|
|
|
 Re: احترم جداً حيدر قاسم ومحمد كبر..رجال تتسق � (Re: Kabar)
|
من نافذة الفيس
Quote: حزنك ياوطنى احزنى
الاستاذ كبر وللامانه من النادرين فى الموقع ده تحس بيهو متسودن حتى النخاع وسودانيتو المطروحه فى الموقع ده اجزم بانها تخفف على كثير من قراء الموقع عناء الغثاء المكتوب من البعض الذين يحسبهم الجاهل ديمقراطين من كثرة النقه والشعارات البرّاقه والتى سرعان ماتذوب وبشده حتى فى ماء النقاش البارد وللاسف هم فى وادى والديمقراطيه فى وادى تانى وماعندهم غير التكتلات المتواصله فى الاغتيال الادبى تجاه كل من ينبض قلبه بهم صادق تجاه وطن ومواطن . كبر اشهد له من متابعاتى المتواصله لما يكتب بانو متاّلم حقيقى من مايسمى بالحرب الثوريه وطبيعى ان يظهر له المنتفعين منها باسلحه خبيثه من ترصد واغتيال معنوى عشان كده القناعه الوحيده الطلعنا بيها من مصاقرتنا للمنتدى ده انو معظم الموجودين فيهو هم والكيزان واحد, ديلك بغشونا باسم الدين وانتو بتغشو فينا باسم الديمقراطيه وحرية الراى ولا شفنا دين كيزان ولا شفنالكم ديمقراطيه عشان كده خلو الحرب تقيف والسلام يعم وبعداك اتناطحو مع الكيزان اصلهم بشكلكم ده لاهم فايتين ولا انتو فايزين. واكيد حيجو منكم الحيدمغونا بطابعة الكوزنه.
عموما استاذ كبر انت على قائمة كتّابنا المميزين فسير ولا تاّبه بما يفعله الغوغائين من ابناء (امسودان) وكل الاحترام
أعجبني · رد · 7 يناير، 2016 06:05 ص |
| |
 
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Kabar)
|
اتساق المواقف لا يعنى ان تمد يدك للجلاد
او تحاوره او تدعم من حاوروه
للحوار شروط قبل الدخول فيه
حرية التعبير و سيادة حكم القانون اولاا ثم بعد ذلك فليتحاور من شاء ان يتحاور
نعم الحرب مؤلمة لكن الحوار بطبيعته هذه
يعطى احد طرفيها مشروعية الاستمرار فيها بدعم الذين لبّوا دعوته للحوار ... و يا للآسف هم الذين انقلبت موجة مبادئهم الى النقيض
حيدر ابو القاسم منذ ايام الفرع و الالتزام الحزبى ثم الانسلاخ و ايام الغربة و كتابات سودانيز اون لاين
رحلة طويلة من المواقف لا يتسق موقفه الاخير هذا معها
محمد النور كبر و موقفه الواضح من الحكومة و الحركات المسلحة بما فيها الحركة الام بزعامة قرنق
الحرب هى الحرب .. رصاص يحصد ارواح الابرياء
و الحوار الدائر الان لن يضع حدّا لها و لا حلّا
و هم .. حيدر و كبر .. يعلمون ذلك علم اليقين
قأين الاتساق هنا يا ود الزين
اعلم تماما ان الذين هرولوا للحوار سيحترقون كما احترق من هرول قبلهم
لكنى لا أعلم لماذا يريد حيدر و كبّر ان يحترقا
فالوزارة و الاستوزار فى عهد الانقاذ صارت عملة يدفعونها لمن يشاء ان يبيع نفسه ليتركهم يحكمون
يا ليت كبر و حيدر يقلعا عن ذلك و تكفينا مصيبتنا فى قريمان
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Kabar)
|
جلال..حبابك يا صديق
كتر خيرك على ابداء وجهة نظرك هنا ، وهي محل تقدير واحترام..
انت قلت:
Quote:
محمد النور كبر و موقفه الواضح من الحكومة و الحركات المسلحة بما فيها الحركة الام بزعامة قرنق
|
نعم فهم صحيح لموقفنا ، واضف الي هذه المجموعة..الأحزاب السياسية التقليدية وهي مؤسسات لا تعرف الديموقراطية ولا تمارسها في داخل منظوماتها وتدعي انها تريد تحول ديموقراطي..كنت افهم أن تستوعب هذه الأحزاب دروس التاريخ السوداني وتجاربه وتبتدر التحول في داخل منظوماتها لتكون قدوة للشعوب السودانية ثم من بعد تطالبها بالدعم والتضحية من اجل مشاريعها وبرامجها.. فمثل هذه الأحزاب لا ثقة فيها ولا تؤتمن على مستقبل السودان.
موقفنا من الحركة الشعبية الأم ، دونك شواهد الواقع خصوصا لو تأملت ما يحدث في دويلة جنوب السودان ، وهذا ناتج طبيعي لغياب الرؤية في الحركات المسلحة..فالسودانيين يا صديقي على مستوى التنظير والكلام يقولون كلام انبياء عدييل ولكن في السلوك والممارسة اليومية بعضهم اظرط من الشيطان..!
في السودان ليست هناك قيم ديموقراطية حقيقية..ونحتاج ازمان عديدة ..ونحتاج ارادة جديدة تستوعب التطورات من حولنا.. باختصار طريقة الأحزب القديمة في فهم الديموقراطية هي طريقة عقيمة..
انت قلت:
Quote:
الحرب هى الحرب .. رصاص يحصد ارواح الابرياء
|
ابدا يا صديقي ، الحرب التي نراها في السودان ليست مجرد رصاص يحصد ارواح الأبرياء..الحرب اصبحت ظاهرة اجتماعية وسياسية ثقافية معقدة للغاية يا صديقي..انظر الى قائمة الحركات التي شاركت في الحوار (ست وتلاتين حركة ) والحركات المسلحة خارج الحوار لا احد يعرف عددها وطبيعة عملها..حتى معسكرات اللجوء الإنساني ، في دول الجوار، بسبب الحرب اصبحت تخرج منها حركات مسلحة وتعوث فسادا في الأرض..
ظاهرة الحرب يا جلال ، ادت الى خلق ثقافة عنف يحتاج السودان سنين طويلة ليتدراكها ويعود مرة اخرى للإستقرار..والآن انتشار السلاح لم يعد قاصرا فقط على مناطق الحرب في غرب السودان ، ودونك نزاع القبائل حول الأرض في ضواحي الخرطوم ، ودونك ما يحدث في شرق السودان وارتباط ظاهرة انتشار السلاح بظاهرة الإتجار بالبشر..
الحرب يا صديقي دخلت حتى جيبك وبيتك.. وكلنا نتأثر بها بطريقة مباشرة أو غير مباشرة.. فالمأئة دولار التي ترسلها دعما للأهل في السودان ، باستمرار الحرب ستكون مأئتان ، ثلاثمأئة ، الف دولار..لأن الحرب تخلق الضائقة الإقتصادية وتخلق التعدي على الحريات العامة والحقوق الأساسية..لأنها ظاهرة استثنائية..وانا ارى الدعوة لحصر الحرب..هي حصار للحكومة وقطع السبيل امام حججها الضعيفة.. في غياب الحرب ستكون الحكومة امام واجبها في التنمية..واذا فشلت ستذهب ..
الحركات المسلحة والمعارضة المدنية ، حتى لو جاءت بحكمها ونالت السلطة..ستظل نفس القضايا المطروحة الآن في الحوار ماثلة امامها ، فهي عليها واجب جمع السودانيين على وثيقة تكون اساس لدستور تحسم فيه طريقة الحكم وتداول السلطة ، وتحسم فيه قضية الهوية ، وتحسم فيه العلاقة بين السلطات في الدولة ، وتحسم فيه رؤية اقتصادية راسخة وتصور يفجر طاقات السودان واستغلال موارده بصورة تنفع اهل السودان. المعارضة تطالب بفترة انتقالية..وليس لها تصور لدستور يمكن أن تقنع به الناس..وليس لها تصور لطريقة حكم..واقولها لك: اول ما يستلموا الحكومة الإنتقالية ح يقعدوا يتلفتوا وح يجيبوا دستور انتقالي..لنعود لدورة العك الشريرة..ناهيك عن غياب ضمانات حقيقية لعدم استغلال الحركات المسلحة ظروف الفترة الإنتقالية والإستمرار في الفوضى..
فلماذا لا نستبق الأمور ونعمل اجراء استباقي بجمع السودانيين والسودانيات ليتداولوا في هذه الأمور.. فالذي يحمل بندقية في الأحراش لديه مشكل دستور وعدم وجود وثيقة تحدد الحقوق وتصونها..فهل ننتظره حتى ينتصر؟..ومن سيدفع تكاليف الحرب لغاية الإنتصار؟
انت قلت:
Quote:
و الحوار الدائر الان لن يضع حدّا لها و لا حلّا
|
نعم قد يضع الحوار الحالي حدا للحرب.. فالحوار يشكل استفتاء لمن يرغب في استمرار الحرب ومن يرغب في وقف الحرب..وهناك رأي شائع في كل انحاء السودان ، رأي على مستوى القواعد الجماهيرية البسيطة وكلها عبرت عن رفضها للحرب..وكلها عبرت عن أن وسيلة العنف المسلح الذي يدور في الأطراف يزيد مآسي الجميع..ولابد من وقف الحرب باي ثمن كان..!
