|
|
 الجزء الثامن (Re: الأمين عبد الرحمن عيسى)
|
رحلتي مع الموت في ادغال دارفورالم وامل
الجزء الثامن
:معاذ حمدالنيل
وبكل قوة نفس.... مشيت عليها عديل المرة دي ...
وكانت المفاجأة .....
مفاجأة بكل المعايير....
وبمعني الكلمة ....
كانت مفاجأة محبطة بالنسبة لي....
بنيت ٲمال لكن علي تلال رملية ....انهارت قبل حتي ماتشوف نور الصباح...
حقيقة البت مهذبة ....رغم سنها الصغير....
وصلتها واتكلمنا.... وعرفت عنها كتير....
بس الشي الخــلاني اتألم انها قالت لي مخطوبة....
مخطوبة؟ !!...
اي مخطوبة...
افتكـــرتها بتهظر معي....
قلت ليها مخطوبة لي منو يابت العـم...
قالت لي بابتسامة ....مخطوبة لي ودخالي في الخرطوم.....
قلت في نفسي ودخالك دا ماعصر علينا لكن.....
فوق بنات نيرتتي ديل كلهم ماشاف زول غيرك.....
الحمدلله انا فيني ميزة ....مابحب اللعب بي بنات الناس... ولو فكرت يوم اني اتعرف علي بت او اقرب منها واسال عن اخبارا ....فهدفي واحد اني اصل ليها بالباب بس كمان في حاجات لازم الزول يعرفا قبل مايدق الباب .....
والزولة دي سلبت قلبي بي جمالا
والنفوس مطبوعة علي حب الجمال....
اسمها (ستو) وبتقرا في مدرسة نيرتتي الابتدائية في الصف الخامس....
ابوها كبير وامها كبيرة وماعندها اخوان...
مخطوبة لي ودخالا في الخرطوم...
قلت في نفسي ستو دي ضاعت من يدك خلاص.....
بس احتمال تكون بتكذب عشان تقنع منها....
في بنات كتار بوزعو الشاب بانهم مخطوبات......
طيب حتي لو وزعتني معناتو ماعندها رغبة فيني....لالالا
امكن انا ماعرفت اخش صاح......
الدخلة دي اهم حاجة....
في بنات كتااااار مابحبو الدخلة المباشرة...
شبه مستحيل انك تلاقي بت مرتين في اقل من خمسة دقايق لكل مرة وتخليها تفتح ليك قلبها طوااالي.....
دا في الغالب طبعا....
مع انو في ناس عندهم قوة تاثير ....واقناع واستمالة للقلوب اكتر من غيرم.....
المهم....
رجعت معسكركبري النحل وانا في جواي مصمم اني اصل لحدي البيت....
ايوه انا حا امشي بيت ناس (ستو) بعد.... نمشي نيرتتي ان شاءالله.....
اعرف الحقيقة براي واسلم علي اهلها.....
وفي كبري النحل ٲسرة كبيرة ....بتتمثل في السرية والفصايل....
والمنطقة الخلوية المحيطة بالمعسكر غنية بالاشجار الكبيرة بمختلف الانواع ...
شجر ساااااكت علي امتداد البصر...
ودي كانت من فوائد كبري النحل علينا....
في فترات الضهرية والعصرية بنطلع مجموعات..... نفرين نفرين.... وتلاتة تلاتة ....معانا فيسانا وادوات القطع....
وننزل في الشجر دا كبر تقيل....
كنا بنستهدف تلاتة انواع من الشجر....
النوع الاول.... الشجر القوي والمتين دا ممكن يتنجر ويتعمل دواليب وفضيات او سراير وكراسي .....ودا طبعا بجيب عايد كويس بس عايز زمن طويل انا شخصيا ماكنت شغال بالنوع دا....
والنوع التاني الشجر الطواااال وقوي ودا بخش في بنيان البيوت زي الحوش حق القش (الصريف) وزي القطاطي والرواكيب وكدا.....
ودا برضو مرغوب شديد واي واحد كان عندو كمية من النوع دا.....
والنوع الاخير الشجر الناشف او السريع في الاشتعال بعد التجفيف.... والنوع دا كان مطلب مهم بالنسبة لينا لانو عايدو وقتي وسريع وبتباع في الحلة طوااالي حار حار او في السوق وبستخدمو في المطبخ والعواسة وغيرا.... ونحنا احيانا بدل عملياتنا كانت بتتاخر وبنحتاج لي قرشينات عشان نتسوق يوم الجمعه في نيرتتي واي زول يشتري حاجاتو الخاصة......
