رجال من ذهب، كبر، حيدر ومن معهم....................

العزيز ول ابا حسن ..حبابك يا صديقي..

على قول حبوباتنا (الهوندي خلا غادي وما توسخ بيهو ايديك)..

صديقنا منصور المفتاح ، من عيال امدرمان ، واجمل حاجة من هجايص الحوار الوطني وشنو كده ما عارف ، انو منصور اتيحت ليهو الفرصة جاب بقاع كردفان التحتانية وشافها وشاف ناسها على طبيعتهم..وبعد ده لمن يتكلم بيكون عارف انو بتكلم عن شنو..!!

بقدر ما عجبتني القطعة/الرسالة التي وجهها لي صديقنا منصور (هنا وفي خيط مجاور) ، بقدر ما عجبتني/ احرجتني عبارة منصور انو (زار جامعة الدلنج وصور بيتنا)..وجامعة الدلنج يا حسن ياها معهد الدلنج الذي تعرفه.. اما حكاية بيتنا.. فلقد كنت انوي ان استغلها في مواجهة الشيوعيين والشيوعيات الوهم الذي يسبوننا ليل نهار باننا قبضنا من المؤتمر الوطني وانو ادانا قطعة ارض درجة اولى في العاصمة ( ونحن الذين ملكنا الأرض في العاصمة قبل مجئ نظام الجبهة الإسلامية الحاكمة في امسودان..!!)..ولكن صرفت النظر..ببساطة لأنو الشيوعيين والشيوعيات بتاعين امسودان ما بيستاهلوا تحك معاهم الحنك..ناس ما عندهم موضوع نوهائي..!!

متذكر امبزبوز يا حسن؟..ممكن تنوني فيك ساعات وساعات..لكن مابتقدر تمنعك من سل العسل..!!

عشان كده يطلعونا غويشات في سواعد الحكامات ولا تشاديين (كما ذهب بعضهم في نواحي اخرى)..تب ما فارقة معانا..فالسؤال/ التحدي: الجنزير التقيل ، البيقلا ياتو ؟.. البيوعوقد نارا بيدفاها هو..!!..ونحن ما عندنا مشكلة تب يا ول ابا بنعوقد نارنا و بنعرف كيف ندفاها..!!

هون عليك يا صاحب..وما تشتغل بالهوندي..!!!

وسيظل الحال الجميل باقي رغم انف الحاقدين: يوم الحارة ، الزول بيلقى اخوه..!!

وستظل مريم بت الشيخ ، ابوها في المشايخة برنجي..!!

وكم واحد :ابكر ول علي ، الرصاص فوقا بيغني..!!

اما جواب الزريقة محمد ، و تور علي سلام..فدي اشياء قدسية يا حبيب ، ليها ناسها البتعرفها وبتعرف قيمتها..!!

اجمل معزة عندي (وانتا يا صاحب بتعرف معزة ناس الخلا يعني شنو) انو صديقنا منصور صور بيتنا في جامعة الدلنج..!!!

وامنياتنا نلاقي اخونا عبد الغني عبد الله..و ندمبل ليهو تلاتة تيران: تور في تلودي تبع حسن ابراهيم ، وتور في شرق كدقلي تبع بريمة ، وتور في الدلنج تبع اخوك كبر..!!

وكن دقش لقاوة : تور في ضنب تور من ابوزبد لغاية لقاوة.. المافي شنو..!!!!!

كتر خيرك يا حسن..!!

ودمت طيبا يا ول ابا..

كبر