ضابط بالسفارة السودانية بالقاهرة يرفض استخراج جواز الكترونى

محمد احمد القاضي

بعد إطلاعي على عدد من التعليقات خاصة هذه أدناه:

Quote: كتب صاحب البوست وأظنه يحاول أن يطابق إسمه الأخير (القاضي) بأن الضابط منعه إستخراج الجواز لكن: 1- كتب othman mohmmadien :لا يوجد دليل على أن الضابط رفض استخراج الجواز من الفيديو المعروض أعلاه.. 2- وقال aosman: دي محاولة للظهور إلا...... 3- أما اسامة عثمان السيد فقال: اصلا مافي جوازات الكترونية في سفارة القاهرة حتي اللحظة 4- وفي مشاركة من Abu Baker Ahmed Abdel Rahaman نقرأ: تحياتى تقول ليهو "ياباشا" مايقول ليك "ياسيد" تقول ليهو "يازول" مايقول ليك "ياسيد" __ قال ليك "مافى جواز اليكترونى". هل يقصد الجواز العضم زاتو و لا عضم الالكترونى موجود والضابط رافض؟ ____ صورته الموقف لى شنو؟ "نتكو فى الشدر، نسمعو الخبر لامن [الشفوت] يجو" 5- Dr. Ahmed Amin : سلام وتحية ود القاضي . على حسب علمي الجواز الالكتروني حتى الآن يستخرج بواسطة اتيام تكلف من السودان ويتم توزيعهم على السفارات و/أو القنصليات خصيصا لهذا الغرض الرقم الوطني ومن ثم الجواز .. الضباط الملحقين بالسفارات لا يستطيعوا استخراج جواز مباشرة من السفارة التيم العامل الموفد من السودان هل موجود بسفارتنا بالقاهرة ؟ ضباط السفارة يقوموا فقط بتجديد الجوازات القديمة (الخضراء) لزوم شرعنة وجودك في الخارج ف ما تظلم جنابو ساكت ... 6- جلالدونا : و على حسب كلام الضابط انتا كل يوم بتمشى السفارة لى شنو بالتأكيد بتكون عارف معلومة انو الجواز الالكترونى بيتم استخراجو عبر اتيام من الخرطوم تأتى خصيصا لهذا الغرض عموما مجرد دخولك السفارة بيأثر على فرصك فى الحصول على اللجوء لو اصلا انتا مقدّم لى ال UN 7- اسامة الامام : ذهبت للسفارة لتجديد جوازي إلالكتروني ورقم وطني لبنتي قبل فترة بسيطة افهمني الموظف بكل يسر وتهذيب ان الجواز والرقم الوطني لايتم استخراجها الا بواسطة تيّم من السجل المدني والتيم كان معاهم هنا لفترة،،،ورجع السودان حتي سألني قال لي ،،،لما التيم كان هنا انت كنت وين قلت لي ما سمعتا بيهو طيب حا يجي تاني متين،،قال لي لِسَّه والله مافي معلومة واضاف لو جوازك منتهي ممكن نجددوا ليك حتي تتمكن من الرجوع للسودان شكرتو وفهمتو انو لِسَّه ساري،،وسافرت السودان قضيت غرضي هناك وفهمت منه ان حتي الجواز الأخضر يمكن تجديده لذات الغرض 8- ترهاقا :الراجل كان مهذب جداً ، وقال ليك بنجدد ليك جوازك ، أما طريقتك فكانت وقحة جداً وأنا لو منو كان مش طردتك وبس ومعاه كفين لمن وشك يحمّر تعامل مع الناس بإحترام يحترموك ، أما لو بقيت فيها أبو عرام وعايز توريهم شغلهم ،وإنت رتبتك شنو وهلمجر فمصيرك حتكون لايص كده ، مرة شلتوني ومرة كفتوني ، ياخوي مشي أمورك بأدب وإحترام واهلنا قالوا :الحسنة معطت شنب الأسد كامل تضامني مع موظف السفارة الذي يواجه هكذا مشاكل كل يوم 9- اميرة السيد :عزيزي جلالدونا. بالمناسبة صحي..لان دخوله كل يوم للسفارة حيقلل فرصة قبوله كلاجئ سياسي..وبعدين قصص اللجوء السياسي ساهلة شديد وما عاوزة قصص معقدة بتاعة ده عذبني...وده شاكلني....وكل ما تعقد القصة فرصة القبول . بتقل...وطبعا اريح لجوء هو البيتم عن طريق الامم المتحدة..وخاصة اذا اختاروا ليك امريكا..... ..ويا د. اسامة انت المصحيك لغاية هسع شنو؟( وجه ضاحك). نحن الوقت عندنا في نيويورك لسع بدري....واساسا في نيويورك مافي ليل ونهار . ..واسمها المدينة التي لا تنام... والله يديكم الصحة والعافية 10 - صلاح عباس فقير : يا ود القاضي، والله الراجل ده صبر عليك! والفديو بتاعك ده شهادة على إنو رجل محترم، إنت تقول ليهو يا باشا، وتزعل لما يقول ليك يا سيد! ود القاضي الله يكون في عوننا وعونك! 11- أيمن الطيب : زيادة على ده كلو التصوير!!!!انت صورت الموظف دا بدون علمه وقصدت إستفزازه ليخرج عن طوره والراجل طول بالو وحاول يتجاوزك والواضح تماماإنو بعرفك لتكرار زيارتك للسفارة!!!! التصوير ممكن يكون فيه إجراء قانوني خاصة إنو القصة داخل سفارة.. الحق إنو الضابط كان مهذب معاك وإنت إتعاملت معاه بصورة غير لائقة!!!

أرجو من صاحب البوست مراجعة ومذاكرة المثل السوداني القائل:

نفريـــن لو قالوا ليــــك رأسك مافي .... اهبشو.

تحياتي