|
|
 نسمات في رئة الوطن ... خواطر من زمن العافية
|
04:11 AM Nov, 03 2015
سودانيز اون لاين
mohamed karib-
مكتبتى فى سودانيزاونلاين
خواطر خريفية
خريف ابو السعن ..صِرفة و جراد ..انه الخريف الذي يشبع فيه ابو السعن ذات نفسه راتعا صِرفة و جراد ..الصرفة بالصاد مكسورة تشبه بصات ديلوكس الخالق الناطق والاخيرة كانت تجمل موقف السوق الصغير في مدنى و الشعبي في الخرطوم ذات زمان كنا طلابا في اميرية مدني جاءت في احدي امسياته صلحة علي متن البص الديلوكس وفي يدها ريكوردكر بهيج الصفرة استدارت احدي زواياه محولة ً الفراغ الناشئ بيضاويا لمقبض انيق في الاطار.. ايه الحاجات الأخ دي ؟؟ تساءل معجبا و مبهورا احمد الزين ..كان ايامها شخصا ملوّناََ بالمستقبل مستشرفا قسماته في كل اولاد و بنات الخالات و الاخوال و ذلك كان زمان التفتح ,دعاش التحولات , بريق الاغاني العذبة و الاماني السندسية ...
الصرفة في خريف ابو السعن تشبه تماما بصات ديلوكس اكسبرس غير انها تسبح علي سندس الخريف محمرة او مخضرة التقاسيم ملتهمة من العشب الاخضر ما يوازي اضعاف وزنها قبل ان تفرد مراوح مجنحة و تطير بين الورود فالصرفة و يا للدهشة ما هي الا يرقة الفراشات هذا طبعا ان لم يلتهمها اذ هي صرفة في مسماها ابو السعن الموصوف كل خريف مدرار بطعامه من صرفة و جراد ....
و اجتمع تحت الشدرة تتساقط من بين الاغصان علي وجوههم المحروقة بشمس الصيف الذي حمل اخيرا عصا الرحيل قطرات المطر ..اجتمع ناس فريق قدام ...الطربوش ,مصطفي ود المكي ,عبد الفضيل ,حسن ود يوسف ود الرحمة ,ود بت سموية و لفيف من عرب الاحامدة يتداولون بشريات خريفهم المتوقفة عليه في ود البر كما في كل عام معيشتهم سنتئذٍ ..
-والله قالوا السيلة عن حاج موسي
-ها زول ها إت ماك نصيح ...سيلة شنو العن حاج موسي و ام كٍتيرة يابسة ؟!
-ها ناس ها شن جاب حاج موسي لي ام كٍتيرة ...الغزالللة
-ترس جابر خبرو شنو؟
-ترس جابر؟ إت بي صحّّك ؟؟ ترس جابر ان ما سال جبل الابايتور بنفدر ...
اقققييييفففوا آ ننااسسس هههوووييي ...ارتفع فوق المجلس صوت الطيب ود دِقيل المعسّم النبرات .....اااللخببببر االللكككيييددد ججبببتوا للييييكككممم انننا دددااا
توقف الجدل و التفت اليه الجميع ..
.اااللخببببر االللكككيييددد ججبببتوا انننا دددااا مننن خخخوورر الكككننددووو لي االعععمممارةة ددداا مملللي مملللي( سيل عارم } وومنن العممماااررةة لللييي حاااججج مموووسسسي دداا عننفف رببووبب( عَنِفْ .. وتعني مطر يجلد الارض جلدا) و ممنن حاااججج مموووسسسي للييعن ( الي حد ) ببلللااددد امممحمممحددد وددد سسسلليممممااان دا حححبببلل تتترررسسس ( حبل ترس يعني الموية و صلت حلق الترس لكن الترس لم ينكسر ) وممننن ببلللااددد امممحمممحددد وددد سسسلليممممااان للليييععن نجججاضضااتتننا ددديييللل دا دُتْ سسسساااي ( الدت يعني المطر الخفيف الي المتوسط ....
كان ذلك خريفا شبع فيه و لا شك ابو السعن
|
|
 
|
|
|
|
mohamed karib
فيس بوك
تويتر
انستقرام
يوتيوب
بنتيريست