الحركات المسلحة الآن فقدت سطوتها ، والعالم اصبح لا ينشغل بها كثيرا..عملية شريان الحياة (2) التي تطالب بها الحركة الشعبية هي حالة يأس من خلالها ترغب الحركة الشعبية في اطالة امد الحرب..!
الدول الأفريقية في غالبيتها يا صديق ، تعاني من انظمة الحكم الشمولية ، والرؤوساء في افريقيا يبقون في الحكم لأجيال واجيال..ولكن بلادهم مستقرة..ودي محنة المثقف الأفريقي الذي يحلم بالديموقراطية في الأقطار الأفريقية..لأنه يدخل في موازنة صعبة للغاية: الديموقراطية/الفوضى/عدم الإستقرار أم السلام/حكم شمولي طويل الأمد؟.. موزانة قاسية..والظروف الإجتماعية من امية ديموقراطية ودستورية هي كلها عوامل تعمل ضد الديموقراطي وحلمه في نظام حكم متعدد وراشد..
الحوار الذي يدور الآن ليس حوار بين الحكومة واطراف معينة ، وانما حوار بين اطراف عديدة ، الحكومة ممثلة مثل غيرها ، والقضايا التي يناقشها اهل الحوار الضمانة الوحيدة لتنفيذها انها جاءت عبر مشاركة شعبية موسعة..ولن تجد الحكومة غير تنفيذها..وبالتالي تبني مهمة دستور للبلاد..ومؤكد لن ينال رضى الجميع ولكنه ينال رضا اغلبية معتبرة..
المعارضة كل مشكلتها الآن ، ان الحكومة لم تضع لها الإعتبار الكافي ، وعرتها تماما ، وبالتالي لم يبقى امام المعارضة غير الإصرار على اهميتها..وهي لم تدرك بعد ان الواقع تجاوزها تماما وادرك اهل السودان عقم العقلية التي تدير هذه الأحزاب..!..هي معارضة منفصلة تماما عن قضايا الواقع ، ولم يعد لنا ما نملكه لإصلاحها ، لأنها ترفض الإصلاح..!
عموما يا صديقي ، محمد النور كبر لا يبحث عن وزارة..وهو رجل فقير ولا تغريه كل اموال الدنيا والأخرة..ومثله لا يشترى ولا يباع اللهم الإ كن الله الخلقو يشتري منو روحو ويستلم الأمانة..فدع عنك الإنجرار وراء بروباقندا البعض هنا..!
ودمت..
كبر
_________________________
| |
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: HAIDER ALZAIN)
|
حيدر الزين ... تسلم يابا,
أحييك ... بقامة وطن ... وبعزمنا على التجاوز.
إستنضحت فؤآدي من تلك الأيام, وشددت أواصر
ذاكرتي على {حق} فتاه آلقة كنا نود أن نزوجها
لشعب السودان ... لكن ... ليس لأعسارنا حدود.
كانت من أعطاب حق ... حكاية الداخل والخارج.
عبر فرضيات جزافية... لكنها تجبرت ووأدت {حق}
نفس المشهد ... ما يزال يتكرر الآن ...وإن نعلم أهو
الداخل يقع و يقوم ... يتقدم ويتأخر, فماذا يريد الخارج؟
وهذا لعمري سؤال حقيقي و موضوعي. لأن من ينشل
نفسه من وأدة السودان الحاضرة, ويهاجر أو يغترب, فهو
في واقع الأمر يهاجر ويغترب فكريا ومعنويا. لكونه لا
يعد ينظر لأمر السودان ألما واجعا عسير الضنايا. بقدرما
تتآلف على نطاق أحكامه مؤثرات أخر, ولأنها مؤثرات حقه,
فهي تستدي الإعتبار, لكن ذات الإعتبار, يستدعي التواضع.
... فهل ... يتواضعون؟
... ولي عودة
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: HAYDER GASIM)
|
جلادونا ... تسلم,
بس ياتو {فرع}
في شجرة الحياة ...
ثم ... من كلمة {إنسلاخ} أنا بعتبرك ثوري طيب,
الحكاية وصلت {الخيانة} مدعمة بالسقوط الذي
الذي ليس له من قرار, فكدي إتخيل كونوا زول
يسقط في بئر, ومع أن لكل بئر قاع, لكن مختارات
{التشفي الثوري} تجعل هذا البير بلا قاع.... حولالالا
إن لم نتوحد على فكرة, فلنتوحد على وطن
... وإن ... في ... عز ... الشدائد
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: طلحة عبدالله)
|
Quote: كتر خيرك يا ابو حسين..
والتحية لصديقنا (حزنك يا وطن احزني)..
والتحية لكل من يرى فينا خيرا...
|
أخونا كبر سلام
إختلفنا أو إتفقنا معك و لكن لا يمكن أن نتدخل في خيارك فمعارضة الحوار خيار أيضاً إحترمنا خيارهم و يفترض أنهم يحترمو أي خيار آخر ....
نعم الحرب لا أحد يؤيدها إلا المستفيد منها .....
بس المحيرني الرافضين للحوار كيف حا يصلوا لمبتغاهم بدون حوار
ثم الحركة الشعبية الآن تحاور الحكومة و حاورت الحكومة من قبل مرات عديدة و لم تجد أي رفض من الرافضين الآن للحوار....
و أغرب شي إنو بعض أعضاء الحركة الشعبية نفسهم يسبون و يلعنون من ذهبوا للحوار ..
تحياتي و إحترامي للجميع
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: ABUHUSSEIN)
|
Quote: بس المحيرني الرافضين للحوار كيف حا يصلوا لمبتغاهم بدون حوار
ثم الحركة الشعبية الآن تحاور الحكومة و حاورت الحكومة من قبل مرات عديدة و لم تجد أي رفض من الرافضين الآن للحوار....
|
أبو حسين ... تسلم,
يا أخوانا الحوار ده مفتوحة ليهو خرتمية بوست, وهنا بوست لمواساة نفرين من ضحايا التعذيب
المتهمين والمدانين والمعاقبين {بتهمة الحوار}... فيا تواسونا ... يا تخلونا, وما تعملو الحالة واحدة
بين الجلاد ... والضحية ... هههههه
بعدين ... يا أبوحسين,
ولأني في مركز النقاهة الصحية, فما حا أتكلم سياسة في الرد على مقتبسك عاليه,
فالشعر أصدق إنباءا من الكتب... واو, أو ... حين قال الشاعر:
حرام على بلابله الدوح ... حلال على الطير من كل جنس
؟؟؟ شوف ليك جنس محن ...
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: معاوية المدير)
|
Quote: كتر خيرك يا صديقي ، والحرب ظاهرة قاسية للغاية..ولقد خلقت ثقافة عنف
يحتاج السودان الى عشرات السنين لتداركها..الحرب كعبة يا حيدر وربنا لا وراك ويلاتها.. |
نسأل الله ان يقطع دابرا، وان لا يسلطها علي بشر،
إتفق مع هذا الكلآم جملةً وتفصيلآ ولا أمانع ان تقف بغض النظر عن من هو السبب
في إيقافها أو الطريقة التي أُوقفت بها، المهم تقيف بس ...
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: معاوية المدير)
|
Quote: نعم الحرب لا أحد يؤيدها إلا المستفيد منها .....
بس المحيرني الرافضين للحوار كيف حا يصلوا لمبتغاهم بدون حوار
ثم الحركة الشعبية الآن تحاور الحكومة و حاورت الحكومة من قبل مرات عديدة و لم تجد أي رفض من الرافضين الآن للحوار....
و أغرب شي إنو بعض أعضاء الحركة الشعبية نفسهم يسبون و يلعنون من ذهبوا للحوار ..... |
شكرا ابوحسين ... والتحية للاخوة حيدر والرائع كبر
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: حسن مهدي)
|
Quote: ود الزين ... يا غالي,
لأشياء أرجو ألا تحسبها رقيات طافحة عن مجرى العقل,
لكن ... معاوية المدير بالنسبة لي هو مشروع صديق,
... تصدق؟ |
الأخ حيدر أراني قسوت عليك بعض الشئ .
انا زاتي أصدق. سبق إتصلت عليك في فترة بعيدة، ردت علي المدام،
قالت لي غير موجود، قلت ليها بتصل تاني، بعد دآك براك عارف البلد
دي شكلها كيف .
كدي خلينا نتعارك، أنا رجل لا احسن الصمود
امام مثل هذه الكلمات ...
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: معاوية المدير)
|
مرحب اخونا كبّر و شكرا على الرد الوافى
Quote: الأحزاب السياسية التقليدية وهي مؤسسات لا تعرف الديموقراطية
ولا تمارسها في داخل منظوماتها وتدعي انها تريد تحول ديموقراطي. |
اوافقك تماما فى هذا و هذه قناعة وصلت لها و اظن ان الغالبية الصامتة من الشعب السودانى قد وصلت اليها و ان لاخير فيها برضو
ثالوث الازمة فى السودان
الحكومة
الحركات المسلحة
الاحزاب
نتائج الانتخابات الاخيرة يا كبر اعلنت بوضوح الرؤية الشعبية فى اهل الانقاذ و هلّل اهل المعارضة و الاحزاب و الحركات المسلحة لذلك
و تناسوا عن جهل او عمد ان هذه الرؤية تشملهم وانهم جوّه الجك برضو
Quote: الدول الأفريقية في غالبيتها يا صديق ، تعاني من انظمة الحكم الشمولية ، والرؤساء في افريقيا يبقون في الحكم لأجيال واجيال..
ولكن بلادهم مستقرة..ودي محنة المثقف الأفريقي الذي يحلم بالديموقراطية في الأقطار الأفريقية..لأنه يدخل في موازنة صعبة للغاية:
الديموقراطية/الفوضى/عدم الإستقرار أم السلام/حكم شمولي طويل الأمد؟
.. موزانة قاسية..والظروف الإجتماعية من امية ديموقراطية ودستورية هي كلها عوامل تعمل ضد الديموقراطي وحلمه في نظام حكم متعدد وراشد.. |
نعم هذه حقيقة واقعة و اذا زدنا عليها النظام الاجتماعى الذى يقدّس الولاء القبلى و يسمو به عن الدولة لدرجة التمرد عليها و رفع السلاح فى وجهها
.. تبنى المثقف الافريقى لهذه الرؤية هى جوهر ازمته و ازمة افريقيا ....
للهند تجربة رائدة فى ارساء قيم الديمقراطية قبل الاستقلال و بعد الاستقلال
كتاب مفتوح به قامت الهند التى نراها اليوم
Quote: نعم قد يضع الحوار الحالي حدا للحرب..
فالحوار يشكل استفتاء لمن يرغب في استمرار الحرب ومن يرغب في وقف الحرب..وهناك رأي شائع في كل انحاء السودان ،
رأي على مستوى القواعد الجماهيرية البسيطة وكلها عبرت عن رفضها للحرب..
وكلها عبرت عن أن وسيلة العنف المسلح الذي يدور في الأطراف يزيد مآسي الجميع..ولابد من وقف الحرب باي ثمن كان..! |
اختلف معك تماما فى هذه الجزئية
فأن تحاور فهذا يعنى ان لك مطالب تتبناها يتم طرحها تحت ظروف لابد ان تتواجد لضمان نجاح الحوار
و المطالب فى ابسط حدوده لو كانت مستقاة مما يطالب به الشعب السودانى لا يمكن ان تتحقق فى ظل حكومة شمولية لا ترينا الا ما ترى
من المطالب دى يا كبر
اعادة تكوين الجيش و الامن و الشرطة و الخدمة المدنية تحت عقيدة جديدة و قوام قومى
حل المليشيات المسلحة
حرية التعبير و حق التظاهر الغير مشروط بى موافقات امنية
و ... بس
خليك من باقى المطالب
هل سيوافق اهل الانقاذ عليها
بالتأكيد لا و الف نو معاها
يا كبر
قلتها فى مفترع للدكتور المشرف من قبل و اقولها لك هنا برضو
....الحوار سلاح بيد الانقاذ ....
تلجأ اليه كلما استحكمت حلقات الازمة حول عنقها .. فلماذا نهرول له او ندعمه لنفتح لها كوّة تأتيها ببعض اوكسجين
------
شكرا حيدر الزين
ففى عز المعمعة الدايرة عن الحوار دى فقد اتحت لنا كوّه هادئة نباصر فيها امورنا مع اناس نرتاح لمواقفهم
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: جلالدونا)
|
Quote: لكن ... معاوية المدير بالنسبة لي هو مشروع صديق,
... تصدق؟ |
ههههه
اسمح لى اقول و لازمن تتقبلا بى صدر رحب
... غصبا عنك....
Quote: ، أنا رجل لا احسن الصمود
امام مثل هذه الكلمات ... |
تفجّخ فى الطين ساكت ؤ تجى تاكل راسنا بى جنس الكلام النى ده
عموما بوادر الود بينك ؤ بين ابن اى القاسم واحدة من حسنات الحوار
بس كمان ما اى حوار .. عشان ما تجى ناطى فى رقبتى
و برضو ما تسألنى عن ال ؤ دى .. حاكم دخلت مزاجى فى الحتة دى ؤ بس
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Kabar)
|
ابوحسين..حبابك يا صديق
كتر خيرك على المفاكرة هنا..
نحن ناس امسودان نتميز بالنسيان والتناقض.. ففي السهلة ممكن نتكلم عن احترام الرأي الأخر..ولكن في المطبات الحقيقية بننسى تلك المبادئ..
وح نتعلم بمرور الزمن ، واعول كثيرا على تكنولوجيا التواصل..ومكن تساهم في تقليل الحدة..الأجيال الجديدة اقل حدة تجاه الرأي الأخر.. وده اتجاه مطمئن في المستقبل..
نعم لا بديل للحوار في حل مشاكل البلد..والقضايا المطروحة الآن في الحوار الوطني في الخرطوم هي ليست قضايا مرحلية وانما قضايا استراتيجية..يعني حتى الرافضين للحوار لو تيسر لهم الوصول الى الحكم سيجابهون بمثل هذه القضايا وسيحتاجون الى مؤتمرات حوار لمناقشتها..فلماذا لا نقصر المشوار؟..
سلوك بعض داعمي الحركة الشعبية شمال..هو افضل نموذج للفوضي الحزبية والتنظيمية.. فالسياسة التي نعرفها في بلد مثل كندا ، مافي زول بيخرج عن خط الحزب العام.. يعني حزبك أو مجموعتك بتخوض مفاوضات وحوار مع الحكومة بطريقة أو بأخرى فما بتقدر تشاتر.. لكن نسوي شنو ياهو حال امسودان..ومثل التنظيمات دي ما عندها القدرة تضبط اعضاءها ومؤيديها..لأنها تفتقد المؤسسية..فلو كانت فيها مؤسسية قليلة لأصدرت تعميمات صارمة وطالبت ناسها بالتقيد بيها..!
يعني ناس الحركة الشعبية شمال ممن يسبون الحوار واهله ويعتبرونه حوار عبر حكومة تفتقد الشرعية ، هم نفسهم من تمضي حركتهم للمفاوضات وتتعامل مع الحكومة (يعني الحركة الشعبية بتعترف بشرعية الحكومة ، وناسها تحت سايطين الحاجات)..
هناك مفاوضات ايضا مع حركة العدل والمساواة (جبريل ابراهيم) وحركة تحرير السودان (مني اركو مناوي)..و ناسهم التحت برضك شغالين سباب وشتائم ضد ناس الحوار الوطني في الخرطوم..
ونتمنى ان يتوافق الجميع على صيغة توقف الحرب وعلي صيغة تصلح لتأسيس دستوري.. بالجد يا ابوحسين تعبنا من حكاية اتفاقية سلام وبعد كم شهر نفس المسالمين تاني يرجعوا الغابة..ياخي لمن الواحد فكر يحرق الغابات دي..!
كتر خيرك..
كبر
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Kabar)
|
Quote: تفجّخ فى الطين ساكت ؤ تجى تاكل راسنا بى جنس الكلام النى ده
عموما بوادر الود بينك ؤ بين ابن اى القاسم واحدة من حسنات الحوار
بس كمان ما اى حوار .. عشان ما تجى ناطى فى رقبتى
و برضو ما تسألنى عن ال ؤ دى .. حاكم دخلت مزاجى فى الحتة دى ؤ بس |
جلالدونا يا حبيب .
إن جيّت للجد دا الكلآم النجيض زاتو، ؤُ مافيش اجمل من ان نناقش قضايا أهلنا في
إطار المودة، ؤُ نديها بُعد آخر كمان عشان نقدر نصنع وطن معافى نناقش قضاياه
بعيد عن المجاملة لصديق أو البُغض لعدو شخصي حتي نستطيع ان نتقبل ما يصب
في مصلحة اهلنا اياً كان مصدره . المسألة يا جلالدونا مسألة رأي ورأي آخر
والمُبتغى مصلحة أهلنا، والكل ينظر لها من زآوية مختلفة . ثق يا جلالدونا مافيش
مجاملة لصديق ؤُ مافيش مخالفة لعدو ابداً، وأسأل الله ان يديم المودة بين الجميع
وان يجنّب أهلنا ووطنا الفتن ما ظهر منها وما بطن ...
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: معاوية المدير)
|
Quote: Shawish Abdelsalam · Calgary, Alberta
للأسف أنا ما عندى access لارشيف كبر لأنو ما عندى عضوية فى المنبر وإلا كنت حا أثبت ليكم
إنو كبر لا متسق ولا يحزنون. على أيام أزمة الإنتخابات والتعداد السكانى فى جنوب كردفان، كان
محمد كبر شغال المديدة حرقتنى وكان واقف مع الحركة الشعبية بطريقة كده مريبة نحن ذاتنا أعضاء
الحركة احترنا فيها. بعد اندلاع الحرب زار كبر السودان وجاء راجع من هناك خشموا فيهو سكر.
وهو كان أمين خلى يجيب لينكات للبوستات الكتبها أيام الانتخابات. |
سلآمات يا شاويش .
وصيّة خاصة، عليك الله سلّم لي علي صاحبي عبد العظيم كودي
الكنا في يوم من الليام ان وهو ساكنين في شقة وآحدة ...
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Kabar)
|
جلال..حبابك يا صديق
كتر خيرك على التعقيب والإتفاق معنا في عديد من النقاط..وده مكسب وممكن نطور الحاجات لي قدام..
نقطة عقلية القبيلة.. هي عقبة في وجه معظم الديموقراطيات في افريقيا..وهناك نماذج تجاوزت هذه العقلية مثل تنزانيا (بالرغم من سطوة الحزب الواحد منذ الإستقلال) وغانا وموريشس (فيها افضل ديمقراطية افريقية)..
هذه العقبة اتوجدت لغياب تطور مؤسسات سياسية ومدنية فاعلة تلك التي تسعى لتأسيس دولة المواطنة والقانون بثبات..و في اعتقادي تجاوزها يكون بالتعليم المستمر..ليس التعليم النظامي وانما التعليم المجتمعي الذي يمحو الأمية الديموقراطية والأمية الدستورية..
بالنسبة لنقطة الإختلاف..و اقدرها جيدا..
ودفاعي عن موقفي بان الحوار الدائر الآن لا اراه حوار بين حكومة وافراد..وانما اراه ماعون للتشاور حول قضايا محددة وهي نفس القضايا التي ترفعها المعارضة سواءا كانت مسلحة أم لأ..
واهلنا قالوا سيد الرايحة بيفتح خشم البقرة..و نحن بنشجع السودانيين والسودانيات انو يتحاور وا في القضايا دي ويمرقوا بوثيقة تصلح للتأسيس الدستوري واستقرار البلد مستقبلا..
بالنسبة للحرب ، فالحوار كما قلت سابقا استفتاء في موضوعة الحرب..وهذا الإستفتاء يسنده موقف شعبي عريض لا نراه في الإعلام أو المنتديات والنقاشات..
واقعيا ، حركات دارفور لن تستطيع مواصلة الحرب لخمس سنوات قادمات..لأن معطيات كثيرة ظهرت في الواقع..الحركة الشعبية شمال بنفس القدر..وهذه مربوطة بواقع الجنوب ، فاذا حدث سلام في الجنوب فأن الحركة الشعبية شمال ستجابه بالضغط لوقف الحرب..واذا لم يحدث سلام في الجنوب ، فان الظروف ايضا ليست في صالح الحركة لتستمر في الحرب..
بالنسبة للمطالب التي ذكرتها ، عن اعادة الهيكلة..اتفق فيها معك..واعتقد أن من الأخطاء التي عقبت الإنتفاضة 1985 هي حل جهاز الأمن وقتها..والآن مثل هذه الأجهزة (تحديدا الأمن والجيش والشرطة)..فيمكن أن تعالج باستفتاء عام..طبعا بقول الكلام ده لأن غالبية القوى السياسية وصلت لقناعة لوجود الجبهة الإسلامية في مستقبل السودان السياسي ، وبالتالي محاولة المدارجة والإصلاح..والجبهة الإسلامية نفسها هناك صوت معتبر داخل قواعدها غير راضي تماما عن اداء حكومته..!
نعم قد يكون الحوار سلاح بيد الحكومة وقد تؤثر عليه في بعض المفاصل..لكن طبيعة الموضوعات المطروحة لا تسمح بالإملاء والتدخل..وفي اعتقادي الحوار اكبر مطب دخلت فيهو الحكومة..ونحن مع انو الناس تدخل الحكومة في زاوية ضيقة..
في المقابل..نفس القضايا يمكن أن تكون نواة لحوار بديل اعلنت عنه المعارضة السياسية المسلحة والسلمية ولكنها كانت فقاعة للمزايدة..ومثلما الغالبية تشكك في جدية الحكومة.. فهناك غالبية معتبرة تشكك في جدية المعارضة..
هنا مافي طريق غير ان يستمر الشعب في تعليم الحكومة والمعارضة في ان تسمع للشعب وان تسعى لتحقيق المطالب..
ودمت..
كبر
| |
|
|
|
|
|
|
|
|
 Re: احترم جداً حيدر قاسم ومحمد كبر..رجال تتسق � (Re: Kabar)
|
السلام عليكم
الأخ حيدر صاحب البوست وحيدر المحتفي به
وكبر
وكل الزوار
لا أحد يشكك في وطنية أي منهما يا حيدر الزين
ولكن
الإختلاف سببه العشم الكبير فيهما
وبرضو الإختلاف دليل صحة وعافية في امسودان كما يحلو للصديق كبر
ونعود إن شاء الله
_____
الحليلة
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: elhilayla)
|
شكرا يا الحليلة ... وموطن العزم هو تلك الثقة,
فإن شاء الله ما نخيب ظنك. فقط أعلموا أننا نعمل
ما في الوسع وفي إطار معطيات ضيقة وخيارات
لا تخلو من عسف. لكننا عازمون على نصرة شعبنا.
بس كمان بقينا قابلين لتغيير المفاهيم والمناهج وآليات
الإنفعال بقضايا الشعب. وأقول ليك يا الحليلة, ما وصلنا
لهذا الدرب بي الساهل, لكنه إنتظار طال العقدين ونصف
من الزمان, ولكنه العالم يمور من حولنا وتتدافع أشرعته
على سبل الخير والشر مجتمعمه, ولكنه الإقليم الذي نحتل
فيه مؤطئ قدم ... يحترق ويبتاعض وتنخفض فيه قيمة
الإنسان وتعلو أصوات ومدافع الحرب... بل هي تلك المتغيرات
التي تتخلل أي أوضاع سياسية وإجتماعية بلا إذن. بل هو الإنعتاق
من شعارات الحلول الكاملة المطلقة والتي لا تحدث في عالم واقعي.
بل هو البحث عن السلام ولما طال أمد الحرب, بل هو السودان الذي
تزيده الأيام غربة وتباعضا ... بل هي محكومة الحال الضام بدل الحل
الإقصائي. بل هي ضرورات التأهل النفسي والفكري لأن يكون كل
السودان حاضرا ومشاركا في صنع التغيير وفي بناء سودان المستقبل.
ففي خجة كبيرة لموجب مؤثرات داخلية وخارجية وتاريخية كمان. ولازم
نكون جاهزين لمناقشة أكثر من سيناريو لما يتعلق بشأن السودان. أو من
هنا إنطلقنا ومن هنا نعتزم مسيرا جديدا, أكثر واقعية وأقرب إلى الوجدان
الوطني في عموم تشكله... سوف نقبل الحل التساومي, لأنه رغم كل
منقصاته أفضل من الحرب الجيدة. سوف نقبل بالسلام ... لنعود إلى براح
الإنسانية وهو يتعاظم لوجهة إحترام الإنسان وحقوقه ورغائبه. سوف نتوالى
مع الحوار ... لأن أكلافه أقل من الحرب, ولأنه يقرب ا لمسافات ا لمتباعدة
بين أهل السودان, ولأنه يجسد المشروع السوداني الأفضل للعبور, وذلك عبر
المشاركة الجمعية الكلية التي لا تستثني أحدا. وإن يقع على القوى الوطنية عبئ
إختيار حل سلمي ديمقراطي, فيقع على السلطة القائمة العبء الأخلاقي في الكف
عن قهر الناس وضرورة السماع لهم وإعتبار إرادتهم الغالبة
فهذا مبلغ إجتماعنا ... و هذه غاياتنا ... وتلك وسائلنا ... ولن يثمن هذا أو يغني ذاك
من جوع ... إلا بتبني الشعب لهذه النهجية وإختياره لأن تكون مرفد عبوره إلى بر
السلام والطمأنينة ... وتقبل تقديري
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: HAYDER GASIM)
|
Quote: هنا مافي طريق غير ان يستمر الشعب في تعليم الحكومة والمعارضة في ان تسمع للشعب وان تسعى لتحقيق المطالب..
|
تسلم ... كبر ... فعاليه عبارة شاملة ومعبرة وناجزه,
أي هذا ما يخلص مؤدى أهدافنا ا لإستراتيجية, أي
التواصي على المبادرات التي في الإمكان أن تساعد
الشعب على فهم أصرم وسير أحكم وإلتفاف أعظم,
حتى يكون قادرا على فرض أجندته على طرفي الحكومة
... والمعارضة ... كلام طيب
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: HAYDER GASIM)
|
شكراً جزيلا يا حيدر ودا العشم دوماً
حتي لو أختلفنا معكما تأكد أن الإختلاف إختلاف في فرعيات وليس كليات
لا نختلف أبداً في بديهيات مثل وقف الحرب تحت أي ما دعوى - لا يهم مطلقاً
ولكن هل سنصل لوقف هذه الحرب من خلال المؤتمر الدائر؟
الحوار أحد أقصر الطرق - بل أقصرها علي الإطلاق - للوصول لحلول سلمية ، لكن كيف؟
وحتماً ستسفر الأيام في القريب عن كل المكنونات
نشيل الصبر
تحية عبرك لكبر العزيز
______
الحليلة
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Kabar)
|
ول ابا شاويش..حبابك يا صديقي
كيف اخبار الأسرة الكريمة..
