ما علاقة الفكر( الجمهوري) بالطريقة الختمية تحديدا!

Quote: موقفنا من الأحزاب انت سألت منو .. موقفنا من الأحزاب فى الحقيقة من الأول كان موقف المعارضة .. أنه أحزابنا أحزاب انضوت تحت الطائفية .. هى مرعية من زعماء الطائفة .. الزعيم السياسى حريص على إرضاء زعيم الطائفة ، ونحن بنعتقد آفة البلد دا كله من الطائفية .. الحركة الوطنية إذن ولا مواجهة في حماس ولا دراسة لمواضيع ومذهبيات وبرامج .. فنحن ضد الأحزاب من بداية نشأتها ، ودايما بنتكلم عن دا وبنقول أنه "قد يجلو الإستعمار بكرة ثم لا نجد أنفسنا أحرارا ولا مستقلين وإنما متخبطين فى فوضى لا قرار لها ، لأننا أحزاب بدون فلسفات وبدون مناهج وبدون برامج" .. فالجملة دى كانت تقريبا بتمثل موقفنا من الأحزاب .. بطبيعة الحال نحن بنتكلم الكلام دا وفي نفس الوقت بنعرف أنه الناس في المرحلة دي ياها دي فرصهم .. فرصهم أنهم يمشوا مع زعماء الطائفية ليواجهوا بسند الطائفية الشعبي الإستعمار ، لأنه الإستعمار كان بقول انتو ما بتتكلموا بإسم السودانيين ، يتكلموا زعماء الطائفة ، يتكلموا زعماء العشائر ، زعماء العشائر الى حد كبير منضوين تحت الطائفية برضو .. اذا كان مشيت لجانب مثلا ناس سنار كانوا ختمية ، جهة الغرب منعم منصور وغيره من الجماعة ديل ماشين مع الأنصار .. فبتلقى زعماء العشائر ماشين مع الطائفية .. ففكروا الأفندية في الوقت داك اللي هم الخريجين أنه يواجهوا الإنجليز بوحدة مع زعماء الطائفة وزعماء العشائر لتنقطع حجتهم .. نحن عارفين أنه المرحلة دي كانت ضرورية لكن بننعيها عليهم ليكون في حركة شوية في الدراسة وفي الرفض وفي التبويب وفي التوجه لتوعية الشعب .. مع معرفتنا لضرورة المرحلة في أنهم يكونوا طائفيين لكن برضو ما كنا بنعطف على مسألة الطائفية لأن لابد من كفاح الطائفية نفسها .. ودا كان موقفنا في الموضوع دا معاهم .. معارضة لكن تحت تحت نحن بنعرف إنهم بمثلوا دور ما يقدر بمثله أحسن منهم في الوقت داك ..