الحاجة الرابعة..
صورة الزولة القاعدة تعمل في الأكل..ودي صورة جميلة وفيها معاني كتيرة خلاص..!
اولا يا سيف ، فكرة الفقر ..يعني الزولة دي ياهو ده كل جملة عدة المطبخ (حلة+براد شاي + كورتين).. مرات بتكون نفس الحلة تعمل بيها العصيدة ، وتغسلها وتعمل فيها الملاح..!
زمان كنت بستغرب من بعض الصديقات والأصدقاء..وكانوا في جمعية حماية البيئة..وشابكننا ليك..(القطع الجاير للحطب) وشنو شنو كده ما عارف..وناسيين انو الناس هناك ما عندها خيارات خالص..غير تستخدم الحطب بالصورة دي..المهم..
الزولة لو بتلاحظ بتلز في عود النار عشان تحمس النار..لا قلوفزات (قفازات سلامة)
No safety Gloves
No safety Glass
No Hard Hat
شفت الفقر قاسي كيف..!
مسكة عود النار (بنسميهو نُشاب النار) ودفعه لتحميس النار بنقول عليها (تقديم النار/ او قدمت النار لتحفظ اشتعالها مستمرا)..!
طبعا ناس كتيرة ح تستغرب لو اكتشفت انو الشافع/ة الفي ضهرها ..نائم/ة..!!
وعملية وضع الطفل هكذا اسمها (الموقاقاة)..وبيقولوا فلانة مقوقية طفلها في ضهرها..والشافع بيكون مربوط بصورة محكمة..وهي عندي عملية تكنلوجيا متطورة للغاية..لأنو الشافع بيكون مرتاح للغاية لدرجة انو بينوم..حاجة مدهشة مش..؟!!!
الفكرة تم تطويرها في زمن البنادر والمدن..وهي فكرة..
Baby Carrier
وبتكون الأم بتشيل الطفل في الحاجة دي (قاعد اسميها قفص الشفع)..!
وايضا في بعض الأسواق بتكون نفس الفكرة بتاعة الزولة الفي الصورة..و في شركات قاعدة تصنع ليها مخلاية مصممة لحمل الأطفال..لكنها بتكون من الأمام..يعني زي شيلة الطفل في الصدر.. بس مشكلتها ما عملية زي بتاعة الزولة الفي الصورة.. لأنو فكرة المخلاية الصناعية بتحد من حركة الأم وما بتقدر تعمل حاجات كتيرة..اما فكرة الزولة الفي الصورة فهي بتخلي حركة الأم حرة الى حد بعيد (تمشي ، تقعد ، تشتغل بيدينها..الخ)..وفي نفس الوكت بتدي الطفل/الطفلة مساحة مفتوح للتنفس المريح..مش قلت ليكم تكنلوجيا متقدمة شديد..!!!
لاحظ فكرة زولة قاعدة وبتطبخ (لأن الطباخة في البنادر يا الزولة تكون واقفة أو قاعدة في بنبر..!!
سالت الآنسات (شهد وشروق)..عن تأمل الصورة..شهد قالت لي: ومالك زعلان كده؟..قلت ليها شفقان من تعب الزولة البتطبخ في نص الحر ..!
شروق..هزت اكتافها .. وقالت لي: ما ياهو انتو هنا الصيف كلو مخمخمننا وماشين البارك عشان تعملوا باربكيو..!
طبعا مافي طريقة اجادل اكتر..والانسة شهد طمنتني وقالت:
It is cool to cook on open space
وفات عليها..دي حياة ناس..عمرها كلو بالطريقة دي..!
طبعا ما تنسى شكل ألة النضافة المجدوعة بالقرب من الزولة الفي الصورة..والحتة شكلها منطقة زراعة اكتر من كونها مكان سكن.. او ربما تكون جبراكة..!!
طبعا لمن شفت الجركانة السوداء جنب الزولة دي اتوجست وحزنت..لأني كنت قايلها جركانة (بنزين ، زيوت عربات..الخ)..ويا ريت يا سيف تطمني وتقول لي..هي جركانة مصممة للموية وبس..!
ولو تأمل صديقنا شيخ قصي اللوغو الفي الجركانة..لما احتاج للسؤال..أو ربما داير يطمئن اكتر من الخواطر الفي بالو..و يا شيخ قصي اللوغو الفي الجركانة عبارة عن مئذنتين (ميضنتين) حاويات العالم بيناتهن يااااااااااااااخ..!
كتر خيرك يا سيف..
ويا ربي الناس لو رجعت تاني اتأملت نفس الصور ح يكون عندها احساس مختلف بالحاجات..أم لأ؟..
ودمت..
كبر