|
|
 الجزء الثاني عشر (Re: حاتم موسى عبدالعزيز)
|
رحـلتي مــــع الموت في ادغـــال دارفور
الم وامـــــل
الجـــزء الثاني عشر (12)
:معاذ حمدالنيل
الانظار كلها اتوجهت علي....
ياربي معاذ دا عايز يقول شنو!! !
مستغربين.....
وانا ذااااتي كنت متحمس للموضوع شديد....
طلعت بخطوات عسكرية لحدي وصلت نص الطابور....
عملت قف...وٲديت السيد القايد التحية العسكرية وقلت ليه...اذنك يا سعادتك
قالي اتفضل .......
كنت كــاتب الكلمات في ورقة ....قصيدة طويلة حفظت بعضها وبعضها بسرق النظر للورقة......
عملت خــلف دور ....وبقيت في مواجــهــة الطابور.... عشان القي القصيدة....
الطابور كان تلاتة صفوف....
صفين بالاطراف وصف في النص مواجه للصفين ديلاك....
والقيت القصيدة.....
بكـــل حماس.....
وبصوت عالي.... احتمال لحــدي الناس الفي الحله سمعوني وانا بلقي القصيدة....
مااااحافظا لكن مستحضر منها بعض الابيات.....
بتعبر عن احساسي بالشي الحصل ....حتي لو مابترتقي للقصايد الشعرية.... لكن هي كلام موزون حسب المشاعر الجياشة في شرق الجـــبل....
قـلت .....
قــدر إنكتـــب...
عـمــــر إنحسب...
لابد نسـير بي كـــل ٲدب....
لو كـنا في لحظة نـدم...
نعشم نكـــون عــز البلد...
فنحـنا برضو الليلة بينا...
ٲمـــانو بل نحنا الســند....
في ساحة الميدان نصـــول....
بي خفــة نكتب بالدماء اروع فصول....
تشهد شمال دارفـــور وطور...
وتشهـــد كـــلاشاتنا البترزم زي طبول..
ياتورو بـورو تعال قريب ماتبتعـد....
مالك بعيد واقف هناك وترتعد....
ماتطلع الجواك يلا.. خليك جاهز....
لي لحظـــة الصفـــر إتسعد....
ما انحنا شعب نحب ٲرضـــنا...
ونكـــره الفي يوم بدور....
يلمس عــــرضنا...
للســـلام ايدينا نــرفع...
وكـــــان حـرب...
بتعرفو دقـــــنا...
وارتفعت هـــتافات المعسكر بالتكبير.... وسط ابتسامات سعادة المقدم بشير ...كملت القصيدة ...وعملت خلف دور... وقدمت التحية العسكرية مــرة تانية... وعملت خلف دور بمشية عسكرية سريعة وخفيفة ونشيطة خشيت لي موقعي في الفصيلة التابع ليها ...وسط تهليل وتكبير وفرح داخلي شديد .....وسعادة المقدم بقولي مبروك يامعاذ ....وزملاني واحــدين بقولو كسرا كسرا...ههههههه
كان تمام خفيف.... تحفيزي.... والليلة كان في احتفال مصفر في المسعكر بي قدومنا من شرق الجبل ....وضابحين تورين قدر الضربة ...وعصاير بالبراميل الكبيرة والخير باااسط.....
ورجعنا للحياة السعيدة وسط نيرتتي واهلها الطيبين.....
ولسه ذكرياتنا في شرق الجبل محيطة بكـل تفاصيلنا .....
وبعيدا عـن المعسكر نمشي للناس الطيبين في نيرتتي....
طبعا الكهرباء عبر المولدات والبوابير.... مافي كهرباء عامه... والاعجب تعب الناس في الموية....
الحـــلة كلها فيها كـرجاكة واحـــدة (مضخة) ....واقفين صفوف... البنات والاولاد ....والنسوان.....
ياريت لو الناس الخيرين يصلو للناس دي ويعملو ليهم ابار ومضخات كافية.... او حتي الدولة تتدخل بكل ماتستطيع... لانو بالجــد موضوع الموية دا موضوع حساس جدا ...النصيحة الكلام دا من الفين وتلاتة..... احتمال وارد انو وضعهم اتصلح الان....
اتمني انو يكون اتصلح....
