كتر خيرك على جلب اخونا محمد البدري و ودوله وبقية فناني النوبة..وبت ابا حنان بلو بلو (ام حسا حلو على قول قريبنا البقاري) ، والبقارة يقولون عن الصوت ..حس..!!
ونأسف عن الإنقطاع هنا..
اها لمن ترجع اشغال البدري أو فناني شباب النوبة ، لأصولها ، بتلاقي الأشغال دي اصلا بتقوم على الربابة ، والربابة بتخلق ريتمها الخاص..دي واحدة..
التانية.. ايقاع السيرة ، الربة ، العرضة..وهو الشايع في النماذج التي جلبتها انت هنا ، برضك شايع في كردفان في مناطق الجوامعة ، وشايع في جبال النوبة..وبيتحول الى ايقاع الكرنق (طبعا انا عندي مزعم ومطلب بان تكون الكرنق هي رقصة امسودان الأولي..!!)..!
اديك نموذجين..
الأولاني من فنان جبال النوبة..جساس كيلبو ميري..وقاعد يشتغل بالربابة..طبعا الناس في البداية ما ح تقدر تربط بين ايقاعات جساس وايقاعات البدري وشباب النوبة في الشمال ، لكن لو قمت زدت سرعة ايقاع الربة/العرضة /البجا..الخ..ح تلاقيهو ياهو نفس الريتم الشغال بيهو جساس وبقية فناني جبال النوبة..
النموذج الثاني..اسمو (نقارة كحليات)..وكحليات منطقة في مدخل كادقلي الشمالي وانت جاي من الدلنج مثلا,..وسكانها كما اعتقد من اهلنا الشوابنة أو اهلنا كادقلي (معليش الزمن طال وانا بكتب بذكريات 1985 لمن كنت طالب في كادقلي الثانوية..)..
المهم..
نقارة كحليات ، في النموذج المعروض.. لمن تسمعها في البداية ..الريتم فيها هو ياهو نفس الريتم بتاع السيرة في غنية (عيني النوبة) أو الريتم البيشتغلوا عليهو ناس محمد البدري و فناني النوبا في الشمال ، وبعض المجموعات في وسط امسودان..!
ميزة نقارة (كحليات) انها بتجمع كل الإيقاعات السودانية.. وهي النقارة الوحيدة التي يعزفها رجل جالس على بنبر ..اضافة الى ان التنويع بتاع الإيقاعات فيها بيقوم على صوت النساء الكورالي والنقارة بتابع الصوت ده..وفي الرقص بتلاحظ فكرة العرضة بتاعة الجعلين والبطاحين والبجا ..الخ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست