|
الجزء الأول (Re: حاتم موسى عبدالعزيز)
|
رحلتي مـع الموت في ادغال دارفور الم وامل الجـــزء الاول (قصة حقيققة عشت احداثها وساكتب تفاصيلها المشرقة والمحزنة واتحمل جميع مسئولية ماجاء فيها ) : معاذ حمدالنيل المكــان : الدمازين رئاسة الشرطة الشعبية الزمان : 2002 هال هع هع هع هال...هال هع هع هع هال... لليمين در...للشمال در... للليمن در... للشمال در... هع هع هع ثابتا للخلف در.... طبعا عارفين جمعناكم بخصوص الاستنفار القومي المنظماهو الرئاسة العامة للشرطة الشعبية... وانحنا في الدمازين عايزين نشارك باربعه فصايل والحمدلله القوة كبيرة واي زول عندو رغبة يرفع يدو.... انا بتذكر الكلام دا كــان في سنة 2002 ونفس الكــلمات والطابور دا بقيادة المساعد شرطة الهادي وعن يمينو المساعد شرطة خالد برئاسة الشرطة الشعبية الدمازين.... بدون تردد العبد لله اول زول رفع يدو ومعاي كمية من الافراد وصف الضباط والجنود والمرابطين ...منهم دفعتي محمدعبدالله عينة ...ودفعتي فهمي عبدالرحمن... ودفعتي محمد ضرار ربنا يرحموا وعدد كــبير من الشباب... حضرة الصول خالد مساعد الادارة معاهو حضرة الصول الهادي وخالد كان بكتب اسماء الراغبين في الاستنفار.... بعداك الناس صرفوا الطابور ماعــدا الناس السجلت اساميها.... وطبعا الناس مقسمة لي محليات ...محلية قيسان.... محلية كرمك... محلية باو... ورغم اني من قيسان لكن في التنظيم العسكري تابع لي محلية كـــرمك حسب التجنيد ومديرنا في الوقت داك نقيب شرطة اسمو صديق ماعارفو هسي لو مواصل في الشرطة بكون عمل عميد اقل شي او لواء بس اخبارو انقطعت وماعارف عنو شي... سعادة النقيب صديق اول ماشاف اسمي استغرب.... وقال يامعاذ انت مش مشيت استنفار السنة الفاتت.... رديت نعم ياسعادتك ...لكن تاني عايز امشي يضحك قالي شكلك ادمنت البارود... انا صراحــة كنت زهجان من شي معين في حياتي ومضايق جـــدا ونفسي اطلع من الدمازين ولقيت موضوع الاستنفار دا اسهل وسيلة.... اهــو الزول يمشي يقضي ليهو وقت شوية بعيد ... فترة نقاهه وكـــدا.... طبعا نقاهه مع البارود والاربي جي والهاونات دي اغرب نقاهه... انا ذاتي مــاعارف دي تجي كيف...هههه المهم.... الناس دي شكلها كــانت مستعجلة شديد.... لانو الموضوع دا طوااالي بدون تاخير نفس اليوم صرفو لينا قروش اسمها بدل خلافة مااامتذكره كـــانت كم ...علي ما اعتقد 200الف بالعمله القديمة وصرفو لينا كاكي عمليات ...وادونا النمر البنوموا فيها والبطاطين والزمزميات يعني جميع المهمات صرفناها في نفس اليوم.... وادونا اذونات لمدة تلاتة يوم اي زول عندو غرض يقضيهو والتجمع يكون يوم الاحـــد بدري في رئاسة الشرطة الشعبية بالدمازين ...موقعا خلف رئاسة الشرطة العامة بالدمازين.... ــــــــــــــــ في استغراب من الاهل والاصدقاء وبعد عناء اقتنعوا بمشاركتي علي مضض وصباح الاحــد بدري ودعتهم وانا في طريقي لرئاسة الشرطة الشعبية بالدمازين..... جماعتك ديل جـــادين شديد ماشاء الله داقين الصيوانات دي زي صيوانات الفراش ههههه.... دايرين يبكوا علينا من هسي ولاشنو ههههه والبصات دي وااااقفه بره جـــااااااهزه والساونات واقفه وناس الاعلام بجهزوا فيها... الو الو سستم.. واحد واحد.. الو.. المهم.... دخلت واتلميت مــع الزملاء الماشين وقعدنا نتسالم ونتونس لحدي ما القوة تكتمل.... عملنا تمااام سريع ....وتم حصر الحضور ورفع التمام للسيد المدير بانو القوة جاهــزة للتحرك... بعداك خشينا الصيوان شكلو كانو عاملين لينا حفلة وداع وكــدا .....وجابو ليهم واحد من ناس الاناشيد الجهادية ديل.... بعد الحفلة ركبنا العربات السياحية واتوجهنا علي الخرطوم.... ـــــــــــــ مـعـسـكــر الجيلي في الخــرطوم نـزلنا في منطقة الجيلي كان في معسكرات كــبيرة دي كانت نقطة تجمع المستنفرين من جميع انحاء السودان وبصحبتنا مــلازم اول اسمو حسن ...سلمنا بي امـــر تحرك لقائد المعسكر وعملو لينا تمام.... غاااايتو انا لحدي ماوصلت جبل مــرة امكن التمامات دي بتحصل دشليون مــرة تقيف في التمام لمن رجلينك توجعك.... كل مـــرة عايزين يشوفو العدد كــم والمافي منو....