نيرتتي فيها مساجد كتيرة.... كنت في كل اسبوع بمشي واحـدة من المساجد دي عشان اصلي الجمعه....غالبيتم صوفية وتجانية الناس الهناك....
لانو طوااالي بقرو صلاة الفاتح.....
دي صلاة عند الطريقة التجانية ....حسب المصادر التجانية .....انو التجاني قالو اتلقا الصلاة دي من الرسول شفاهة في اليقظة مافي النوم ....ودا في حد ذاتو موضوع باطل لانو الرسول مابتشاف في اليقظة بعد وفاتو ....ممكن في النوم نقول تمام وعادي .....والادهي انو قال اجـرها بيعدل قرٲة القرٲن كذا مــرة ....ودا برضو شي بيوضح ليك مدي انحراف الناس دي.....
من الاشياء الطريفة.... اني في واحـــدة من المساجد يوم جمعه ووقت الصلاة خلاص دخل ....والناس منتظرين خطيب الجمعه يجي وماااااجا....مفترض الخطبة تبدا الساعة واحــدة ونص..... والصلاة زي اتنين ....او اتنين ونص .....اها لحدي الساعه اتنين مافي زول ظهر واي زول بتلفت للتاني......
ولمن لقو نفسهم بدون خطيب قالو يصلو ظهر ساكت....بالله شوف الناس دي....
وقفتهم وقلت للماذن اذن ....وطلعت المنبر ....طبعا مندهشين شديد مني وقام المؤذن اذن مع انو مااامقتنع......
خطبت بيهم خطبة عن القيامة واهولا في ربع ساعة ودي كانت بداية علاقات جـــديدة لي في نيرتتي.....
منها بديت في القرية دي دعـوة.... وبقيت اطلع كتير ....والحمدلله الاجواء الامنية هادئة ولفيت مساجد القرية كلها وبركـز علي الجمعات وكـدا....
وطبعا عرفت اهل البنوتة ديك ...
زولتي الراعية....هههه
بالصدفة وانا جاي من الحلة بالنهارية ....المحا ليك من بعيد ....سايقة البهايم وماشة تدوبي ساااكت ولاهاميها....
العبدلله اندس ورا شجرة قنقليس كبيرة وخليتا ليك لحدي ما ابتعدت مني..... وتابعتها بنظري لحدي ما اخدت لفة بزقاق ضيق كــدا .....وجريت ليك وراها عشان ماتضيع مني.....
تابعتها لحدي ماعرفت بيتم....
بيت كبير..... جنب الباب شجرة نيم ....
انا الحتة دي بعرفا وجيت فيها قبل ايام....
جارم معرفة من قبل مشيتي لشرق الجبل....
حلاق مااااهر..... بمشي احلق عندو طوالي في سوق نيرتتي.....
قلت خــلاص الموضوع بتحل وصاحبي دا بجيب لي الخبر اليقين.....
وبقيت اتردد كــتير علي الحله....
وكلمت صاحبي الحلاق جاب لي خبر البت وطلعت فعلا متكلمين فوقا......
وقالي اصلا الناس ديل بتزاوجو بيناتم وما اظن يقبلو بي زول غريب....
قلت خـلاص اكسر الحنك وانسي القصة وارض الله واسعة......
في المعسكر كان الروتين طاغي لابعد الحدود....
دوريات ليلية.... وتمشيط وتمامات يومية.... وونسات وضحك وقليل من الترفيه....
انا مابلعب كشتينة ولاضمنة عشان كــدا بستقل اوقات فراغي باي حاجة تانية...
وجاتني فكـــرة حلوة.....
وطوالي وضعتها حيز التفيذ....
الصباح لبست جلابية جــديدة وعمة وشال كان شفتني بتقول الشيخ دا ماعندو علاقة بالعسكرية...هههه
اتوجهت علي مدرسة نيرتتي الاساسية.....
قابلت مدير المدرسة.....
ودار بيناتنا الحــوار التالي..
السلام عليكم...
رد المدير وعليكم السلام....
قلت ليهو.... يا استاذ انا ضيف معاكم هنا.... والحمدلله عندي شهادة سودانية.... ومقدراتي عالية في توصيل اللغة العربية والتربية الاسلامية وحابي اتعاون معاكم وماداير منكم اي حاجة
رد علي جـــدا .....
خلاص تعالي بكــرة الصباح.....تدرس سنة كــم....
