والبساطة التي يعيشها هذا الرجل السهل السمح البسيط .. هكذا يحل أعقد المشاكل التي تعكر صفو حياة كثير من الناس .
أول خطو عملها خرج مر على ورشة النجوم .. وعرف منهم مشكلتهم حلاها في أقل من نصف ساعة وكانت استشارة شفهية . وعاد الى عمله .. وبشر أمه بالتلفون وقال لها اليوم المساء نروح نخطب سحر من أهلها . كلمت عم الزين ووافق فورا .. طلبت منه أمه أن يكون الموضوع يوم الخميس حتى تعطيهم فرصة يجهزوا انفسهم ويفرشوا بيتهم .. وهي ستخبر أهلها لليوم الموعود .
نلتقي في الحلقة 65 قبل النهاية
يتبع
| |
|
|
|
|
|
|
|
|
|
Re: حوار الأرزاق (Re: ادريس خليفة علم الهدي)
|
حوار الأرزاق
65
الفاتح متشوقا لنهاية دوام العمل .. غير لبس الشغل ولبس ملابسه الخاصة وبدأ يرتب في الأوراق والملفات .. رن تلفونه .. نظر فوجدها هي ..أكيد أبوهم أطلق القنبلة ورغم أنها خطوة متوقعه منها.. لكن هو لم يستطع أن يخمن رد الفعل .
- دا شنو العملتو دا ؟
- عملت شنو دا بدل ما تباركي لي الخطوبة ؟
- كمان خطبت .. الف مبروك ودي منو سعيدة الحظ دي ؟.
- واحدة كدا مجنونة اسمها سحر وابوها وافق الحمد لله .
- القال ليك منو هي موافقة .؟
- قال لي قلبها .
- سمعتوا وين قلبها دا ؟
- هو مديني فرصة ؟ كل يوم اسمع فيه .
- بصراحة أنا اتكلم جد .
الفاتح ضاحكا : تقصدي شنو يعني تتكلمي جد ؟..
- ليه أنا عربية ( سيارة) تطلبني من الورشة ؟
- وأنا طلبتك من الوكالة ؟ ولا من أبوك شخصيا .
- لا كدا ما ينفع لازم تجي البيت وتطلبني في البيت .
- ياخ معقولة أنت معقدة كدا أنا كنت قايلك انسانة سمحة وبسيطة زي أبوك ..
- يا سلام عليك . عشان بعدين لمن تطلقني ترجعني الورشة ؟
- أرجعك الورشة ليه ؟
- مش أخدتني من الورشة ..؟
سكت الفاتح فترة طويلة .
- سكت مالك غلبك الكلام .؟. هوي أنا بهذر معاك ساي والله لو كنت طلبتني في السجن كنت واقفت مع أنه اليوم داك ما كنت بعرفك ؟
- والله حيرتيني حيرة ذكرتيني جماعة قرايبنا كدا عقدوا حياتهم وكانوا عايزين يعقدوا حياتي معاهم .
- عارفاهم ... بس جد عايزنكم تجونا .. مش عشان الموضوع دا .. اشتقنا ليكم .
- كلنا ؟
- أيوه كلكم .. أنت عايز تشيل أي حاجة براك .؟
- حلاص أنا احاول أقنع ناس أمي نجيكم بعد المغرب نشرب الشاي ..
- وتتعشوا كمان .
- بس خايف أمي ترفض لانها قالت لي خلي موضوع الخطوبة الرسمي يكون يوم الخميس ..عشان انتو تتهيأوا وتكلموا قرايبكم وهي تكلم أهلها كمان .
- ياخ تعالوا زيارة بس زي ما كنتوا تجونا زمان .
- ما قلت لك أحاول أقنعهم .أنت كمان حاولي كلمي ابتسام عشان نقوي الموقف .
نداء من خارج المكتب .
مهندس الفاتح خلاص الورشة قفلناها ..
- يلا يا حب عن أذنك نحن قفلنا .
- بقيت جرئ .. ؟
ضاحكا - اتعلمت منك ..
