زينب ..حبابك يا صديقة
كتر خيرك على اشراكنا في هذه المادة..والتحية لأجمل وافضل قناة في نورث امريكا..ويكفي انها القناة الوحيدة على وجه الأرض التي يعمل كل عضو في مجلس ادارتها لمدة تلات سنوات بلا راتب (متطوع)..!
الأسرة سودانية يا زينب ، وزي ما قال ول ابا بريمة ..حكاية ترباس في الخلفية وغنية (امي الله يسلمك)..اضافة لنطق الأسم (الشايب) فاهل امسودان وحدهم من ينطقه هكذا..!
انا غايتو متضامن مع اخونا عبد الباقي (ياخي الزول ده مهمش جنس تهميش..وهو اقلية زينا كده.. ربنا يغطي عليهو)..
الحوار لطيف ، وناس القناة اتوفقوا في اختيار العنوان والتنميط بانو الفرقة بين الأجيال.. فبقدر ما الإبنة/الصديقة آية بتوضح حماس الشباب ، بقدر ما اختنا احلام (الأم) بتوضح صوت العقل والعقلانية..!
اعجبتني جدا امنيات الشابة اية بانها بتحلم تكون سناتور ..و في اخر الحديث قالت (ممكن بكرة تبقى هيلاري كلينتون)..!!
فكرة الحجاب ، بالرغم من انو الغالبية بتعاين ليها بانها فكرة دينية ، لكن الشابات في نورث امريكا (من دور الشابة آية ولي تحت) فكرة الحجاب بقت عندهم هوية و تميز اكتر من كونها فكرة دينية..!!
حزنت للغاية لإفادة الأخت احلام (الأم) التي قالت اربعطاشر سنة في امريكا ما عندها تأمين صحي.. بالجد تجربة قاسية للغاية..والأمريكان اتطرقوا ليها بطرق كتيرة للغاية..و يعجبني كثيرا فيلم (جون كيو) بطولة اليس كمبرلي ودينزل واشنطون..وفيهو نقد للنظام الصحي في امريكا..!
قبل شوية ، جرس الباب دق عندي ، وقمت مشيت..فتحت الباب..لقيت واحد من حزب محلي بيسألني عشان اتضامن معاهو (نائب الدايرة الولائية بتاعنا اتوفي قبل شهرين ، والإنتخابات ح تكون في نهاية الشهر ده لإختيار بديل ليهو..انتخابات عديل لا تزكية ولا باركوها يا جماعة..!!)..اها الراجل الزاير من حزب منشق عن المحافظين واسمو (وايلد روز)..وقلت ليهو ما عندك مشكلة ح اتضامن معاك..!
لمن دخلت البيت.. البنيات (شهد وشروق) سألوني: ده منو؟..قلت ليهم دا مندوب الوايلد روز..ياخي الساعة الهرشني ليك..الصغيرة (شروق) قالت لي : اوعك تكون وعدتو بالتضامن؟.. قلت ليها نعم..الساعة المطت ليك بوزها..!
طبعا حكيت تجربتي مع البنيات والإنتخابات في بوست سابق..و كانن مصرات انو نمشي نصوت وندعم الإن دي بي (حزب يساري تمكن من الفوز بحكومة المقاطعة وطرد المحافظين الحكموا لمدة اربعة واربعين سنة..!!)..وحتى اللحظة وبالرغم من الظروف الضاغطة عندنا وضعف اقتصاد ولايتنا القايم على البترول ..البنيات لسع بيفتكرن انو حكومة الولاية لازم تستمر تحت الإن دي بي..ولازم نديهم فرصة وما نشتغل بالعوارض اياها..!
صاحبنا نائب دايرتنا المرحوم.. كان هندي من السيخ (ناس العمة والدقن العجيبة ديك)..وكنت بدعمو لسبب غريب للغاية.. لأنو زارني في البيت وقعد معاي ساعة..ونسة شديدة ياااااااااااااخ..وده الفرق بين الأجيال: الشباب براغماتك للغاية وبيدعموا الحاجات الثورية بتاعة التغيير الجذري..والعواجيز (مثلي واختنا احلام) ناس بتخاف وبتحاول تباصر الحاجات بهدوء..!!
والتحية لأهلنا في امريكا.. وانتخاباتهم المرة دي شكلها جايطة شديد..!!
ودمت..
كبر
Kabar
فيس بوك
تويتر
انستقرام
يوتيوب
بنتيريست