قلت ليهو اي فصل ماعدا الفصول الصغيرة من خامسة وتحت لا من سادسة وفوق ممكن.....
قالي ...تمام
تعالينا بكــــرة
طلعت من مكتب المـــدير وكلي فرحة....
حاسي اني حا اقدم حـــاجة مفيدة لاهل نيرتتي الطيبين ديل....
وقبل مــا اطلع من باب المدرسة لمحتها ليك ....
نفس البت الراعية.....
قلت في نفسي انتي حكايتك شنو معاي...
وراي وراي....
في الخلا القاك.....؟!
وفي المدرسة برضو القاك..؟!!
وقفت شوية كدا وانا متحير .....
قبل ما اتشجع واسرع بالباب وانا مرتبك حبتين....
اصعب شي تقع في حــب زول وانت عارف انك ماحاتصل ليهو
لو كـــان في طريقة بتوصلك ليهو ممكن...
دا كـــلو من النظر....
من البداية انا مليت عيني منها... ودي كانت النتيجة انو صورتا اتعلقت في ذهني وبقت تطاردني في كل مكان....
ماعلينا...
الصباح بعد التمام وشاي الصبح مشيت المدرسة.....
بعد الطابور الصباحي المدير قالي عندك عربي في تامن....
قلت كويس....
قالي انا حا احضر معاك...
طبعا من حقو يتاكد من مقدراتي علي توصيل المادة.....
وكانت الحصة ادب.....
المــدير اتكيف مني شديد وكمل معي الحصة للنهاية...
قالي والله اجبرتني اني اكمل معاك الحصة وانا مستمتع بيها كاني طالب.....
طبعا راسي دا كــبر قرب يقع في الواطة...هههععع....
بس صراحــة انا اصلا بحب التدريس....وبدون فخر عـندي ملكة توصيل المادة للطالب بصورة مبسطة شديد وممتعة.....
انا بعرف اساتذة مرو علي ....الواحــد ينومك في الحصة ولحدي مايطلع ماتعرف هو كـان بقول في شنو.....
ياخ الاستاذ دا زي الفنان....هسي الفنان لو ما امتع نفسو ماحايمتع جماهيرو....نفس الشي الاستاذ لو ماحسة بي حصتو ومتعتا .....ماحايقدر يوصل الطالب للمتعه وهو بتلقي منو المادة....
خلقت علاقة طيبة بيني وبين الطلبة وبيني وبين الاساتذة......
لدرجـــة اني لمن جيت اودعم اتحسرو شديد.... واتمنو اني اكــون مواصل معاهم.....
من الطرايف في المــدرسة
استاذ الانجليزي كان عـندو طلعة.... وحصتو بعد نص ساعة.....
قالي يا معاذ عايزك تدي ناس خامس حصة الانجليزي....
والعبدلله في الانحليزي ماناقش اي حاجة.....انا الانحليزي دا من الطلبة الكانو بنطو بالشباك .......هههههه
طبعا صارحتو اني تعبان في الانجليزي
قالي مااافي شي اصلا...
ديل خامس يعني حــروف بس....
وتحت الحاحو وافقت علي مضض....
وقلت ربنا يستر.....
يكون في طالب شفت الليلة يجهجهني ساكت بالاسالة......هههههه
وخشيت ليك الفصل
نظام الولد خواجة ومقرم الانجليزي وواثق من نفسو....
جـــود مورننج...
جاني الرد جـود مورننج تيتشا....
ههههه
طبعا دا من شوية المخزون القديم الفي راسنا واي زول ناقشو وحافظو....
هــواريو...
ايام فرول ثانكيو......
يلا افتحوكراساتكم....
ابو الزفــت ذاتو......فجأة قلبتها ليك عربي...
والحصة كلها كبتل الـ....
اسمول الـ....
كبتل ام.....
اسمول ام.....
غايتو الحمدلله الطلبة طلعو زيي تماما ماناقشين حــاجة....
كتبو الحروف..... ومسحت العرق بي منديلي..... ويدي كلها طبشير وبقيت مـارق من الفصل زي صلاح الدين الايوبي لمن حـــرر القدس.....
تاني انجيليزي
...توبة.....هههههههه
وفي يوم من الايام وانحنا في المعسكر
لاحت لينا من علي الافق زيتوايات كــبيرة...
