|
|
 الجزء العاشر (Re: مهند سوركتي)
|
رحلتي مع الموت في ادغال دارفور الم وامل.......
الجـــزء العاشر (10)
:معاذ حمدالنيل
سيل مــن الزخيرة كانت ورانا في طريقنا وانحنا منسحبين لي دوبو العمدة......
انحنا اشتغلنا حسب التكتيك العسكري الاتعلمناهو في المركز....
تزحف....
وتستخدم القيامات المختلفة...... في الاماكن البتكون فيها النيران بكثافة عالية.....
...اما الزحف دا كان الاغلب ....رغم انو الارض ضريسة وشوك.... بس والذي خلق الناس انحنا ماحاسين باي حاجة....
ياخ الناس بموتو يمينا وشمالنا.... والارواح بتطاير وفجأة صحبك علي بعد مترين منك... يصرخ ااااه.... تتلفت تلقاهو انضرب في رجلو او يدو....
انا بيني وبين العربية امتار ....وهي ماشة بسرعه شديدة....
بكورك ليهم اقيفو اقيفو..... وزملاني الفوق شغالين لي اسرع اسرع....هو السواق بقيف...؟!!!! والله كان بقيت لواء شرطة مايقيف..... دا سايق سواقة زول بينو وبين الموت الوقفة دي...هههههه
غايتو بغريذة حب الحياة في القلب.... وفطرة ربنا استخدمت كل ما املك من قوة ....عشان اقطع المسافة بيني وبين العربية.... ولمن وصلتها كانت المشكلة اني شايل كلاشي ومعي تلاتة خزن بالجنبة في الكفوف .....الحمدلله اتصرفت صح ....سلمت واحد فوق الكلاش وواحد ناولني يدو وجـروني وانا نطيت..... ماشعرت الا وانا في العربية ....حتان فتحت عيني وشلت نفس طويل قلت الحمدلله.....
الناس دي مشتتة كلها....
واحدين وصلو دوبو العمدة .....وواحدين منسحبين كداري ....وواحدين لحقو العربات....
الجنجويد ديل ماتو موت شديد خلاص....والمجرحين جراحات قاتلة كتار.... وواحدين وضعهم مابطمن....
يوم من اخطر ايامي في دارفور .....وفي حياتي كلها.....
الناس بدت تتجمع في دوبو العمدة.... واي زول بتفقد مجموعتو واخوانو عشان يشوفو المفقودين ...والجرحي ....والمتاكدين انهم اتقتلو في ارض المعركة....
ربنا يتقبلم شهداء برحمتو ومنو وكرمو.... الحمدلله انحنا قوتنا مافيها ولا زول مات.... بس عندنا جرحي كتار ....غالبية الماتو من المجاهدين والجنجويد .....
بدينا في عملية الاسعافات الاولية للمصابين لحدي مااااايتم تسفيرم لي نيالا لتلقي العلاج....
بعد ساعتين كــدا الناس اتكاملت كلها في دوبو المعدة .....وتم حصر الموجودين بعد المعركة والمفقودين والمجرحين والاتقتلو فعليا.....
الشمس نصة نهار بقت حــمـــراااااااء..... وحولها دايرة كــبيرة شكلي هاله كـــدا....الجماعه نضمو قالوا عشان الموت كتر.....بس الكلام دا ماصاح.... لانو الشمس دي ٲية من ايات ربنا ....مابتتاثر بموت انسان او ولادتو او غيرا...ودا بذكرني في سيرة الرسول صلي الله عليه وسلم ...لمن سيدنا ابراهيم عليه السلام ولد الرسول الصغير مات.،... الشمس كانت اتكسفت اليومداك.. اها الصحابة اتكلموا قالو الشمس اتكسفت عشان ابراهيم مات...لمن الحديث وصل للرسول صلي الله عليه وسلم طوالي خطب فيهم...
قاليهم ....ان الشمس والقمر ٲيتان من ايات الله لاتخسفان او تكسفان لموت احد...