وبعد..
المكتبة فيها بعض الموضوعات لم تضاف بعد..وشكرا على تذكيرنا سوف نقوم بتحديثها في اقرب فرصة..
والخيوط التي ذكرتها ليس فيها تمجيد للحركة الشعبية او الوقوف معها..ويمكن تراجع ابعد من ذلك مناقشاتنا مع اخونا خالد كودي ونقدنا لفكرة دولة سودان الورطة التأريخية بتاع نيفاشا ونقد فكرة السودان الجديد..وهي نقاشات موجودة في مكتبة اخونا خالد كودي..
وانت بعضمة لسانك ذكرت أن موقفنا تغير بعد اندلاع الحرب مع ان موقفنا من الحركة الشعبية موجود وهو اختلاف منذ عهد نقاشنا مع خالد كودي في سنة 2007
نعم زرت السودان ، واكتشفت حاجات على ارض الواقع كانت غائبة عني..وعرفت عن اداء الحركة الشعبية ايام السلام..وغالبية اهل المنطقة كانت ناقمة على هذا الأداء..لدرجة ان البعض اشتط وقال افضل ان تعود الحركة الشعبية للحرب حتى نخلص من جهالة كادرها وادائه الإداري الضعيف..
حينما عدنا كتبنا خيوط نوعية مثل خيطنا بعنوان (لعنة الغدر: النوبة من قرنق الى عرمان)..وهو خيط احدث حراك كبير للغاية واثر في مواقف كثير من اهل جنوب كردفان/جبال النوبة..وجعل الكثيرين والكثيرات يعيدون التفكير في امر جدوى الحرب كوسيلة للمقاومة ، ببساطة لأن تكاليفها اصبحت اكثر فداحة من منتوجها المتوقع..
اضافة لأحداث مثل الهجوم على كادقلي و ابو كرشولة وامروابة وشمال الدلنج وابوزبد..كل هذه الأحداث وضحت ان الحرب اصبحت عبثية ، ليس لأنها توسعت رقعتها في العمليات ولكن لأنها عمليات غير ذات اثر استراتيجي ولم تعدل في ميزان الحرب والقوى والأحداث السياسية..يعني يا شاويش الجبهة الثورية كانت شغالة بحكاية شوفوني..
حكاية الحلاوة يا شاويش اشارة غير كريمة ، ومحمد النور كبر ليس مثل الضعفاء ممن يباع ويشترى بحفنة قريشات أو مناصب كما فعلت الحركة الشعبية في اتفاقية نيفاشا..وقد ذهبت في نفس الإتجاه من قبلك بسنوات احسان عبد العزيز التي اتهمتنا باننا نلنا قطع الأراضي درجة اولى ونلنا بعض الحاجات.. انت ذهبت السودان بعد ذهابي الأول فهل اتهمناك بانك قبضت أو بعت واشتريت؟..والتناقض الحق يا شاويش ..انت زول بتعلن انك تنتمي للحركة الشعبية وهي حركة مسلحة وبتقاتل الحكومة السودانية ..وانت بتمشي السودان زي الترتيب وبتحوم فيهو من غير ما تتعرض للمضايقة أو الإعتقال.. ويبقى السؤال: ليه الحكومة لم تقم باعتقالك؟..هل لأنك متواطئ معاها ؟.. أم أن الحكومة بقت كويسة ومتسامحة وبتسمح لناس الحركة الشعبية يزوروا اهلهم في السودان من غير مضايقة؟..اختر الإجابة التي تعجبك..ودع للقارئ امر تحديد الإتساق وعدم الإتساق..
في هذا المنبر يا صديقي ، تعودنا أن كل من يتجرأ ويقول كلمة طيبة عن محمد النور كبر يجابه بالقمع والتسفيه والإحتقاروالبلطجة..ويبقى السؤال: ليه كل الخوف ده من محمد النور كبر؟..وليه كل هذا العداء؟..
مكتبتنا فيها خيط مهم عن المحكمة الجنائية الدولية..واهم ما فيهو قلنا أن قوانين السودان غير مؤهلة لمحاسبة الناس على اساس جرائم الإبادة والجرائم ضد الحرب والجرائم ضد الإنسانية..والحكومة قامت بتعديل القانون الجنائي السوداني ليشمل هذه الجرائم..وهذا هو الفرق بين الحكومة والمعارضة.. فالحكومة بتقرأ وبتابع وأي كلام موضوعي بتشتغل بيهو..والمعارضة لا بتقرا ولا بتخلي الجماهير تقرا..طوالي نازلة فينا قمع وتشويه واستحقار وتسفيه..يعني باقي ليك نسكت ليه؟..
نعم نحن ضد الحرب ونقاوم استمرارها..و اكثر من كده سنقاوم فكرة شريان الحياة 2 ودخول الإغاثة عبر دويلة الجنوب أو اثيوبيا.. لأن ذلك الأمر سيؤدي الى اطالة امد الحرب..
ودمت طيبا..
كبر
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Kabar)
|
كتب خالد حاكم:
Quote:
لأخ كبر تحياتى مافى زول مع الحرب .. لكن الحرب مفروضة على الناس والناس حملت السلاح من اجل الحرية ومن اجل حياة كريمة وحقوق مواطنة كاملة ومتساوية وبعدين بتقول لابد من وقف الحرب باى ثمن , هل تفتكر الثمن ان تبصم الناس بالعشرة لنتائج الحوار الذى يريده المؤتمر الوطنى ؟المؤتمر الوطنى يريد ان يحيل اى نقطة تختلف الناس حولها للتصويت معتمدا على أحزاب الفكة التي صنعت على يده وانت عارف انو الأحزاب دى بتفوق ال83 حزب حتى الان وكلها متوالية ومرتزقة ولا قاعدة جماهيرية تذكر لها في ارض الواقع وكل همهم مصالحهم الشخصية في ظل استمرار الإنقاذ في السلطة كما سمعت من تصريحات قادة المؤتمر الوطنى حزب المؤتمر الوطنى يرفض رفضا باتا فكرة الحكومة الانتقالية , وفى اسواء الفروض ممكن يلجأ للتصويت لحسم هذا الموضوع بالأغلبية اعتمادا على أحزاب الفكة المتوالية .. هل تفتكر ان الحوار سيكون ناجحا وسيؤدى الى حل من دون تفكيك حكم الإنقاذ ؟ اذا الهدف من الحوار هو وقف الحرب فقط لماذا أصلا الناس حملت السلاح وماذا يعنى وقف الحرب للشخص الذى حمل السلاح اذا الحوار لم يلبى مطالبه الذى من اجلها حمل السلاح ؟
|
خالد..حبابك يا صديقي
كتر خيرك على التعقيب والأسئلة..
نحن محتاجين اعادة تسمية الأشياء.. فمفهوم ان الحرب مفروضة..هو بروباقندا الحركات التي تخوض الحرب..هي وحدها من فرض امر الحرب ومناخ الحرب على البسطاء في مناطق معينة..
اما اهداف الحرب ، بانها من اجل الحرية ، فاهلنا بيقولوا (اخوك كن زينوهو بل راسك)..ونحن ننظر الى تجربة دويلة جنوب السودان وما يحدث فيها الآن.. فالقتال طيلة العشرات من السنين كان تحت اجندة الحرية والمساواة والكرامة ، واهو اول ما الجنوبيين نالوا استقلالهم براك شايف الحاصل..
ايضا نحن لا نقرأ التجارب من حولنا ، فتجربة الحرب في اثيوبيا كانت ناجحة واسقطت نظام الديكتاتور منقستو..والسبب لأن الحرب كانت في كل انحاء اثيوبيا ..و بالرغم من انتشار الحرب في انحاء القطر ومجاعة 1985 الإ ان الثوريين الأثيبويين كانوا اكثر ارادة وتصميم لنيل الحرية ونالوا مطلبهم..والأن بنفس الإرادة يخوضون معارك البناء والنهضة..
في السودان ، كل من يظن بجدوى الحرب كوسيلة للتغيير عليه ان يكون قدر التحدي.. انقلوا الحرب لكل اجزاء السودان وقاتلوا حتى تنالوا مبتغاكم.. اما ان تدور الحرب في اجزاء معينة ويدفع انسانها تكاليف الحرب فهذا امر نرفضه وسوف نقاومه..!