وفي البيت بعد تناول وجبة الغداء وفرحت الاسرة الصغيرة بفرح الفاتح .. فتح الفاتح موضوع الزيارة .. عاندت امه لكن قبل ما تردخ .اشطرتت أنه ما يمشوا يدهم الفاضية . الفاتح بشرهم بالمبلغ الكبير الذي استلمه .. قال نغشى محل الحلويات منها بقلاوة وكيك وما شابه .
وبعيد المغرب كانوا أمام بيت عم الزين ..
وجدوا على غير المتوقع عندهم ضيوف أمراة ببناتها .. عفوا انها أخت زوجة عم الزين وبناتها .. فرحا بالمناسبة بعد ان بشروها حضرت مع بناتها لتبارك .
- بالمناسبة يا فاطمة دي أختي محاسن .. برضها والدة عصفورات بس زيي كدا ما عندها ولد .
فاطمة مجاملة : ما شاء اله أنتو مفروض تولدوا بنات بس مدام أنتاجكم حلو كدا ؟
- تسلمي الله ما ضراك .
- مرسي يا خالتو على المجاملة اللطيفة دي .
سحر وسط الحسان بنات خالتها الزنبقة وسط باقة الفل والياسمين .أرتدت فستان اسودا يبين حسن قوامها واسدلت شعرها طويلا على ظهرها ..
الفاتح تلعثم وبدأ يتبسم يطأطئ رأسه حياءا ثم يرفعه ليختلس نظرة .. ثم يتبعها بأخرى .
أقتربت منه : مالك تعاين لي كدا خجلتني .
فاطمة .. واللله نحن ما كنا مستعجلين وسحر طبعا عجبتنا من أول يوم شفناها وحتى أختها ريم ماشاء الله أدب وجمال .. بس لكن ولدنا الشليق دا غلبه الصبر وكلم عمه الزين .
- والله نحن شارنكم بأي طريقة تطلبوا ..
- أكيد دا العشم فيكم نعم النسب والله .
- بس أنا كنت عايزاها رسمي ما عايزة أفوت أمي وأبوي وهم ربوا معاي أولادي ديل .
- ما في شي فاتهم ونحن ما عملنا شي لسع .
- خلاص المبدي متموم ربنا يسعدهم ويتم وعلى خير .
خالة البنات من النوع الذي يحب الفرح ..
بدون مقدمات أنطلقت في نوبة من الزغاريد ..أربكت الجميع مع أن من سنة الخطوبة الكتمان .. لكن لم تستطع كتم الفرح .
فاطمة أم الفاتح رغم ربكتها .. لكن جارتها في الزغاريد ..
رفع الجيران رؤوسهم متطفلين . ليعرفوا السبب .
وصل صوت الزغاريد للشارع .
ليصل شلة العشاق .
تنطلق الابتسامات الخبيثة التي تشعل النار في قلب العاشق المصدوم .. هشام عقرب .. سب وسخت وشخت وذهب غاضبا ناحية بيتهم تشيعه ضحكات الشماتة من شلته.
أخخ وا خسارتك يا سحر .. خلاص طارت .
- يا أخوان هسع عرفتوها سحر كيف يمكن ريم ؟
- ياخ ما ظاهره .. أنا من شفت الشاب الوسيم بتاع الأتوس دا يجي هنا كتير والجماعة طالعين ونازلين معاه عرفت واحدة من العصفورات طارت .. لكن لامن شفت تركيزه على سحر عرفت صاحبنا عقرب أكل نيم .. هاهاهاهاها ...
- ياخ هشام عقرب دا فارض نفسه ساي البت دكتوره ياخ يعني حا تعرس ليها عسكري نفر مرفود وبتاع بنقوا كمان .
- يا زول الزول دا ما يسمعك . اليومين ديل أعملوا حسابكم في قمة خطره واحباطه .
وفي داخل البيت بعد تناول المأكولات والمشروبات والزغاريد التي أعلنت الخطبة غصبا عن الكتمان ..