ووراهم يعملو شنو في حالات الكسوف والخسوف من الصلاة والاستغفار والدعاء....
اها ....انحنا يومنا دا الشمس ما اتكسفت لكن ظهرت عليها حمرة غريبة وزي ماكلمتكم...
فترة الظهيرة صلينا... وانجمينا شوية من التعب ....وبقينا نعيد شريط المعركة عشان نعرف غلطنا كان وين.....
الجثث بعضها تم دفنو من قبل الجنجويد في مقابر جماعية ....وبعضها ماقدرو عليهو لانهم في مناطق خطيرة وبتشكل خطورة علي كل من بحاول ينقلم....
المعتمد قرر انو نهجم تاني بعد بكرة والهجوم يكون بالليل المــرة دي .....ماقلت ليكم الزول دا حالف يا يخش الجبل يايموت هناك.....
طبعا في ناس تحت تحت بقولوا وانحنا ذنبنا شنو......ههههههه
معانا ملازم جعلي اسمو علي كلمتكم عنو في الاجزاء الاولي وحانشوف موقفو المضحك جدا معانا بعد هجومنا التاني دا...هههههه
اليوم الاول مـــرة.... واليوم التاني برضو كان راحة واستجمام واستعداد.....
تممنا علي عرباتنا وذخايرنا ومعداتنا وكل ادواتنا المحاتجين ليها في المعركة .....حتي الاسعافات الاولية ....جهزنا الشاش حق الجروح وكل ماااابنحتاج ليهو.....
وفي نص الليل من اليوم التاني كان بداية تحركنا بكل هــدؤ وتكتم.....
المرة دي العربات بعيدة مننا حسب التوجيهات .....عشان اصواتا بتتسمع
وبما اننا عرفنا طريقة استخدام العدو للجبل في السواتر الطبيعية.... كانت الخطة المرة دي اننا نجيهم باتجاه الحله حقتم....
علي الاقل يكون عندنا سواتر وندخل عليهم باتجاه الحله.....
اها متحركين مشاه بي صحبتنا الخيالة من الجنجويد وقوات الاحتياطي المركزي والمجاهدين ...
قربنا خالص من الجبل.... والدنيا ليل المرة دي..... واي زول بقرا ايات من القران الكريم لانو الموت هنا ملموس عديل ومحسوس ....هو الموت وارد في كل مكان.. بس هنا مش وارد هنا بتشاف عديل..... وبعد شوية حا اوريكم بتشاف كيف ونتيجة دا شنو...
وبدينا في الهجوم علي مركز العدو بضرب دانة مضيئة في سماء منطقة (دربات) ..،.... البتاعة دي مشت فووووق واتعلقت في السماء..... وفجأة ضوووت ليك المكان بقا زي النهار الساعة اطناشر بالضهر......
وعلي ضؤ الدانة المضيئة دي بدينا في الهجوم....
هجوم شرس ومــركــز.... ومعانا اسلحة المعاونة وناس الار بي جي بدقة عالية في اماكن معينة....
وبعد شوية جانا الرد.....
والرد كان عنيف....
بنفس شراسة هجومنا..
الناس دي ياصاحية ياعندهم علم....
لانهم ردو بسرعة شديدة ولا كانو في عنصر مفاجأة ولاشي...
المـــرة دي الخطة اترسمت صاح
لانو ماعندنا خساير في الارواح زي الهجوم الفات..
كنا ورا الحلة ومستخدمنها سواتر.... بس مافي فايدة لانو ماقادرين نطلع الجبل واستمرينا في المنطقة ديك واشتباكنا معاهم لحدي ساعات الصبح الاولي بدون نتيجة....
انحنا هــدفنا اننا نحرر منطقة دربات..... ونضمها لسيطرة الدولة من جديد.... بس كانت حكاية اصعب من الخيال......
السيد المعتمد كان مصر علي اننا نخش منطقة دربات ونستولي عليها.....