حكاية أن المؤتمر الوطني يتكتل مع احزاب لا وزن لها ، نعم امر موجود ، فلماذا لا تتبع المعارضة (مدنية ومسلحة) نفس التكتيك وتتكتل حول هدف واحد وواضح..؟..وان كانت المعارضة تظن أن لها الثقل السياسي الكبير فلماذا لا توظف هذا الثقل كأداة للتغيير؟..لماذا لا تتكتل المعارضة حول وسيلة الحرب وتنقلها لكل اقاليم السودان وتقتلع النظام وتقيم النظام الذي ترغب؟.. أو لماذا لا تتكتل المعارضة حول خيار العصيان المدني وتنفذه في كل انحاء البلد وتنال مبتغاها في اقتلاع النظام؟..
الحكومة الإنتقالية..خليك من المؤتمر الوطني الحاكم..انا كمواطن ارفضها واعتبرها مدخل للفوضى..لأن القوى السياسية التي تطالب بهذا المطلب لا اثق في انها ستقود السودان الى الإستقرار.. الإنتخابات على علاتها كانت بموجب اتفاقية نيفاشا وانسحبت القوى السياسية وتركت المسرح للحركة الشعبية والمؤتمر الوطني..فلماذا تطالب نفس القوى بفرصة اخرى؟..والى متى نظل ندور في نفس الحلقة بتاعة ادونا فرصة تاني؟..
ايضا أنا ضد فكرة المؤتمر التحضيري خارج السودان ، لأننا ببساطة صرنا مضحكة قدام العالم..نثق في الأخر ولا نثق في انفسنا..وعموما هو امر لا جدوى منه..وتكفي تجربة نيفاشا التي تمت تحت رعاية دولية لتنتهي بتقسيم البلد..واذا الناس دايرة تقسم البلد .. فمافي مشكلة ، فلتكن شجاعة وتعلن هذا المطلب وتعمل بارادة لتحقيقه..
ودمت..
كبر
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Kabar)
|
الحليله..حبابك يا صديقي
كتر خيرك على الثقة وربنا يقدرنا نكون قدرها..
الإختلاف امر مشروع يا صديقي ، وزمان في المنبر كنا نتحدث عن مشروعية الإختلاف..لكن بعض الجماهير هنا ما عندها القدرة على الإختلاف الفعال الذي يقود الى نتائج كبيرة وواثقة..ولكن هذا البعض اكثر جنوحا للتسفيه والإحتقار..
ومرحب بعودتك..
كبر
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Kabar)
|
سلام للجميع هنا واخص الحيدرين واخونا كبر
لا احد يشكك في حسن نوايا اخوانا حيدر قاسم وكبر
فالاختلاف هنا لا ينطوي على تخوين ابداً ولكن الشيئ المؤلم حقاً هو ناتج هذا الحوار
وهو شرعنة استمرارها وذلك بدليل كلام البشير نفسه وتهديده بمواصلة الحرب لمن ابى
طاولة الحوار وفق شروطه هو التي نسجها على مقاس حزبه حتى يبرر بها افعاله طيلة
سنوات حكمه العجاف .
ورفضه لكل الشروط المستحقة للحركات المسلحة والحركة الشعبية وهي اطراف الحرب المهمة حتى تضمن ان هناك حوار
جاد يحلحل أزمات البلاد
أبو حسين سلامات وعوافي عليك .. كتبت
| Quote: بس المحيرني الرافضين للحوار كيف حا يصلوا لمبتغاهم بدون حوار |
لا اظن ان من بيننا احد يرفض مبدأ الحوار الجاد كوسيلة رفضاً نهائياً وان وجدوا سيكونون قلة لا تذكر
ليس هناك عاقل يفضل الموت والدمار على الحلول السلمية
انا من اكثر المؤيدين للحوار والحلول السلمية بغض النظر عن كيفيتها ولكني ضد الحوار المفبرك ومطبوخ
ومفصل على تجميل وجه هذه العصابة ومحاولة الحكومة تبرير جرائمها وإظهار وقوف كل قطاعات الشعب في صفها ضد
ما تسميهم (الحكومة) بالمتمردين ، كانما الحركات المسلحة والحركة الشعبية وجميع جبها القتال قد تمردت على شرعية
ونسو انفسهم كيف جاءوا.
عموماً نحن مع الحوار الجاد غير المشروط والذي يفضي الى تفكيك الحزب الحاكم لفشله في إدارة البلاد 26 عاماً
وادخل البلاد في نفق لا ضوء في اخره . لذلك وجب اقتلاع هذا النظام نهائياً ورد المظالم حتى يعم سلاماً وامناً حقيقياً
ونتمنى ان يكون زوال هذه الحكومة بصورة سلسة وسلمية تجنب البلاد شر الانفلاتات الأمنية .
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Haytham Ghaly)
|
كتب هيثم غالي:
Quote:
انا من اكثر المؤيدين للحوار والحلول السلمية بغض النظر عن كيفيتها ولكني ضد الحوار المفبرك ومطبوخ
ومفصل على تجميل وجه هذه العصابة ومحاولة الحكومة تبرير جرائمها وإظهار وقوف كل قطاعات الشعب في صفها ضد
ما تسميهم (الحكومة) بالمتمردين ، كانما الحركات المسلحة والحركة الشعبية وجميع جبها القتال قد تمردت على شرعية
ونسو انفسهم كيف جاءوا.
|
هيثم..حبابك يا صديقي..
حكاية الشرعية ، تجاوزها الزمن حينما تمت اتفاقية نيفاشا 2005..يعني الحركة الشعبية واحزاب التجمع هي التي تركت فكرة شرعية النظام..و جلست معه..ومنحته شرعية جديدة..وليس من حقها ، اخلاقيا ، ان تبتز الناس بهذا الأمر..
الحاجة التانية.. اتفاقية نيفاشا قبلت بها الحركة الشعبية ونالت عبرها مكاسب اكبرها استقلال الجنوب..وبالتالي لا تستطيع الحركة الشعبية الحديث عن شرعية النظام..
الحركة الشعبية شمال.. مالك عقار كان حاكم النيل الأزرق عبر انتخابات قبلها وخاضها وفاز فيها..ومجلس الولاية كانت فيهو عضوية منتخبة من الحركة الشعبية شمال..ودي شرعية دستورية هم قبلوا بها.. الخروج عليها تمرد وخيانة وطنية..
الحركة الشعبية شمال ، في جنوب كردفان ، كانت عندها وظائف تنفيذية وفي الإنتخابات نالت 18 معقد في مجلس الولاية التشريعي..وخاضت الإنتخابات ولم تقاطعها..ثم تمردت على الوضع الدستوري وداست على المكاسب التي حققتها بطرق مشروعة وسلمية ..وبالتالي ارتكب اهلها خيانة وطنية..
مني اركو مناوي رئيس حركة تحرير السودان ، كان مساعد رئيس حكومة السودان ، وفشل في تطوير حركته كحزب سياسي ويخوض الإنتخابات لأنه لم يملك السند الجماهيري..وحينما لم يجد حظه بعد الإنتخابات العامة في 2010..خرج وتمرد وارتكب الخيانة الوطنية..!
أي فصيل جلس مع النظام وتقاسم معه السلطة وخرج عليه فهو متمرد ومرتكب لجريمة الخيانة الوطنية..
وأي فصيل جلس مع هذا النظام فلقد اعترف بشرعية النظام ، وبالتالي لا يملك مبرر اخلاقي وسياسي ليتحدث عن الشرعية..!
الحركات المسلحة لم تقم بأي استفتاء جماهيري لقواعدها وتستشيرهم في امر الحرب ، ولم تستشير بقية اهل السودان في امر الحرب..بالتالي لا تملك شرعية وتبرير لحربها اللهم الإ كن البلطجة والسلاح..!
ودمت..
كبر
__________________
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Kabar)
|
Quote:
هيثم..حبابك يا صديقي..
حكاية الشرعية ، تجاوزها الزمن حينما تمت اتفاقية نيفاشا 2005..يعني الحركة الشعبية واحزاب التجمع هي التي تركت فكرة شرعية النظام..و جلست معه..ومنحته شرعية جديدة..وليس من حقها ، اخلاقيا ، ان تبتز الناس بهذا الأمر..
الحاجة التانية.. اتفاقية نيفاشا قبلت بها الحركة الشعبية ونالت عبرها مكاسب اكبرها استقلال الجنوب..وبالتالي لا تستطيع الحركة الشعبية الحديث عن شرعية النظام..
الحركة الشعبية شمال.. مالك عقار كان حاكم النيل الأزرق عبر انتخابات قبلها وخاضها وفاز فيها..ومجلس الولاية كانت فيهو عضوية منتخبة من الحركة الشعبية شمال..ودي شرعية دستورية هم قبلوا بها.. الخروج عليها تمرد وخيانة وطنية..
الحركة الشعبية شمال ، في جنوب كردفان ، كانت عندها وظائف تنفيذية وفي الإنتخابات نالت 18 معقد في مجلس الولاية التشريعي..وخاضت الإنتخابات ولم تقاطعها..ثم تمردت على الوضع الدستوري وداست على المكاسب التي حققتها بطرق مشروعة وسلمية ..وبالتالي ارتكب اهلها خيانة وطنية..
