إلسا قارورة عطر

(عدل بواسطة درديري كباشي on 11-20-2015, 03:41 PM)

53

وصلت بيتنا أول خطوة خرجت شريط الكاسيت من السيارة ووضعته في جيبي

ودخلت . كنت حريص ألا أنساه في السيارة .. الوالد وأخواتي ربما عندهم مشوار وأكيد سيشغلوا مسجل السيارة .

وجدت أفراد الأسرة متجمعين في حديقتنا بحوش الصالون مشغلين النافورة وجهاز الكاسيت الكبير .. جلسة عائلية جميلة على حديقتنا الغناء .. تلك الحديقة التي أصبحت حجر الزاوية في قصر سعادتي .. يحفها فرح الأطفال والضحكات البريئة وسعادة والدي بأحفادهما .

تعال يا مصطفى فاقدنك من قبيل . هو أنت ما مشتاق لينا .. نحن ما صدقنا جيت تقوم تطلع طوالي .

قلت متمتما .آسف والله كان عندي مشوار مهم ..

أمي : مشوار شنو كمان يا ولدي أهم من أخواتك .. يهاتن بيك من جن من السفر .هن واولادهن .

قلت : يا أمي أنت ناسية أنه أنا خريج السنة دي .. ما عندي مشروع بحث التخرج لازم أخلصه في الأجازة عشان ما يأخرني .

رد شيطاني مفحم لا أدري من أين طرأ لي ليخرجني من هذا الحرج .

قالت : الله يخرجك ويفرحنا بيك يا حبيب قلبي .

قال أختي الأكبر :متين تتخرج يا مصطفى عشان تجينا هناك في السعودية .. الفاتح قال وظيفتك مضمونة بس أنت تصله هناك .

قلت في نفسي ..أها دي مصيبة جديدة كمان .. عاوزة تفتح لينا باب غربة ثانية .لكن أمي حسمتها .

قالت : يا بتي سعودية شنو .. نحن عايزنه يتخرج ويجي يمسك شغل أبوه ويساعدنا ويريحنا نحن في عمرنا دا .

قالت أختي ومعروف أنها عنيدة تدافع عن أفكارها بصورة متسميتة و( عبيطة )

يا أمي الحمد لله أنت وابوي لسع شباب وما محتاجين زول يساعدكم .. خلوه يطلع يشوف الدنيا يكتسب خبرة ويرجع ليكم نجيض ومركز كمان .

رغم غيظي من فكرتها لكن عجبتني حكاية يطلع يشوف الدنيا ويرجع ليكم مركز .. حسيت أنها تصب في صالح مشروعي .

أطلع أشوف الدنيا وأرجع نجيض ومركز لكن ليس في السعودية .. خليها أروبا يا بنت الحلال . خليها هناك حيث ( طار قلبي مني).. هناك في السويد .

قالت أمي : مصطفى أنت ما ترد مالك ساكت لا قلت كلام أختك دا عجبك ولا ما عجبك .

قلت : يا أمي أنا همي الأول أني أتخرج وأحرز نتيجة جيدة عشان أنا لسع مشواري طويل .

- أجي يا ولدي مشوار شنو كمان الراجيك بعد تتخرج ؟ . أوعى تقول لي عاوز تعرس طوالي .

- لا يا أمي عرس بتاع شنو أنا مفكر اواصل في الدراسة الحمد لله على رأي أم مازن أنه أنتو لسع شباب ما محتاجين لي حاليا ..أنا مفكر أعمل ماجستير ودكتوراه .(قلت في نفسي أهو جاتني الفرصة طائرة لوحدها حتى أطرح مشروعي وأهيئهم من بدري )

أبوي تدخل لأول مرة وقال : ممتاز فكرة رائعة وأنا بأيدك بشدة .

أمي : هوي تؤيده شنو كمان أنت . أنا ما صدقت بدل كل سنة شايلة همه نام كيف وأكل شنو وحا يجي متين ما صدقت قرب يتخرج تاني تجو تسووها لي قراية وسفر .

قلت لو تعرف أمي وهو أي سفر الذي ينتظرها ..

أختي الله يعطيها العافية ساندتني بشدة وقالت فكرة جميلة أحسن شئ طالما ما أهلك ما محتاجين ليك وقادرين يصرفوا عليك أنك تواصل دراستك وأنشاء الله تتعلى ما تدلى يا أخوي يا حبيبي .

قلت : الله خليك يا أم مازن ويخلي لك أولادك وأبوهم .. أنشاء الله يمكن بعد ما أعمل الدكتوراه يمكن أجيكم هناك في السعودية ..

وقلت ساعتها لن تعد فارقة لأن إلسا وصغاري منها سيكونوا معي .

أمي لم يعجبها هذا الحوار من أساسه لمت أغراض الشاي وغادرت لم تستطع أن تخفي غضبها ..

لكن أحسن شئ فتح الموضوع من الآن ربما بعد أربعة خمسة أشهر تكون قد تهيأت لمفارقتي من جديد .. ربما فرح القبول والنجاح سيخفف عليها الصدمة قليلا .

أتمنى ذلك .