ووعد القوة بحوافز كبيرة مادية ومعنوية اذا هم حققو ليهو الرغبة دي.. ماقلت ليكم الزول فارس .....
في الحـــلة البتمركز فيها العدو.... كان في صندوق مليان عملات سودانية كبيرة..... وخاتنها في حوش بره ...شكلو طعم يصطادو بيهو عساكرنا وفعلا دا الحصل.....
عندنا تلاتة اشخاص ورا بعض ماتو حول الصندوق دا ....واحد ورا التاني....الاول دا مشي بقوة قلب وثقة.... بس انضرب في الحتة دي ....وشكلو الزول البصطادم دا نياش خلاص..... اها التاني برضو مشي.... وخاتي في راسو احتمال اصل للصندوق ....واحتمال لا.... بس حكاية مجازفة ....ومات في نفس الصندوق...والتالت برضو ما اتعظ..... وكان تالتم علي الصندوق السميناهو صندوق الموت ...تاني عاد زول قرب من الصندوق مافي ...ههههه
ذكرتني حكاية سيلفر صاحب الرجل الواحدة في رحلتو للبحث عن الكنز لمن كان بغني خمسة عشر رجلا ماتو من اجل الصندوق...
بعد ما اتاكــدنا انو مافي مناص من الرجوع.....انسحبنا تكتيكا لي دوبو العمدة بي قواتنا.... والخساير عندنا زي عشرة قتلي ...وشوية مجرحين مازي المرة الفاتت ....بس نفسياتنا بالجـــد محطمة....
معقولة دا الهجوم التاني وبدون اي نتيجة تذكر ...غير اننا بنخسر كل مــرة وكـــل مرة تحس انو الدور جاي عليك المرة الجاية.....
وفي المعسكر اتجمعنا كلنا... ونفس الحصل المــرة الفاتت من حصر للقوات وكـــدا.....
استرحنا من الارهاق والليلة عــندنا اسبوع كامل من يوم اتحركنا ....
صاحبي عبد النبي اتعوق في رجـــلو ...اتعوق بضربة حصان مازخيرة....وطبعا بعد الموت التقيل دا اي زول بقا يحاول يخارج نفسو باي صورة......
وهو زود العيار حبتين يعني العرجة ذاتا كبرا وعمليها حاجات وبهارات ...هههه
انحنا قلنا احتمال العميد قرر اننا ننسحب خلاص ....
بس وين مافي طريقة.....
ماقلت ليكم الزول دا عايز يغطس حجرنا.. ههه
الملازم علي الجعلي معانا في الدفاعات بضحك وقالينا
والله انا عمري ما افتكرت نفسي في يوم اجري من راجل زيي لكن الليلة جرينا عديل....
ههههههه
قاصد انساحبنا بعد الهجوم الاول.....
وفكينا ليك ضحكة....
واحد رد عليهو....والله ياجنابو المثل بقول الراجل ياضراعو ياكراعو.....
واحــد تاني قال ...هوي ضراعو بتاع شنو ياخ الناس شوف ماشايفنهم هنا الراجل كــراعو بس....
وتاني الناس تضحك
ناس حلوين شديد
هسي دا محل بضحكو فيهو ولادي حكاية ضحك الرجال بكا.....
طبعا جنابو علي بقعد مع المعتمد وبجيب لينا الشمارات...وشكلو عرف نية المعتمد علي تنفيذ هجوم تاني....
جانا تاني يوم ....
قالينا براااحة كــدا كانو خايف الكلام مايصل للقيادات الفوق....
يا اخــوانا حاولوا اتكلمو مع العميد دا..... ياخ قولو ليهو عديل تاني ماااماشين الجبل دا....انحناضباط لو اتكلمنا بنتحاكم....
بس انتو مابعملو ليكم حاجة
هههههه
والله حتي الضباط الصغار ديل اتجرسو جنس جرسة....