وصوت التكبير واصلنا لحـــدي المركز....
وشوية وكانو معانا.....
ضربو لينا الصفارة في نفس الوقت للجمعون....
ياربي الحاصل شنو التمام الفجائي دا...
اللهم اجعلو خير.....
سعادة المقدم بشير........
قالينا مبروك ياشباب
فترتنا انتهت في دارفور وان شاءالله خلال ساعات عايزين الناس تكون جـــاهزة عشان نمشي نيالا والسفر بكــرة للخرطوم.....
الخبر وقع علينا زي الصاقعة
خبر مفرح..... ومحزن .....في نفس الوقت
بقدر ما اشتقنا لي اهلنا وبلدنا.....
بقدر ما حزينين علي وداع نيرتتي....
هنا في القرية دي..... في ناس اتزوجو...
وفي ناس ٲصبحت بينا وبينم علاقات وحـب.....
بس دي سنة الحياة....
اي زول حـزم حاجاتو.... ودخلنا الحله سريع اي زول ودع زولو....
في ناس جابو معاهم زوجاتم....
العبدلله لو كان قعد شوية احتمال كبير اكون بي زوجتي من جبل مـرة...
وفي ناس خلو زوجاتم لحدي مايدبرو امورم ويرسلو ليهم.....
سلمنا علي اخــوانا الجايين يغيرونا... وشرحنا ليهم طبيعة المنطقة.....
خلال ساعات كنا جـــاهزين....
حتي سريتنا في كبري النحل تم تغييرا بسرية من القوة الجـــديدة....
تسليم وتسلم بين القادات.....
ركبنا الزيتوايات......
والحــله دي عن بكـــرة ابيها في المعسكر
يلوحو لينا باياديهم ....والدموع علي خــدودم.....
نفس الاستقبال وانحنا جاااين...
بس الفرق انو الاستقبال كان صامت....
والوداع فيهو لغات وكلام...
كلاام حب كبير.... وحزن دفين ...ودموع بتحكي علاقة الناس بي بعض...
وداعا نيرتتي.....
وقـــبل مـا اخت النقطة الاخيرة فـي الاحداث.... عندي كلام عايز اقــولو....
احتمال تكون في ٲسماء لبعض الشخصيات غلطت فيها ....لانو الفترة طالت ....بس الاحـداث ياها الاحداث بدون اي زيادات مني او رتوش ....وحاولت فعلا اني اصف الحدث علي ماهو عليه ....لكن قلمي ماقدر يتجاوز او يبالغ في الوصف فخرجت الصورة مبتورة بعض الشيئ....ياريتني لو كنت قدرت اصور فظاعة المنظر وقلوبنا المخلوعة وانحناعلي قمة جبل مــرة في (روكرو)..... او انتظارنا للقدر المحتوم والمصير المعلوم وانحنا بنشيع المغادرين الي الدار الاخـــرة في شرق الجبل.....قصص كــتيرة.... اختصرت بعضها واتقاضيت عن بعضها ....وسطرت اهمها.... مع بعض الانفعالات الانسانية ......القصة ماعسكرية بحته اكتر من انها تجربة شخصية.... حبيت انقلا بحذافيرا بعيدا عن المثالية..... ونفس الوقت ذكر المحاسن الفيها.....حتي الجنجويد اديناهم حقهم كامل .....ومدحناهم بما فيهم وذكرنا اشياء فيهم لابد ان تذكر .......وحتي عساكرنا فيهم الخير وفيهم الشر وانا اول واحد.......
والان.....
ان للقلم ان يتوقف.....
وللذاكرة ان تستريح....
وللقلب ان ينام....
وفي نيالا عدينا يوم....
واليوم البعديهو كان الطيران جاهز....
تلات رحلات بنفس الطيارة....
الحمدلله المرة دي الطيارة حلوة ...مازي الطيارة الجينا بيها....ههههه
تحس ياداب انك راكب طيارة....
وداعا نيالا....
وداعاسماء دارفور....
ايام في الذاكرة لن تنسي...
بحلوها ومرها...
والمها ....واملها...
والي هنا انتهت رحـــلتي مع الموت في ادغال دارفور..
حيث اجتمع الالم بالامل.... والسعادة بالحزن.... والموت بالحياة....