- خلاص وقت الحكاية بقت رسمية نحن نجيكم يوم الخميس مع أمي وأبوي ونخلي الكلام يبقى كلام رجال .
- لا يا أمي أنا رأيي نكلم جدي هسع بالتلفون .. ولو عايزين يجو أمشي أجيبهم وأجي .
- يا ولد أنت ما تخلي شفقتك دي ؟
- خليه الولد عريس وفرحان الله يسعده بعدين الحكاية مجرد تعارف نحن ما حا نعمل شي هسع بس نتلمى ونتعارف .
وفعلا بعد مكالة تلفونية .. يرد الجدين بفرح ويعلنوا استعدادهم للحضور .
وفي أقل من ساعة يحضرهم الفاتح وتنطلق الزغاريد من جديد .
عم صالح لعم الزين .
- أنا رأيي يا الزين نحن يوم الخميس نعقد ليهم في الجامع بعد صلاة العصر وبعدين لو عايزين لعبة في المسا بطريقتهم يفرحوا ويحتفلوا .
- يا أبوي نحن ما مستعدين لحاجة زي دي .
- ما له تستعدوا وهو حا تعملوا شنو يعني؟
- يا أبوي عايزة أنجد المراتب وأجير البيت
- كله ممكن يتعمل لسع الاسبوع في اوله.
- والله ياخ التشوفوه يا حاج صالح وأنا موافق على كل شي .
- الولد محتاج يشتري الشيلة ويرتب نفسه ويتصل بأخوانه .
- نحن ما قلنا يتم العرس كله عقد وبس بدل ما يكونوا طالعلين ونازلين مع بعض والخطبة دي حاجة حقت خواجات ساي .. الزواج شرعا هو إعلان وعقد صاح ولا ما صاح يا الزين .
- والله ما أقدر اقول حاجة انتو اتفقوا وانا موافق .
- وأنت رأيك شنو يا عريس ؟
- أنا ما عندي مانع طبعا .
- أنت حا يكون عندك مانع؟ مخصوص مشيت جبت أبوي عشان يكلفت الموضوع .
- معقولة دا رأيك في أبوك يا فاطمة .
- لا العفوا يا أبوي عداك العيب أنت الأصل و البتقول عليه نعملوا .
- يلا اتفقنا خلاص زغردن يا حريم .
وانطلقت الغاريد وزاد عدد المزغردات باشراك الجارات القريبات في هذا الفرح العفوي .
استعدادا ليوم الخميس
يتبع
| |
|
|
|
|
|
|
|
|
|
Re: حوار الأرزاق (Re: درديري كباشي)
|
حوار الأرزاق
66
بين موجات الضحك و الزغاريد وتناول المشوربات والحلويات . عدت تلك الأمسية الجميلة . وهي تصهر أسرتين لطالما جمعتهم الظروف والزمن سابقا .. ها هي تفعل الآن .. بصدفة البحث عن الرزق التي خاضها الفاتح منذ أقل من أسبوعين .. ها هي تفتح له أبواب الرزق بكل الأنواع ومن حيث لا يحتسب .. شقيقته الساخرة وهي تهمس في أذنه ( مبروك يا عريس راسمال وعيال هاهاهاها ) أشارة الى أن مصدر رزقه هو نفسه سيصبح مصدر ذريته .
وفي الباب تجمع أفراد الاسرتين للوداع بعدما تم الأتفاق على كل شئ ...
وكل رأسين بما يوازيهم من موضوع وتجانس.
عم صالح وعم الزين في ترتيب العقد .. والمأذون .. والمعازيم .. والاجتماع بعد صلاة العصر في مسجد الحي ..( أنت كلم ناس الصناعية يا الزين أنا بشوف جيرانا هناك و أقاربنا ) . وهو كذلك يا عم صالح أنا كمان بشوف جيرانا هنا وأهلنا مع ناس الصناعية .
- أها يا سعاد ربنا يسهل الأمور .. الله يخليك يا فاطمة وربنا يديم الأفراح ويخليهم لبعض ويرزقهم بالذرية الصالحة ..
