صديقنا ادم مهاجر(من الفيس بووك)..حبابك
طيب ما انت زول كويس ياخي ، مالك قاعد تركب لينا وش؟ (بيني بينك دافوري السياسة مرات بيخلينا نمرق من عراريقنا ذاتو)..!
ماك هين تب يا ادم مهاجر..وكتين بتفرز عصيدة اهلنا ناس البحر (تحديدا الجزيرة) وعصيدة اهلنا في غرب امسودان..!!
زمان يا ادم ، في الستعينات ، وانا طالب بكلية القانون جامعة الخرتوم..مشيت زيارة لبعض من اقاربي في منطقة بحر ابيض (منطقة كرري ، بالقرب من مدينة ربك)..
اها لمحت قريباتي بيسوطن العصيدة (باعتبار الأمر تراث ، وولدهم زول خلاء يقوموا يذكروهو بحاجاتو)..لقمتين بس ..طراش ما انزل الله به من سلطان..!!
اليوم التاني ، برضك في الفطور عصيدة..و قمت قلت ليهم (باص)..!!
قام عمي ، اسمو ادريس الإزيرق ، نادى زوجتو بالإسم..وهي عمتنا ..وعيالها وبناتها فيهم من مسك البيت وفيهم من ينتظر.. وناداها بلقبها (زهرة الفكة..!!)..
قالت ليهو : هوي..!
قال : ليها تعالي..!
اها عمتنا اتلفعت بتوبها وجات الضرا (الديوان)..
قال ليها ، قدام الجميع: سوطي عيش لول ملاح قبال الجوع يكتلو لينا في فريقنا..!
وعمتك رجعت وساطت العصيدة زي الترتيب ..وضربناها..!
اصدقائي وصديقاتي (بعضهم ابناءوبنات عمنا ادريس وعمتنا زهرة الفكة) كانوا بيسألوا بضيق وحنق..اشمعنا يعني ؟..
طبعا ، احد ابنائهما ، قال لي: سنين طويلة ما سمعت ابوي بينادي امو بلقبها..!!
المهم..
كتر خيرك على ذكر فكرة دقيق الدامركو.. او الدامرقو..!
وهي تقنية يا صديقي..والله تقنية عدييل.. كده.. ومتطورة للغاية..وهسع ناس البندر الحايمين هنا ديل كلهم تقول ليهم (دامركة/دامرقو) يختوا الخمسة في الإتنين..ويتمحنوا..
لكن أي واحد لو مشى يشتري عيش من الدكان (في نورث امريكا مثلا) ح يلقى اصناف كتيرة..التمييز بينها بيكون على اساس الدقيق (دقيق قمح بقشرة أم بدون قشرة..والله صحي)..
قريبتك يا ادم مهاجر (الحيكومة/المدام) ذات مرة رسلتني السوق..اها من ضمن القائمة بتاعة الحاجات (دقيق قمح دامرقو)..ياخي اتكيفت جنس كيف (طبعا الزولة بت امدرامين ، لكن مرات عندها جاكات ناس الريف..)..لمن اشتريت ليها فتيل ريحة بتمانين دولار..!!
تقنية فصل القشرة عن الغلال ، هي تقنية معروفة في عالم اليوم..لكن مافي زول جايب خبر انو اساسها ياهو فكرة الدامرقو بتاعة حبوباتنا في تلك المناطق..!!
وللجميع هنا.. فكرة الدامرقو هي تقنية منها حبوباتنا بيفصلن القشرة عن الغلة (قمح ، دخن ، ذرة..الخ)..!
حصل يا ادم مهاجر جربت اكلة من دامرقو امباط (عيش الريف/الذرة الشامي)؟..
وزي ماقال استاذنا الشاعر الكبير ، محمد طه القدال (انا ما بجيب سيرة الجنوب)..
نحن بنقول (انا ما بجيب سيرة ام جنقر)..!!
ودمت..
كبر