ياخ الواحــد دابو من الكلية اتخرج ليهو شهيرات ....يعني المسكين ما اتمتع بالدبورة ....لقاها ليك زخيرة وموت..... واحدين ندمو عديل علي اليوم القالو ليهو خش الكلية.......
قضينا اسبوع كـــامل....
كدا اسبوعين تمااام في دوبو العمدة...
حمام لايكن....
طيلة تحركنا من جبل مرة الي الان بدون اي حمام.....
بس الحمدلله الكاكي الصحراوي دا لونو اصلا علي لون الارض ....والوساخة مابتظهر عليهو.....
اضف اننا كنا شايلين معانا لبستين كاكي اضافيات ....وملابس خاصة اضافية لاننا متحسبين للوضع...
الموضوع ماكان خطير
في الاسبوع دا بتطلع عربات تمشيط حول المنطقة للتامين واغراض الاستطلاع.....
لمن يقولو ليك انت ماشي في الاستطلاع الجاي ....تحس كانك وصلت قبرك خلااااص...
فترات الصبحية والظهرية كنا بنتوزع حول المنطقة ....وكانت الخيرات راااقدة......
البهايم دي طااااشة سااااكت يمين.... وشمال....وطبعا مافي حلة قريبة الا حلة الاعداء في دربات.... وحي دوبو العمدة فاااضي ....والبهايم دي طاشة لاراعي ولا شيتين.....
تمسك من طرف وتضبح....
كل مجموعة مع بعض تمسك ليك خروف وكخ بالسكين....
لحم بس.....
الراس والكوارع والكمونية والحاجات دي مااشغالين بيها....
ولا عندنا شي اسمو ملاح.....
تلقطو ليكم حطب وشية تقيلة....
انت قايل هنا في زيت وبصل وكـــدا.. ههه
هنا تجازف الملح وشية علي جمر الحطب.... شبعنا لمن جاتنا تخمة ......
بعد ماتاكل طوالي علي مصحفك وقرٲنك.... الناس دي كلها بقت شيوخ هناك.....
ماقلت ليكم الموت محسوس....
اصلا لمن الانسان يستشعر حقيقة الموت وقربو ....بمشي عديل زي الصراط المستقم...هسي انحنا فعلا بنقول اننا مستشعرين ....ومتاكدين اننا ممكن نموت تحت اي لحظة...
لكن الحقيقة دا مااااشعور حقيقي ملامس لشغاف القلب والوجدان ...لانو لو لامس شغاف القلب امورنا كلها كانت إستعدلت...اما مع الغش والنفاق المستشري.... والكذب وعدم الامانة فدي مجرد ادعاءات ساكت.....
حتي الناس المعانا كانو بقطعو الصلوات.... بقو يصلو...سبحان مغير الاحوال...
احساس الموت كــان عالي جدا.....لدرجة. إنو
في ناس كتبو وداعات ورسايل للاهل ووصايا...
ماتقلو دي جرسة .....لا....
دي حقيقة الناس عاشتا في اللحظات ديك ..... اي زول منتظر الصف...صف الموت...
ياخ الهليكوبتر دي كل يومين بتجينا بتنقل الماصبين لي نيالا...
واحـدين بموتو في الطيارة فوق....وواحدين بصلو نيالا يموتو هناك.....
والعمرو قدام بعيش....
العبدلله من الناس الكتبووصاياهم لاسرم.....
امي العزيزة.. السلام عليكم ورحمة الله امابعد فاعلمو ان هذه الدنيا دار ممر وليست بدار مقر...اعزيك في نفسي وارجوك لاتحزني فان موعدنا الجنة ان شاء الله.....وصيتي ان لا تفرشو علي بعد موتي.... ولاتبكوا علي بكاء الجاهلية... ولاتنسوني من دعائكم والسلام.....ابنكم معاذ حمدالنيل
وختيت الوصية في الشنطة...
احتمال اني اموت كان تسعين في المية.... والعشرة في المية الحياة....