هههههه علي كـــل....انحنا كنا رابع ولاية جابت ناسا ...يعني من اولي الولايات وقعدنا فترة بتاعة شهر في الجيلي بدون برنامج... اكل وشراب ومحاضرات اسلامية وتمااامات...في الشهر دا كل يومين كانت القوات بتتوافد من جميع ولايات السودان وفي اخـــر الشهر المعسكر دا كان اتملا فل.... لدرجة انو في تزاحم علي المنافع بقت بالصف والغسيل بالصف .... بعد الشهر عرفنا اننا حانمشي منطقة خلوية لاعادة التاهيل مرة تانية نظام دورة تنشيطية عسكرية وكـــدا ودي دايما بعملوها لاي قوة قبل ماااتتوجه للعمليات.... بعداك القوة خلطوها مع بعض يعني الولايات شكوها عشان الناس تتعارف واي ناس ولاية يخشوا في الولاية التانية وعملو لينا تمااام اخير كان اطول تمااام..... لانو القوة كبيرة بشكل عجيب كان التمام دا طويل ...طويل ....طويل.. ياخ تقوم وتقعد... تقعد وتقوم... احتمال لو كـــان في جلكسيات الواحــد حايخش الواتس مليون مــرة...ههههه بس ياحليلنا حتي الربيكا ماظهرت الوقت داك....... المهم زي الظهر التمام انتهي اتخيل تمام من 7صباحا ينتهي الظهر... خلاص الناس دي وزعوها كتايب وسرايا وفصايل البعجبني انو العسكرية دي فيها تنظيم عجيب...يعني الااااااف البشر اي زول عارف فصيلتو وناسو... ولمن الصفارة تضرب في ظرف ربع ساعه اي زول بكـــون خش فصيلتو.... نهاية اليوم العربات كانت جاهزة طبعا القوة الزي دي الا زيت وايات الكبيرة حتان تشيلم... واتحركنا لمنطقة خلوية اسمها مندرا ...(جبل مندرا) .....وصلناها بالليل وصلنا في غبااار عجيب لي يوم الليلة بتذكروا..... لحدي جبل مندرا نقيف ونشوف الايام الجاية فيها شنو من الاسرار العجيبة والقصص الغريبة .... الي اللقاء بمشيئة الله في الايام التالية في رحلتي مع الموت في ادغال دارفور...
|
|
|
|
|
|
|
العنوان |
الكاتب |
Date |
رحلتي مع الموت في أدغال دارفور الم وأمل (قصة مشوقة واقعية سوف تستمع بكل لحظاتها) | حاتم موسى عبدالعزيز | 03-29-16, 10:11 AM |
الجزء الأول | حاتم موسى عبدالعزيز | 03-29-16, 10:18 AM |
Re: الجزء الأول | قصي محمد عبدالله | 03-29-16, 10:26 AM |
Re:رحلتي مع الموت في أدغال دافور | محمد حمزة الحسين | 03-29-16, 04:39 PM |
Re: Re:رحلتي مع الموت في أدغال دافور | قصي محمد عبدالله | 03-29-16, 05:12 PM |
الجزء الثاني | حاتم موسى عبدالعزيز | 03-30-16, 06:48 AM |
Re: الجزء الثاني | Abdalla Hussein | 03-30-16, 07:11 AM |
Re: الجزء الثاني | ismeil abbas | 03-30-16, 09:01 AM |
الجزء الثالث | حاتم موسى عبدالعزيز | 03-31-16, 07:37 AM |
الجزء الرابع | حاتم موسى عبدالعزيز | 04-01-16, 09:46 AM |
Re: الجزء الرابع | امجد الجميعابى | 04-01-16, 02:19 PM |
الجزء الخامس | حاتم موسى عبدالعزيز | 04-02-16, 12:55 PM |
الجزء السادس | حاتم موسى عبدالعزيز | 04-03-16, 09:31 AM |
الجزء السابع | حاتم موسى عبدالعزيز | 04-04-16, 12:45 PM |
Re: الجزء السابع | الأمين عبد الرحمن عيسى | 04-04-16, 07:19 PM |
الجزء الثامن | حاتم موسى عبدالعزيز | 04-05-16, 09:30 AM |
الجزء التاسع | حاتم موسى عبدالعزيز | 04-06-16, 10:35 AM |
Re: الجزء التاسع | مهند سوركتي | 04-06-16, 03:48 PM |
الجزء العاشر | حاتم موسى عبدالعزيز | 04-07-16, 07:57 AM |
Re: الجزء العاشر | مجدى محمد مصطفى | 04-08-16, 07:56 PM |
الجزء الحادي عشر | حاتم موسى عبدالعزيز | 04-09-16, 07:41 AM |
الجزء الثاني عشر | حاتم موسى عبدالعزيز | 04-10-16, 11:59 AM |
Re: الجزء الثاني عشر | محمد فضل الله المكى | 04-10-16, 04:19 PM |
Re: الجزء الثاني عشر | محمد هاشم ابوزيد | 04-11-16, 01:00 AM |
Re: الجزء الثاني عشر | حاتم موسى عبدالعزيز | 04-11-16, 08:15 AM |
Re: الجزء الثاني عشر | Saifaldin Fadlala | 04-11-16, 09:53 AM |
Re: الجزء الثاني عشر | عبد الحميد فخر الدين | 04-11-16, 10:17 AM |
|
|
|