وبهذا تكون قد اكتملت لوحة رحلتنا بمافيها من صور قد لاتخلو بعضها من الخطأ في المعلومة.... او تقديم وتاخير لبعض الاحداث ....او غلطات علمية هنا وهناك....
ولكني حـاولت جاهدا ان اسطر ما تعينني به الذاكرة دون العودة الي مــراجع.....
او البحث عن المناطق في قوقل او عبر الانترنت......
واي عمل بشري معرض للخطأ والصواب...
وماكتب كاتب اليوم شيئا الا واعتذر عن بعضه في غده.... وقال ياليت لو ان كذا لم يكن .....ويابا الله الا ان يكون الكمال له....فنحن اهل النقص والعصيان والعيوب
اللهم لا اله الا انت سبحانك اني كنت من الظالمين
وكلمتي الاخيرة اقول فيها......
نيرتتي سكنتها فسكنتني....
كتبتني ثم كتبتها....
عهد ميثاق قطعناه سويا..... اننا سنظل اوفياء للابد....
تـمـــــت
بحـمــدالله
|
|
 
|
|
|
|
|
| العنوان |
الكاتب |
Date |
| رحلتي مع الموت في أدغال دارفور الم وأمل (قصة مشوقة واقعية سوف تستمع بكل لحظاتها) | حاتم موسى عبدالعزيز | 03-29-16, 10:11 AM |
| الجزء الأول | حاتم موسى عبدالعزيز | 03-29-16, 10:18 AM |
| Re: الجزء الأول | قصي محمد عبدالله | 03-29-16, 10:26 AM |
| Re:رحلتي مع الموت في أدغال دافور | محمد حمزة الحسين | 03-29-16, 04:39 PM |
| Re: Re:رحلتي مع الموت في أدغال دافور | قصي محمد عبدالله | 03-29-16, 05:12 PM |
| الجزء الثاني | حاتم موسى عبدالعزيز | 03-30-16, 06:48 AM |
| Re: الجزء الثاني | Abdalla Hussein | 03-30-16, 07:11 AM |
| Re: الجزء الثاني | ismeil abbas | 03-30-16, 09:01 AM |
| الجزء الثالث | حاتم موسى عبدالعزيز | 03-31-16, 07:37 AM |
| الجزء الرابع | حاتم موسى عبدالعزيز | 04-01-16, 09:46 AM |
| Re: الجزء الرابع | امجد الجميعابى | 04-01-16, 02:19 PM |
| الجزء الخامس | حاتم موسى عبدالعزيز | 04-02-16, 12:55 PM |
| الجزء السادس | حاتم موسى عبدالعزيز | 04-03-16, 09:31 AM |
| الجزء السابع | حاتم موسى عبدالعزيز | 04-04-16, 12:45 PM |
| Re: الجزء السابع | الأمين عبد الرحمن عيسى | 04-04-16, 07:19 PM |
| الجزء الثامن | حاتم موسى عبدالعزيز | 04-05-16, 09:30 AM |
| الجزء التاسع | حاتم موسى عبدالعزيز | 04-06-16, 10:35 AM |
| Re: الجزء التاسع | مهند سوركتي | 04-06-16, 03:48 PM |
| الجزء العاشر | حاتم موسى عبدالعزيز | 04-07-16, 07:57 AM |
| Re: الجزء العاشر | مجدى محمد مصطفى | 04-08-16, 07:56 PM |
| الجزء الحادي عشر | حاتم موسى عبدالعزيز | 04-09-16, 07:41 AM |
| الجزء الثاني عشر | حاتم موسى عبدالعزيز | 04-10-16, 11:59 AM |
| Re: الجزء الثاني عشر | محمد فضل الله المكى | 04-10-16, 04:19 PM |
| Re: الجزء الثاني عشر | محمد هاشم ابوزيد | 04-11-16, 01:00 AM |
| Re: الجزء الثاني عشر | حاتم موسى عبدالعزيز | 04-11-16, 08:15 AM |
| Re: الجزء الثاني عشر | Saifaldin Fadlala | 04-11-16, 09:53 AM |
| Re: الجزء الثاني عشر | عبد الحميد فخر الدين | 04-11-16, 10:17 AM |
|
| |
حاتم موسى عبدالعزيز
فيس بوك
تويتر
انستقرام
يوتيوب
بنتيريست