|
|
 الجزء التاسع (Re: حاتم موسى عبدالعزيز)
|
رحلتي مع الموت في ادغال دارفورالم وامل
الجـــزء التاسع
:معاذ حمدالنيل
الفاصل بين الموت والحياة شعرة رقيقة اسمها الاجل....
وزي مابقولو اهلنا في دارفور (ماتموتي الا كان اجلك تم)....
وانحنا اجلنا ماتم....
عشان كــدا مااامتنا...
بس والذي انزل الكتاب....
الموت دا شفناهو شفناهو....
اول مـرة الانسان يحس بطعم الموت...
طعمو عديل كانو في كباية شاي او وجبة فطور....
صحي الدنيا دي غارانا ساكت....
الليلة عايزكم تدوني قلوبكم قبل اسمعاكم.... لانو دي حلقة استثنائية.. بمعني الكلمة...
شكلها برااااااو...
وحجمها مختلف...
ونكهتا مرة زي العلقم...
فيها اصوات وضوضاء....
فيها زخيرة تقيلة عشان كدا ياريت لو اي زول يعمل ليهو قطن في اضانو...
كاني سامع الاصوات....
شي رشاشات...
وشي اربجيهات ....
وشي دوشكات....
صوت الكلاش دا رايح عديل بسمعو زي طقيع الحجر...
عزف شديد....
بس عزف بسفر الاخرة ترنسيت وانت وعملك....
الناس دي استعدت وانا قاعد هنا...
ياااااه
يا عبدالنبي....
تعال سريع يازول انت مننتظر شنو....
عبدالنبي صديق من ابناء الابيض ...
بعد وفاة صاحبي محمد ضرار كان اقرب زول لي.....
الرحلة بدت لي نيالا....
اتجمعنا هناك...
عشان رحلة الهلاك في وادي شرق الجبل...
اتجمعنا هناك نفس اليوم ...مافي زمن...
معانا معتمد محلية جبل مرة ذاتو....
والله اسمو نسيتو لكن هو عميد شرطة.... زول ماااكن وصحتو زي الحصان....
بس الاهم انو فارس جد جد....
وحانعرف الفروسية دي قدام
بس قرب يغطس حجرنا...ههههه
زي ماقال الشاعر الجود يفقر والاقدام قتال.....
اتلمينا علي المجاهدين ....وعلي الجنجويد....
والقادات اتجمعو كلهم عشان يحصل تاااالف بين القوات....
وزي ماحكيت ليكم في الجــزء التامن عن الجنجويد وجهلهم ....وتقديسم لموسي هلال قدر شنو.....
انا البغيظني فيهم الحجبات....
من ماااشفتها قلبي طم .....وقلت في نفسي دي اول الهزيمة....
لانو ربنا قال وان تنصرو الله ينصركم.....
زول دارع ليهو تميمة في يدو وضهرو وداير ربنا ينصرو ماااظنيت.....
معناتا كدا فقدنا اهم اسباب النصر وهي المعونة الالاهية....
طبعا ديل مابنفع معاهم نقاش.... بقومو بودوك الاخرة وقتي ....وبتبقا فتنة بين القوات....
تاني يوم كلنا اتحركنا علي شرق الجبل.....
كنا بنمشي شوية... ونعسكر شوية في طريقنا لي شرق الجبل....
الكلام دا نهاية 2003بداية 2004علي ما اعتقد....
مرينا بحلال كتيرة ...بس الاسماء رايحة مني تماما......
معانا فنطاس موية واحد.... للشراب... والطبيخ ...حمام ووضو مااامعانا...تتصرف
تتوضا من الحله...
او تتيمم....
الموية دي للشراب والطبيخ....
في مشيتنا دي بيتنا في منطقة من المناطق العلي طريقنا....
عملنا عشانا اكلنا ونمنا اخدنا راحتنا....
الجنجويد ديل جنهم اكل ...
عملو شية تقيلة ...ضربنا معاهم ضرب جد .....
ناس طيبين وفراس ...لكن جهلاء شديد....
الحبه دي ماناقشنها....
الغريبة فيهم شفع صغاااار.....
اتكلمت مع واحد فيهم شويفع ساااكت
قلت ليهو اسمك منو...
قالي ٲمحمد....
قلت ليهو انت لسه صغير مالك جاي في الحرابه دي ؟!!....