يتبع

54

أنفضت أمي من الجلسة غاضبة بعد أن جمعت أواني الشاي .. وبقيت مع والدي وأختي الكبريات نناقش في مشروع المستقبل .. حمدت الله أن الشقية سوسن مشغولة باللعب مع الأطفال .. و ربما تدخلت والتقطت الفكرة بذكائها عن التغيير المفاجئ في خطة مستقبلي .. هي كانت تعلم أني كنت مخطط بعد أن أتخرج أعمل مع الوالد وأطور العمل ليصبح شركة ويمكن يتطور لاستيراد وتصدير بأسس علمية وعملية .. تعامل مع البنوك وفتح أعتمادات وغيره .. وطرق رجال الأعمال الحديثة المعروفة .. لو كانت حاضرة للحوار لأعادتنا للمربع الأول والسؤال عن سبب تغيير خطتي المستقبلية .. وربما خمنت أن رغبتي في الدراسات العليا أن تكون في الدول الأروبية . هي الوحيدة التي عاشت معي قصة السا وساهمت في تأجيجها سلبا وإيجابا ..صحيح أنه نسيت أو تناست عمدا قصة إلسا لكن بها ذكاء كافي ليستنتج .

- أها يا ولدي وناوي تعمل الدراسات العليا في جامعتك ذاتها ولا جامعة تانية .

أها بدأت أسئلة الورطة من الآن .. لكني الحمد لله فجأة أصبحت حاضر البديهة بدون تردد كنت أرد وبثقة . وقلت :

حقيقة يا أبوي أنا بقدم سوى في جامعتنا أو جامعة ثانية .حتى الجامعات خارج السودان ممكن أقدم لها ( بداية للتمهيد )

أم مازن قالت : ما شاء الله يا أخوي أريت لو قبلوك في جامعة أروبية ..أولا شهاداتهم مقيمة أكثر في الخليج وممكن تشتغل في شركات كبيرة وبراتب ما شاء الله يغنيك لجنى الجنى ..

قلت : برضو بحاول .. ماله .. فكرة ما بطالة .

أبوي قال . تحاول ؟ وضحك بعدها ..

قلت في نفسي أبوي عاد لحركات زمان .. الظاهر عليه عارف حاجة ما قالها تكون أببا كلمته ؟

أختي أم مازن قالت في شنو في حاجة انا ما عارفاها ؟ ليه ضحكت يا أبوي ؟

قال مكملا : لا بس قال بحاول .. مفروض هو يبدأ اولا يقدم للجامعات الأروبية لو ما لقى طريقة بعدها يحاول في الجامعات الداخلية ..لأن الجامعات الأروبية هي أساس العلم الحديث .

قلت بدون ما أشعر : ينصر دينك يا أبوي .. فعلا هناك راح نأخذ العلم من مصادره . حقيقة رده ريحني رغم أن ظني مشى بعيدا ولم يعد ..

قالت أم مازن . هي أنشغلت ونسيت أديك الحاجات الجبتها ليك من السعودية .. مضت الى الداخل ..

أبوي أستأذن ودخل الى غرفته .. ظليت أنا في الحوش .. تذكرت الشريط والعطر دخلت الى الغرفة ,احضرت جهاز الكاسيت الصغير ( هيد فون ) وشبكت السماعات في أذني ..وأعدت سماع الشريط من جديد .. ولم أنسى أن أبخ من عطرها على كفي . وأستلقيت على السرير أستمع وأشم في العطر ..

عاد شيطان الشقية سوسن .. بدأت تتلفت وتشم وقالت : في ريحة سمحة جاية من وين ..؟ دا أنت يا مصطفى متريح بالريحة دي .

من وين ظهرت لينا العفريتة دي ؟

قلت لها أيوا في حاجة ؟

قالت : بس الريحة دي بتذكرني واحدة صاحبتي ولا من ما متذكره ؟

بعد ثوان أكملت- ايوا أتذكرت اتذكرت .تتذكر إلسا البنت الحبشية الكانت شغالة معانا في أجازتك الفاتت؟ كان عندها ريحة زي دي قالت أخوها مرسلها لها من أروبا ..أت جبتها من وين يا مصطفى .؟

قلت في نفسي البنت دي الله يكافينا شرها .

لا زالت تصر تنتظر الرد وأنا عقلي أشتغل مثل الحاسب الآلي لأجد لها ردا مقنعا.

قلت لها : دي واحدة زميلتنا أهلها مغتربين هدتها لي .

قالت : ايو كدا يا عم الظاهر عليك بقيت بتاع علاقات ومستويات راقية .

قلت لها :أسكتي ساي هو نحن بنلعب ؟

قالت : طيب قعد تسمع في شنو أدينا نسمع معاك .

قلت في نفسي الشافعة المسلطة دي الظاهر ما راح ترسيها على بر .

قلت : قعد أسمع في زيدان ابراهيم يعني حا أسمع شنو تاني ؟

قالت : طيب ما تشغله في المسجل الكبير خلينا نسمع معاك زيدان في حد بيأباه ..

عملت نفسي تذكرت شئ أو أني أنشغلت قمت مسرعا في دولابي كان هناك شريط لزيدان أحضرته وقفل( الهيدفون )وسلمت لها الشريط الآخر طبعا .

أنقذني منها أن طرق الباب وفتحته وجدته صديقي عصام .

قلت له الحمد لله جيت في الوقت المناسب .

قال ليه في شنو يا شيخ .؟

يا أخوي في أفلام كثيرة حصلت تعال نشيل كراسي ونجلس في الشارع قدام البيت .

وقلت لولد اختي . يا مازن قول لجدتك تعمل لينا شاي معاي عصام .

(عدل بواسطة درديري كباشي on 11-26-2015, 08:52 PM)
(عدل بواسطة درديري كباشي on 11-26-2015, 09:10 PM)

(عدل بواسطة درديري كباشي on 11-28-2015, 02:06 PM)

(عدل بواسطة درديري كباشي on 12-03-2015, 02:26 PM)
(عدل بواسطة درديري كباشي on 12-03-2015, 02:37 PM)