اها في يوم وانحنا كناقاطعين كبري النحل عشان موضوع الحطب دا....
وعينك ماتشوف الا النور....
كمية بتاعة نحل بصورة غريبة.....
وزي مابقولو اهلنا ....الراجل يا كراعو ياضراعو.....
ضراعو دي طبعا مع النحل دا مااابتجي...هههه
وفكينا سيقانا دي للريح كاننا خاشين في مسابقة افضل اعداء.....
لو شفتنا وانحنا بنجري من النحل حاتموت من الضحك لمن تتقلب علي قفاك....
غااايتو الجرية افادتنا الا من بعض النحلات العبيطات .....
ديل شكلهم عايزاتنو معانا عديل.... غايتو اللياقة دي ماااكويسة....ههههه
العبدلله كان من نصيبو نحلتين ختو وسم علي وشي وجنب نخرتي لحدي الان بتذكروا.....
رجعنا المركز جوه وكانت حكاية ورواية مع نحل اليوم دا.....هههه
انا في البداية العضة كانت عادية وقلت اه
الموضوع انتهي....
بس ساعتين من العضة ولقيت ليك وشي دا ماشي يورم شوية شوية .....
وياريت لو وقف علي كدا....
وشي دا بعد كم ساعة بقا عبارة عن هنبوكة منفوخة من عضة النحل.....لدرجة حاسي اني محتاج اشيل باقي وشي بيدي وانا متحرك....ياااااه
انا تلاتة يوم معتكف في خيمتي جوه مابطلع.......في اليوم الرابع بدا الورم شوية يفش.... ولحدي نهاية اليوم كنت احسن كتييييير من الايام الفاتت....
حسيت بالراحة لكن درس بليغ علي ارض الواقع...ياما سمعنا بالنحل وكبري النحل وضقنا عضات ولسعات النمل والباعوض والعقرب ....بس زي النحل وعضتو اول مرة في حياتي.....
وتتوالي علينا الايام سريعة في كبري النحل .....واتقضت فترة الشهرين زي البرق الخاطف....
وحان موعد التبديل للرجوع الي نيرتتي....
اشتقنا ليك يانيرتتي...
واشتقنا لي ناسك...
اشتقنا لي ارضك....
حبك فينا بكبر...
تعالي من خلقك....
وعدنا الي نيرتتي من جديد ....واستلمت سرية ٲخري موقعنا في كبري النحل....
وتلك الايام نداولها بين الناس....
طبعا اتفاقية السلام في نيفاشا حصلت في الوقت دا انحنا في قرية نيرتتي ...
كان خبر مفرح.....
واحتفال كبير في المعسكر....
كلنا فرحنا من قلوبنا.....
كلمة السلام ذاتا كلمة مفرحة...رغم انو الاتفاقية كانت مشوهه كتير ....وفيها بنود مااامرضية بس حقن الدماء مطلب اساسي ومهم وفي النهاية هدفنا شنو غير السلام....
وانحنا اصلا بنحارب عشان الامن والسلام.... يعني ماحبا للدم ولا للقتل..... بس كمان الماعايز السلام ....وداير يفرض علينا قراراتو.... ونفسو..... فحبابو.... ومستحيل نهابو..... انحنا رجال واسود الحاره بنتوصابو .....يا دخل قبرو.... يا رجع لي صوابو.....
ومرت الايام في نيرتتي.... إلي ان دقت ساعة الصفر ....وحان موعد الزحف... ودقت طبول الموت علي رؤس دارفور.....
متحرك كامل لشرق الجبل....
بقيادة عميد في الشرطة وهو معتمد المحلية انذاك....
اتجهزت سريتنا عشان تشارك في المتحرك ....وسرية في نيرتتي وسرية في كبري النحل.........
المتحرك كان بتشكل من مجموعة كبيرة جدا ....انحنا جزء صغير من المجموعة دي.....
بالاضافة للمجاهدين ....وقوات الجنجويد.....
والجنجويد دي مجموعه من القبايل العربية بدارفور.... عندها قيادات منهم وفيهم زي موسي هلال مثلا....
موسي هلال دا عندهم صاحب الكلمة النافذة ....والامر المطاع.... غالبية الناس ديل جهال مابعرفو كوعم من كرسوعم.... وفهم الواحد فيهم سكينتو وطبنجتو وبندقيتو وجوادو ..... واحتمال اسم جنجويد يكون جاي من الجواد والجن لخفة الحركة وكدا.....
يعني جن راكب جواد.....