- سحر مالة تتزوج هسع وبدون ما تكمل تعليمها .... ليه ؟ يعني هو الفاتح ما يقدر يوصلها الجامعة ويرجعها كل يوم ؟ عادي جدا يا سعاد البنات بقن يتزوجن ويواصلن تعليمهن..
- المهم هي راضية ومبسوطة عايني ليها حلاة الدنيا عليها تضحك كيف مع أخواتها .
الفاتح ذاته عايز يطير من الفرح .
- يا أمي أنا خلاص من مكاني دا بمشي أتصل بالنقاشين واشتري ليهم المواد .. لو كنا عطالة زي زمان كنا عملناه نفير هاهاهاهاها .
- خلاص يعني الولد اشتغل .
- ليه أنت ما معترفة بشغله يعني ؟
- كيف يا اختي والله نعم الشغل أنا بحب أكاويه ساي .. ما تتحسسي يا ريم .
- عارفاك يا ابتسام بس عايزة اقلقلك شوية هاهاهاها .
- يلا يا جماعة وقفناكم كتير .
أمام الباب أتضحت الصورة أمام العاشقين .
- ما قلت ليكم سحر هي الطارت .
- خلي عقرب يمشي ينتحر بعد كدا هاهاهاهأ.
- يا جماعة الزول دا أختوه ما تشحنوه أكثر من كدا ..
وصل الفاتح جديه لمنزلهما و بعدها الى بيتهم . تغمره السعادة بل يكاد يطير من الفرح .
والرسائل مصحوبة بالنغمات تترى على جواله .
- العروس الشفقانة دي ما تخلينا نصل ... يقوم يعمل بينا حادث ..
- يا بت خليهم فرحانين ببعض الله يحفظهم . الفاتح اتصل بأخوانك فرحهم معانا .
- حاضر يا أمي بعد نصل البيت .
وفعلا بعد ما وصل البيت اتصل بأخوانه .. وكذلك بأصدقائه .
- عصام أنا خطبت .
- كيف يعني عملت حادث ؟
- أقول لك خطبت يا وهم مش خبطت هاهاهاها ..
- والله سمعتها كدا هاهاهاهاها .. الف مبروك ما شاء الله يا هندسة ماشة معاك باسطة .. هوا .. نجي عليك نحن والشلة هسع كنا في سيرتك في محل الفول .
- بعد قليل كان بيته أيضا يضج بالأصحاب ..
- بالله الفاتح ماشاء الله قبل اسبوعين كان لافي في الصناعية يدور على رزقه .
- أصلا ربنا لمن يقول لها كوني تنبهل معاك لمن تآمن .
- عقبالكم كلكم يا أحباب .
- الله يسخر لينا زول ملك زي عمك الزين دا .
- يعني الربة حتكون في بيت العروس .؟
- العقد والربة كله هناك هنا ما في حاجة لكن أمي مصرة تعمل صيانة للبيت .
- معاها حق خليها تفرح شوية
- أنا علي الفنانين والساوند .
- يلا يا جماعة نتحرك كلنا الفاتح دا أول واحد في الشلة يتأهل .. يعني المناسبة حقتنا كلنا .
أها يا الفاتح خلال الاسبوع دا أي مساعدات نحن جاهزين .
كذلك حضر الجارات مع الأم لتنطلق موجات زغاريد جديدة في حي الفاتح .
- الله يجيبك يا يوم الخميس .
قالها الفاتح وهو متمدد على سريره قبل النوم .
- بطل شفقتك دي يا عريس ولا أمشي شرط الأيام من النتيجة خلي الخميس يجي بكره .
- يا ريت لو ممكن .
- والله يا ولدي بقيت عينك قوية لمن غلط .
- فيها شنو يا أمي أصلا أنا ما كنت متخيل الموضوع حا يسلك بالسرعة دي .
- هي ؟؟ نسيت ما اتصلت بحسن أخوي أكلمه .
- لزومه شنو خليه .
- كيف أخليه دا أخوي يزعل مني بعدين .
- أنا رأيي كلميهم بعد العقد .. يكونوا هم ارتاحوا من تعب السفر وأمورهم استقرت .