قالي انت ماك خابر ولاشنو ؟...انا كان ماجبت سلاح بت عمي مابدورني.... ولابعرسوها لي....
بالله شوف....
يعني الشافع دا جاااي من بيت ابوهو عشان سلاح بس.....
هههههه
قال مابدو بت عمو .... الا يجيب سلاح...غايتو جنس محن..!!!!
الناس ديل شكلهم كدا بقول من القبايل العربية ....حتي لهجتم....
ناس طوال .,..وفيهم وجاهة ....وفراس شديد....
الموت دا عندهم زي شراب الموية....
روح الانسان دي عندهم زي روح النعجة......
الصباح بدري قمنا متحركين...
انحنا بي عرباتنا ....والجنجويد بي حصينم...
وصلنا حتي اسمها دوبو المدرسة.... اخدنا فيها استراحة اليومداك...
واليوم التاني اتحركنا....
تمينا تلاتة يوم واخيرا وصلنا لمنطقة دوبو العمدة....
منطقة خالية من السكان الزمن داك....
احتمال وارد السكان يكون اتخارجو بفعل الحروبات الكتيرة.... والدمار الحاصل......
وصلنا دوبو العمدة....
اتغدينا ...واخدنا راحة شوية.... والمساء كانت خطة الهجوم بشرحوها للقوات كلها.... عشان اي زول يعرف موقعو....
الجبل علي بعد نص ساعه من دوبو العمدة بالعربات....
يعني قريب....
قريب شديد....
ودي المنطقة المسيطرة عليها حركات التمرد....
ياخ منطقة من اشرس المناطق...
هنا....
هنا في (دربات ) دي ماتو كترة خلق....
من الجيش السوداني والشرطة وغيرو....
ربنا يتقبلم في الشهداء....
ناس اشترو الاخرة بالدنيا....
وباعو ارواحم دي رخيصة لي ربنا...
بذكروني كلمة اخونا الزبير ربنا يرحمو (الموت دا محل مايعز البلد بنمشيلو بنشميلو)
وكلمة اخونا شطة (انحنا الموت دا ماخايفنو كان وقع علينا كان وقعنا عليهو كلو عندنا واحد).....
ياسلام ايام الوطنية بتجري في الدم... والناس همها تنضف الوطن والارض.... من العملاء والمرتزقة والماجورين....
هسي قلبوها عمارات وشركات وبقت مأكلة ساكت وتجارة....
الله يرحمك يا وداعة الله ابراهيم.... ويا الزبير محمدصالح.... ويا ابراهيم شمس الدين... بعدكم القضية بقت مازي زمان ربنا يصلح الحال.....
الخطة كانت مدروسة وواضحة شديد...
القوة اتقسمت علي اربعة اقسام...
قسم يكون جاهز في دوبو العمدة احتياطي...
وقسم يكون مشاه في النص....
والقسم البكون في المقدمة ديل الخيالة بتاعين الجنجويد ... يبدو الهجوم هم....
وبعديهم المشاه....
والمشاه ديل فيهم جنجويد قدامنا وانحنا بعديهم....
واخر قسم ناس اسلحة المعاونة والعربات الكبيرة....
يكونو معانا ورانا.....
عشان يقدرو ناس المعاونة يتدخلو في الوقت السليم......
ولو حصلت حاجة يقدرو يسعفو المصابين والجرحي وينفذو عمليات الانسحاب....
اتقرر الهجوم يكون بدري....
بدري شديد....
بعد صلاة الصبح طوالي....
يعني قبلي الشرقة...
الناس دي اليومداك نامت نوم الديك في الحبل...ههههه
انتو صحي نوم الديك في الحبل دا كيف
.....ههههه
دقت ساعة الصفر....
ولاحت انوار الفجر الاول ...
صلينا الصبح جاهزين بي ذخايرنا وجميع معداتنا.....
الزخيرة دي هناك بدون حساااب.....
عربية كاملة محملة زخيرة.....
وياريت لو تنفعنا....
القصة مافي الزخيرة .....ولا في العربات....
القصة في النصر من عند الله....
والثبات عند اللقاء....
اتحركنا بسم الله.....
بس صراحة الخيالة حقين الجنجويد ديل ... بي حجباتم دي هسي ربنا بنصرنا كيف ؟!!! ....
قلتها في نفسي برااي....