مني اركو مناوي رئيس حركة تحرير السودان ، كان مساعد رئيس حكومة السودان ، وفشل في تطوير حركته كحزب سياسي ويخوض الإنتخابات لأنه لم يملك السند الجماهيري..وحينما لم يجد حظه بعد الإنتخابات العامة في 2010..خرج وتمرد وارتكب الخيانة الوطنية..!
أي فصيل جلس مع النظام وتقاسم معه السلطة وخرج عليه فهو متمرد ومرتكب لجريمة الخيانة الوطنية..
وأي فصيل جلس مع هذا النظام فلقد اعترف بشرعية النظام ، وبالتالي لا يملك مبرر اخلاقي وسياسي ليتحدث عن الشرعية..!
الحركات المسلحة لم تقم بأي استفتاء جماهيري لقواعدها وتستشيرهم في امر الحرب ، ولم تستشير بقية اهل السودان في امر الحرب..بالتالي لا تملك شرعية وتبرير لحربها اللهم الإ كن البلطجة والسلاح..! |
وحبابك الاف اخونا كبر
نعم يا كبر كل ما ذكرته صحيح ومنطقي جداً
ولكن كل ما ذكر أعلاه ايضاً لا يثبت ان الحوار الدائر الان يمكن ان يحل مشاكل السودان
أي انه لا تتوفر فيه الجدية من جانب الحكومة ولا تتوفر في الثقة من جانب المعارضة بشقيها مسلحة وغير مسلحة.
ولا اظن اختلاف اثنان على ذلك
ان كنت ترى غير ذلك وترى ما لا نرى في ان هذا الحوار جاد فعلاً وسينتهي بحلحلة مشاكل السودان
فارجو افادتنا هنا برؤيتك واسبابك التي دعتك ان تضع ثقتك في ان هذا الحوار سيحل المشكل القائم
انا أتمنى ذلك من كل قلبي ولكني اظن فيما اظن انه اذا لم يجلس كل اطراف النزاع للحوار فأن المشكلة قائمة ولا امل لحلها
تحياتي واحتراماتي
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: طلعت الطيب)
|
Quote: ولكن الشيئ المؤلم حقاً هو ناتج هذا الحوار
وهو شرعنة استمرارها وذلك بدليل كلام البشير نفسه وتهديده بمواصلة الحرب لمن ابى
طاولة الحوار وفق شروطه هو التي نسجها على مقاس حزبه حتى يبرر بها افعاله طيلة
سنوات حكمه العجاف . |
تسلم ... أخي هيثم غالي,
طالما أن الحوار يضفي شرعية على الإنقاذ, فأرجع لي ورا قليلا أو كثيرا.
لتعلم أن وفد المنافي جاء متأخر جدا . طيب أقول ليك حاجة, هي الإنقاذ
طوال عمرها الأول { ما قبل نيفاشا} لم تتوسل أو تتحدث عن أي شرعية.
فشرعيتهم متخذة من قناعاتهم وسلاحهم ومستلاتهم الدينية. فأول من أضفى
عليهم شرعية هم الحركة الشعبية والتجمع سابقا {قوى الإجماع حاضرا}
وأقول ليك أكتر ... أن ثمة وجهة نظر معتبرة داخل أروقة المؤتمر الوطني
ترى ألا يتمخض الحوار الراهن عن حكومة إنتقالية, لكون أن وضعهم الراهن
شرعي ويستندون في الأساس على دستور 2005 . فأعد النظر لترى من قلد
نظام الإنقاذ شرعية ... أضحت في قيدهم مستحق رسمي ... وأبقى طيب
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: HAYDER GASIM)
|
الف سلامة يا حيدر الزين
اجر وعافية ان شاءالله
تحياتي لاستاذنا العزيز حيدر قاسم الذي كتب:
Quote: تسلم ... أخي هيثم غالي,
طالما أن الحوار يضفي شرعية على الإنقاذ, فأرجع لي ورا قليلا أو كثيرا.
لتعلم أن وفد المنافي جاء متأخر جدا . طيب أقول ليك حاجة, هي الإنقاذ
طوال عمرها الأول { ما قبل نيفاشا} لم تتوسل أو تتحدث عن أي شرعية.
فشرعيتهم متخذة من قناعاتهم وسلاحهم ومستلاتهم الدينية. فأول من أضفى
عليهم شرعية هم الحركة الشعبية والتجمع سابقا {قوى الإجماع حاضرا}
وأقول ليك أكتر ... أن ثمة وجهة نظر معتبرة داخل أروقة المؤتمر الوطني
ترى ألا يتمخض الحوار الراهن عن حكومة إنتقالية, لكون أن وضعهم الراهن
شرعي ويستندون في الأساس على دستور 2005 . فأعد النظر لترى من قلد
نظام الإنقاذ شرعية ... أضحت في قيدهم مستحق رسمي ... وأبقى طيب |
أي نعم اخي لا احد ينكر ان اتفاقية نيفاشا هي التي اضفت صفة الشرعية لحكومة الإنقاذ
ولكن لا اظن ان هناك مقارنة بين نيفاشا والحوار الذي يدور الان ، فكلنا يعلم ان اتفاقية نيفاشا
قد نجحت في إيقاف أطول حرب أهلية شهدتها القارة الافريقية تقريباً فما الذي سيفضي اليه هذا الحوار.؟
إن كان هذا الحوار سيؤدي الى وقف الحروب التي تدور رحاها الان في معظم انحاء البلاد وكان مقابل هذا ان تتمتع حكومة الإنقاذ
بالشرعية فاني سأكون اول من يخرج مؤيداً لهذا الحوار ليس ثقةً او حباً في الإنقاذ وانما حقناً لهذه الدماء الغالية التي تسيل كل يوم دون ذنب
ورأفة بالنازحين والفارين الى الكهوف من غارات الانتنوف وغيرها.
اخي حيدر انت وانا والجميع هنا يعلم تمام العلم ان هذا الحوار لا يعدو ان يكون فرقعة إعلامية ومماطلة من الحزب الحاكم لكسب مزيداً من الوقت
وهذا بالتأكيد يعني مزيداً من الحرب ومزيداً من القتل والتشريد ونهب ثروات البلاد .
ودمت اخي بالف خير
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Haytham Ghaly)
|
السيد حيدر
والله الاتنين ماساهلين الله يديهم العافية
بس بشفق على الاستاذ كبر من خندقته والدفاع المستميت حينما يتعلق الأمر بالاخت تراجي. ومواقفها الاخيرة..
لدي إحساس ان موقفه هذا سيكون خصما عليه فهي مندفعة فيما يخص الشأن العام ولاتلقي بالا لماتقول وتكتب وهو يكتب بتريث ويبث افكارا متسقة تجذب القراء العاديين امثالنا.
دمتم
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Yousuf Taha)
|
حقيقةً موقف كبر نفسو انا مستغرب فيهو لانو حسب ما اذكر انو كان فاتح بوست وتحدث عن دعوة تراجي للحوار
وحتى قال انها ما استوفت شروط الحوار الا بعد ان زوجوها للاخ عليان الذي قال انه انسلخ من حركة العدل والمساواة
في معركة قوز دنقو .. العهدة على الذاكرة الخربة يا كبر ان خانتني الذاكرة فذكرني ما حدث في ذلك البوست وان كنت على خطأ فارجو المعذرة
فان كنت على حق فدى معناه انك غيرت موقفك من مشاركة تراجي بصورة كلية فلماذا هذا التحول ما الذي جد
المداخلة بنيت على ما استطعت ان اتذكره من مناقشات بعد علمنا بدعوة تراجي للحوار وما عرفت اسم البوست وما لقيتو زاتو
ولك ودي واحترامي الذي تعلم
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Gaafar Ismail)
|
يوسف..حبابك يا صديقي
و كتر خيرك على حسن الظن..
اغرب حاجة يا يوسف.. ما متذكر نهائي اني دافعت عن تراجي في مشيتها للحوار الوطني..وكل دفاعي كان عن المجموعة كلها وعن فكرة الحوار وقضية وقف الحرب..وهي شغلانة معقدة للغاية (قصدي حكاية الدفاع دي)..لأن بعض الأصدقاء والصديقات في الوفد بتاع مجموعة المنافي كان على اتصال بي قبل ذهابهم الى الخرطوم..وكان حديثهم عن الحوار بانهم ماشين يقولوا للناس في الحوار كل الداير في روؤسهم..
ودي ليك انت وبس يا يوسف ، لم اعلنها من قبل..بعض الجهات كانت ترغب في ضم اسمي لقائمة معازيمهم..او بالعدم اكتب ليهم ورقة..و اعتذرت عن الحاجتين..لأسباب لا اود ذكرها الآن..!