- فهمت قصدك .. كلامك صاح .
( فهمت الأم قصد ابتسام بأن تترك الفرصة لهالة ترتب حياتها من جديد قبل أن تتلقى الصدمة .. عسى ولعل يظهر لها بديل في خلال تلك الأيام وأصلا بديلها موجود كما فهمت من أمها . لكن بعد الصدمة سيكون التوافق صعب ويمكن مستحيل )
- يا يوم الخميس ما تسرع تخفف لي نار وجدي .
- تاني ؟
يتبع
| |
|
|
|
|
|
|
|
|
|
Re: حوار الأرزاق (Re: Yousuf Taha)
|
النهاية
بدأت الأيام حافلة بالنشاط الفاتح وأصهاره ..
والفاتح ينطلق بين البيتين يقضي مهام هنا ومهام هناك .
معليش يا الفاتح يا ولدي .. نحن ما عندنا ولد أنت ياك ولدنا ..
- ما عندك مشكلة يا خالة حتى لو ما كنت أنا العريس كان وقفت نفس الوقفة دي .
- أصيل يا ابني ولد أصول .. تمشي معاي الزريبة نحجز الخرفان .
- خرفان لشنو .؟
- لشنو كيف ما عندنا عرس ؟
- ما قلتوا عقد بس .
- طيب الأهل والجيران ما حا يتغدوا والأقارب اليجو يقيلوا معانا نقول ليهم تعالوا بعد الغدا كمان ؟ .
- والله كلامك صاح يا حاج كانت فايتة علي .. معناها تشوف لينا طباخين .نحن ما نقدر نقيل قدام الحلل ونتجهز للحفلة .
- كمان فيها حفلة طيب دا ما عرس عديل ؟.
- أصله الفاتح لو كان شيلته جاهزة كنا دخلناهم وارتحنا ..
- والشيلة مشكلة هسع سوقي بناتك وأرح نشتريها من السوق .
أعترض الفاتح - لا لا لا يا عمنا الا دي بس .. عندي أخواني وقريباتنا معاهم حا يشتروها من بلاد الغربة ويرسلوها في أقل من شهر تكون جاهزة ..
- يلا نمشي عشان نحصل السوق ناس أمي منتظريني كمان .رغم أنه أصحابي أتولوا أمرهم بعرباتهم لكن في حاجات خاصة قالوا الا أكون معاهم .
- يلا أرح سريع نحصل السوق عشان تفضى ليهم . .
في حركة دؤوبة لبس البيتين ثوب العرس بحركة الناس واستعداد للوليمتين في بيت الفاتح وبيت صهره ..
في يوم الخميس الموعود ..
كانت هناك وجبتي غداء في بيت الفاتح وبيت صهره .
ثم تحرك قريب العصر وفد عقد القران بسيارات من أمام بيت الفاتح بزعامة جده .. والتقوا عند المسجد المنشود قرب بيت عم الزين .
- قبلت تزويج بنتك البكر سحر الزين على موكلي الفاتح سيد أحمد على مؤخر الصداق المتفق بينهما علي كتاب الله وسنة رسوله صلى الله عليه وسلم .. الفاتحة .
أنطلقت الأعيره النارية مصحوبة بزغاريد النساء وعبارة أبشر يا عريس .. أبشروا ..أبشروا .. وموسيقى الشرطة أمام البيت عزفت بآلات النفخ وآلاتها النحاسية .الحان العرضة والسيرة. رقص أهل الحي والضيوف والاقارب بفرح صادق.. وفي المساء بدأ التحضير لوجبة العشاء والحفل المصغر داخل حوش الزين ..
كرسيين وثيرين للعروسين .. خلفهم أكليل من الورود .. كل شئ جهز محليا وبعفوية ..
أحضر أصحاب الفاتح مكبرات الصوت والفنانين والذين وعدوا بهم .. وفي المساء كان الفاتح يرتدي بدلته التي ركنت منذ التخرج قبل عامين .. ها هي تأتيها مناسبة أخرى ليطل بها على الناس .. والعروس أرتدت فستان زفاف أبيض مختصر .الزينة.