بالاضافة لي جهلهم حتي بابسط امور الدين بقدسو شيوخم تقديس ٲلوهية عديل كدا ....والشيخ دا (موسي هلال) مابنادو بي اسمو بقولو عليهو الشيخ...
وبريدو ريدة وكان قاليهم اقتلو فلان ولا حتي براجعوهو طوالي بقطعو راسك ....
اخطر شي انهم متدرعين الحجابات والتمااايم.... ودا ذااااتو من اسباب الهزايم في المعارك....
الواحد وربي رابط كوم حجبات في جسمو اكتر من ملابسو اللابسة ....وبتفننو في ربطها...
واحدين ربطنها زي الحزام وصط الجسم وواحدين متلفحين بيها يجي زي 70حجاب ورا بعض....
وحانشوف هل الحجابات دي نفعتم في معركتنا الجاية.....
معركة شرسة جدا كاني بعاين لي غبار الحصين الان قدامي....
والناس بتتطاير باليمين والشمال.....
يا خيل الله اركبي
خلوكم قراب عشان نشوف في الجزء الجاي ونتابع متحركنا لي شرق الجبل وسنابك الحصين بعد اصوات المدافع والهاونات عملت شنو......
والي اللقاء ان شاءالله
|
|
 
|
|
|
|
|
| العنوان |
الكاتب |
Date |
| رحلتي مع الموت في أدغال دارفور الم وأمل (قصة مشوقة واقعية سوف تستمع بكل لحظاتها) | حاتم موسى عبدالعزيز | 03-29-16, 10:11 AM |
| الجزء الأول | حاتم موسى عبدالعزيز | 03-29-16, 10:18 AM |
| Re: الجزء الأول | قصي محمد عبدالله | 03-29-16, 10:26 AM |
| Re:رحلتي مع الموت في أدغال دافور | محمد حمزة الحسين | 03-29-16, 04:39 PM |
| Re: Re:رحلتي مع الموت في أدغال دافور | قصي محمد عبدالله | 03-29-16, 05:12 PM |
| الجزء الثاني | حاتم موسى عبدالعزيز | 03-30-16, 06:48 AM |
| Re: الجزء الثاني | Abdalla Hussein | 03-30-16, 07:11 AM |
| Re: الجزء الثاني | ismeil abbas | 03-30-16, 09:01 AM |
| الجزء الثالث | حاتم موسى عبدالعزيز | 03-31-16, 07:37 AM |
| الجزء الرابع | حاتم موسى عبدالعزيز | 04-01-16, 09:46 AM |
| Re: الجزء الرابع | امجد الجميعابى | 04-01-16, 02:19 PM |
| الجزء الخامس | حاتم موسى عبدالعزيز | 04-02-16, 12:55 PM |
| الجزء السادس | حاتم موسى عبدالعزيز | 04-03-16, 09:31 AM |
| الجزء السابع | حاتم موسى عبدالعزيز | 04-04-16, 12:45 PM |
| Re: الجزء السابع | الأمين عبد الرحمن عيسى | 04-04-16, 07:19 PM |
| الجزء الثامن | حاتم موسى عبدالعزيز | 04-05-16, 09:30 AM |
| الجزء التاسع | حاتم موسى عبدالعزيز | 04-06-16, 10:35 AM |
| Re: الجزء التاسع | مهند سوركتي | 04-06-16, 03:48 PM |
| الجزء العاشر | حاتم موسى عبدالعزيز | 04-07-16, 07:57 AM |
| Re: الجزء العاشر | مجدى محمد مصطفى | 04-08-16, 07:56 PM |
| الجزء الحادي عشر | حاتم موسى عبدالعزيز | 04-09-16, 07:41 AM |
| الجزء الثاني عشر | حاتم موسى عبدالعزيز | 04-10-16, 11:59 AM |
| Re: الجزء الثاني عشر | محمد فضل الله المكى | 04-10-16, 04:19 PM |
| Re: الجزء الثاني عشر | محمد هاشم ابوزيد | 04-11-16, 01:00 AM |
| Re: الجزء الثاني عشر | حاتم موسى عبدالعزيز | 04-11-16, 08:15 AM |
| Re: الجزء الثاني عشر | Saifaldin Fadlala | 04-11-16, 09:53 AM |
| Re: الجزء الثاني عشر | عبد الحميد فخر الدين | 04-11-16, 10:17 AM |
|
| |
حاتم موسى عبدالعزيز
فيس بوك
تويتر
انستقرام
يوتيوب
بنتيريست