واتقرر اننا تاااني نهجم للمرة التالتة...
وكان الهجوم المرة دي صباح بكــرة
ماقلت ليكم المعتمد دا مابخاف......وحالف انو يخش او يموت.....
نقيف هنا ونتلاقا مع الجـــزء الحادي عشر ....نشوف حكايتنا مع المعتمد في منطقة دوبو العمدة...
حانخش....؟؟!!!!
ولاحايموت؟؟!!!
ولا البحصل شنو؟؟!!!
في ارض الهلاك......
والموت.....
مزيد من الاحداث في الجزء الحادي عشر
الي اللقاء
|
|
 
|
|
|
|
|
| العنوان |
الكاتب |
Date |
| رحلتي مع الموت في أدغال دارفور الم وأمل (قصة مشوقة واقعية سوف تستمع بكل لحظاتها) | حاتم موسى عبدالعزيز | 03-29-16, 10:11 AM |
| الجزء الأول | حاتم موسى عبدالعزيز | 03-29-16, 10:18 AM |
| Re: الجزء الأول | قصي محمد عبدالله | 03-29-16, 10:26 AM |
| Re:رحلتي مع الموت في أدغال دافور | محمد حمزة الحسين | 03-29-16, 04:39 PM |
| Re: Re:رحلتي مع الموت في أدغال دافور | قصي محمد عبدالله | 03-29-16, 05:12 PM |
| الجزء الثاني | حاتم موسى عبدالعزيز | 03-30-16, 06:48 AM |
| Re: الجزء الثاني | Abdalla Hussein | 03-30-16, 07:11 AM |
| Re: الجزء الثاني | ismeil abbas | 03-30-16, 09:01 AM |
| الجزء الثالث | حاتم موسى عبدالعزيز | 03-31-16, 07:37 AM |
| الجزء الرابع | حاتم موسى عبدالعزيز | 04-01-16, 09:46 AM |
| Re: الجزء الرابع | امجد الجميعابى | 04-01-16, 02:19 PM |
| الجزء الخامس | حاتم موسى عبدالعزيز | 04-02-16, 12:55 PM |
| الجزء السادس | حاتم موسى عبدالعزيز | 04-03-16, 09:31 AM |
| الجزء السابع | حاتم موسى عبدالعزيز | 04-04-16, 12:45 PM |
| Re: الجزء السابع | الأمين عبد الرحمن عيسى | 04-04-16, 07:19 PM |
| الجزء الثامن | حاتم موسى عبدالعزيز | 04-05-16, 09:30 AM |
| الجزء التاسع | حاتم موسى عبدالعزيز | 04-06-16, 10:35 AM |
| Re: الجزء التاسع | مهند سوركتي | 04-06-16, 03:48 PM |
| الجزء العاشر | حاتم موسى عبدالعزيز | 04-07-16, 07:57 AM |
| Re: الجزء العاشر | مجدى محمد مصطفى | 04-08-16, 07:56 PM |
| الجزء الحادي عشر | حاتم موسى عبدالعزيز | 04-09-16, 07:41 AM |
| الجزء الثاني عشر | حاتم موسى عبدالعزيز | 04-10-16, 11:59 AM |
| Re: الجزء الثاني عشر | محمد فضل الله المكى | 04-10-16, 04:19 PM |
| Re: الجزء الثاني عشر | محمد هاشم ابوزيد | 04-11-16, 01:00 AM |
| Re: الجزء الثاني عشر | حاتم موسى عبدالعزيز | 04-11-16, 08:15 AM |
| Re: الجزء الثاني عشر | Saifaldin Fadlala | 04-11-16, 09:53 AM |
| Re: الجزء الثاني عشر | عبد الحميد فخر الدين | 04-11-16, 10:17 AM |
|
| |
حاتم موسى عبدالعزيز
فيس بوك
تويتر
انستقرام
يوتيوب
بنتيريست