طبعا لو سمعوني احتمال يقولو طابور خامس وطوالي محاكمة ميدانية.. ههههه
التوجيهات كالاتي....
مافي اي زول يضرب اي طلقة الابعد يضربونا هم....
يعني انحنا حانمشي بهدؤ شديد لحدي الجبل ....
عشان نفاجأم ونكون كسبنا عنصر المفاجأة....
الله يستر....
الخيالة في المقدمة.....
المشاه في النص.....
العربات ورانا.....
ومجموعة احتياطي في دوبو العمدة....
قربنا لي دربات...
منطقة اسمها (دربات)
دي المنطقة الفيها الاعداء....
الفاصل بينا وبين الجبل حاجة بسيطة شديد...
الغريبة مافي اي شي...
صنة عجيبة.....
شكلهم اتخارجو.....
عرفو انحنا جينا وطلعو.....
تحليلات... واي زول راسو بودي وبجيب...
وقربنا خااالص من الجبل....
صنننن.....
طبعا انحنا حسب المعلومات متاكدين انو المنطقة دي خطيرة .... ومسيطرين عليها حركات التمرد......
طيب معقولة...؟!!!
يكونو نايمين....؟؟!!!
ماعارفين بي متحركنا دا...؟؟!!!
مافاضل بينا وبين الجبل الا امتار...
مفترض نضرب زخيرة تفتيش وكدا......
بس التوجيهات اننا مانضرب اي زخيرة....
معانا العميد قائد المتحرك ومعتمد جبل مرة شخصيا ....
قربنا شديد من الجبل....
باقي خطوات.....
الخيالة فعلا وصلوالان للجبل.... وبدو يتسلقو بدايتو....
وانحنا علي وشك الوصول للحواف....
وعينك ماتشوف الا النور....
زخيرة جاتنا بكل الاتجاهات.....
ياخ دي زخيرة ولا مطرة....
حياتي كلها ماااشفت زخيرة زي دي...
ولاسمعت صوت الزخيرة بتمر جنب اضاني الا هناك....
زن مرت زن قربت زن....
ياخ زي النحل الطلق دي بالجنبات....
ردمونا ليك جنس ردم....
لمن اقتنعنا وزدنا علم...هههه...
طبعا خلاص مواجهة ...مواجهة....
وانحنا ذاتنا ماكذبنا.....
ودارت معركة من اعنف المعارك....
ماحصلت وياربي تاني ماتحصل في حياتي......
معركة لحدي الان شايفا زي الحلم...
والله كانها حلم.....
المشكلة وين....
انو الخيالة القدام....
اول ما الزخيرة بدت من قوات العدو....
الحصين دي جفلت ورجعت ورا....
والخوفة دخلت القلوب.....
وفي حصين طوالي بالجفلة ديك وجات صادة فينا ورا .....ودقشونا ليك...
طبعا لمن دقشونا انحنا غالبيتنا قلنا خلاص الموضوع دا باظ....
تعرفو في المعارك في حاجة....
الصفوف الامامية لو ثبتت القوة كلها بتثبت....
بس المقدمة لو فتحت الصندوق.... الخوف بدخل القلوب....
ولو الخوف دخل القلوب الهزيمة وقعت...
انحنا وجــزو من الخيالة صمدنا شوية....
بس ماشايفين حاجة.....
والعدو في الجبل بنشنو فينا وبلقطونا زي العاصفير في الشجر......
يعني انحنا مكشوفين.....
طبقنا جميع القيامات اليومداك....
زحفنا في الارض دي جنس زحف....هههه
لو قمت فوق بتكون مع الخساير او الجرحي.....
الجنجويد ديل ماتو موت الجراد هناك....
ماقلت ليكم ناس جهال.. قال مابستخدمو الساتر.....
نقوليهم استخدمو الساتر ارقدو في الارض ولاشغالين بينا....
وما اغنت عنهم حجباتهم شيئا....
اقل شي من الجنجويد يكونو ماتو اربعين وقتي في اللحظة ديك....
دا غير المجرحين....
وانحنا مافاضل شي غير الانسحاب....
وبد الانسحاب بدون اي تنظيم....
وناس العربات ذااااتم عايزين يتخارجو عشان مايستلمو مننا اي عربية...
ركبت ركبت ....ماركبت تمشي كداري... تجري..... تتصرف ..... لحدي ماتصل دوبو العمدة....
والزخيرة دي ورانا بكميات مهولة....