أنطلق الحفل .. رقص الصغار والكبار .. حتى عم صالح رافعا عصاته فرحا بهذا اليوم .. تحس أن الفرح كان مركون في نفوسهم مثل الأثاث في المخزن أخرجوه ونفضوا عنه الغبار .. وأشعلوه كمباخر الصندل .. حاجة خديجة الجدة أطلقت رغاريد بصوتها المتحشرج لم تستطع أن تكتمها أو تستحي من صوتها . فكان أحلى من أرق نغم سمعه الجميع .. أبشري يا حاجة ..
جلس العروسين في مكانهما يتلقون التهاني ..
وقف عم الزين خلف بنته ويمينه زوجته كما وقف الجد خلف الفاتح ويسارها الجده وأم العريس فاطمة .. وبدأ عصام يلتقط الصور لهذه اللمة أضافة لتصوير الفيديو .
- علاء الدين لاحظ للشاب داك .
- ماله ؟
- شكله حاقد من قبيل يعاين للعرسان الوحيد صاري وجهه غايته شكله ما مريح .
- ياخ مالك وماله يمكن أصلا طبعه كدا .
شباب الحي والجيران كلهم تقدموا مهنئين .
تحرك هشام عقرب نحو العريسين .
وقف أمام العروسين وأخرح مسدسا من جيب جلبابه وقال عباره واحدة .
- مبروك يا خاينة ..
وجه المسدس نحو سحر ..
ولكن في اللحظة المناسب تحرك علاء الدين وضرب يده لأعلى لتنطلق الرصاصة .. وتستقر في صدر عم الزين خلف بنته مباشرة .
يتحول الفرح الى صراخ وعنف التم الرجال حول هشام عقرب وأرقدوه أرضا وآخرن حملوا عم الزين .. لإسعافه ناحية المستشفى ..
حضرت الشرطة وأستلموا المجرم .
تحول الجمع الى لمة في المستشفى ..
أدخل عم الزين ناحية غرفة العمليات .
آخر كلام للطبيب الحمد لله الرصاصة بعيدة من القلب لكن اخترقت الرئة .
الله يستر الله يحفظك لبناتك وأمهم ما عندهم غيرك .
بعد انتظار دام عدة ساعات .. أخرج من العملية ناحية غرفة الانعاش .
آخر كلام شنو يا دكتور .. الحمد لله أخرجنا الرصاصة .. لكن في نزيف الله يستر دعاوتكم .
بين النواح وتصفيق الأيادي المتحسرة ..الله يلعنوا الولد دا كم مرة شكيناه لأهله يشوفوا ولا يدخلوه السجن لكن أهله مستهترين أهو لامن جابها ليهم كبيره .
هو شنو حكاية الولد دا ماله .
يا جماعة عم الزين فتح .
جرى نحاية غرفته الحاج صالح والفاتح العريس وزوجته وبناته .
-وبصوت ضعيف :أوصيكم يا صالح على بناتي وأمهن .. الفاتح أنت زي ما قلت ليك الله بعثك لي ولد . أحمي عروسك وأختها وأمهم أمانة في رقبتك .
- الزين ربنا يطول عمرك ويخليك ليهن .
- نحن نغالط نفسنا يا صالح يا أخوي ؟ أنا لي كم يوم أحلم بالحكاية دي الظاهر كانت تحذير .خلوا بالكم من البنات وأمهن .
وأسلم عم الزين روحه الطاهره .. لتحول النواح المكتوم الى صراخ خارج العنبر والمستشفى ..
الفاتح في غضون أيام وعطالة مقنعة وجد نفسه أمام مسؤولية جسيمة أكبر من سنه لكن .هل يستطيع أن يكمل وينجح .
ربما ..
انتهت
| |
|
|
|
|
|
|
| |
ادريس خليفة علم الهدي
Yousuf Taha
فيس بوك
تويتر
انستقرام
يوتيوب
بنتيريست