اصدقائنا في وفد المنافي ، خصوصا الناس الكانت بتتكلم معاي..كانت حاسة برد الفعل..و بعضهم ما عندو عضوية هنا..فقمنا بالواجب في الدفاع عن حقهم (كمجموعة) في الذهاب للحوار..و تقديم رؤيتهم (و بيني بينك ، هسع الجماعة واحدين ح يجوا يقولوا كبر فاكيها في روحو ، لكن حتى العبارات والمفاهيم الظهرت ياهو كلامنا القاعدين نقول فيهو هنا)..
ولو الناس متذكرة ، اني قلت بالحرف (تراجي هي اضعف الحلقة في المجموعة المشت باسم وفد المنافي)..!
نعم تراجي مرات بتنداح شديد..خصوصا لمن تلقى ليها مايكرفون..!
نعم ممكن ندافع عن المجموعة كلها مع بعض وعن فكرة الحوار وعلاقتها بوقف الحرب..لكن دفاع مستميت عن تراجي براها مافي طريقة ليهو في السقط ده..!
كتر خيرك يا يوسف..
ودمت..
كبر
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Kabar)
|
هيثم..حبابك ياصديقي
كتر خيرك..وبالمناسبة في حاجات كتيرة واقعة ليك كويس..وحدسك سليم..
وكنت بسميها (المُــلة تراجي)..
بالنسبة للبوست المعني كان بعنوان (بنية الوعي التناسلي والعنصرية:سكوت دينق اخوان عن ترشيح تراجي مصطفى)..
وفي المداخلة الثانية قلت:
(تراجي مشهورة بانها شخصية مثيرة للجدل..ولسع عندها القدرة على اثارة الجدل..لكن يتخيل لي دي اخر مرة)..
الكلام ده انا كتبتو ونشرتو في المنبر ده في ست اكتوبر..وبراك شايف تطور الحاجات فيما بعد..!
لكن اطرف الحاجات والمفارقات المدهشة المافي زول انتبه ليها.. انو ناس دينق اخوان نهائي ما شاركوا في الكعة حول تراجي..!!!
وعشان تشوف شغلهم بتاع الظهير القشاش.. كل القدروا عليه حتة ترصد لمحمد النور كبر وفتحوا بوست كالعادة باسم محمد النور كبر.. ا
هو قدامك كل الخيوط المفتوحة عن مجموعة المنافي.. ناس دينق اخوان عاملين غمرانين..لا حس ولا خبر..حكاية مدهشة لحد الريبة ، مش؟..
ولمن يطروا اسم تراجي بيقولوا (الأخت تراجي)..!
ودمت..
كبر
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Kabar)
|
استاذنا جعفر..حبابك يا صديقي
التحية لأرواح هؤلاء الشهداء..
كتر خيرك على المطايبة..
التحول الديموقراطي عملية شاقة وذات تراكم مستمر..واهم شروط نجاحها ، كماذكرت انت ، الإستقرار والسلام ووقف الحروب..مشكلة بعض اصحابنا ، خصوصا ناس الأحزاب الرافضين للحوار الدائر في الخرطوم ، انهم يعملون بمبدأ امسك لي واقطع ليك.. يعني لو حدثت حكومة انتقالية.. فهذا عندهم هو التحول الديموقراطي..و فات عليهم أن الديموقراطية تحتاج تعليم الشعب بقيمها وبتجاربها ، مش تعليم بتاع حصص ومقالات وانما سلوك عملي متراكم على ارض الواقع..!
واحدة من فوائد نقاشنا مع الناس هنا ، بالرغم مما نالنا من اذى مقصود أو غير مقصود ، ان دشنا بادرة ادبيات جديدة..فكل من يخاطبنا يحرص على تأكيد رفض الحرب وضرورة وقفها ، ويحرص على تأكيد أن الحوار امر ضروري للغاية.. ثم تأتي الإختلافات في كيفية هذا الحوار..وطالما اتفقنا على امرين مهمين.. فان بقية التفاصيل (بالرغم من ان الشيطان يكمن في التفاصيل) مقدور عليها..!
ايضا من فوائد نقاشنا هنا ، ان الناس فعلا حست بان السودان فيهو تنوع حقيقي وان الناس احيانا لا تشعر بمآسي بعضها البعض في الوطن الواحد ، عشان كده بتلاحظ في انفعال كبير للغاية باحداث الجنينة المؤسفة..غض النظر عن الزاوية التي ينظر بها كل فرد لتلك الأحداث..وهذا في تقديري تطور ايجابي..يعني الحوار الموازي قاعد يجيب حقو شوية شوية..!!
وشوية شوية ح نتعلم من بعض ان لا احد يستطيع احتكار الوطن والقضايا العامة..ودي لو اشتغلنا فيها كويس ح نقدر نقلل من الحدة التي نخاطب بها بعضنا البعض..
ومعا يا صديقي ، نقاوم استمرار الحروب العبثية في السودان..!
ودمت طيبا..
كبر
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Kabar)
|
| Quote: بعض الجهات كانت ترغب في ضم اسمي لقائمة معازيمهم..او بالعدم اكتب ليهم ورقة..و اعتذرت عن الحاجتين..لأسباب لا اود ذكرها الآن..! |
كبر يا اصحب .
قررررربت اسألك لكن طالما ادخلتها في خصوصياتك، نحجم .
بس عن إذنك داير أقول الكلآم دا، في رأي انت اولى من الجميع بالذهاب، لأنّك ادرى منهم جميعاً بثقافات
المناطق الدائرة فيها الحرب، وليس لأنك من الدايسين علي جمرها فالكل تحرقه جمرة منها في صدره
إلا ذوي الحاجات .
اظن وبعض الظن إثم الأخ حيدر قاسم قُدمت له الدعوى ورفض ايضا، أما بالنسبة لك أخي كبر فشكراً
لأنك قطعت الظن باليقين ...
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: Kabar)
|
حبيبنا حيدر الزين ..
صدقني إفتقدنا كبر في كتاباته التراثية ..
قدم لنا الكثير من الاستنارة عن أهلنا في كردفان الذين نجهل كثيراً عن عمق تراثهم ..
كبر كان يقدم رسالة عميقة وبأسلوب أدبي سلس ..
عرفنا منه الكثير الرموز والعبارات التي كنا نجهلها عن أهلنا الطيبين هناك ..
كنت أشاهد ليالي الدورة المدرسية ( الابيض ) .. وبناتنا وأولادنا يبدعون في تقديم التراث الرقصات والاغاني
كل هذا والاستاذ كبر في خاطري .. وأقول ليته فتح بوست عن هؤلاء الصغار وكبار فناً وإحساساً
قيل ان الاديب معاوية النور قال وهو يعانق العقاد في زيارته للخرطوم (( ليت لي خنجراً أطعن به هذا السياسي القابع في دواخلك ))
ملحوظة : لأن العقاد تعرض إلى موجة من الانتقادات لأنه كان يؤيد الحلفاء ضد الالمان آنذاك .. ولأن الانجليز كانوا مستعمرين الناس أتعاطفو مع الالمان
مودتي حيدر .. وفي إنتظارك حبيبنا كبر ..
| |
|
|
|
|
|
|
|
|
|
Re: احترم جداً حيدر قاسم ومحمد كبر..رجال تتسق � (Re: علي عبدالوهاب عثمان)
|
Quote: لو الناس متذكرة ، اني قلت بالحرف (تراجي هي اضعف الحلقة في المجموعة المشت باسم وفد المنافي)..!
نعم تراجي مرات بتنداح شديد..خصوصا لمن تلقى ليها مايكرفون..! |
صدقت فقد اثبتت إنها شخصية تحب الظهور والزخم الإعلآمي، يعني باختصار شخصية
ضعيفة ليست جديرة بتبني قضايا شعب . هكذا ظهرت تراجي في الخرطوم .
Quote: في المداخلة الثانية قلت:
(تراجي مشهورة بانها شخصية مثيرة للجدل..ولسع عندها القدرة على اثارة الجدل..لكن يتخيل لي دي اخر مرة)..
الكلام ده انا كتبتو ونشرتو في المنبر ده في ست اكتوبر..وبراك شايف تطور الحاجات فيما بعد..! |
برضو صدقت في دي . انا إستغرب كيف ما إعترضتوا علي ذهابها ؟.
الحكومة بالمناسبة تحب مثل هذه الشخصيات وتستعملها كحزام ناسف .
| Quote: (تراجي مشهورة بانها شخصية مثيرة للجدل..ولسع عندها القدرة على اثارة الجدل..لكن يتخيل لي دي اخر مرة).. |
بالطبع آخر مرّة، بس الحزام لآمن ينفجر بينسف الجميع .
قول، وآحد كرت إتحرق ؤُ في وآحد اصلو محروق من يومو وزمانو ...
| |
|
|
|
|
|
|
| |
HAIDER ALZAIN
Kabar
ABUHUSSEIN
جلالدونا
HAYDER GASIM
طلحة عبدالله
معاوية المدير
حسن مهدي
احمد الشيخ
elhilayla
طلعت الطيب
Gaafar Ismail
علي عبدالوهاب عثمان
وائل حمزه الزبير
فيس بوك
تويتر
انستقرام
يوتيوب
بنتيريست