والاربي جي دا قدامنا بقع لمن الارض تتهز.....
الناس ديل مابعرفو للار بي جي.....
لانو الدانات دي بتقع قدامنا بي مسافات بعيدة.....
لو دانتين بس وقعت في نصنا انحنا بنكون خلاص عبرنا محطة الدنيا بدون عودة ....بس ربنا سلم.....
واثناء انسحابنا فكو فيناحاجة اسمها الفنق.. حاجة زي مسيل الدموع كدا فيها شطة وبتعكر الجوة وتكتم النفس....
وبدت رحلة الانسحاب الي دوبو العمدة....
وزي مابقولو الحرب فر وكر....
بس ياتري هل رجعنا بي كــدا واقتنعنا بالهزيمة.....
احتمال....
واحتمال لا.....
لكن السيد المعتمد كان عندو راي تاني....
راي اننا حانكمل المسيرة مع ادغال شرق الجبل....
ومع نقطة الهلاك في (دربات)
نشوف في الجـــزء العاشر..... بقية الاحــداث في دوبو العمدة والطريق الي دربات....
الي اللقاء
|
|
 
|
|
|
|
|
| العنوان |
الكاتب |
Date |
| رحلتي مع الموت في أدغال دارفور الم وأمل (قصة مشوقة واقعية سوف تستمع بكل لحظاتها) | حاتم موسى عبدالعزيز | 03-29-16, 10:11 AM |
| الجزء الأول | حاتم موسى عبدالعزيز | 03-29-16, 10:18 AM |
| Re: الجزء الأول | قصي محمد عبدالله | 03-29-16, 10:26 AM |
| Re:رحلتي مع الموت في أدغال دافور | محمد حمزة الحسين | 03-29-16, 04:39 PM |
| Re: Re:رحلتي مع الموت في أدغال دافور | قصي محمد عبدالله | 03-29-16, 05:12 PM |
| الجزء الثاني | حاتم موسى عبدالعزيز | 03-30-16, 06:48 AM |
| Re: الجزء الثاني | Abdalla Hussein | 03-30-16, 07:11 AM |
| Re: الجزء الثاني | ismeil abbas | 03-30-16, 09:01 AM |
| الجزء الثالث | حاتم موسى عبدالعزيز | 03-31-16, 07:37 AM |
| الجزء الرابع | حاتم موسى عبدالعزيز | 04-01-16, 09:46 AM |
| Re: الجزء الرابع | امجد الجميعابى | 04-01-16, 02:19 PM |
| الجزء الخامس | حاتم موسى عبدالعزيز | 04-02-16, 12:55 PM |
| الجزء السادس | حاتم موسى عبدالعزيز | 04-03-16, 09:31 AM |
| الجزء السابع | حاتم موسى عبدالعزيز | 04-04-16, 12:45 PM |
| Re: الجزء السابع | الأمين عبد الرحمن عيسى | 04-04-16, 07:19 PM |
| الجزء الثامن | حاتم موسى عبدالعزيز | 04-05-16, 09:30 AM |
| الجزء التاسع | حاتم موسى عبدالعزيز | 04-06-16, 10:35 AM |
| Re: الجزء التاسع | مهند سوركتي | 04-06-16, 03:48 PM |
| الجزء العاشر | حاتم موسى عبدالعزيز | 04-07-16, 07:57 AM |
| Re: الجزء العاشر | مجدى محمد مصطفى | 04-08-16, 07:56 PM |
| الجزء الحادي عشر | حاتم موسى عبدالعزيز | 04-09-16, 07:41 AM |
| الجزء الثاني عشر | حاتم موسى عبدالعزيز | 04-10-16, 11:59 AM |
| Re: الجزء الثاني عشر | محمد فضل الله المكى | 04-10-16, 04:19 PM |
| Re: الجزء الثاني عشر | محمد هاشم ابوزيد | 04-11-16, 01:00 AM |
| Re: الجزء الثاني عشر | حاتم موسى عبدالعزيز | 04-11-16, 08:15 AM |
| Re: الجزء الثاني عشر | Saifaldin Fadlala | 04-11-16, 09:53 AM |
| Re: الجزء الثاني عشر | عبد الحميد فخر الدين | 04-11-16, 10:17 AM |
|
| |
حاتم موسى عبدالعزيز
فيس بوك
تويتر
انستقرام
يوتيوب
بنتيريست