ياخي لمن شفتك جبت سيرة (اياغوا) كدت ان اقول (يا واقفا يبكي على رسم درس..ماذا يضيره لو جلس)..!!
وزمان استاذنا التشكيلي الحاج عبد الرحمن ، عندو نظرية انو شكسبير عربي واسمو شيخ الزبير ..والإ ليه كل الإحتفاء بالنقيب المغربي/المراكشي اخونا عطيل..!!
لكن اياغوا قاعد ، في كل زمان وكل مكان: المكر/الخبث/الدهاء/حب السلطة/حب التسلق (اياغوا متسلق ود لزينا يا حامد)/حب سحق الآخر بمبرر او بدون مبرر (انانية شديدة يا صديقي..)..
بالطبع يا صديقي ، خطر الإعلام كبير للغاية ، وحتة صغيرة بتخرب الرصة ..وعشان تصلح الرصة محتاج جهد كبير للغاية..!
ليه اصبحنا عابسين ولا نحب التأمل؟..دي قصة طويلة..طويلة شديد يا حامد..!
اتذكرت الفيلم قبل يومين ، وانا بحاول اجهز رد لصديقنا المعز ابو نورا في بوست اخونا بريمة عن تراث البقارة..واندهشت لمفارقة عجيبة ومدهشة..وهي فكرة سنما التشادي محمد الصالح هارون (تلاثة من افلامو فازت بجوائز مختلفة) وفليمه الجميل (درت)..عارف المفارقة وين؟..
المفارقة انو اول من عرفنا كجماهير من امسودان بهذا الفيلم الجميل هي استاذتنا وصديقتنا تماضر شيخ الدين ..وتماضر هي احد افراد الكاست في فيلم بنتلي بروان (فيصل هاجي غرب) ، وبنتلي اساسا عاش في تشاد ، وبيحب امسودان ، فقام عمل تجربتو بصورة اوسع (هو مهاجر لتشاد ، وفيصل مهاجر لأمريكا ، والتجربتين بتحكي حنين الإنسان/ التوهان/ الإنقطاع عن المحيط الأولي واستبدالو بمحيط جديد..الخ)..
ناس امازون عارضين نسخة للفيلم باطناشر دولار..!
وناس فيمو ..عارضين نسخة للإيجار (دولارين)..
التحية للكاست: تماضر ، ياسر ، عزمي ، هلين ، تروي ، دان..والشاب رامي داوود (فيصل)..ياخي رامي ده عندو مناخات آكسنت بيعرفها براهو (في الفيلم شكلو حاجة وفي الغناء/الراب حاجة تانية خالص)..!
طبعا ما تشوف النقة دي ، انا الفيلم لغاية الآن ما شفتو، لكن قريت عنو..وبعض المراجعات اتكلمت عنو بصورة كويسة ..خصوصا الثيمة الأساسية بتاعة الهوية شاغل اهالي امسودان الشاغل.. ياخي تعبير بسيط ودقيق من تماضر في الفيلم في مقطع الأنترفيو (لألأ ما من دارفور ، دارفور نو..ثم سكتة ، ثم ياسر: من الخرتوم ، ذا كابيتول..!)..المقطع ده اختصر احبار واوراق وكليكات نقة عن الهوية..تعبير محكم (كلام وملامح)..!
انا لا احب السلمون يا حامد..شفت ليك راعي متصالح مع مطايب البحر ياخي؟..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست